Pagsangyaw ug Pagpanudlo sa Tibuok Yuta

Aprika

KAYUTAAN 57

POPULASYON 827,387,930

MGA MAGMAMANTALA 1,086,653

MGA PAGTUON SA BIBLIYA 2,027,124

Côte d’Ivoire

Sa balangay sa Bianouan nga nahimutang sa sidlakang bahin sa nasod, uhaw gayod sa kamatuoran ang mga molupyo didto. Pukawon sa pipila ang mga igsoon bisag alas 6:00 pa lang sa buntag aron makighisgot sa Bibliya una sila motrabaho sa kaumahan. Ang uban naghangyo nga tun-an sila sa Bibliya sa gabii human sa mga tigom sa kongregasyon. Usa ka adlaw, adunay babaye nga dili makamaong mobasa ang mihangyo sa usa ka brader nga makabaton sa librong Unsay Tinuod nga Gitudlo sa Bibliya? Siya miingon nga ang iyang bana ang mobasa niini alang kaniya. Gihatagan sa brader ug libro ang maong babaye ug giduaw sa iyang balay pagkaugma. Ang babaye ug ang iyang bana mapailobon gayong naghulat kaniya. Ang bana wala moadto sa uma kay ilang gibasa ang libro sa tibuok gabii. Karon, buot sa iyang bana nga makighisgot sa brader bahin sa iyang nabasahan. Nasugdan ang pagtuon sa Bibliya uban sa maong magtiayon.

Benin

Usa ka dakong pamilya sa hilit nga dapit nagsugod pagtuon sa Bibliya. Ang amahan maoy usa ka pastor sa relihiyon sa ilang dapit. Duha pa lang ka semana sukad sa ilang unang pagtuon, ang tibuok pamilya midawat sa pagdapit nga motambong sa distritong kombensiyon. Sa Sabado sa gabii, ang kinamagulangang anak nga babaye kalit nga nagsakit ug namatay. Bisan pa sa maong panghitabo, ang amahan mitambong sa Dominggo nga mga sesyon. Pagka-Lunes, siya miingon bahin sa kamatayon sa iyang anak: “Si Satanas ang hinungdan niini aron sa pagpahuyang kanamo, apan dili kami motugot nga mahitabo kana.” Iyang gipagawas ang iyang mga gamit sa simbahan: sotana, kupo,  bakos, lanang igdidihog, ug baston. Ang iyang asawa nga usa pod ka opisyal sa simbahan naghimo usab sa ingon. “Amo nang taposon karon ang among pagpakig-uban niining relihiyona,” miingon ang pastor. Dayon, uyon sa gihisgotan sa Buhat 19:19, iyang gisunog ang tanan atubangan sa mga tawo. Ang pamilya padayong nagmauswagon.

Madagascar

Sa miaging tuig, usa ka magwawali sa relihiyon nga nagpuyo sa usa ka balangay nga dunay mga 500 ka molupyo ang nakadawat ug librong Gitudlo sa Bibliya gikan sa usa ka Saksi sa laing balangay. Human niya kini basaha pag-ayo, ang magwawali kombinsido nga iyang nakaplagan ang kamatuoran, ug iya kining gipaambit sa mga membro sa iyang simbahan. Sa wala madugay, siya, ang iyang pamilya, ug ang 20 ka tawo miluwat sa maong simbahan ug nagsugod sa paghimog mga tigom, sama sa gihimo sa mga Saksi ni Jehova sa matag dapit. Nangabot ang mga espesyal payunir aron tabangan sila. Ilang gidumalahag mga pagtuon sa Bibliya ang daghang interesado ug gihikay ang Pagtuon sa CBS ug Bantayanang Torre nga regular. Sa Oktubre, lima ang nahimong dili-bawtismadong mga magmamantala, ug karon gihikay sa mga payunir ang tigom alang sa Pakigpulong Publiko ug Tunghaan sa Teokratikanhong Ministeryo. Ang kasagarang  tumatambong mokabat ug 40, ug kapin sa 20 ang gidumalahag mga pagtuon sa Bibliya.

Habagatang Aprika

Si Hennie ug ang iyang asawa namalaybalay. Samtang sila naglakaw kilid sa koral sa usa ka balay, usa ka isog nga iro ang kalit nga misuksok sa iyang baba sa buho sa koral ug gipaak ang kamot ni Hennie. Siya nagkadugo pag-ayo, busa sila midalidalig uli, dayon gihinloan ug gibendahean sa iyang asawa ang iyang samad. Human niana, miadto si Hennie sa doktor. Siya miingon sa iyang asawa nga dili niya tugotan nga ang usa ka iro makapahunong kaniya sa pagsangyaw, busa sila mibalik sa teritoryo mga usa ka oras sa ulahi. Sila misugod sa sunod nga balay nga tupad niadtong dunay isog nga iro. Human sila makaduaw ug pipila ka balay, usa ka tawo ang nagpadayon kanila. Siya namati pag-ayo ug buot magpaduaw pag-usab. Nasugdan ang usa ka pagtuon sa Bibliya, ug wala madugay siya tigtambongan na sa mga tigom. Sa dihang siya miluwat sa Dutch Reformed Church, ang usa ka opisyal sa simbahan nakigkita kaniya ug nagtanyag kaniya nga mahimong diakono. Apan, hugot ang iyang desisyon nga moluwat na sa maong relihiyon. Siya padayong nagmauswagon ug nagpalista na sa Teokratikanhong Tunghaan sa Ministeryo.

