Ang Labing Makaiikag nga mga Hitabo sa Miaging Tuig

ANG mga hitabo sa miaging tuig naghatag ug dugang pamatuod nga kita nagkinabuhi na sa hinapos nga bahin sa “kataposang mga adlaw,” nga gihubit sa Pulong sa Diyos ingong “makuyaw nga mga panahong lisod sagubangon.” (2 Tim. 3:1) Apan, samtang nagkalisod ang kahimtang sa kataposang mga adlaw, nahimong mas tataw usab ang panalangin ni Jehova sa iyang matinumanong mga alagad sa tibuok yuta. Bisag nagsagubang ang mga Saksi ni Jehova ug mga kalamidad, krimen ug kapintasan, sakit, depresyon, pagkatigulang, pagsupak, o kawalay interes, sila ‘nagmalahutayon sa lumba nga gibutang sa ilang atubangan’ tungod sa kusog nga gihatag ni Jehova.—Heb. 12:1.

“ANG KATAPOSAN SA BAKAK NGA RELIHIYON HADUOL NA!”

Sa Oktubre ug Nobyembre 2006, ang mga Saksi ni Jehova migugol ug mas daghang oras sa pagsangyaw aron ipanagtag  ang Kingdom News Num. 37, nga nag-ulohang “Ang Kataposan sa Bakak nga Relihiyon Haduol Na!” Unsay reaksiyon sa mga tawo niining puwersadong mensahe?

“Husto gayod ang gisulti niini!” matod pa sa usa ka tawo sa Sweden nga wala makauyon sa pagkasalingkapaw diha sa bakak nga relihiyon. Sama niining tawhana, daghan ang misugod sa pagtuon sa Bibliya tungod sa Kingdom News.

Nepal

Sa Kathmandu, gihatagan ni Dil ug Kingdom News ang usa ka tawong hinimba nga gibiyaan sa iyang asawa duha ka bulan na ang milabay tungod sa iyang pagkapalahubog. Sa dihang mibalik si Dil kauban ang iyang bana nga si Buddha aron hisgotan ang Kingdom News, ang tawo miingon nga wala siya makaangay sa binuhatan sa ubang membro sa ilang simbahan. Miingon usab siya nga ang gisulti sa mga Saksi ni Jehova lahi sa iyang nadunggan sa simbahan. Gibasa sa brader ang Pinadayag 18:2-4 ug iyang gipasiugda ang kahinungdanon sa paggawas gikan sa “Dakong Babilonya.” Sa ikatulong pagduaw, ilang gisugdan pagtuon ang leksiyon 13 sa brosyur nga Gikinahanglan. Sa ikalimang pagduaw, ilang nahimamat ang asawa, nga mipauli na sa balay. Ang asawa duna nay nahibaloan bahin sa mga Saksi ni Jehova ug nakauyon siya sa atong mensahe. Sa ikapitong pagduaw, ang asawa miduyog na sa pagtuon. Siya miingon, “Ang akong bana dili na moinom.”

Brazil

Gipapilit sa usa ka drayber ug traysikol ang nadawat niya nga Kingdom News diha sa luyo sa iyang dyaket sulod sa pipila ka adlaw. Busa dili gayod kalikayan nga makita kini sa mga pasahero samtang nagpadulong sila sa ilang destinasyon.

Duha ka sister sa Brazil nakuratan sa dihang miduol sila sa usa ka balay tungod sa gipaskin nga karatula, “Makasulod mo, apan dili mo makagawas nga buhi.” Kay nahadlok, sila nangutana sa ilang kauban nga duha ka brader kon unsay angay nilang buhaton. Ang mga brader nakahukom nga adtoon ang balay. Human mangayo sa giya ni Jehova, ang mga brader mipakpak, nga maoy ilang paagi sa pagpahibalo sa tagbalay nga  dunay tawo. Ang tagbalay, nga usa diay ka polis, malipayong midawat sa Kingdom News. Iyang gipatin-aw kanila nga nagreper siya sa iyang balay ug may mga materyales sa likod sa balay mao nga nagbutang siyag karatula aron mahadlok ang mga kawatan. Pagbalik sa mga brader, siya misugot nga magtuon sa Bibliya.

Mongolia

Makadaghan nang sangyawi ni Tsetsegmaa ang iyang magulang nga babaye. Ang iyang magulang nakatambong nag tigom ug kaduha na siya makatambong sa Memoryal, apan dili kaayo siya interesado ug dili gustong magtuon sa Bibliya. Apan, pagkakita niya sa Kingdom News Num. 37 diha sa balay ni Tsetsegmaa, napukaw ang iyang interes. Sa duha ka oras nila nga panaghisgot, daghan siyag gipangutana nga gitubag usab ni Tsetsegmaa pinaagi sa Bibliya. Siya nahingangha sa iyang nadungog ug gusto niyang makakat-on ug dugang pa. Karon regular na siyang nagtuon sa Bibliya.

Georgia

Sa dihang gitanyagan sa mga Saksi ug Kingdom News ang usa ka babaye, siya nangutana kanila kon kana ba usa ka relihiyosong basahon. Pagtando sa mga Saksi, iyang gidawat ang Kingdom News ug misaad nga basahon kana. Pagbalik sa mga Saksi, siya nangutana kon nalimbongan ba siya sa Ortodoksong Simbahan. Naguol siya sa kahimtang sa kalibotan ug sa nagakahugno nga moralidad sa mga batan-on. Siya miingon nga naglisod siya sa pagpakigsulti sa iyang mga anak. Gibasa sa mga Saksi kaniya ang 2 Timoteo 3:1-5, ug iyang gidawat ang librong Gitudlo sa Bibliya. Sa dihang molakaway na ang mga Saksi, siya miingon: “Kombinsido ako nga tinuod ang inyong relihiyon. Ako nakadayeg gayod sa inyong mga batan-on tungod kay sila maayog pamiste, matinud-anon, ug maayog moral.” Siya karon tigbasahan na sa atong mga magasin.

