Tibuok-Kalibotang Taho

ASIA UG ANG TUNGANG SIDLAKAN

KAYUTAAN 47

POPULASYON 3,930,343,401

MGA MAGMAMANTALA 591,750

MGA PAGTUON SA BIBLIYA 477,609

Japan

Sa hapit nang manganak si Miho, naglisod siya sa pagsangyaw sama sa naandan. Kay buot mopadayon sa pagpayunir, iyang gipangayo sa magtatan-aw sa pag-alagad ang mga adres sa mga balay nga lisod sangyawan, sama sa guwardiyadong mga apartment. Iyang gihatagan si Miho ug duolan sa usa ka gatos ka adres. Daghan siya ug giteleponohan. Sa iyang unang mga pagsulay sa pagtelepono, walay interesadong mamati, ug 30 minutos lang natapos na niya ang iyang mga pagtawag. Dayon, iya kining gisundan ug sulat. Ang bisan unsang madungog niya gikan sa telepono, sama sa usa ka bata nga naghilak, iyang gihimong pangbukas alang sa mubong sulat. Sa pamanabana niya nga nadawat na ang sulat, siya motelepono ug iyang ipatin-aw ang benepisyong makuha sa pagpadapat sa giya sa Kasulatan nga gihisgotan diha sa sulat. Sa usa ka higayon, usa ka ginang sa panimalay mibalibad sa pagpakigsulti, apan gipadad-an lang gihapon siya ni Miho ug sulat. Sa dihang mitelepono pag-usab si Miho, ang anak nga babaye lang, nga usa ka estudyante, maoy diha sa balay, ug nabasa niya ang sulat ni Miho. Gisangyawan siya ni Miho ug gisaaran nga padad-an siya ug sulat nga may mga tambag sa Kasulatan bahin sa kinabuhi sa kabataang nagtungha. Si Miho miingon nga motawag siya pag-usab. Gitubag sa inahan ang tawag sa telepono ug miingon nga dunay problema ang iyang anak sa eskuylahan ug ang gisulti ni Miho kaniya nakatabang. Human sa pipila ka pagtawag ug pagsulat, ang inahan ug anak nagsugod sa pagtuon.

 Nepal

Usa ka maestro nga ginganlag Prem dugay nang nangita sa kamatuoran. Siya tigbasa ug Bibliya ug tigsimba sa simbahan duol sa eskuylahan nga iyang gitrabahoan. Apan, wala siyay nadawat nga mga tubag sa iyang mga pangutana ug naglagot tungod kay ang pastor nagsigeg pangayog amot. Si Prem miampo sa Diyos, nga nangayog tabang kon unsaon sa pagkaplag sa relihiyon nga makatabang kaniya sa pagkahibalo sa kamatuoran. Sa dihang si Prem mibalhin ug nagsugod pagtudlo sa laing eskuylahan, iyang gipangutana ang iyang bag-ong mga silingan kon asa ang simbahan. Diha sa apartment nga iyang gipuy-an may usa ka batang lalaki nga nagtungha kansang inahan nakatambong ug pipila ka tigom sa Kingdom Hall, ug didto siya gidala sa bata. Ang pakigpulong publiko nga napaminawan ni Prem nagpatin-aw sa Gingharian sa Diyos, ang tema nga gusto gayong masabtan ni Prem. Nagpatuon siya ug Bibliya. Kay nalipay nga natubag na gayod ang iyang mga pangutana, si Prem ug ang iyang pamilya karon tigtambongan na sa mga tigom. Nagpadala sila ug sulat sa ilang gianibang relihiyon nga nagpataktak sa ilang ngalan diha sa listahan sa mga membro niini kay gusto nila nga mahimong mga Saksi ni Jehova.

Taiwan

Ang mga estudyante sa tunghaang primarya gihangyo sa paghimog komposisyon alang sa tinuig nga indigay sa pagsulat. Ang tema maoy “Ang Akong Paboritong Libro.” Ang 10-anyos nga si Weizhen misulat nga ang Bibliya mao ang iyang paboritong libro. Gawas sa paghatag ug komento bahin sa pagkatukma sa tagna sa Bibliya ug sa maayong giya nga gihatag sa Pulong sa Diyos, iyang gisaysay nga ang Bibliya nakatubag sa iyang mga pangutana nga dili matubag sa tin-awng paagi sa iyang mga magtutudlo ug sa iyang mga isigkaestudyante. “Ang among magtutudlo nag-ingon kanamo nga unggoy kono ang gigikanan sa tawo,” misulat si Weizhen. “Ako namalandong: ‘Kon gikan pa ang tawo sa unggoy, dili ba angay natong tahoron sila ug magmapasalamaton kanila? Busa nganong atong ibutang man sila sa tangkal diha sa mga zoo? Dili ba dako kaayo kana nga sala?’ Apan ang Bibliya klarong nagtubag: Kita sa tinuoray dili gikan sa unggoy. Kondili ang atong mga katigulangan gilalang sa dagway sa Diyos gikan sa abog sa yuta.”  Iyang gitapos ang iyang komposisyon pinaagi sa pagsulat: “Sila miingon nga sa karaang panahon, ‘Ang pagbasa ug libro samag nagbukas ug kaban sa bahandi.’ Para nako, ang Bibliya mas mahal pa kay sa bulawan. Busa, kining libroha mao ang akong labing paborito nga libro.” Ang iyang komposisyon nakadaog ug unang ganti taliwala sa mga salmot nga gihatag sa mga estudyante nga kinto grado pataas, bisag kuwarto grado pa lang siya. Sa nag-asoy sa iyang eksperyensiya, iyang gikutlo ang Hebreohanon 4:12 ug dayon miingon, “Gihatag ko ang tanang pasidungog ngadto kang Jehova nga Diyos.”