Tanzania

Niadtong Oktubre 2005 panahon sa kampanya sa pagsangyaw sa hilit nga teritoryo, ang siyam ka igsoon gikan sa Kongregasyon sa Iringa miadto sa Pawaga, mga 75 kilometros ang gilay-on. Ilang nadunggan nga dunay nag-inusarang magmamantala sa maong dapit, ug ila siyang gipangita. Human nila mapangutana ang daghang tawo, nakaplagan nila ang maong brader, ug ang brader miingon nga kapin nag 20 ka tuig siyang nagpuyo didto, nga nagtuo nga gibando pa gihapon ang buluhaton sa Gingharian sa Tanzania. Siya nagsangyaw sa uban sulod sa maong mga tuig, ug siya miingon nga dunay pipila nga interesado gayod sa mensahe sa Bibliya. Ang mga igsoon nga gikan sa Kongregasyon sa Iringa miboluntaryo sa Pawaga ug moestar sila didto ug tagduha ka semana aron maugmad ang interes sa mga tawo. Sa 2006, duha ka regular payunir ang mibalhin didto aron tikaron ang maong tabunok nga teritoryo. Ang nag-inusarang igsoon natabangan sa espirituwal, ug ang gamayng grupo duna nay  siyam ka magmamantala karon. Sa pagkakaron, ang ilang mga tigom gihimo ilalom sa kahoy, apan sila nagplano nga magtukod ug gamayng tigomanan, gamit ang lokal nga mga materyales.

Rwanda

Ang usa ka tin-edyer nga si Gentille nahimong inila tungod sa iyang abilidad sa pagpamuntos sa dulang saker. Ginganlan siya sa mga tawo ug Manayibitego, usa ka Kinyarwanda nga pinulongan nga nagkahulogang “Diyos sa Pagpamuntos.” Pipila ka Italyano ang nakamatikod sa iyang abilidad ug nagtanyag kaniyag dugang pagbansay. Ilang gidapit siya nga mosalmot sa dulang saker didto sa Italya. Ang pag-adto sa Uropa ug ang kahigayonan nga mahimong inilang tigdulag saker sa tibuok kalibotan maoy usa ka madanihong tanyag. Apan, si Gentille nasayod nga kon dawaton niya ang maong tanyag, mabiyaan niya ang iyang pamilya. Usa ka Saksi ang iyang inahan, ug bisan pag siya nagtuon sa Bibliya, wala niya kini seryosoha. Ang pagdulag saker maoy labing hinungdanon sa iyang kinabuhi. Nakig-estorya si Gentille sa iyang inahan bahin sa maong butang ug iyang naamgohan nga mahimong mameligro ang iyang espirituwalidad. Iya kining gibalibaran ug gihimong panguna sa iyang kinabuhi ang intereses sa Gingharian. Nabawtismohan siya sa dili pa dugayng asembliya.

 MGA NASOD SA AMERIKA

KAYUTAAN 55

POPULASYON 893,357,181

MGA MAGMAMANTALA 3,367,544

MGA PAGTUON SA BIBLIYA 3,236,692

Curaçao

Usa ka adlaw sa dihang nagdumalag pagtuon sa Bibliya ang usa ka brader, gitunolan siyag usa ka bala sa tagbalay ug dayon nangutana kon nahibalo ba siya kon unsa kana. Giingnan siya sa lalaki nga niadtong wala pa magduawan kaniya ang brader, pipila ka bulan na siyang nagplano nga maghikog tungod kay nawad-an siyag trabaho ug pamilya. Buot gayod niyang manimalos ug siya nakahukom nga iyang patyon ang upat ka tawo nga gituohan niyang maoy hinungdan sa iyang mga problema. Iyang gibutangag upat ka bala ang iyang rebolber, samtang ang usa iyang gibilin aron maoy iyang gamiton sa paghikog. Apan sa wala pa siya mobiya sa balay, nakahunahuna siya sa pagpangayog tabang sa Diyos. Iyang giablihan ang telebisyon ug nangita siyag estasyon bahin sa relihiyon. Nianang tungora, dunay duha ka Saksi nga nanuktok sa pultahan, ug sa wala madugay gidumalahan siya nilag pagtuon sa Bibliya. Iyang gilabay ang upat ka bala, apan iyang nalimtan ang ikalima. Sa dihang iya kanang nakaplagan sa iyang bulsa, iya kanang gipakita sa brader, nga nagsugilon sa iyang planong paghikog, ug nag-asoy kon sa unsang paagi nausab ang iyang kinabuhi sukad nga siya nagtuon sa Bibliya. Siya miingon nga lima ka tawo ang utangan sa ilang kinabuhi sa mga Saksi ni Jehova. Sa pagkakaron, tigtambongan na siya sa mga tigom.