Bangladesh

Si Richel, nga usa ka 19 anyos nga sister, nanagtag ug Kingdom News Num. 37 sa teritoryo nga wala pa masangyawi sukad. Bisag layolayo kadto sa iyang gipuy-an, miadto gayod siya didto tungod sa espesyal nga kampanya. Diha sa  ikaduhang balay, iyang nahimamat ang duha ka batan-ong babaye nga nag-angkong Kristohanon, kansang amahan namatay duha ka bulan pa lang ang milabay. “Nganong gitugot man sa Diyos nga mahitabo kini?” sila nangutana. Gitubag kana ni Richel pinasukad sa Bibliya. Ang mga batan-on malipayong midawat sa Kingdom News, ug ila pa ganing giingnan si Richel, “Diyos ang nagpaanhi kanimo sa among balay.” Kay nasabtan ni Richel nga kinahanglang tabangan sila sa espirituwal, iyang gitanyagan sila ug pagtuon sa Bibliya ug ila kining gidawat. Sila mangandam pag-ayo sa pagtuon ug sila daghag pangutana. Tungod niana, si Richel kinahanglang manukiduki, apan malipay siya sa pagtudlo sa kamatuoran ngadto sa mga tawo nga gigutom sa espirituwal.

Armenia

Si Eliza nga usa ka regular payunir giteleponohan ni Lilit, nga nagtuon sa Bibliya kaniadto. Siya miingon, “Kon  aduna kay buhaton ugma, biyai usa na. Aria ko ugma kay mopadayon ko sa pagtuon.” Unsa may nahitabo? Sa unang pagtuon ni Lilit ug Bibliya uban sa mga Saksi ni Jehova, giingnan siya sa iyang bana: “Pagpili, si Jehova o ako.” Busa, siya mihunong sa pagtuon. Paglabay sa duha ka tuig, siya nakadawat ug Kingdom News Num. 37 samtang gisuroy niya ang iyang mga anak sa parke. Kini nakapukaw pag-ayo sa iyang interes nga tungod niana iyang giprangkahan ang iyang bana, “Kontento na tingali ka nga mabuhi ug 50 ka tuig ug dayon mamatay, apan ako dili!” Dayon iyang gipasaligan ang iyang bana nga kon magtuon siya sa Bibliya mausab ang iyang di maayong mga kinaiya, mao nga wala na mosupak ang iyang bana. Karon malipayon na siya sa iyang pagtuon nga may pag-uyon sa iyang bana, kinsa maoy moatiman sa mga bata samtang nagtuon siya.

Cambodia

Panahon sa espesyal nga kampanya, si Hugues nga usa ka misyonaryo misangyaw ngadto sa usa ka lalaki nga Muslim. Human niya mabasa ang Kingdom News, siya miuyon nga ang mga relihiyon dili gayod angayng makigbahin sa gubat. Siya nahigawad usab sa iyang relihiyon, kay sumala pa niya nadaot kono ang reputasyon niini tungod sa mga membro nga panatiko. Gibasa ni Hugues kaniya ang Salmo 46:9, nga nagpakita sa saad sa Diyos nga mawala na unya ang gubat. Pagkasunod semana, gipakita ni Hugues kaniya ang librong Gitudlo sa Bibliya. Gipabilhan na niya karon ang Bibliya ug regular na siyang nagtuon niini.

Rusya

“Nahibalo ko nga ang inyo maoy tinuod,” matod sa usa ka paring Ortodokso nga midawat ug Kingdom News gikan sa duha ka sister, “ug laglagon sa inyong Diyos nga si Jehova ang tanang bakak nga relihiyon apan ang inyo maoy magpabilin.” Dayon, iyang gisulti kanila kon unsay iyang nahibaloan bahin sa langitnong paglaom ug sa paraiso sa yuta. Gipangutana siya sa mga sister kon nganong nagpabilin pa siya sa iyang relihiyon nga nahibalo man siya nga laglagon kini. “Aw, mao man god ni ang akong trabaho,” matod pa niya. “Aduna koy tulo ka apartment ug upat ka sakyanan. Di nako ni kabiyaan.”

 ESPESYAL NGA KAMPANYA SA PAG-ANUNSIYO SA MEMORYAL

Sa Lunes, Abril 2, 2007, ang mga Saksi ni Jehova sa tibuok kalibotan nagdayeg sa Diyos tungod sa iyang di-takos nga kalulot ug gugma pinaagi sa pagsaulog sa Panihapon sa Ginoo. Agig pagpangandam niining hinungdanong okasyon, dihay espesyal nga imbitasyon nga gipanagtag sa tibuok kalibotan sukad sa Marso 17 hangtod sa Abril 2. Gipahimuslan sa daghang estudyante sa Bibliya ug mga bata kining panahona pinaagi sa paggugol ug daghang oras sa pagsangyaw sa maayong balita.

Tinipong Bansa

Sulod sa duha ka oras sa gabii sa Memoryal, ang brader nga receptionist sa hedkuwarter sa mga Saksi ni Jehova sa Brooklyn, New York, nagkapulikig tubag sa mga tawag sa telepono gikan sa mga tawo nga nagpakisayod kon asa sila makatambong ug Memoryal. Daghan ang nanawag tungod kay nakadawat silag imbitasyon sa Memoryal. Usa ka babaye miingon: “Mao pay akong pag-abot sa balay ug nakita nako ang inyong imbitasyon para sa okasyon nga himoon karong gabii. Gusto kong motambong, apan wala ko mahibalo kon unsa kining orasa magsugod.”

Si Jacquelin, nga nag-edad ug 16, naghatag ug imbitasyon sa Memoryal sa iyang maestra ug iyang gisaysay ang kahinungdanon niini. Sa wala damha, mitambong ang iyang maestra. Kay gipahigayon man ang programa diha sa usa sa mga Assembly Hall sa mga Saksi ni Jehova, gisuroy ni Jacquelin ang iyang maestra pagkahuman sa programa. Ang maestra  nakadayeg sa kahinlo ug sa pagkaorganisado sa maong pasilidad ilabina gayod kay mga boluntaryo ra ang nagtukod ug nagmentinar niini. Giganahan kono kaayo siya sa pakigpulong ug siya miingon, “Naghisgot man tong mamumulong ug pagtuon sa Bibliya, kinsa may motuon nako?” Si Jacquelin malipayong mitubag, “Ako Maam!” Tun-an ni Jacquelin ug Bibliya ang iyang maestra kada Lunes human sa klase.