Mongolia

Sa dihang si Bolortsetseg, nga bag-o pang nabawtismohang sister sa Mongolia, nakadungog nga namatay ang iyang paryente ug nga ang asawa sa namatay naguol pag-ayo, iyang gipadad-an siya sa tanan natong mga publikasyon sa pinulongang Mongolian. Usa ra ka gabii nga gibasa kini sa nabiyuda nga si Evsanaa. Pagkasunod adlaw, iyang giteleponohan si Bolortsetseg ug mihangyo nga duawon siya dihadiha dayon. Si Bolortsetseg nagdala ug laing sister sa pagduaw kang Evsanaa, kinsa nangandam ug taas nga listahan sa mga pangutana. Siya maikagong namati sa mga tubag gikan sa Bibliya. Human sa dugay kaayong panagsultihay, ang mga sister miingon nga mas daghag makat-onan si Evsanaa kon maghisgot lang sila ug usa ka topiko sa usa ka higayon. Ilang gisugyot kaniya ang pagtuon sa Bibliya sa balay. Si Evsanaa misugot dayon nga magtuon tulo ka beses sa usa ka semana. Usa ka bulan pa lang nga nagtuon, gilabay na niya ang tanan niyang mga rebulto ug tigtambongan na sa mga tigom. Paglabay sa duha ka bulan human nga nahimong magmamantala, siya nangandam nang mag-oksilyare payunir sa dihang gipatin-aw kaniya nga kinahanglang magpabawtismo una siya. Wala siya maluya apan determinado hinuon sa paggugol ug labing menos 50 ka oras sa usa ka bulan sa pagsangyaw ug naghulat ug kombensiyon aron magpabawtismo.

Kazakhstan

Sa siyudad sa Rudny, nakahibalag ang usa ka payunir ug batan-ong lalaki nga ginganlag Nikolay nga interesadong magtuon ug Bibliya diha sa balay. Apan may problema.  Si Nikolay ug ang iyang pamilya nagpuyo sa layo kaayong baryo, ug panagsa ra siyang moadto sa Rudny sa pagbisita sa iyang mga paryente. Ang brader nangutana kon mahimo ba siyang moduaw kaniya diha sa iyang baryo, apan si Nikolay miingon nga 200 kilometros ang gilay-on sa baryo ug lisod kaayo ang biyahe didto.

Bisan pa niana, gisulat lang gihapon sa brader ang adres ug misaad nga makigkita ra sila kaniya pag-usab. Ang brader naghikay sa pagduaw sa baryo ug iyang gidapit ang usa ka brader ug duha ka sister sa kongregasyon sa pag-uban kaniya. Paglabay sa duha ka semana, sila misakay ug tren. Sa hapit nang miabot sa kinaduolang estasyon sa tren, ilang nahibaloan nga 18 kilometros pa ang baryo ni Nikolay ug wala nay kasakyan. Wala na silay laing mahimo kondili nagbaktas na lang sila. Dili lalim ang pagbaktas kay panahon kadto sa tingtugnaw ug puwerteng bugnawa ang hinaguros sa hangin. Wala magdugay, usa ka traktor nga naghatod ug tangke sa gatas milabay kanila ug mihunong. Gipasakay sila sa drayber—sa sulod sa tangke! Abi sa mga magmamantala nga nagtiaw ang tawo, apan ang tangke walay sulod ug uga, busa misakay sila. Bisag tugnaw kaayo diha sa sulod sa tangke, labing menos may salipod sila sa hinaguros sa pwerte ka bugnawng hangin. Giingnan sila sa drayber nga iyang ihunong sila mga siyete kilometros pa paingon sa ilang destinasyon. Gikan didto, mopadayon pa sila pagbaktas paingon sa ilang adtoan. Laing duha ka oras nga gibaktas nila ang siyete kilometros nga gilay-on sa baryo ni Nikolay.

Si Nikolay ug ang iyang asawa, si Valya, nakuratan ug nalipay sa pagkakita sa mga igsoon diha sa ilang pultahan. Ilang giakatar ang ilang mga bisita aron mainitan ug gidalitan ug pagkaon. Nagsugod dayon sila paghisgot bahin sa Bibliya. Paglabay sa duha ka semana, ang mga igsoon nga taga-Rudny mibalik didto. Ang payunir nga brader miingon: “Gisugat kami ni Nikolay diha sa estasyon. Daghang tawo sa baryo gustong makigsulti ‘sa mga tawong miabot nga misakay sa tangke sa gatas,’ busa naghimog eskedyul si Nikolay, aron ang tanang interesado among mahimamat. Ang tanang nalista miabot sumala  sa ilang eskedyul ug midawat sa gitanyag nga pagtuon sa Bibliya.” Sa ngadto-ngadto, halos tanang nagsugod sa pagtuon sa Bibliya sa maong baryo miuswag sa espirituwal. Paglabay sa duha ka tuig, si Nikolay ug Valya nabawtismohan. Karon ang ilang duha ka anak nga lalaki maoy dili-bawtismadong mga magmamantala na, ug si Nikolay dili pa dugay nga natudlo ingong ansiyano niining nahilit nga grupo.

Georgia

Ang mga payunir tigsangyawan sa hilit nga mga kabukiran sa nasod sa Georgia. Duha ka payunir nga mga sister mibaktas ug otso kilometros paingon sa hilit kaayong baryo nga nahimutang sa kinatumyan sa usa ka dalan-dalan sa bukid ug nagsugod pagpamalaybalay. Wala magdugay gipahunong sa usa sa tigulang nga mga lalaki sa baryo si Ketevan, nga usa sa mga sister, ug nangutana kon nganong nagsangyaw siya nga dili man siya sakop sa relihiyong Ortodokso. Ang sister misulay sa pagpatin-aw, apan dili mamati ang tigulang. Dayon gisuntok sa tigulang si Ketevan nga nakapatumba kaniya ug gibunalan siya ug sungkod. Ubay-ubay ang nakakita niini, ug kining hitaboa nabaniog sa tibuok baryo. Sa ulahi, si Ketevan mibalik sa pagsangyaw sa mao gihapong baryo. Usa ka babaye nga supak kaniadto nakakita kaniya ug miingon: “Mibalik na usab ka human nga gibukbok ka! Nakadayeg ako sa imong kaisog! Sige, dayon ug sultihi pa ako ug dugang.” Human makapamati, siya miingon nga si Ketevan puwedeng makaduaw kaniya sa bisan unsang oras sa pagsangyaw kaniya.