Uruguay

Usa ka babaye ang midapit sa duha ka brader ngadto sa iyang balay. Siya naghilak samtang nagsulti kanila nga tibuok gabii siyang nag-ampo sa Diyos, nga nangaliyupo nga ipadayag unta kaniya ang Iyang kabubut-on. Dili pa dugay nga  giduaw siya sa mga pastor sa ilang simbahan aron sa pagpangolektag ikapulo gikan sa dakong kantidad nga iyang nadawat. Naguol siya kay wala gayod siya duawa sa maong mga pastor sa laing okasyon, bisan pag mihangyo siya sa ilang tabang panahon sa malisod kaayo nga mga kahimtang. Kapin na sa usa ka bulan nga wala siya mosimba. Sa kataposan, iyang giingnan ang usa sa mga pastor nga siya mibating nalimbongan sa ilang nagkasumpaking mga pagtulon-an. Apan inay tubagon ang iyang mga pangutana, giingnan hinuon siya sa pastor nga gabaan gayod siya sa makapito tungod sa iyang pagbiya sa iyang relihiyon. Gisaysayan siya sa mga igsoon nga ang Diyos naggamit sa iyang mga manulonda sa pagpangita sa mga tawong naninguha sa kamatuoran. Daghag pangutana ang babaye, ug gisugdan dayon ang pagtuon kaniya sa librong Unsay Tinuod nga Gitudlo sa Bibliya? Sa ulahi miapil usab sa pagtuon ang iyang bana, ug silang duha mitambong sa Memoryal ug sa espesyal nga pakigpulong. Nakadayeg gayod sila sa kalidad sa pagpanudlo didto sa Kingdom Hall ug halos dili makatuo nga walay gihimong pagpangolekta didto. Padayon ang ilang pag-uswag ug nakakita silag daghang higala diha sa kongregasyon.

Chile

Ikaingon nga ang estudyante sa Bibliya nga nagpuyo sa kinatumyan sa habagatang bahin sa kalibotan mao ang babaye nga nagpuyo sa hilit nga dapit sa Cape Horn. Siya ang asawa sa tigbantay sa parola sa maong hilit nga dapit. Sa nagpuyo pa siya sa Punta Arenas, usa ka oksilyare payunir nga sister ang nagdumala kaniyag pagtuon sa Bibliya sulod sa upat ka semana. Human niana siya mibalhin sa Cape Horn. Sukad sa iyang pagbalhin, gihimo ang pagtuon kaniya pinaagig telepono. Siya padayong miuswag.

 Costa Rica

Dunay mga 10,000 ka Guaymi nga mga Indian ang nagpuyo niining nasora, ug ang kadaghan kanila anaa sa Sixaola, usa ka gamayng lungsod nga nahimutang duol sa utlanan sa Panama. Ubay-ubay sa maong mga lumad ang interesado gayod sa Bibliya. Aron matagan-an ang espirituwal nga mga panginahanglan sa maong mga tawo, giasayn sa maong dapit ang batan-ong magtiayon nga espesyal payunir. Kinahanglang tun-an una nila ang pinulongan sa mga tawo didto. Uban sa tabang sa 26 ka igsoong Guaymi, dako gayod ang ilang nalampos. Sa unang higayon, adunay gihimong Memoryal sa pinulongang Guaymi, ug wala damha nga ang mitambong niini miabot ug 264. Sukad niadto, nagpadayon ang ilang pag-uswag. Pananglitan, ang usa ka CBS nga may 13 ka magmamantala adunay aberids kanhi nga 20 ka tumatambong. Karon 40 na ang tigtambongan niini. Tungod niini, duha pa ka dugang grupo sa CBS ang naporma.