Habagatang Aprika

Ang siyam ka magmamantala sa usa ka kongregasyon sa hilit nga dapit nahibulong kon nganong usa ra ka imbitasyon sa Memoryal ang ilang nadawat nga 500 man unta ang ilang giorder sa sangang buhatan. Sa ulahi ilang nasayran nga wala diay mahibalo ang mga kawani sa buhatan sa koreyo kon para kang kinsa ang pakete tungod kay natangtang ang adres niini. Giablihan sa mga kawani sa buhatan sa koreyo ang pakete aron ilang masayran kon kinsay nagpadala ug kon kinsay gipadad-an niini. Pagkakita nila nga imbitasyon diay kini sa Memoryal, sila mihukom nga iapod-apod  kini diha sa mga kahon sa sulat sa buhatan sa koreyo. Nahibaloan kini sa mga igsoon sa dihang nakuha nila ang imbitasyon diha sa kahon sa sulat sa kongregasyon. Ang siyam ka magmamantala nalipay kaayo tungod kay 42 ang mitambong sa Memoryal, ug ang kadaghanan kanila nagdala sa imbitasyon nga gibutang diha sa ilang kahon sa sulat!

Italya

Gihatagan ni Patrizia ug imbitasyon sa Memoryal ang iyang gitun-an ug Bibliya nga si Gabriella, ug iyang gisaysay nga hinungdanon ang pagtambong niini. Ang singko anyos nga anak nga lalaki ni Gabriella nga si Mattia, nga naminaw diay sa ilang panaghisgot, nangayo pod ug imbitasyon aron iya konong ihatag sa iyang maestra. Pagkasunod adlaw, gihatag ni Mattia ang imbitasyon ngadto sa iyang maestra ug iyang gipatin-aw kon unsa ka hinungdanon ang Memoryal ug siya nanghinaot nga motambong ang iyang maestra. Pipila ka adlaw sa ulahi, panahon sa miting sa mga ginikanan ug mga magtutudlo, giingnan sa maestra si Gabriella nga siya nakadayeg kaayo sa pagtuo ni Mattia mao nga siya nakahukom nga motambong sa Memoryal. Ang maestra mikuyog kang Gabriella ug Mattia sa Memoryal. Siya naminaw pag-ayo sa pakigpulong ug siya nakadayeg sa mga bata tungod kay sila buotan kaayo. Dayon miingon siya nga iya nang nasabtan kon nganong hinungdanon ang Memoryal sama sa giingon ni Mattia. Human niadto, gihatagan ni Mattia ang iyang maestra ug libro nga Akong Basahon sa mga Estorya sa Bibliya para sa anak niini, ug tig-adtoan na si Gabriella ug Patrizia sa maestra aron makighisgot kaniya.

Mexico

Gisangyawan sa usa ka ansiyano ang ministro sa Presbiteryano ug gidapit siya sa pagtambong sa Memoryal. Malipayong gidawat sa ministro ang imbitasyon ug, sa katingala sa ansiyano, siya nangayo pa ug dugang imbitasyon aron ihatag sa iyang mga parokyano. Ang mga igsoon nalipay nga mitambong sa Memoryal ang ministro kauban sa 40 ka membro sa ilang simbahan, nga ang matag usa kanila nagdala sa ilang mga imbitasyon ug nagpakita niana pagsulod  nila sa pultahan. Ang ministro nag-ingon nga daghan pa unta ang gustong motambong apan wala mokuyog kay abi nilag dili pasudlon ang walay imbitasyon. Ang 11 ka magmamantala niining kongregasyona nalipay kaayo nga 191 ang mitambong sa Memoryal!

Australia

Ang usa ka batan-ong lalaki nanulti sa uban diha sa gym nga iyang gitrabahoan bahin sa iyang pagtuon sa Bibliya uban sa mga Saksi. Usa sa iyang nasangyawan mao ang usa ka babaye nga misugot nga motambong sa Memoryal. Sa tin-edyer pa kining bayhana, nakadungog siya sa pag-awit sa mga igsoon diha sa Kingdom Hall ug nananghid siya sa iyang mga ginikanan nga motambong, apan wala sila mosugot nga makig-uban siya sa mga Saksi ni Jehova. Bisag gidid-an siya, mitambong ra gihapon siya sa mga tigom, apan pagbalhin nilag puyo, wala na siyay kontak sa mga Saksi. Panahon sa Memoryal, gipailaila siya ngadto sa usa ka sister nga maoy midumala sa pagtuon sa Bibliya uban kaniya. Misugod siya pagtambong sa mga tigom sa kongregasyon, ug nainteres usab ang iyang bana. Balik niadtong batan-ong lalaki nga nagtrabaho sa gym, siya karon usa na ka di-bawtismadong magmamantala ug hapit nang magpabawtismo.

Kazakhstan

Usa ka interesadong babaye miingon nga dili siya makatambong sa Memoryal kay duna siyay gagmayng mga bata. Apan sa adlaw sa Memoryal, ang iyang singko anyos nga anak nga babaye nag-ilis ug miadto sa Kingdom Hall nga siya ra. Sa dihang namatikdan sa inahan nga nawala ang iyang anak, gipangita dayon niya kini. Namasin siya nga mitambong kini sa Memoryal ug tuod man, atua kini sa Kingdom Hall. Kay tua na man siya didto, mitambong na lang pod siya kauban ang iyang anak ug naminaw pag-ayo sa pakigpulong.

PAGPALEGAL SA BULUHATON

Pransiya

Sukad sa 1996, nangusog ang pipila ka opisyales sa Pransiya nga pabayron ug buhis ang sangang buhatan alang  sa alawans nga gihatag niini sa mga membro sa pamilyang Bethel sa Louviers. Apan, sa Marso 28, 2007, ang Administratibong Korte sa Paris midesisyon nga ang mga membro sa pamilyang Bethel dili kinahanglang mobayad ug buhis tungod kay sila dili man suweldado. Ang korte miingon nga “ang permanenteng mga membro sa Bethel sa Louviers nagtrabaho didto tungod sa ilang pagtuo.” Ang desisyon sa korte nagpamatuod nga ang kalihokan sa pamilyang Bethel maoy relihiyoso ug kini nahiuyon sa desisyon sa hataas nga administratibong korte sa Brazil.