 APRIKA

KAYUTAAN 57

POPULASYON 802,232,357

MGA MAGMAMANTALA 1,043,396

MGA PAGTUON SA BIBLIYA 1,903,665

Rwanda

Di pa dugay, ang mga tawo nga naglakaw sa dalan nakakitag kopya sa librong Ikaw Mabuhing Walay Kataposan sa Paraisong Yuta. Ilang gidala kini ngadto sa usa ka ministro sa ilang simbahang Protestante. Maikagong gibasa sa ministro ang libro ug nangita sa mga Saksi ug gisugdan siya sa pagtuon ug Bibliya. Ang iyang kahibalo sa kamatuoran sa Bibliya miuswag, busa miluwat siya sa iyang relihiyon ug nagpabawtismo. Kasamtangan, madasigon niyang gipadayag ang kamatuoran ngadto sa iyang kanhing mga kauban sa relihiyon, ug 25 ka membro ang mibiya sa relihiyon aron mahimong mga Saksi ni Jehova. Ang lalaki nga mipuli kaniya ingong ministro sa simbahan nagsugod usab sa pagtuon sa Bibliya uban sa tabang sa mga Saksi, ug siya usab mibiya sa iyang relihiyon. Siya karon tigtambongan na sa Kristohanong mga tigom ug gustong mahimong  magmamantala. Ang iyang asawa nabawtismohan sa dili pa dugayng espesyal nga asembliya. Katingalahan kon imong hunahunaon nga kining tanan nagsugod tungod sa usa ka libro nga nakit-an diha sa dalan!

Côte d’Ivoire

Samtang nagpaingon sa pagsangyaw sa Abidjan nga mao ang kaulohan sa siyudad, usa ka batan-ong Saksi nga ginganlag Berenger nakasugat ug usa ka babaye nga namaligyag tinapay. Ang babaye wala makamatikod nga nahulog ang iyang kuwarta nga balor ug 5,000 franc ($10, U.S.). Sa gipunit kini ni Berenger aron ihatag kaniya, laing babaye gikan sa atbang misinggit nga nag-ingon, “Ambi nang kuwarta; akoa na!” Apan, sa gipangutana ni Berenger kon pila ang kantidad, ang babaye nasuko ug milakaw. Giagpas ni Berenger ang babaye nga nawad-an sa kuwarta. Sa iyang katingala, ang babaye wala moangkon nga nahulogan siya ug kuwarta, ug miingon, “Lansis ni aron imo akong tulison.” Apan, sa nakakita nga si Berenger sinsero ug mapugsanon, iyang gisusi ang iyang kuwarta ug nakadiskobre nga nawad-an gayod diay siya ug 5,000 franc, nga ikapalit ug 50 ka tinapay.

Si Berenger miingon: “Akong gihatag kaniya ang kuwarta ug gisultihan siya nga akong gihimo kini kay ang akong Diyos, si Jehova, nagtudlo sa iyang mga alagad nga magmatinud-anon. Iya akong gipasalamatan ug miingon: ‘Kon ang tanan sama pa untag batasan sa mga Saksi ni Jehova, managhigala unta ang tanang tawo. Karon pa ako makakita sukad ug batan-on nga ingon niini ug paggawi.’ Ako siyang gihatagan ug tract, ug siya misaad nga mamati na siya sa mga Saksi ni Jehova. Nianang adlawa, 50 ka franc lang ang sulod sa akong bulsa alang sa tibuok adlaw. Bisan pa niana, nalipay ako nga nahimo nako ang hustong butang.”

Demokratikanhong Republika sa Congo

Si Eugene, nga usa ka ansiyano, dyanitor ug guwardiya sa usa ka tindahan ug brilyante. Siya nahinumdom: “Usa ka gabii dihay tawo nga miadto sa tindahan aron sa pagbaligya sa brilyante nga balor ug $22,000 (U.S.). Apan, ang pakete nga nasudlan sa mga  brilyante nahulog gikan sa iyang bulsa. Sa katarantar, nahasirilsiril siyag pangita niini apan wala niya kini makit-i. Pagkasunod adlaw, ang iyang amo ug usa ka kauban nagngadto-nganhi sa karsada sa pagpangita sa pakete, apan wala nila kini makit-i. Dayon nanilhig ako sa gawas, sa atubangan lang gayod sa pultahan sa among tindahan, didto ra diay ang pakete sa mga brilyante! Akong gipunit kini ug midagan paingon sa akong amo, nga taga-Belgium. Dili siya makatuo sa akong gihimo. Akong gisultihan siya nga Saksi ni Jehova ako ug ako mahinadlokon sa akong Diyos. Ang tag-iya sa mga brilyante, kay natandog pag-ayo sa akong pagkamatinud-anon, miingon, ‘Dili kini katuohan!’

“Giingnan ako sa usa sa akong mga kauban, ‘Eugene, imong nasalbar ang atong dungog!’

“Ako mitubag: ‘Salamat! Si Jehova ang angayng pagadayegon, kay siya ang nagtudlo kanako nga magmatinud-anon.’”

Angola

Samtang nagduaw sa usa ka baryo, si João, nga usa ka misyonaryo nga nag-alagad ingong magtatan-aw sa sirkito, buot magpasalida ngadto sa mga igsoon ug sa mga tawong interesado sa maong dapit sa DVD nga nag-ulohang Noah Walked With God—David Trusted in God. Ang brader nagdalag gamayng generitor, duha ka trompa, diyutayng gasolina, ug iyang laptop nga kompiyuter. Diha sa unang baryo, siya misaka sa gamayng balay nga gama sa yuta, ug siya nangandam sa pagpasalida sa pelikula nianang gabhiona. “Sa akong kakurat,” siya miingon, “duolan sa 38 ka tawo ang miabot, nga nagdalag mga lingkoranan, tag-as nga bangko, bato, lata sa gatas, ug ubang mga butang nga mahimong kalingkoran. Gamay ra ang lugar sa balay nga dili kasudlan bisan katunga sa mga tawo nga nanambong, busa among gitan-aw ang pelikula diha sa gawas. Ilalom sa daghag bituon nga kalangitan, akong gipatong ang kompiyuter ibabaw sa mga tisa, ug daghan sa nanan-aw nanglingkod sa mabulokong Aprikanhong panapton nga gibuklad diha sa yuta.” Nabaniog dayon kining okasyona, ug daghan ang nangabot gikan sa mga baryo nga giduaw ni João. “Sa natapos ang salida, walay gustong  mopauli,” siya miingon. “Daghan ang miingon nga kini ang labing malipayong gabii sa ilang kinabuhi ug sila mapasalamaton kaayo kang Jehova niini nga espirituwal nga tagana.” Sa tulo ka semana nga giduaw ni João ang mga grupo sa kabaryohan, 1,568 ka tawo ang nakatan-aw sa DVD!

Ghana

Si Vida, nga tighatod ug mga suplay sa pagkaon sa Accra, nagpanuko sa paghatod ug preskong utanon sa sangang buhatan sa Ghana. Kay ngano man? Kay gisultihan siya sa pastor nga ang mga Saksi dili maayog buut sa mga tawong dili-Saksi. Busa, sa naghatod si Vida sa iyang unang inangkat nga mga utanon, siya nahibulong nga gisugat siya ug mahigalaong mga pahiyom ug matinahorong pagpasalamat sa mga nagtrabaho sa kosina. Sa misunod nga mga semana, nasuod niya ang mga boluntaryo diha sa sanga, nga nakamatikod nga silang tanan maluloton kaniya ug nakaamgo nga gibakakan siya sa iyang pastor.