Panama

Ang usa ka magtutudlo sa pisikal nga edukasyon nga si Ramiro nagsugod pagtuon sa Bibliya uban sa mga Saksi ni Jehova niadtong 2004. Nianang panahona, siya mogugol lamang ug 12 ka oras matag semana sa pagtudlo sa unom ka grupo sa mga estudyante. Sanglit kinahanglan man siyang mogugol ug 24 ka oras sa pagtudlo matag semana, giingnan siya sa direktor sa eskuylahan nga iyang gamiton ang nahibiling 12 ka oras sa pagtudlo ug bahin sa relihiyon sa mao ra gihapong grupo sa mga estudyante. “Tudloi sila bahin sa Diyos, kang Jesus, ug sa Bibliya,” matod sa direktor. Gitudlo ni Ramiro ang kon unsay iyang nakat-onan. Nianang tuiga, 150 ka estudyante nga anaa sa ikaunom ngadto sa ikawalong mga grado ang iyang  gitudloan sa librong Kahibalo nga Motultol sa Kinabuhing Walay Kataposan. Pagkasunod tuig, sa dihang giluwatan ang librong Unsay Tinuod nga Gitudlo sa Bibliya?, kuwalipikado na si Ramiro nga mahimong di-bawtismadong magmamantala. Siya padayon karong nagtudlo sa maong mga klase, nga naggamit sa librong Gitudlo sa Bibliya. Ang gidaghanon sa mga estudyante mikabat nag 160, nga gibahin sa unom ka grupo. Unsa man ang resulta? Gidumalahan na karon ug pagtuon sa Bibliya ni Ramiro ug sa ubang mga magmamantala sa kongregasyon ang pipila sa maong mga estudyante. Ang mga ginikanan sa pipila ka estudyante nagpasalamat kang Ramiro tungod sa ilang nakitang pag-uswag sa panggawi sa ilang mga anak. Ang pipila sa mga ginikanan nakatambong na sa mga tigom sa kongregasyon ug ang uban nakatambong pa gani sa atong mga asembliya. Si Ramiro nabawtismohan sa miaging Nobyembre ug padayon niyang gipahimuslan pag-ayo ang matag kahigayonan sa pagtudlo sa kamatuoran sa Bibliya.

Guatemala

Sa siyudad sa Guatemala, giduaw sa usa ka magmamantala nga si Jeremy ang usa ka batan-on nga iyang gidumalahag pagtuon sa Bibliya. Ang balay sa maong batan-on nahimutang sa huot kaayo nga dalan. Sa dihang nanuktok si Jeremy, giablihan siya sa magulang nga babaye sa batan-on ug giingnan nga wala ang iyang manghod. Samtang anaa pa sa pultahan si Jeremy, dihay duha ka batan-on nga miduol kaniya. Ang usa nagtion kaniya sa ulo ug pistola, ug miingon, “Gisugo ako sa pagpatay kanimo.” (Sa ulahi nasayran ni Jeremy  nga mao diay kana ang isulti sa mga tulisan aron hadlokon ang ilang mga biktima.) Si Jeremy miasoy: “Gisirad-an sa babaye ang pultahan, ug akong gipangutana ang mga lalaki: ‘Unsa may inyong tuyo?’ Ang usa kanila mitubag: ‘Nag-unsa ka man dinhi?’ Ako silang giingnan nga ako nagsangyaw sa Pulong sa Diyos. Siya misingka: ‘Unsa man nang imong mensahe, hala sulti!’ Gikulbaan ako pag-ayo ug wala ko mahibalo kon unsay himoon. Samtang akong gipagawas ang akong Bibliya, ang lalaki nga nagkupot sa pistola mihilak tungod kay nahibalo siya nga daotan gayod ang iyang gihimo. Siya mihangyo nga ako siyang tabangan. Iyang giutingkay ang akong bag ug iyang gikuha ang Pagmata! nga naghisgot bahin sa salapi. Gikapkapan ako sa laing usa aron pangitaon ang akong pitaka, apan giingnan siya sa nagkupot ug pistola: ‘Ayaw siyag hilabti.’ Siya nagpasalamat, dayon iya kong gigakos, ug sila mibiya. Human niana, kalmado na kaayo ko, ug akong gipasalamatan si Jehova nga iya kong giluwas sa maong panghitabo.”

Dominican Republic

Usa ka sister nga orthodontist (espesyalista sa pagpahiluna sa posisyon sa ngipon) ang mitambong sa usa ka adlawng seminar bahin sa mga pamaagi sa pag-atiman sa ngipon. Kapig 250 ka dentista ang gidapit ug nakatambong sa maong seminar aron mokuwalipikar sa pagtungha sa usa ka mahal ug abanteng kurso sa Uropa. Walo lamang ka dentista ang kuhaon. Pagkahapon, ang sister giingnan nga usa siya sa mga napili nga motungha sa maong kurso ingong eskolar. Ang sister nasorpresa ug mitubag: “Salamat nga inyo kong gihatagan sa maong kahigayonan, apan wala nako pil-api ang aplikasyon, ug dili nako dawaton ang inyong talagsaong tanyag. Isip usa sa mga Saksi ni Jehova, dili nako ibaylo sa bisan unsang butang ang espirituwal nga kaayohan sa akong pamilya. Kon akong dawaton ang maong kurso, kinahanglang gahinan gayod nako kanag igong panahon, apan aduna kamiy lima ka tigom nga angay gayod nakong gahinag panahon. Mas palabihon pa nakong dili na lang motungha sa maong kurso kay sa magiyan sa droga ug mahimong salawayon ang akong duha ka ulitawong anak tungod sa akong pagbiya kanila.”