Sa laing kaso, ang siyudad sa Lyon wala mosugot nga abangan sa mga Saksi ni Jehova ang usa ka bilding nga gipanag-iya sa siyudad aron gamiton sa Memoryal. Apan, sa Marso 15, 2007, ang usa ka huwes sa administratibong korte nagmando sa mga opisyales sa siyudad nga tugtan ang mga Saksi ni Jehova sa pag-abang sa maong bilding. Gisang-at sa mga opisyales sa siyudad ang kaso sa Konseho sa Estado, apan gidapigan niini ang desisyon sa administratibong korte; ang korte nag-ingon nga ang gihimo sa siyudad maoy “seryoso ug tataw nga pagyatak sa kagawasan sa pagtigom, nga maoy usa sa mga katungod sa tawo.” Ang Konseho sa Estado nagmando usab nga bayran sa siyudad ang nagasto sa lokal nga asosasyon sa mga Saksi ni Jehova niining kasoha.

Bisag pabor sa mga Saksi ni Jehova ang desisyon didto sa Lyon, wala gihapon sila lung-i sa mga magsusupak, media, ug bisan sa mga opisyales sa gobyerno. Pananglitan, sa usa ka interbiyo sa 2005, ang kanhing hawas sa French National Assembly nag-akusar nga ang mga Saksi ni Jehova kono “naorganisar samag mga mafia nga naggamit ug pagpanglimbong.” Tungod niining mabutangbutangon nga pahayag, ang mga Saksi ni Jehova nagpasakag demanda sa korte, ug sa Hulyo 2007 ang Korte sa Apelasyon sa Rouen midesisyon pabor sa mga Saksi, nga nag-ingon nga ang “dili makataronganong pahayag [sa nag-akusar] maoy mabutangbutangon [ug] naglapas sa kagawasan sa pagsulti.” Ang gobyerno sa Pransiya padayong nagpahamtang ug dili-makataronganon ug dili  subay-sa-balaod nga buhis ngadto sa Asosasyon sa mga Saksi ni Jehova. Kining kasoha gisang-at na ngadto sa European Court of Human Rights (ECHR), ug ang mga igsoon masaligon nga si Jehova nagpaluyo kanila.

Uzbekistan

Dihay kapin sa usa ka libo ka dokumentadong mga insidente sa pagpangdakop, pagbilanggo, o pag-atake batok sa mga igsoon. Daghan ang gipanakop panahon sa pagsaulog sa Memoryal sa 2005 ug 2006. Apan malipay kami sa pagtaho nga panahon sa Memoryal sa 2007, walay nahitabong kabaldahan. Hinuon, wala magdugay ang malinawong kahimtang. Dili dugay human niana, usa ka brader ug usa ka sister ang gidakop ug gisentensiyahan tungod sa pagtudlog relihiyon. Ang brader, nga minyo ug duhay anak, gisentensiyahan ug duha ka tuig nga pagkabilanggo ug kana gipahamtang dayon. Ingong silot sa sister, kunhoran sa gobyerno ang iyang suweldo ug 20 porsiyento sulod sa duha ka tuig.

Georgia

Sa Mayo 3, 2007, nagkauyon ang mga huwes sa ECHR sa pagpakanaog ug hukom nga ang gobyerno sa Georgia sad-an tungod kay gitugotan niini ang kapintasan batok sa mga Saksi Jehova. Busa, gimando sa korte nga bayran ug danyos ang mga biktima. Sukad sa Oktubre 1999 hangtod sa Nobyembre 2002, dihay 138 ka kaso sa mapintas nga pag-atake batok sa mga Saksi ni Jehova. Sa pipila ka higayon, dihay mga polis apan wala nila panalipdi ang mga biktima. Napamatud-an sa korte nga ang kanhing kagamhanan sa Georgia, gawas nga nagpasagad sa mga obligasyon niini ilalom sa European Convention on Human Rights, naglapas usab sa relihiyosong kagawasan sa atong mga igsoon tungod kay wala panalipdi niini ang mga igsoon batok sa mga panatiko. Kining tin-aw nga desisyon nagpaila gayod nga kinahanglan nilang hatagan ug kagawasan ang mga Saksi ni Jehova ug panalipdan sila batok sa pagsupak sa kadaghanan.

Eritrea

Lima ka tuig human pangusgi sa gobyerno ang pagkontrolar sa mga relihiyon nga dili sakop sa upat ka relihiyon nga ilang giaprobahan, ang mga Saksi ni Jehova nakasinati  gihapon ug grabeng pagsupak. Bisag sa balay lang magtigom ang atong mga igsoon, sila dakpon gihapon, paantoson, ug pugson sa pagsalikway sa ilang pagtuo. Hangtod niadtong Abril 2007, dunay 24 ka Saksi ni Jehova nga napriso tungod sa pagtambong sa tigom, pagsangyaw, o pagdumili sa pagsundalo. Tulo kanila nag-edad nag 60 o kapin pa, napulo ang anaa sa hugaw kaayo nga bilangguan, ug tulo ang gipriso sukad pa sa 1994. Bisag wala magmalamposon ang paningkamot nga matabangan ang atong mga igsoon, kita masaligon nga sa dili madugay ilang maangkon ang kahupayan, ug kita padayong nagsalig kang Jehova nga iyang tubson ang iyang mga alagad “gikan sa pagpanglupig ug sa kapintasan.”—Sal. 72:14.

Andorra

Ang aplikasyon sa mga Saksi ni Jehova sa pagpalegal sa ilang buluhaton, nga gisumitir niadto pang 1973, sa kataposan naaprobahan na niadtong Disyembre 14, 2006. Adunay kapin sa 150 ka magmamantala sa Gingharian nianang nasora.

Korea

Sa kapin sa 50 ka tuig, ang mga brader sa Habagatang Korea gibilanggo tungod kay sila dili magsundalo. Ingong resulta, lima kanila ang namatay. Naningkamot si Brader Yoon ug Brader Choi sa pag-apelar sa kaso diha sa mga korte sa Habagatang Korea, apan sila napakyas. Busa, miapelar sila sa Human Rights Committee of the United Nations. Sa Nobyembre 3, 2006, ang komite midesisyon nga sad-an ang Habagatang Korea sa paglapas sa katungod sa mga brader ug kini nagmando sa gobyerno nga bayran sila ug danyos. Gimandoan usab sa komite ang Habagatang Korea nga magtaganag kapiliang mga serbisyo alang sa mga tawo nga dili magsundalo tungod sa diktar sa ilang tanlag ug sa ingon dili sila mapugos sa paglapas sa ilang mga prinsipyo o sa pagpabilanggo. Sa aberids, 70 ka brader ang mapriso kada bulan.