Kay gustong makakat-on pag dugang, si Vida mihangyo ug pagtuon sa Bibliya, bisag dili siya makamaong mobasa. Sulod sa unom ka bulan, si Vida nakakat-on pagbasa gikan sa iyang kaugalingong Bibliya, ug sa dili pa dugayng distritong kombensiyon, siya gibawtismohan. Bisan pa sa pagbiaybiay sa mga membro sa iyang pamilya ug mga kauban kanhi, natabangan ni Vida ang iyang ig-agaw nga mahimong dili-bawtismadong magmamantala.

Sudan

Samtang namalaybalay, usa ka sister nakahibalag ug duha ka dalagita nga nagpadayon kaniya sa balay. Katingalahan nga ang mga dalagita mibalibad sa tabang sa sister sa pagpangita sa mga teksto diha sa ilang Bibliya. Tungod diay kay gipasidan-an sila sa pari sa ilang lugar nga kon hikapon sa mga Saksi ni Jehova ang ilang kopya sa Bibliya, ang unod niini mausab rag iya aron mosibo sa mga doktrina sa mga Saksi. Ang mga dalagita mibalibad pa gani sa paglamano sa sister. Apan, sa dihang ilang nakit-an ang mga teksto, ang ilang nabasa sibo sa giingon sa sister. Nakaamgo nga namakak ang pari, sila midesisyon sa pagtuon sa Bibliya. Kay nabalaka, ang  pari misaad sa paghatag kanila ug kuwarta aron ipalit ug pagkaon—basta mohunong sila sa pagtuon sa Bibliya. Ang ilang tubag? “Dili kami gustong mabusog sa pagkaon. Mas gusto namong mabusog sa pulong sa Diyos.” Ang mga dalagita karon nagtambongan na sa mga tigom sa kongregasyon.

Etiopia

Bisag Saksi ang iyang asawa mga napulo na ka tuig, ang lalaki nga ginganlag Awoke walay interes sa kamatuoran. Bisan pa niana, sa mibiyahe siya sa laing bahin sa nasod alang sa duha ka bulan nga kurso, siya nakadesisyon sa pagpangitag mga Saksi. Sa pag-abot niya, gitultolan siya sa usa ka opisina nga gitrabahoan sa usa sa atong mga sister. Ang sister nagsige ug ampo nga unta may brader nga motabang sa kongregasyon didto. Sa dihang gisultihan ang sister nga dunay tawo nga nagpakisayod bahin sa mga Saksi ni Jehova, misantop sa iyang hunahuna ang iyang pag-ampo. Sa pagkakita niya kang Awoke, nga maayog pamesti ug pamostura, siya nakahinapos nga siya ang bag-ong brader nga iyang giampo. Sa kalipay, iyang giadto dayon si Awoke ug mainiton niyang gipangomosta. Tungod sa iyang dakong kalipay, wala makagahom si Awoke sa pagsulti kaniya kon kinsa siya, ug dili niya gustong mahigawad ang sister sa dihang iyang gipailaila si Awoke sa mga igsoon. Sa iyang pag-estar didto, mitambong siya sa tanang tigom. Sa natapos ang iyang kurso ug panahon na nga mopauli, gidapit siya sa mga sister sa paniudto, ug ilang gihangyo siya nga maoy mohatag ug pasalamat sa pagkaon. Siya nahinumdom kon sa unsang paagi ang iyang asawa, nga may tabon ang ulo, mohatag ug pasalamat panahon sa pagpangaon, nga naghimo niini sa ngalan ni Jesus. Busa natapos ang pag-ampo ug pagpangaon nga walay problema. Natandog sa kalulot nga gipakita kaniya panahon sa iyang pag-estar, si Awoke midesisyon nga mahimong tinuod nga brader. Sa iyang pagpauli, nagsugod siya sa pagtuon, ug sa dili pa dugay nga asembliya siya gibawtismohan. Ang iyang asawa nalipay, ug si Awoke naghulat sa higayon sa pagsulti sa iyang kaagi ngadto sa kongregasyon nga iyang naadtoan.

 UROPA

KAYUTAAN 46

POPULASYON 730,776,667

MGA MAGMAMANTALA 1,506,019

MGA PAGTUON SA BIBLIYA 744,319

Ukraine

Usa ka elektrisyan miadto sa Kingdom Hall sa pag-ayo sa kuntador sa koryente. Siya gibantog nga palahubog sa iyang baryo. Samtang nag-ayo sa kuntador, namatikdan niya ang tinuig nga teksto: “Duol sa Diyos, ug siya moduol kaninyo.” (Sant. 4:8) Siya mihunong ug nangutana sa usa sa mga igsoon: “Mahimo bang makaduol kita sa Diyos? Mahimo bang makaduol sa Diyos ang mga makasasala?” Gitubag siya sa brader pinasukad sa Bibliya ug gidapit siya sa tigom. Pagka-Dominggo, ang tawo midesisyon sa pagtambong sa tigom apan sa laing baryo, kay dili siya gustong makit-an sa iyang mga silingan nga mitambong sa Kingdom Hall. Apan, ang mohatag ug pakigpulong publiko alang nianang adlawa maoy ansiyano nga nagpuyo usab sa baryo nga iyang gipuy-an. Sa pagkakita kaniya, misulay ang tawo sa pagtago. Apan nailhan siya sa ansiyano ug mainitong giabiabi. Tungod niana, siya midesisyon sa pagtambong ug mga tigom sa iyang baryo mismo. Siya nagsugod sa pagtuon sa Bibliya, ug paglabay sa usa ka tuig siya nagpabawtismo.

Niadtong higayona, ang asawa sa lalaki nagtrabaho sa gawas sa nasod, ug wala siya makatuo nga ang iyang bana mihunong na sa pag-inom-inom ug nahimong Saksi ni Jehova. Aron makita niya mismo, siya mipauli. Siya nalipay nga ang iyang bana mihunong na sa pag-inom ug nag-atiman sa ilang mga anak, apan dili siya makadawat nga Saksi ni Jehova na ang iyang bana. Apan, usa ka adlaw, gihangyo siya sa iyang bana, “Mahimo bang manambong tang tanan sa Kingdom Hall?” Misugot siya. Nagsugod siya sa pagtuon ug Bibliya, ug wala magdugay, siya  gibawtismohan uban sa ilang tulo ka anak nga babaye. Busa, ang usa ka bersikulo sa Bibliya nakatabang ug lima ka tawo sa pagduol sa Diyos.