 ASIA UG ANG TUNGANG SIDLAKAN

KAYUTAAN 47

POPULASYON 3,993,686,009

MGA MAGMAMANTALA 607,112

MGA PAGTUON SA BIBLIYA 496,577

Israel

Namatikdan sa usa ka batan-ong oksilyare payunir nga si Ella ang usa ka edarang babaye nga naglisod pagdala sa iyang basura. Gitabangan siya ni Ella ug iya usab siyang gisangyawan sa mubo. Gihatag sa babaye ang iyang adres, mao nga giduaw siya ni Ella sa makadaghan, apan wala sila magkita. Sa kataposan, giablihan siya sa babaye. Sanglit medyo bungol, wala diay madunggi sa babaye ang pagpanuktok ni Ella sa miagi. Siya gidumalahag pagtuon sa Bibliya. Bisan pag ateyista ang maong babaye sa sinugdan, sa ngadtongadto miuswag ang iyang pagpabili sa Diyos ug sa iyang Pulong. Human sa duha ka tuig, iyang gipahinungod ang iyang kinabuhi kang Jehova ug di pa dugayng nabawtismohan sa edad nga 92.

Mongolia

Si Terbish, nga usa ka edarang babaye, nagtrabaho sa tindahan sa mga libro sa tibuok niyang kinabuhi. Sa dihang giduaw siya sa 18 anyos nga payunir nga sister nga si Munkhzaya, si Terbish miingon nga daghan na kaayong libro ang iyang nabasa. Siya miingon nga tungod sa kadaghan na sa iyang nabasa, masabtan dayon niya ang bisan unsang libro pinaagi lamang sa pagbasa sa sinugdanan, o kaha sa tunga-tunga o sa tumoy niini. Apan lahi ang Bibliya, kay bisag giunsa niya kini pagbasa, wala gayod siya makasabot niini. Misulay siya sa pagsimba, apan wala kana makatabang kaniya. Busa, personal niya kining gitun-an, nga naghimog mga nota sa matag teksto. Buot gayong masabtan ni Terbish ilabina ang Hebreohanon 11:6. Gipatin-aw ni Munkhzaya kaniya ang maong teksto, gitanyagan siyag pagtuon sa Bibliya, ug gidapit siya sa pagtambong sa Kingdom Hall. Sa pagkadungog niya sa nahimutangan  niini, si Terbish miingon: “Mao ba na ang bilding nga nindot kaayog mga bulak sa gawas? Kada agi nako sa maong dapit, mohunong gayod ako aron tan-awon ang kanindot niini. Mahimo mo ba akong ipailaila sa tig-atiman niini?” Gipailaila siya ni Munkhzaya sa tig-atiman sa mga bulak. Sa pagkakaron maikagon si Terbish sa pagkat-on bahin sa Maglalalang ug nagtambongan na sa mga tigom. Si Munkhzaya miingon, “Sa wala pa nako masangyawi ang maong babaye, dugay na diay siyang nasangyawan sa mga bulak.”

Japan

Tungod sa kasakit sa iyang mga bitiis, dili na mahimo sa 78-anyos nga si Hiroko ang iyang nahimo kaniadto sa pagsangyaw. Siya nag-ampo kang Jehova alang sa giya, ug iyang gihimong teritoryo ang puliking terminal sa bus diin makalingkod siya didtog mga 30 minutos. Siya mapahiyomon ug nagpakitag interes sa mga tawo. Duna usay usa ka ospital sa duol, mao nga kon may mga tawo nga nagdalag tambal, iyang pangomostahon ang ilang panglawas. Kon iyang makita nga dunay naglisod sa pagsabot sa impormasyon sa biyahe sa bus, iya silang tabangan, ug kadtong mga wala masinati sa lugar, iyang tudloan kon asa ang nindot nga suroyanan. Siya mamati kanila dihang sila mosulti ug dayon magtanyag kanilag mga magasin. Dunay pipila ka tawo nga regular niyang makita sa terminal; maong duna gihapon siyay mga balikduaw.

Myanmar

Si Lazaru maoy usa ka tigpayuhot ug droga. Ang iyang paagi sa pagkinabuhi naglangkit sa droga, krimen, ug tanang matang sa bisyo. Apan sa dihang gipakita kaniya sa usa ka payunir nga sister ang giingon sa Bibliya nga ang ngalan sa Diyos maoy Jehova, giila dayon ni Lazaru nga kini mao ang kamatuoran ug midawat siyag pagtuon sa Bibliya. Bisan tuod ug taastaas  nga panahon ang iyang gigugol sa pagtuon, apan nagpadayon ang iyang pag-uswag. Ang labing lisod alang kaniya mao ang bug-os nga pagbag-o sa iyang pagkinabuhi. Sa dihang giingnan niya ang iyang mga kauban nga mohunong na siya sa pagpakig-uban kanila, nabalaka sila pag-ayo sanglit daghan man siyag nahibaloan bahin sa ilang ilegal nga mga kalihokan sa droga. Bisan pag daghan ang misulay sa pagpatay kaniya, apan kanunayng nakaikyas si Lazaru. Sa ngadtongadto, mibalhin siyag puyo sa laing lugar, ug siya nabawtismohan uban sa iyang asawa.

