Sulat Gikan sa Nagamandong Lawas

AGIG pagsunod sa panig-ingnan ni Jesus, kita kinasingkasing nga mag-ampo sa Diyos: “Pagabalaanon unta ang imong ngalan.” Ang atong dakong tinguha nga magkinabuhi subay niana nga pag-ampo makita diha sa atong pagkinabuhi ingong mga Saksi ni Jehova. Siyempre, labaw pa ang gikinahanglan kanato kay sa pagkahibalo lamang sa ngalan sa Diyos. Kinahanglan nga atong pahimuslan ang tanang kahigayonan aron mahimaya ang maong ngalan. Sa pagkamatuod, dako kaayong kadungganan nga pagatawgon kita nga mga Saksi ni Jehova.—Mat. 6:9; Isa. 43:10.

Agig pagsunod sa Salmo 110:3, ang katawhan ni Jehova malipayong nakigbahin sa buluhaton nga gisugo ni Jehova nga kinahanglang himoon. Nganong ang mga tawo sa tanang pangedaron ug kahimtang nagsakripisyo sa pagsangyaw? Una, tungod sa ilang gugma sa Diyos ug sa ilang debosyon kaniya. Ang Deuteronomio 6:5, 6 nagsugo kanato sa paghigugma kang Jehova sa ‘bug-os natong kasingkasing, kalag, ug kusog.’ Kining kinasingkasing nga gugma nagpalihok kanato sa paggamit sa atong panahon, kusog, ug kahinguhaan sa pagpauswag sa intereses sa Gingharian sa Diyos, ug ang usa sa mga paagi nga atong mahimo kana mao ang pagpakigbahin sa ministeryo kutob sa atong mahimo.

Ang gugma ni Jehova sa katawhan maoy katarongan sa iyang paghatag ug sugo sa pagwali sa maayong balita sa Gingharian sa tibuok yuta. Dili siya buot nga adunay malaglag kondili nagtinguha nga ang tanan maghinulsol sa ilang daotang dalan ug mobalik sa ilang Maglalalang aron sila mabuhi. (2 Ped. 3:9) “Ako malipay,” si Jehova miingon, “dili sa kamatayon sa tawong daotan, apan nga mobiya ang daotan gikan sa iyang dalan ug mabuhi.” (Ezeq. 33:11) Kon makigbahin kita sa ministeryo, kita maoy dayag nga pamatuod nga gihigugma ni Jehova ang atong isigkatawo. Sa walay duhaduha, kini maoy usa sa katarongan  kon nganong kita malipay ug mobatig katagbawan kon kita makigbahin niining hinungdanong buluhaton.

Ang atong lalom nga gugma kang Jehova madayag usab sa atong panglantaw sa iyang dinasig nga Pulong, ang Balaang Kasulatan. Kon walay Bibliya, wala unta kita makabaton ug kahibalo bahin sa Diyos ug dili unta kita makapakigsuod kaniya, ingon sa gidapit sa Santiago 4:8 nga maoy atong buhaton. Ug wala usab unta kita mahibalo kon nganong ania kita dinhi ug kon unsay mahitabo sa umaabot. Wala unta kita mahibalo nga ang ginikanan natong tanan, si Adan, maoy nakaingon sa atong mga problema. (Roma 5:12) Wala usab unta kita mahibalo nga tungod sa dakong gugma sa Diyos, iyang gihatag ang iyang bugtong Anak sa paglukat kanato. Sa daghan pang ubang paagi, kita gipaambit ug diyutay ni Jehova sa iyang kahibalo, kaalam, ug pagsabot. Gipabilhan gayod nato ang gasa nga iyang gihatag kanato, ang iyang Pulong nga dinasig sa espiritu! Ang atong apresasyon niining katingalahan nga gasa magpalihok kanato sa ‘pagpalit sa panahon’ sa pagbasa, pagtuon, ug pagpamalandong sa iyang mga pulong. (Efe. 5:15, 16; Sal. 1:1-3) Dili gayod kita angay mobati nga usik ug panahon ang pagbasa sa Pulong sa Diyos adlaw-adlaw. Hinunoa, ang atong gugma sa Diyos angayng motukmod kanato sa paghigugma sa iyang Pulong, nga mopalihok kanato sa pagpauswag sa atong pagsabot bahin kaniya ug pagpalalom sa atong gugma kaniya.

Atong nakat-onan gikan sa Bibliya nga sa dihang nakasala si Adan kang Jehova, iyang gidala  ang iyang umaabot nga mga anak, nga naglakip sa matag usa kanato, ngadto sa makaluluoy, walay paglaom nga kahimtang. Apan, ang Diyos makahimo ug may gihimo alang sa katawhan, nga naghimog mga lakang sa pagseguro nga matuman ang iyang katuyoan sa yuta.—Gen. 3:15.

Sa walay duhaduha kitang tanan nagtinguha gayod sa pagbalaan sa halangdong ngalan sa atong Diyos. Sa dihang molambo ang atong kahibalo kon unsa ka katingalahang Diyos si Jehova, kita matukmod sa pagkooperar kaniya ug sa iyang organisasyon sa pagpadayag sa iyang mahimayaong ngalan ug katuyoan. Kita makasalig nga kita iyang kahimut-an ug panalanginan karon ug makasalig nga makabaton ug kinabuhing walay kataposan diha sa bag-ong kalibotan.

Kami nga mga membro sa Nagamandong Lawas nagpaabot sa among gugma kaninyo minahal nga mga igsoon. Buot usab namong ipahayag ang among dakong apresasyon sa inyong pagpaningkamot sa paggamit sa nahibiling panahon sa dili pa moabot “ang dakong kasakitan” sa pagsangyaw sa maayong balita sa mas daghan pang tawo kutob sa mahimo. (Pin. 7:14) Sa paghimo niini, kamo naghatag kanila ug samang kahigayonan nga inyong nadawat, ang pagkuhag kahibalo bahin sa Diyos ug kang Kristo nga motultol sa kinabuhing walay kataposan.—Juan 17:3.

Inyong mga igsoon,

Nagamandong Lawas sa mga Saksi ni Jehova

[Hulagway sa panid 4]

Si Carey W. Barber

[Hulagway sa panid 4]

Si John E. Barr

[Hulagway sa panid 4]

Si Samuel Herd

[Hulagway sa panid 4]

Si Geoffrey Jackson

[Hulagway sa panid 5]

Si Theodore Jaracz

[Hulagway sa panid 4]

Si Stephen Lett

[Hulagway sa panid 5]

Si Gerrit Lösch

[Hulagway sa panid 5]

Si Anthony Morris III

[Hulagway sa panid 5]

Si Guy Pierce

[Hulagway sa panid 5]

Si David Splane