Gresya

Diha sa dalan nga ginaagian adlaw-adlaw sa usa ka brader paingon sa trabaho, may namatikdan siya nga babaye nga tig-adtoan sa usa ka altar-altar nga nahimutang niining dalana. Kining maong mga altar-altar, nga makita sa mga daplin sa dalan sa Gresya, sagad maoy timaan sa usa ka aksidente nga may namatay. Aron matabangan kining babayhana, ang brader naghimog mubong sulat nga may makahupay nga mga teksto sa Kasulatan bahin sa kahimtang sa patay ug sa paglaom sa pagkabanhaw. Human gibutangan kinig iyang ngalan ug numero sa telepono, gibutang sa brader ang sulat diha sa altar-altar. Pagkasunod adlaw mismo, ang babaye mitelepono kaniya ug interesado kaayo sa maayong balita. Siya karon regular na nga ginabalik-duaw.

Norway

Human sa pagsangyaw, unom ka sister misulod sa usa ka painitan. Ilang gihisgotan ang nindot nga pakigpulong publiko nga ilang nadunggan sa Kingdom Hall sa miaging duha ka adlaw. Bahin kini sa paglaom sa pagkabanhaw. Pagkataudtaod, ang babaye nga namati miduol sa ilang lamesa. Siya nangutana kon mahimo ba siyang makalingkod uban nila aron makapamati siya sa ilang gihisgotan. Iyang giingnan sila nga dili pa dugayng namatay ang iyang mga ginikanan. Makapadasig ang ilang panagsultihay. Gipangayo sa mga sister ang numero sa telepono sa babaye, ug usa kanila sa ulahi nakigkita kaniya ug nasugdan ang pagtuon sa Bibliya.

Lithuania

Si Olga, nga usa ka batan-on nga bug-os-panahong magwawali, nakasugod ug pagtuon sa Bibliya diha lang sa pultahan sa usa ka babayeng Ruso. Sa usa sa ilang unang mga panagsultihay, gihangyo sa babaye si Olga sa pagpatin-aw sa ekspresyon sa Bibliya nga “kataposang mga adlaw.” (2 Tim. 3:1) Si Olga misaad nga iyang ipatin-aw kini sa sunod niyang duaw. Sa halos usa ka bulan, dili gayod masapnan ni Olga ang babaye sa ilang balay, bisag nagbalik-balik siya pagduaw. Ug bisag walay miabli sa pultahan, si Olga nakamatikod nga may milili diha sa lilianan  sa pultahan. Si Olga miingon: “Dili ko motuo nga gusto nang mohunong kining babayhana sa among mga panagsultihay bahin sa Bibliya. Kay morag duna may tawo diha sa likod sa siradong pultahan. Busa, midesisyon ako sa pagsulat kaniya aron ipatin-aw ang butang nga nakapabalaka kaniya. Paglabay sa tulo ka adlaw, misulay na usab ako sa pagduaw. Nalipay kaayo ako sa dihang iyang gibuksan ang pultahan! Siya natandog pag-ayo sa sulat ug sa interes nga gipakita kaniya.”

Gipasalamatan sa babaye si Olga ug miingon: “Gibalik-balik nakog basa ang imong sulat ug nasabtan ko ang tanan.” Tungod niini, ang pagtuon diha sa pultahan nahimong regular nga pagtuon sa Bibliya sa balay gamit ang librong Gitudlo sa Bibliya. Ug karon, matag panahong moadto si Olga sa pagtuon, abiabihon siyag maayo niining interesadong babaye.

Switzerland

Sa Geneva, nga usa ka siyudad nga gipuy-an sa mga tawo sa nagkalainlaing rasa, may usa ka sister nga ginganlan ug Marie nga nakigsulti sa usa ka babaye nga taga-Tungang Sidlakan. Kay nagtuon man si Marie ug pinulongang Arabiko, kini nga pinulongan ang iyang gigamit sa pagpakigsulti kaniya. Si Marie miingon nga siya nagtuo sa bugtong matuod nga Diyos. Sa pagkadungog niana, gigakos ug gihagkan siya sa babaye, nga nag-ingon nga siya nagmagul-anon ug nagkamulo ug ampo sa dihang nakigsulti kaniya si Marie. Ang babaye miingon nga mopauli na siya sa iyang nasod pagkasunod adlaw. Gibuksan ni Marie ang iyang Bibliya ug gibasa ang 1 Pedro 3:7 ug nagpatin-aw nga ang Diyos dako kaayo ug pagtamod sa mga babaye. Dayon, siya miingon nga buot ni Jehova nga pasidunggan ug tahoron sa matag bana ang iyang asawa. Nakurat, ang babaye nangutana: “Anghel ka ba, o tawo? Gikasubo  ko nga wala mosunod ang akong bana sa gisugo sa Diyos niini nga teksto. Ako nag-ampo kanunay sa tabang sa Diyos. Ug imo dayong gibuksan kining libroha ug gibasa kining tekstoha kanako.” Gipasulat dayon niya kang Marie ang teksto diha sa papel. Siya miingon nga iyang dad-on ang papel aron ipakita kini ngadto sa iyang pamilya, ug iyang suginlan sila bahin niining katingalahang hitabo. Si Marie naguol nga molakaw na ang babaye, apan nagsabot sila nga mokontak ra sila sa usag usa.

Netherlands

Ang siyudad sa Rotterdam maoy usa sa kinadak-ang mga pantalan sa kalibotan. Ang mga karga nga moabot gikan sa barko ibalhin diha sa mga trak aron ihatod ngadto sa mga nasod sa Uropa o sa uban pang mga nasod. Busa, daghan kaayong trak ang mag-agi-agi dinhi. Diha sa usa sa kinadak-ang mga haywey paingon sa kanait nga Alemanya adunay dakong hunonganan sa trak diin kutob 1,500 ka trak nga may treyler ang mohunong matag oras. Kay gibaod man nga kinahanglang mohunong ang mga drayber niining dapita, gipahimuslan sa atong mga igsoon ang higayon sa pagsangyaw sa mga drayber sa matag trak, ug makahimamat sila ug mga drayber gikan sa Uropa, Tungang Sidlakan, ug halos sa tanang republika kanhi sa Unyon Sobyet. Ang mga drayber interesadong mobasa sa atong mga magasin. Sa miaging tuig, ang mga igsoon nakasangyaw ug kapin sa 82 ka beses diha sa hunonganan sa trak ug nakapahimutang ug kapin sa 10,000 ka magasin sa 35 ka pinulongan.