Taiwan

Mihunong kadiyot ang pipila ka igsoon atubangan sa usa ka painitan nga may talagsaong ngalan, nga kon hubaron sa Iningles—The Book of Ezra Coffee Shop. Kay naikag, gipangutana sa usa ka igsoon ang tag-iya kon nganong iyang gigamit ang ngalang Ezra (Esdras). Ang tag-iya miingon nga nakadayeg gayod siya kang Esdras tungod sa iyang kasibot sa matuod nga pagsimba. Hinimba diay ang maong tawo sulod na sa daghang katuigan, apan mihunong siya sa pagsimba di pa dugay tungod kay ang iyang asawa nga usa ka Vietnamese dili makasabot sa mga sermon sa ilang simbahan. Miingon ang igsoon nga siya mobalik aron sa paghatod ug Bibliya nga Vietnamese, ug pagkahapon niana ilang nadawat ang Bibliya. Nasugdan ang usa ka pagtuon uban sa tibuok pamilya.

India

Sa usa ka lungsod diin grabe ang pagsupak sa buluhatong pagsangyaw, lima ka sister ang gipriso sa upat ka adlaw tungod sa ilang pagsangyaw. Sa sinugdanan, dili maayo ang tinagdan sa babayeng warden ngadto kanila ug iya silang gipasidan-an nga dili magsangyaw bahin sa Kristiyanidad sulod sa prisohan. Apan sa paglabay sa mga adlaw, iyang namatikdan ang ilang lumo ug mahigugmaong tinamdan. Tungod niana, nausab ang iyang pagtagad kanila. Gibahinan sa mga sister ang ilang kaubang mga piniriso ug ang warden sa mga prutas ug mga pagkaon nga ilang nadawat gikan sa mga igsoon. Sa usa ka gabii, nadunggan sa warden ang mga sister nga naghisgot ug mga punto gikan sa librong Pakigsuod Kang Jehova. Sa wala madugay, milingkod ang warden atubangan sa ilang selda, ug miapil siya sa ilang panaghisgot. Sa adlaw nga gibuhian na ang mga sister, namatay ang usa ka paryente sa warden. Gihupay siya sa mga sister pinaagi sa paglaom sa pagkabanhaw.

 Sayosayo niana, dihay laing babayeng warden nga nangutana kon nganong napriso sila. Gisaysayan siya sa usa sa mga sister nga nasaypan lang pagsabot ang pagsangyaw ingong ilegal nga pagpangabig ug mga tawo ngadto sa laing relihiyon. Kay nakadayeg sa iyang nadunggan, ang warden miingon: “Bisan pa sa inyong kahimtang, kalmado gihapon kaayo ang inyong sinultihan. Maulaw ko ninyo kay masuk-anon kaayo ko. Sultihi lang unya ko ninyo kon sakit na kog sinultihan, ug tudloi usab ako sa pagsulti nga sama kaninyo. Wala gayod ako makasabot kon nganong prisohon man ang mga tawong sama ninyo.” Kon duna siyay bakanteng oras, moadto ang maong warden sa mga sister, ug moingon: “Sige, sultihi ko ninyog dugang bahin sa Bibliya. Makapagaan gayod kana sa akong gibati.” Dihay duha ka babayeng piniriso nga may kasong pagbuno nga natandog sa mensahe sa Bibliya. Ang mga sister mainampingong nagsangyaw kanila ug sa ubang piniriso. Karon kay gibuhian na man sila, padayong nangitag nahiangayng paagi ang mga sister aron ilang mahaling ang interes sa mga piniriso.

Indonesia

Mao pa lang gyoy pagkahumag sangyaw sa usa ka espesyal payunir nga si Resmawati. Sa iyang pagpauli, gidapit siya sa usa ka babaye ngadto sa iyang balay aron makighisgot bahin sa Bibliya. Tulo ka adlaw sa ulahi, giduaw siya pag-usab ni Resmawati. Ang babaye naghilak ug iyang giestorya ang bahin sa iyang abusado nga bana. Gibasa ni Resmawati ang Hebreohanon 4:12 ug  iyang gisaysay nga dakog ikatabang ang pagtuon sa Bibliya. Iyang giasoy ang eksperyensiya ni Tony nga anaa sa 2003 Calendar of Jehovah’s Witnesses. Nainteres niana ang babaye ug nangayo siyag kopya sa kalendaryo. Sa misunod niyang pagduaw, gihatag ni Resmawati ang kalendaryo sa babaye, ug ilang gisugdan ang pagtuon sa librong Gitudlo sa Bibliya. Sa sunod nga higayon nga siya miduaw, nangutana ang bana kon mahimo ba siyang moapil sa pagtuon. Iya diayng nabasahan ang bahin kang Tony didto sa kalendaryo, ug siya natandog pag-ayo niana. Tayming pod kaayo kay Tony sab ang iyang ngalan, unya pareho pa gyod silag kinaiya niadtong Tony nga anaa sa kalendaryo sa dihang wala pa kini makakat-on sa kamatuoran. Pagkakita ni Tony sa eksperyensiya diha sa kalendaryo, iyang giingnan ang iyang asawa ug mga anak: “Di ba ngalan man nako na? Nganong nailhan man ko nianang magsasangyaw, unya iya pa gyod kong gisulat?” Ang iyang asawa mitubag: “Wala mahibalo ang mga Saksi sa imong ngalan. Ug bisan pag nahibalo sila niana, dili pod nila dayon kana ikabutang sa kalendaryo, labi na kay 2007 na karon unya 2003 pa god ni!” Kay namatikdan niya nga kalit nga nainteres ang iyang bana, mataktikanhon niya siyang gipangutana, “Buot ba nimong mahisama kang Tony diha sa kalendaryo?” Wala niya damha ang tubag sa iyang bana, “Sulayan nako.” Sama sa Tony nga gipakita diha sa kalendaryo, si Tony nga taga-Indonesia nagbag-o sa iyang kinabuhi, iyang gipaputlan ang iyang taas nga buhok, ug hapsay na siyang tan-awon. Ang iyang tibuok pamilya padayong nagtuon sa Bibliya.