Kaniadto, daghang brader nga nag-atubang niining isyuha igo lang mosunod sa mando sa korte nga silbihan ang sentensiya nga usa ka tuig ug tunga. Apan ning bag-o lang,  kadaghanan sa batan-on natong mga igsoon nakahukom nga iapelar ang gipakanaog nga sentensiya sa korte, ug ingong resulta ginatos ka apelasyon ang gisang-at karon. Busa ang gobyerno sa Korea nagpahibalo nga sila magtaganag kapiliang mga serbisyo nga dili konektado sa militar. Panahon ray mag-igo kon ipatuman ba gayod nila kini, ug kon ang mga serbisyo nga ila unyang ipabuhat madawat ba sa tanlag sa usa nga mohimo niana.

Argentina

Sa Hulyo 2007, ang ministro sa hustisya ug tawhanong katungod mipirma ug usa ka resolusyon nga nagpakita nga si Daniel Victor Guagliardo gibilanggo sa dili makataronganong paagi tungod kay siya midumili sa pagsundalo sumala sa diktar sa iyang binansay-sa-Bibliya nga tanlag. Kini nga desisyon dakog ikatabang niadtong gibilanggo sa di-makataronganong paagi tungod sa pagdumili sa pagsundalo.

Armenia

Desinuybe ka igsoong lalaki ang gipasakaan ug kaso sa korte sa dihang gibalibaran nila ang kapiliang serbisyo tungod kay supak gihapon kini sa ilang neyutral nga baroganan. Dayon, sa Septiyembre 2006, ang piskaliya nagpahibalo sa mga igsoon pinaagig sulat nga gisibog na ang kaso. Apan, ang kagamhanan wala pa maghatag ug kapiliang mga serbisyo nga madawat sa usa ka Kristohanon. Busa, sa tungatunga sa 2007, dihay 71 ka batan-ong mga brader nga gisentensiyahan ug hangtod sa tulo ka tuig nga pagkabilanggo.

Usa si Vahan Bayatyan sa daghang batan-ong mga Saksi nga gikasohan ug gibilanggo sa Armenia. Human siya sentensiyahi ug usa ka tuig ug tunga nga pagkabilanggo, ang abogado sa gobyerno miapelar nga patas-an ang iyang sentensiya tungod kono kay ang pagdumili ni Brader Bayatyan sa pagsundalo “walay-pasukaranan ug makadaot.” Ang korte sa apelasyon misugot niini mao nga gidugangan ug usa ka tuig ang sentensiya, ug kini nga desisyon gidapigan sa korte suprema. Nagpayl dayon ug kaso si Brader Bayatyan sa ECHR. Gidawat kana sa ECHR, nga nagpaila nga tun-an nila pag-ayo ang maong kaso. Manghinaot kita nga mahimong paborable ang desisyon  sa ECHR nga makatabang kang Brader Bayatyan ug sa uban pa nga nag-atubang sa maong isyu.

Azerbaijan

Bisag legal ang mga Saksi ni Jehova sa Azerbaijan, ang atong mga igsoon didto nakasinati gihapon ug daghang kalisdanan. Pananglitan, sa Disyembre 24, 2006, kapin sa 200 ka igsoon ug mga interesado ang nagtigom sa Baku aron magtuon sa Bibliya sa dihang mibutho ang mga polis kauban ang mga reporter sa TV ug lokal nga mga opisyales aron pahunongon ang tigom. Bisag ang mga polis walay dalang papeles sa pagrekisa (search warrant), ilang giguba ang pultahan sa giabangan nga pasilidad ug ilang gidakop ang tanang nanambong. Labing menos duha ka tawo ang gikulata. Daghan kaayong literatura ang ilang giembargo ug gipanguha sab nila ang kahon sa kontribusyon lakip na ang sulod niini nga kuwarta, legal nga mga dokumento, ug pipila ka kompiyuter nga gigamit sa paghubad sa Bibliya ug mga literatura. Kadaghanan kanila gibuhian ra nianang adlawa. Apan, ang unom ka langyawng mga boluntaryo gipapahawa sa nasod kay sila giakusahan nga “nalangkit sa relihiyosong propaganda.” Ang atong mga igsoon dinhi gibilanggo tungod kay sila dili magsundalo. Nalisdan usab sila sa pag-order ug literatura sa laing nasod.

Israel

Sa Pebrero 5, 2007, ang Korte sa Distrito sa Haifa nagpakanaog ug hukom nga ang Haifa Congress Center (ICC) sad-an sa pagpihig sa mga Saksi ni Jehova tungod kay wala sila motugot nga abangan ang ilang pasilidad para sa kombensiyon. Ingong danyos, ang korte nagmando sa ICC nga bayran ang ubang gasto sa mga Saksi sa maong kaso. Sumala pa sa pangulong abogado sa gobyerno, ang mga tagdumala sa ICC “obligado . . . nga trataron ang tanang kliyente niini sa makiangayong paagi, ug niining kahimtanga wala nila kana buhata.” Tungod sa paborableng hukom, ang atong mga igsoon sa Israel dali nang makapahigayon ug dagkong mga tigom.

Tajikistan

Duha ka kargada sa atong literatura ang giembargo sa mga opisyales sa aduwana, ug ang departamento sa kultura  giawhag sa pagdili sa atong literatura ug sa atong organisasyon. Tungod niini, duha ka misyonaryo nga graduwado sa Gilead ang gipapahawa sa nasod. Dayon, sa Oktubre 11, 2007, gidili na sa mga awtoridad ang buluhaton sa mga Saksi ni Jehova. Ang tanang kaso sa inhustisya giapelar na ug kita nanghinaot nga buksan ni Jehova ang dalan aron magpadayon ang buluhatong pagsangyaw niining mabungahong teritoryo, nga nakabatog 14 porsiyento nga pag-uswag sa 2007 nga tuig sa pag-alagad.