 MGA NASOD SA AMERIKA

KAYUTAAN 56

POPULASYON 883,782,291

MGA MAGMAMANTALA 3,256,287

MGA PAGTUON SA BIBLIYA 3,111,358

Peru

Si Jorge regular payunir ug dibuhista. Iyang gisangyawan si Hubert nga dibuhista usab, ug si Hubert midawat sa gitanyag nga pagtuon sa Bibliya. Bisag supak kaayo ang iyang pamilya, mga higala, ug mga silingan, natapos ni Hubert ang pagtuon sa librong Kahibalo nga Motultol sa Kinabuhing Walay Kataposan sa unom lang ka bulan. Diha sa iyang mga pag-ampo, nangayo siya ug tabang ni Jehova aron makakat-on ang iyang pamilya sa kamatuoran. Nalipay kaayo siya sa dihang ang iyang magulang nga lalaki nga si Jhon miapil sa pagtuon ug nagsugod sa pagtambong sa mga tigom. Pagkasunod semana, ang bayaw ni Jhon nga si Cesar miapil sa pagtuon. Bisag supak sa sinugdan, nagtuon usab ang asawa ni Cesar. Dayon, ang kauban ni Hubert sa eskuylahan nga si Reynaldo gusto usab nga magtuon. Kay supak man kaayo ang iyang pamilya, napugos siya sa pagtuon diha sa balay ni Hubert. Wala magdugay, ang manghod ni Hubert nga si Milton nagsugod usab sa pagtuon. Human sa iyang unang pagtuon, gisangyawan ni Milton ang iyang duha ka kauban sa eskuylahan nga si Darwin ug Christian, nga nagsugod usab sa pagtuon ug pagtambong sa mga tigom. Si Hubert duna pay duha ka magulang nga lalaki, si Ronald ug si Martin.  Si Ronald kinsa dunay taas kaayong listahan sa mga pangutana bahin sa Bibliya miapil sa pagtuon ni Hubert, busa gipatin-aw ni Jorge nga matubag ang iyang tanang mga pangutana pinaagi sa pagtuon sa Bibliya. Siya nagpatuon. Dayon, si Martin nagsugod sa pagtuon, ug ang iyang duha ka anak nga babaye miapil usab. Si Hubert ug Jhon gibawtismohan diha sa “Ang Kaluwasan Haduol Na!” nga Distritong Kombensiyon. Sumala sa kinaulahiang ihap, 18 ka tawo ang nakakat-on bahin kang Jehova tungod nianang unang pagsangyaw.

Brazil

Si Paulo nagpuyo sa amihanang bahin sa nasod diha sa usa ka ranso. Ang babaye nga iyang gipuyo-puyo ug sa ulahi iyang giminyoan nagtuon sa Bibliya, ug si Paulo misugot nga magtuon usab ug Bibliya aron lang mapahimut-an ang babaye. Sa laing bahin, ang jaguar nga manunukob sa mga baka gipangita sa mga ransero ug napatay ra nila kini. Kay gustong makasapi, ilang giteleponohan ang tag-iya sa ranso ug nangayog kuwarta nga ilang ibayad kono sa tawo nga nakapatay sa jaguar. Si Paulo miuyon sa plano, ug iya pa ganing giasoy sa iyang amo ang nahitabo kono. Apan, tungod sa nakat-onan ni Paulo sa Bibliya, gitulisok siya sa iyang konsensiya. Bisag nahibalo nga mataktak siya sa iyang trabaho ug nga masuko kaniya ang iyang mga kauban, iyang giteleponohan ang iyang amo ug iyang gisultihan siya sa tinuod. Sa ulahi, si Paulo gihimong manedyer sa ranso tungod sa iyang pagkamatinud-anon. Si Paulo ug ang iyang asawa bawtismado na nga mga magmamantala sa maayong balita. Makapalipay kaayong makita kining matinud-anong tawo nga nagmaneho sa iyang traktor paingon sa Kingdom Hall, uban sa iyang asawa ug ilang duha ka anak!

 Mexico

Samtang nagtambong sa usa ka miting alang sa mga ginikanan nga gihimo diha sa eskuylahan sa iyang duha ka anak nga babaye, si María, nga usa ka madasigong regular payunir, nakamatikod nga ang mga magtutudlo nabalaka sa rebelyosong tinamdan ug imoral nga paggawi sa ubang mga estudyante. Usa ka magtutudlo miingon: “Mga ginikanan, kon dili kamo buot nga ang usa sa inyong mga anak mahimong delingkuwente, palihog tabangi kami. Pakigsulti sa inyong mga anak. Paliti sila ug libro. Tabangi sila tungod kay daghan kaayo sila ug mga pangutana. Ayaw tugoti nga sa isigkabata sila mangitag tubag sa ilang mga pangutana.” Si María nagpakisusi sa opisina sa prinsipal bahin sa panggawi sa iyang mga anak ug siya gisultihan nga dili sila problema. Dayon iyang gisugyot ang librong Mga Pangutanang Gisukna sa mga Batan-on—Mga Tubag nga Mosaler ingong praktikal nga giya sa mga batan-on. Ang prinsipal namati pag-ayo ug mihangyo kang María nga dad-an siya ug kopya. Sa dihang gidala kini ni María pagkasunod adlaw, ang prinsipal nakaangay sa libro ug mihangyo ug laing kopya para sa sikolohista sa tunghaan. Human mabasa kana, ang sikolohista misugyot nga himoon kining bahin sa leksiyon sa eskuylahan. Ang prinsipal mipedido ug mga libro alang sa 12 ka magtutudlo ug 50 ka libro alang sa librarya sa eskuylahan.