Malaysia

Sa pipila ka lugar sa Borneo, ang mga igsoon naggamit ug mga letrato nga gikan sa satelayt aron sa pagpangitag mga balay. Ang ilang taho nag-ingon: “Nakatabang kini kanamo aron among makit-an ang mga balay diha sa kalasangan. Ang gituohan namo nga ‘mga atop sa balay’ mga balay-balay diay sa kanding. Mao nga mangatawa kami kay mga kanding na man hinuon ang among masangyawan. Apan ang uban sa maong mga atop gipuy-an gayod diay sa mga tawo. Wala pa gayod namo makobrehi sukad kining bukiron nga teritoryo. Sanglit baga man kini nga kalasangan ug lisod kaayo subayon ang mga dalan, makatabang gayod kanamo ang maong mga letrato gikan sa satelayt aron dili kami masaag.”

 UROPA

KAYUTAAN 47

POPULASYON 732,610,687

MGA MAGMAMANTALA 1,533,790

MGA PAGTUON SA BIBLIYA 749,911

Hungaria

Ang usa ka 12 anyos nga sister mitaho: “Siyam ka bulan na ang milabay human ako gibawtismohan, ug karon nag-oksilyare payunir ako sulod na sa tulo ka bulan. Nakatabang gayod kanako si Mama. Daghan ang nangutana kon sa unsang paagi ako nakaoksilyare payunir samtang ako nagtungha, apan alang kanako mas lisod ang pagpayunir kon dili ako moeskuyla. Akong gigamit ang mga bakanteng panahon aron sa pagsangyaw. Regular akong makighisgot bahin sa Bibliya uban sa akong lima ka eskolmet. Duna poy duha nga akong gidumalahag mga pagtuon sa Bibliya. Tungod niini, gibati ko gayod ang panalangin ni Jehova. Alang kanako, dili usa ka kabug-at ang pagpayunir, apan tinubdan hinuon kini sa kalipay. Ang akong inahan maoy usa ka regular payunir, ug gusto ko usab nga mahimong sama kaniya. Buot nakong alagaran si Jehova nga bug-os panahon.”

Britanya

Si Susan nagsugod pagtuon sa Bibliya niadtong 2001, ug iya kanang gipadayon sulod sa mga duha ka tuig. Nianang panahona, naglisod gayod siyag hunong sa pagpanigarilyo. Kadaghan na siyang misulay sa paghunong, apan wala siya magmalamposon. Ingong resulta, miundang siya sa pagtuon, apan padayon gihapon siyang nagtambong sa mga tigom. Upat ka tuig sa ulahi, gibati ni Susan nga angay siyang maningkamot aron sa pagpauswag sa iyang espirituwalidad, busa nangayo siyag tabang sa kongregasyon. Nagtuon na usab siya sa Bibliya ug nakatabang kaniya ang libro nga Pakigsuod Kang Jehova. Ang detalyadong paghisgot sa gugma ni Jehova alang kanato ug kon  sa unsang paagi nato ikapakita ang atong gugma sa Diyos nakapalihok gayod kaniya. Sulod lang sa walo ka semana, bug-os na siyang nakabiya sa pagpanigarilyo. Gibati ni Susan nga ang iyang pagtuon sa maong publikasyon nakatabang kaniya nga mosalig kang Jehova. Siya padayong miuswag, ug nagpahinungod sa iyang kaugalingon kang Jehova pinaagi sa pagpabawtismo sa “Sunda si Kristo!” nga Distritong Kombensiyon.