Ukraine

Usa ka adlaw una pa sa espesyal nga pakigpulong sa Estadyum sa L’viv sa Mayo 12, 2007, ang mga tagdumala nadala sa pagpit-os sa mga magsusupak, busa nakahukom sila nga dili ipagamit sa mga Saksi ang estadyum. Ang mga opisyales sa gobyerno sa Ukraine ug sa Tinipong Bansa gikontak dayon aron kombinsihon ang mga tagdumala sa estadyum nga ang mga Saksi ni Jehova dili hulga sa kalinaw sa siyudad. Sa adlaw nga ipahigayon ang maong pakigpulong, ang negosasyon nagpadayon pa gihapon samtang ang linibo ka Saksi ni Jehova gikan sa lainlaing dapit sa Ukraine nanghugop ngadto sa L’viv sakay sa awto, bus, ug tren. Ang atong mga igsoon malinawong nagtapok sa gawas sa gikandadohang ganghaan sa estadyum ug mapailobong naghulat samtang nagpahimulos sa makapadasig nga pagpakig-ubanay sa mga igsoon ug nanag-awit pa ganig mga alawiton sa Gingharian. Sa kalit lang, mga 20 minutos una magsugod ang programa, ang mga tagdumala sa estadyum nakombinsir ra sa pag-abli sa mga ganghaan aron makasulod ang mga igsoon. Kapin sa 27,000 ka igsoon ang nanulod sa estadyum aron maminaw sa makapadasig nga pakigpulong sa magtatan-aw sa sona.

Turkmenistan

Ang mga Saksi ni Jehova dili pa legal sa Turkmenistan. Dihay higayon nga medyo milurang ang pagsupak, apan human niana, gilutos na usab sa mga awtoridad ang mga igsoon. Bisan pa niana, ang mga igsoon maisogon apan maampingong nagtigom ug nagpaambit sa maayong balita ngadto sa ilang mga silingan. (Mat. 10:16) Tulo ka batan-ong  mga brader ang gidakop tungod kay midumili sila sa pagsundalo. Silang tulo nakombikto; ang duha wala pa pahamtangi ug sentensiya, apan ang usa gisentensiyahan na ug usa ka tuig ug tunga nga pagkabilanggo. Kay kini nga brader ginamaltratar diha sa prisohan, ang iyang kahimtang nakadani sa pagtagad sa langyawng mga nasod. Ang mga igsoon nga abogado gikan sa laing nasod wala tugti sa pagsulod sa nasod aron depensahan ang mga igsoon sa korte. Bisan pa niana, walay tawhanong awtoridad nga makababag sa atong mga pag-ampo sa Labing Hataas.—1 Tim. 2:1, 2.

Kazakhstan

Gipahunong sa unom ka opisyales sa piskaliya ang tigom nga gipahigayon sa balay sa usa ka sister sa dapit diin wala pa marehistro ang mga Saksi ni Jehova. Ang lima ka sister, hasta ang usa ka brader nga wala sa tigom nianang panahona, gipamultag dako. Ang ilang kaso giapelar na.

Turkey

Sa Hulyo 31, 2007, ang sangang buhatan sa Turkey nalipay sa dihang nadawat nila ang kompirmasyon nga narehistro na ang Asosasyon Alang sa Pagsuportar sa mga Saksi ni Jehova. Gidangtan ug duha ka tuig ang pagparehistro tungod kay ang gobyerno miapelar sa korte. Ilang gikuwestiyon ang karta sa sangang buhatan kay kini dili kono subay sa konstitusyon. Human madesisyoni sa ubos nga korte sa Istanbul nga legal ang maong karta, ang gobyerno miapelar sa korte suprema. Apan gidapigan sa korte suprema ang desisyon sa ubos nga korte mao nga kita narehistro. Tungod niana, ang sangang buhatan aduna na karoy legal nga ahensiya nga magamit sa pagpalit ug pagpanag-iyag mga propiedad, pag-abang ug mga pasilidad alang sa mga kombensiyon, pagdawat ug mga donasyon, ug pagdepensa sa intereses sa mga Saksi ni Jehova diha sa korte.

Duha ka Saksi ni Jehova ang giakusahan nga “nagsamoksamok sa mga tawo” samtang nanagtag ug Kingdom News Num. 37 ug sila gipamulta tungod niana. Apan, gikanselar sa Sisli Peace Court sa Istanbul ang maong multa, ug kini miingon nga “ang pagtanyag sa mga publikasyon sa mga Saksi  ni Jehova . . . wala maglapas sa kagawasan sa panghunahuna ug pagtuo” ug ang mga lungsoranon sa Turkey “gawasnon sa pagpakaylap sa ilang tinuohan.” Sa gihapon, ang atong mga igsoon sa Turkey nag-atubang ug laing kalisdanan, sama sa isyu sa neyutralidad, nga tungod niana ang batan-ong mga brader mahimong mabilanggo o pamultahon.

Sumala sa atong nakita sa nahisgotan na nga mga taho, ang mga Saksi ni Jehova sagad nga moapelar sa European Court of Human Rights sa dihang ang mga nasod sa Uropa mobabag sa atong katungod sa pagsimba sa atong Diyos. Sa tungatunga sa 2007, dihay 22 ka kaso nga gisang-at nganha nianang korteha, nga naglakip sa isyu sa neyutralidad, pagparehistro, ug paglutos. Ang atong mga igsoon nga nag-atubang niini nga mga kalisdanan, sa Uropa man o sa laing mga lugar, nanginahanglan gayod sa atong mga pag-ampo.—2 Cor. 1:10, 11.

PAGKAMATINUMANON UG INTEGRIDAD

Diha sa seksiyon niining Tinuig nga Basahon bahin sa kasaysayan sa mga Saksi ni Jehova sa Rusya, imong mabasa kon sa unsang paagi nahuptan sa atong mga igsoon didto ang ilang integridad ubos sa pagmando sa kagamhanang Sobyet nga nagdili sa atong buluhaton. Grabe kaayo ang ilang naagomang pagsupak. Apan bisan sa mga nasod diin legal ang atong buluhaton, si Satanas ug ang iyang binhi walay puas nga naningkamot sa pagbungkag sa atong integridad sa malipatlipatong paagi. Apan malipay gayod si Jehova kon magpabiling matinumanon ang iyang mga alagad! (Prov. 27:11) Ania ang pipila ka eksperyensiya nga nagpakita kon giunsa pagpasundayag sa katawhan sa Diyos sa tibuok kalibotan ang ilang pagtuo ug pagkamaunongon diha sa ilang adlaw-adlaw nga pagkinabuhi.

