Kalihokan sa mga Saksi ni Jehova sa Modernong Kapanahonan

Rusya

Ang kasinatian sa mga Saksi ni Jehova sa Rusya maoy usa ka asoy sa pagtuo ug kaisog, maingon man usab sa dili-matarog nga pagkamaunongon sa Diyos atubangan sa grabe ug walay-puas nga pagsupak. Ang pagkadestiyero, pagkabilanggo, ug ang pinugos nga pagpatrabaho wala gayod makapahunong sa mga Saksi sa pagsangyaw ni nakapaluya kanila.

Hinuon dili ra makapasubo kaayo ang ilang kaagi sanglit nahibalo sila nga kadtong nagtuo kang Jehova pagalutoson gayod. Wala nila lantawa ang ilang kaugalingon ingong makaluluoy, hinuon ilang giisip ang mga pagsupak ingong kahigayonan aron ilang mapamatud-an ang ilang pagkamaunongon sa Diyos. Matod sa usa ka brader, “Sa dihang gibasa ang among sentensiya, kalmado ra ang tanan nakong mga estudyante sa Bibliya. Nalipay gayod ako niana! Silang upat gisentensiyahan nga bilanggoon ug 25 ka tuig diha sa mga kampo. Mas bug-at ang akong sentensiya . . . Human kami sentensiyahi, kami nagpasalamat sa tabang ni Jehova. Ang mga guwardiya dili makatuo ug natingala kon nganong nalipay man hinuon mi.”

Imong mabasa ang bahin sa usa ka babaye nga nakakat-on sa kamatuoran pinaagi sa mga sulat nga gihikot sa mga bato ug giitsa sa pikas bahin sa koral sa bilanggoan. Makat-onan usab nimo kon sa unsang paagi namentinar sa mga binilanggo ang ilang lig-ong relasyon sa Diyos. Matikdi kon unsay nahitabo sa dihang ang Saksi nga mga ginikanan giakusahan sa pagbigtas sa dalunggan sa ilang anak nga babaye.

Ang mga dekada sa pagdili maoy usa lamang ka panid sa kasaysayan. Sa milabayng bayente ka tuig, talagsaon kaayo ang pag-uswag sa mga Saksi niining halapad nga yuta. Matikdi usab kon sa unsang paagi giatubang ug gisulbad sa atong mga igsoon ang bag-ong mga problema nga nalangkit sa maong talagsaong pag-uswag. Sa unang higayon, malipay kami nga igahin kining tibuok nga seksiyon sa kasaysayan sa Tinuig nga Basahon sa usa lamang ka nasod—ang Rusya.