Uruguay

Usa ka adlaw niana sa wala pa mobanagbanag, usa ka tawo nga gikan sa kasikbit nga Argentina mibiyahe paingon sa iyang balay sa Uruguay. Sa talisakay na siya ug lansa nga motabok sa Río de la Plata, gitanyagan siya sa usa ka batan-ong babaye ug Enero 2006 nga gula sa magasing Pagmata! nga naghisgot bahin sa mga artikulo sa hapin nga “Unsay Anaa sa Umaabot?” Ang batan-ong babaye mahigalaon, ug malipayong gidawat sa tawo ang magasin. Sa pag-abot sa tawo sa Montevideo, ang mga pasahero gihatod ngadto sa dakong terminal sa bus. Sa iyang kakurat, giduol na usab siya ug Saksi apan niining higayona, usa ka tigulang nga babaye nga nagsungkod. Mao gihapong isyu sa magasin ang gitanyag, ug gidawat kini sa tawo. Wala magdugay sa pag-abot niya sa balay nianang gabhiona, may nanuktok sa iyang pultahan. Oo, usa gihapon ka Saksi ni Jehova. Human mamati sa mubo nga presentasyon, iyang gidawat ang magasin—sa  ikatulong higayon nianang adlawa! Sa gisulti sa Saksi nga mahimo siyang moamot alang sa tibuok-kalibotang buluhaton, siya miingon nga nahibalo na siya niana ug misulod aron mokuha ug kuwarta. Sa pagbalik niya, iyang gidala ang duha ka magasin nga iyang gidawat sayo nianang adlawa. Naghisgot sa pangutanang “Unsay anaa sa umaabot?” siya mipahiyom ug miingon: “Segurado ako sa usa ka butang: Sa umaabot may moabot nga mga Saksi ni Jehova!”

Puerto Rico

Usa ka sister miduaw sa iyang anak nga babaye sa dihang mikalit pagsulod sa balay ang duha ka tulisan, ang usa nagdalag rebolber. Gipugos sila nga magpagula ug kuwarta, apan sa miingon ang mga babaye nga wala silay kuwarta giutingkay dayon sa usa sa mga tulisan ang balay samtang gitionan sila ug rebolber sa laing tulisan. Dihadiha nag-ampo sila kang Jehova. Ang tulisan nangutana, “Unsay inyong gihimo?” Sila mitubag nga mga Saksi ni Jehova sila ug nga sila nag-ampo sa ilang Diyos, si Jehova. Samtang gisangyawan sa mga sister ang tulisan nga dunay rebolber, ang laing tulisan mibalik, nga nag-ingon nga may nakit-an siyang ATM card. Wala magdugay misakay silang tanan sa awto sa inahan ug mipaingon sa bangko. Ang mga sister nagpadayon sa pagsangyaw ug sa pagpakigsulti nga matinahoron ngadto sa mga tulisan. Gihangyo karon sa inahan ang tulisan sa pagtago sa rebolber, ug sa iyang katingala gitagoan kini sa tulisan, nga nag-ingon nga nakadayeg siya sa iyang pagkakalmado. Ang sister miingon nga duna siyay anak nga lalaki nga sama nilag edad apan masanag ang iyang paglaom sa umaabot. Iyang giawhag ang mga tulisan sa pagsubay sa mga dalan ni Jehova aron sila usab makabaton ug maanindot kaayong kaugmaon. Bisan pa niana, silang tanan mipaingon sa bangko, ug nagkuhag kuwarta ang anak. Dayon gidala sa mga tulisan ang atong mga sister sa usa ka gamayng karsada, diin didto ilang gibuhian sila. Ang usa sa mga tulisan gustong mogapos kanila, apan wala mosugot niini ang lalaki nga nagdalag rebolber. Iyang gisultihan ang mga sister nga dunay usa nga gamhanan kaayo nga nanalipod kanila. Una pa niana, ang mga lalaki nakapanulis, nakagapos, ug nakapangulata na sa uban diha sa kasilinganan.

 OCEANIA

KAYUTAAN 30

POPULASYON 35,914,649

MGA MAGMAMANTALA 94,323

MGA PAGTUON SA BIBLIYA 49,667

Papua New Guinea

Si Tom, nga sundalo kaniadto, nahibalo kon unsa ka makalilisang ang gubat. Sa nakahibalag siya ug mga Saksi sa baryo nga iyang gipuy-an, siya natandog sa saad sa Bibliya bahin sa usa ka kalibotan nga walay gubat. Si Tom nagtuon sa Bibliya ug miuswag sa espirituwal, apan miabot ang usa ka pagsulay sa iyang pagtuo sa dihang midesisyon siya sa pagtambong sa Memoryal. Ang amahan ni Tom pastor kaniadto sa United Church, ug si Tom maoy tsirman niana nga simbahan, nga tapad sa Kingdom Hall. Sa misulod si Tom sa Kingdom Hall, iyang makita ang mga membro sa iyang simbahan—iyang suod nga mga higala, mga kauban kanhi sa trabaho, ug ang ministro sa simbahan—kinsa mitutok lang kaniya. Si Tom gustong motago, apan siya naghunahuna: ‘Nganong motago man ko? Panahon na karon nga mahibalo ang mga tawo nga hapit na ko nga mahimong Saksi ni Jehova.’ Pagkahuman sa selebrasyon sa Easter, iyang giduol ang ministro sa simbahan ug nangutana, “Nakakita ka ba nako diha sa Kingdom Hall?”

Ang ministro mitubag, “O, nakita ti ka,” ug silang duha nangatawa.

Dayon si Tom miingon: “Bay, abi nakog ang usa ka daang restawran mao ang kinamaayohan nga restawran, apan akong nahibaloan nga ang pagkaon niini dunay hilo. Dayon nakakita ako ug bag-ong restawran, nga nagdalit ug lamian, sustansiyadong mga pagkaon. Sa nakatilaw ako sa lamiang pagkaon niining bag-ong restawran, nganong mobalik pa man ko sa daang restawran?”

 Ang ministro nakasabot sa diwa sa ilustrasyon ug miingon, “Tom, ayaw pagsulti sa uban, apan regular ako nga magbabasa sa magasing Pagmata!” Gipatangtang ni Tom ang iyang ngalan gikan sa listahan sa mga membro sa simbahan ug bisag daghan siya ug mga pagsulay, siya nahimong dedikadong alagad ni Jehova.