Sweden

Ang usa ka payunir nga sister nga nagtrabaho sa usa ka pribadong ospital kanunayng nag-atubang ug pagsulay kon unsaon niya paglikay sa pangamoral sa kauban niyang mga empleyado. Apan, nakahunahuna siyag epektibong estratehiya  aron malikayan ang maong mga situwasyon. Sa sinugdan pa lang, iya nang sultihan ang bag-ong mga empleyado nga siya Saksi ni Jehova, ug pirme niyang isulti nga minyo siya. Mangita siyag paagi nga masultihan ang iyang mga kauban sa trabaho bahin sa mga butang nga gusto niya ug sa iyang bana aron ipakita nga lig-on ang ilang kaminyoon. Kon kinahanglan siyang makig-estorya sa doktor bahin sa usa ka pasyente, iyang himoon kini didto sa kan-anan diin dunay laing tawo. Kon may tawo nga mosulod sa iyang gitrabahoan nga lawak ug isira niini ang pultahan, siya mag-ampo dayon kang Jehova ug makiglabot sa maong tawo sa mahigalaon apan pormal nga paagi.

Alemanya

Si Marian, nga usa ka brader, nagtrabaho sa usa ka kompaniya sa amihanang Alemanya sulod na sa 13 ka tuig. Kay hangtod man sa gabii ang iyang trabaho, maglisod siyag tambong sa tigom sa tungatunga sa semana. “Naguol ko niana, tungod kay gusto gyod kong motambong sa mga tigom,” matod pa niya. “Makadaghan kong nangayog tabang kang Jehova aron matambongan nako ang tanang tigom.” Siya nag-ampo kang Jehova nga hatagan siyag kaisog sa pagduol sa iyang labaw. Maayo ang resulta tungod kay gitugtan siya sa pagpaulig sayo sa adlaw sa tigom basta mahuman lang niya ang iyang trabaho. Maayo na unta ang tanan, apan mibalik ang problema sa dihang gipulihan ang iyang labaw ug wala na usab siya tugti sa pagpaulig sayo. Unsay gibuhat ni Marian? “Matinahoron nakong giingnan ang akong bag-ong labaw nga makigsulti ko sa manedyer sa kompaniya,” matod pa niya. Sa pagpakigsulti niya sa manedyer, si Marian naghatag ug maayong pamatuod ug iyang gisaysay ang hinungdan kon nganong gusto niyang motambong sa mga tigom. Tugtan sa manedyer nga mouli ug sayo si Marian panahon sa tigom kon mosugot ang mga kauban niya sa trabaho. Busa nakigmiting si Marian sa iyang mga kauban aron iyang ipasabot kanila ang kahimtang, nga naghatag usab kanilag maayong pamatuod. Si Marian makatambong na karon sa tanang tigom sa  tungatunga sa semana. Miingon siya: “Kinahanglang maningkamot ko pag-ayo aron makatambong sa tigom, apan ang kinasingkasing nga pag-ampo kang Jehova naghatag kanakog kusog nga labaw sa kasarangan.”

Britanya

Para kang Sophie, nga nag-edad ug 16, usa gayod ka pagsulay ang kanunayng pagpanghagad kaniya nga moadto sa mga parti sa eskuylahan. Siya miingon: “Ganahan unta ko sa pipila sa maong mga parti, apan kon moadto ko, basin unyag magbasol ko tungod kay mahimong motungha ang mga situwasyon nga makadaot kanako sa ulahi. Dili pa dugay, gihagad ko sa usa nako ka klasmet nga babaye nga motambong ug parti sa ilang balay ug giingnan ko niya nga tapoktapok lang kono kadto. Sa ulahi akong nahibaloan nga nianang semanaha diay ang iyang adlawng natawhan. Maayo gani wala ko moadto kay nabalitaan nako sa ulahi nga daghan sa iyang mga higala sa eskuylahan ang nangahubog niadtong gabhiona kay wala didto ang iyang mga ginikanan. Mao nay hinungdan kon nganong mas gusto nakong makig-uban sa mga igsoon nga lainlaig pangedaron nga makatabang kanako sa espirituwal. Kami sa akong manghod nga lalaki mangimbitar ug mga igsoon nga mas bata ug mas magulang kanamo aron magtugtog ug mga instrumento sa musika, magbarbikyu, o manuroy sa banika. Sa pagkakaron, kon hagaron ko nga moadto sa parti, akong palandongon kon unsa kahay mahimong epekto niini sa akong relasyon kang Jehova. Akong napamatud-an nga dili ka maalkanse kon imong buhaton ang husto.”

Italya

Ang 17 anyos nga si Giovanni kanunayng birigbirigan sa mga babaye sa eskuylahan, apan dihay usa kanila nga mas agresibo kay sa uban. Kay wala man siya hatagig atensiyon ni Giovanni, siya misulat kaniya nga nag-ingon: “Para nako bagay tang duha. Nakagusto ko nimo. Ganahan man god ko sa imong kinaiya, ug dili kay kana ra, aduna pay lain. Unta makahimo kag maayong desisyon. Nagmahal kanimo.” Dayon, iyang gisulat ang iyang ngalan ug gipalakrahan ug halok ang sobre. “Moangkon ko nga naglisod ko sa paghimog desisyon,”  matod pa ni Giovanni. “Sa akong hunahuna, basin wala na koy makita nga sama niya ka guwapa. Pagkahibalo sa akong mga eskolmet, ila kong giingnan nga sugton ang maong babaye. Sila miingon: ‘Pahimusli ang higayon! Anugon kaayo kon imo siyang balibaran.’ Apan, gibati nako nga naapektohan na ang akong relasyon sa Diyos. Busa nag-ampo ko kang Jehova ug nakigsulti ko sa akong mga ginikanan. Sila nakuratan tungod kay wala sila magtuo nga nag-atubang diay ako niining matanga sa pagsulay. Gitun-an namo pag-ayo ang Bibliya, nga naggamit ilabina sa libro nga Mga Pangutanang Gisukna sa mga Batan-on—Mga Tubag nga Mosaler. Nakigsulti usab ako sa hamtong nga mga igsoon sa kongregasyon. Sa kataposan, ako nakahimog hustong desisyon ug akong gibalibaran ang babaye. Makaingon ko nga mas gitahod ako karon sa akong mga eskolmet tungod sa akong kalig-on.”

Mexico

“Sa dihang 19 anyos pa ko, gisultihan ko sa doktor nga ako may juvenile rheumatoid arthritis,” nahinumdom si Antonio, nga nag-edad na karon ug 59 ug 37 ka tuig na usab sa kamatuoran. “Naguol ko pag-ayo tungod kay nabaldado ko ug nag-wheelchair sulod na sa 35 ka tuig. Usahay, mawad-an kog paglaom. Apan ang pagkahimong puliki sa Kristohanong mga kalihokan kutob sa akong maarangan nakapalig-on kanako.” Pito ka tuig kanhi, misamot pa ang kalisod ni Antonio sa dihang namatay ang iyang inahan nga maoy nag-atiman kaniya. Giunsa man kana pagsagubang ni Antonio? Siya miingon: “Sukad niadto, akong nakita nga si Jehova motabang gayod sa iyang mga alagad ug dili  gayod mobiya kanila. Gihikay sa among kongregasyon nga atimanon ko sa usa ka brader ug tagan-an usab ako sa ubang mga igsoon sa akong mga kinahanglanon.” Si Antonio nagpaabot sa panahon nga matuman na ang tanang saad sa Gingharian.

“HIMOANG MAS LUAG ANG DAPIT SA IMONG TOLDA”

“Himoang mas luag ang dapit sa imong tolda. Ug ipabuklad ang mga tabil sa tolda sa imong dakong tabernakulo.” (Isa. 54:2) Natuman gayod kining tagnaa sa kahibulongang paagi sumala sa gipakita sa nagkadakong panginahanglan alang sa dapit sa pagsimba ug sa mas dagkong mga pasilidad sa sangang buhatan. Ang pagpanukod nga gihimo sa tibuok nawong sa yuta sa miaging tuig nakahatag ug dakong kalipay sa mga Saksi ni Jehova, ilabina gayod ang pagpahinungod sa unom ka buhatan nga gihisgotan sa ubos.

Puerto Rico

Trese pa lang ka tuig human matukod ang kinaulahiang pasilidad sa sangang buhatan, kinahanglang dugangan na usab kini tungod kay midako ang pipila sa mga departamento niini. Si David Splane, nga membro sa Nagamandong Lawas, ang naghatag sa pakigpulong sa pahinungod sa adlawng Sabado, Septiyembre 16, 2006.

Colombia

Ang mga igsoon gikan sa 30 ka kanasoran nagtigom sa sangang buhatan sa Colombia niadtong Nobyembre 11, 2006, aron ipahinungod ang gidugang nga mga pasilidad sa buhatan nga nahimutang sa Facatativá, nga 42 kilometros amihanan-kasadpan sa Bogotá. Gitambongan kinig 3,605. Ang mga igsoon nga wala magkita sulod sa 30 o 40 ka tuig nagginaksanay, ug silang tanan nadasig sa pakigpulong nga gihatag ni Gerrit Lösch, nga membro sa Nagamandong Lawas.

Fiji

Mobaktas lang kag lima ka minutos gikan sa sentro sa kaulohan sa Fiji, ang Suva, makaabot ka na sa nindot kaayo nga sangang buhatan, nga nag-umbaw sa dunggoanan. Sa adlawng Sabado, Nobyembre 11, 2006, si Geoffrey Jackson,  nga membro sa Nagamandong Lawas, naghatag sa pakigpulong sa pahinungod nga gitambongan ug 410.

Burundi

Ang petsa 25 sa Nobyembre 2006, dili gayod malimtan sa mga Saksi ni Jehova niining nindot nga siyudad sa sentral Aprika. Ang 1,141 nga nanambong gikan sa 11 ka nasod nalipay sa pagpakig-uban kang Guy Pierce, nga membro sa Nagamandong Lawas, sa pagpahinungod sa maanindot nga bag-ong mga pasilidad. Tataw kaayo ang panalangin ni Jehova, ug dakog purohan nga daghan pa ang moduyog kanato sa pagsimba kang Jehova.

Rwanda

Human sa 30 ka tuig nga kasamok, nga naglakip sa pagdili sa buluhaton ug giyera sibil, ang atong mga igsoon sa Rwanda nalipay sa pag-abiabi kang Guy Pierce aron ipahinungod ang ilang bag-ong sangang buhatan nga may nindot kaayong tanaman.

Bisan pa sa linuog nga pagpuo sa rasa, diin daghang igsoon ang namatay, ang buluhaton ni Jehova miuswag gihapon niining nasora nga gitawag ug Yuta sa Linibo ka Bungtod. Ang nanambong sa programa sa pagpahinungod sa adlawng Sabado, Disyembre 2, 2006 maoy 553, ug ang 112 kanila naggikan sa 15 ka nasod.

Uganda

Ang bag-ong sangang buhatan nga nahimutang sa habagatang utlanan sa Kampala, nga kaulohan sa nasod, gipahinungod sa adlawng Sabado, Enero 20, 2007. Ang 170 sa 665 nga nanambong naggikan sa mga 20 ka sangang buhatan. Si Anthony Morris, nga membro sa Nagamandong Lawas, ang naghatag sa pakigpulong sa pagpahinungod.

“SI JEHOVA NAGBUHAT UG USA KA DAKONG BUTANG”

Sa walay duhaduha, aduna kitay katarongan nga magmalipayon kon atong tagdon ang kahibulongang mga butang nga gihimo ni Jehova sa miaging tuig. Busa duyog kitang magpasalamat sa Diyos sama sa gisulti sa salmista: “Si Jehova nagbuhat ug usa ka dakong butang sa iyang gibuhat kanamo. Kami nagmalipayon.”—Sal. 126:3.

[Kahon/Hulagway sa panid 9]

Tibuok-Kalibotang Kampanya

Ang pipila ka tawo sa lainlaing dapit nagduhaduha kon tinuod ba gayod nga gipanagtag ang Kingdom News sa tibuok kalibotan. Pananglitan, giingnan sa usa ka tagbalay sa Brazil ang usa ka magmamantala nga maghulat una kay manawag siya sa iyang amigo sa Tinipong Bansa kon nakadawat ba kinig imbitasyon. “Oo, diyes minutos pa lang ang milabay,” mitubag ang iyang higala. Nakadayeg ang tagbalay niini, busa iyang gidawat ang Kingdom News ug misaad nga basahon gayod niya kini.

[Hulagway sa panid 12]

Usa lamang ka imbitasyon ang nadawat sa kongregasyon diha sa kahon sa sulat sa buhatan sa koreyo

[Hulagway sa panid 25]

Si Antonio andam na nga mosangyaw

 [Mga hulagway sa panid 28, 29]

Pagpahinungod sa mga Sangang Buhatan

Puerto Rico

Rwanda

Colombia

 Burundi

Fiji

Uganda