Solomon Islands

Sa Pebrero 18, 2006, natapos sa 58 ka magmamantala ang unang Basic Australian Sign Language Course nga giorganisar sa sangang buhatan sa mga Saksi ni Jehova. Sukad niana, napulo ka tawong bungol ang midawat ug pagtuon sa Bibliya ug tigtambongan na sa mga tigom sa kongregasyon. Usa kanila mao si Moses. Gihubit siya sa iyang silingan ingong “tawo nga daling masuko ug sapoton—tawo nga gahi kaayong pasabton.” Apan, sa dihang ang Saksi nga paryente, nga nakatapos niini nga pagtuon mitanyag kang Moses ug pagtuon sa Bibliya, iya dayon kining gidawat. Paglabay sa usa ka bulan mitambong siya sa iyang unang tigom sa Kingdom Hall, ang iyang sinina gum-os, ang iyang buhok taas, ug ang iyang bungot baga. Ang maayo nga pag-abiabi kaniya ug ang kamatuoran nga iyang nakat-onan nakatandog sa iyang kasingkasing. Siya nakurat sa pagkahibalo gikan sa Bibliya nga pinaagi sa paghatag ug maayong pagtagad sa iyang pamesti ug panagway, mahimaya niya ang Diyos. Sa dihang misulod siya sa Kingdom Hall pagkasunod semana, ang mga igsoon wala makaila kaniya. Siya nagpatupi na ug namalbas, ug hinlo na ug besti. Daghan usab siyag gibag-o sa iyang personalidad. Ang iyang silingan miingon: “Areglado na siya karon, ug mapahiyomon.” Si Moses mauswagon sa espirituwal ug nagtabang sa ubang mga bungol sa pagsabot sa maayong balita.

Tahiti

Ang Makemo, nga usa ka gamay, nahilit nga pulo, nga kapin sa 600 kilometros gikan sa Tahiti, dunay 720 lamang ka molupyo. Usa ka babaye nga ginganlag Ravahere nakahibalo sa kamatuoran dihang miestar siya sa iyang mga paryente sa Tahiti. Sa pagpauli niya sa Makemo, siya nagsugod sa pagtuon sa Bibliya, una pinaagi sa koreyo, dayon sa fax, ug sa ulahi pinaagig telepono. Gipalegal ni Ravahere ang iyang kaminyoon ug naghimog  ubang kausaban aron mahiuyon sa mga sukdanan ni Jehova, bisan pag gilisod-lisod siya sa ubang mga membro sa iyang pamilya kinsa gusto nga magpabilin siya nga Mormon. Unya, sa miadto si Ravahere sa usa ka kongregasyon sa Tahiti, siya nahimong dili-bawtismadong magmamantala. Matag duha ka semana makadawat siya ug makadasig nga mga sulat gikan sa mga magmamantala nianang kongregasyona.

Sa Hunyo 2006, ang magtatan-aw sa sirkito ug ang iyang asawa miduaw kang Ravahere. Siya miingon nga matag hinapos sa semana si Ravahere nagapamalaybalay. Nakahimo siya ug mapa sa iyang teritoryo ug nakasugod ug daghang pagtuon sa Bibliya diha sa balay. Iyang idispley ang atong mga magasin tapad sa iyang gamayng painitan. Nagdumala usab siya ug pagtuon sa libro sa kongregasyon, nga niini motambong ang iyang bana.

Fiji

Matag semana si Matthew, nga usa ka ansiyano ug misyonaryo nga nabansay sa Gilead, nagdumalag pagtuon sa Bibliya uban sa upat ka estudyante diha sa usa ka kolehiyo alang sa mga nagtuon sa pagkamagtutudlo. Diha sa kolehiyo, ang mga ministro sa nagkalainlaing mga simbahan mohatag ug mga sermon magabii uban sa mga membro sa simbahan. Kini gihimo aron matabangan ang mga kadagkoan sa  eskuylahan, nga naningkamot sa pagsumpo sa daotang panggawi sa kadaghanan diha sa eskuylahan.

Usa ka gabii, nakamatikod si Matthew nga daghang estudyante diha sa kapeteriya—duolan sa 250—nga hilom nga nanglingkod ug naghulat nga may mga Bibliya, kuwaderno, ug bolpen. Sila naghulat sa usa ka ministro sa usa ka dakong relihiyosong grupo nga modumala ug serbisyo. Kay wala man moabot ang ministro, si Matthew gidapit sa paghatag ug pakigpulong ngadto sa grupo. Dili sama sa naandang pag-awit nga sundan ug sermon bahin sa kalayo ug asupre nga ihatag sa uban, si Matthew mihatag ug lahi nga matang sa presentasyon, ginamit ang Kasulatan. Ang ulohan nga gipili ni Matthew sa iyang dihadiha nga pakigpulong mao ang pagdasig sa mga estudyante sa paghinumdom sa ilang Maglalalang samtang sila batan-on pa. Human niana, ang tanang estudyante naglinya sa paglamano kang Matthew ug nagpasalamat kaniya. Siya karon nagplano sa pagpakigkita niadtong nagpakitag interes niining wala damhang kahigayonan.

Australia

Samtang namalaybalay, duha ka sister nakahibalag ug babaye nga masakiton. Iyang gisultihan sila nga tinagalan na ang iyang kinabuhi kay duna siyay kanser ug siya puliki nga nanghipos sa mga butang aron dili na mabalaka ang uban dihang mamatay na siya. Ang babaye miingon nga wala siyay pamilya ug walay mga higala ug nga mingaw kaayo ang iyang kinabuhi. Siya miingon usab nga duna siyay dili maayong mga eksperyensiya sa ubang mga relihiyon ug mibati nga gibiyaan siya sa Diyos. Sa ulahi, gidad-an siya sa usa sa mga sister ug pungpong sa mga bulak, ug tungod kay wala man diha ang babaye, gibilin kini sa sister diha sa pultahan nga may gamayng nota. Pagkahapon, ang babaye mitelepono sa pagpasalamat niining malulotong buhat. Siya miingon nga wala pa mahitabo sukad nga may tawo nga nahingawa kaniya o naghatag kaniya ug mga bulak, ug siya nangayog pasensiya kay siya wala diha sa iyang balay. Sa dihang miduaw pag-usab ang mga sister, naghulat na siya kanila. Gipakitaan siya ug librong Gitudlo sa Bibliya, ug usa ka pagtuon sa Bibliya ang nasugdan.

[Hulagway sa panid 43]

Si Miho

[Hulagway sa panid 47]

Kami miabot sakay sa traktor nga naghatod ug tangke sa gatas

[Hulagway sa panid 47]

Si Ketevan

[Hulagway sa panid 48]

Pipila sa kanhing mga membro sa simbahan

[Hulagway sa panid 55]

Si Olga

[Hulagway sa panid 55]

Si Marie

[Hulagway sa panid 57]

Si Hubert, Jorge, ug Jhon

[Hulagway sa panid 58]

Si Paulo ug iyang pamilya

[Mga hulagway sa panid 63]

Si Ravahere diha sa iyang painitan sa Makemo

[Hulagway sa panid 63]

Si Matthew