Estonia

Ang 17 anyos nga estudyanteng si Helgi nga milain ug puyo sa iyang nagdiborsiyong mga ginikanan, nainteres sa kamatuoran ug nagsugod pagtuon sa Bibliya. Sa sinugdan, wala siya makatambong sa mga tigom tungod kay migugol siyag daghang panahon sa pagkanta uban sa usa ka lokal nga banda. Samtang nagkalalom ang iyang pagpabili sa kamatuoran, mihimo siyag mga kausaban sa iyang kinabuhi. Iyang gipatin-aw sa iyang mga kauban kon nganong dili siya makauban kanila sa mga gabii nga dunay tigom. Nagpatala siya sa Teokratikanhong Tunghaan sa Ministeryo ug mikuwalipikar ingong di-bawtismadong magmamantala. Siya miapil sa usa ka tibuok-nasod nga  kompetisyon sa pag-awit diin ang makadaog hatagag kontrata sa usa ka sikat nga kompaniya sa rekording. Bisan pag daghan ang wala makapasar sa awdisyon, nakapasar si Helgi sa mga hurado, ug tungod niana mikuwalipikar siya sa sunod nga ang-ang sa kompetisyon. Apan ang sunod nga kompetisyon naatol sa iyang unang bahin sa Teokratikanhong Tunghaan sa Ministeryo. Unsay angay niyang himoon? Ang iyang inahan nga dili Saksi misugyot nga kanselahon ang iyang bahin o kaha ihatag kini sa laing higayon. Apan si Helgi miingon nga dili lang ang paghatag sa bahin ang isyu kondili kon unsay iyang unahon sa iyang kinabuhi, ang espirituwal ba o ang materyal nga mga butang. Iyang kining gihunahuna pag-ayo ug midesidir nga ihatag ang iyang bahin inay moadto sa kompetisyon. Gihatag ni Helgi ang iyang bahin, ug gitahod sa iyang inahan ang iyang desisyon.

Sa ulahi, usa ka reporter sa telebisyon ang mitambong sa “Sunda si Kristo!” nga Distritong Kombensiyon aron sa pagkuhag video bahin sa kombensiyon ug sa pagbawtismo. Sa dihang nakita niya si Helgi nga nagpadulong sa bawtismohanan, gi-videohan niya kini ug dayon giinterbiyo. Pagkagabii niana, gipakita kana sa balita, lakip na ang mubong video sa dihang miapil si Helgi sa unang bahin sa kompetisyon, ug natapos kini sa iyang bawtismo ug siya mapahiyomong miingon: “Mao kini ang kinamaayohang desisyon sa akong kinabuhi.”

Bulgaria

Si Ivelin maoy usa ka piniriso sa Belene. Siya misulat sa lokal nga sanga sa mga Saksi ni Jehova, nga nagkanayon: “Dinhi sa prisohan, ako nakakaplag ug usa ka kopya sa Bantayanang Torre ug daghan akog pangutana kaninyo. Naghinulsol na ko sa akong mga sala, ug buot nakong bag-ohon ang akong pagkatawo sa sulod ug sa gawas. Gusto kong mohangyo kaninyog usa ka butang nga tingali lisod alang kaninyo ug daw imposible gayod nga mahitabo. Mahimo ba nga inyo akong sulatan aron makakat-on ako bahin kang Jehova? Dili ko segurado kon mobalos ba mo niining akong sulat, apan ang pagkahibalo pa lamang bahin kang Jehova nakahatag na kanakog kalipay. Buot nakong masayod ug dugang bahin niining mga butanga, dili lamang alang sa akong kaugalingon kondili alang usab sa akong  kaubang mga piniriso. Palihog hinumdomi nga bisag dili mo makasulat kanako, sa dihang makagawas ko dinhi, pangitaon ra unya mo nako!” Gipaningkamotan dayon sa mga igsoon nga maduaw ang maong interesado ug sa pagkakaron napulo ka piniriso ang ilang gidumalahag pagtuon, lakip na si Ivelin.

Portugal

Si Jana, nga usa ka espesyal payunir, miasoy: “Usa ka adlaw sa dihang migawas ako sa estasyon sa tren, nakita nako ang usa ka lalaki nga Insek ug ako siyang gisangyawan. Natingala siya kay makamao akong mosultig Ininsek, ug siya miingon nga padulong siya sa ospital kay hapit nang isesaryan ang iyang asawa. Silang duha sa iyang asawa dili makamaong mosultig Portuges, ug giingnan sila sa ospital nga mangitag tighubad. Mora na siyag mawad-ag paglaom ug nagpatabang siya kanako. Pagkasunod adlaw, gipasul-ob ako sa mga doktor ug sinina sa tig-opera aron akong kuyogan ang iyang asawa panahon sa operasyon. Sa nagpadayon ang operasyon, akong gikuptan ang kamot sa babaye ug daghan siyag pangutana bahin sa Bibliya ug sa atong buluhaton. Nahimugso ang usa ka himsog nga batang babaye, ug sa kalipay sa inahan, iya akong gihangyo sa pagpilig ngalan alang sa iyang anak. Naghunahuna ako sa makadiyot, ug akong gipili ang ngalang Sara. Nagustohan sa babaye ang maong ngalan ug interesado kaayo siyang masayod ug dugang pa bahin kang Sara nga gihisgotan sa Bibliya ug sa Diyos nga iyang gisimba. Paggawas namo sa ospital, ako silang gitanyagag pagtuon sa Bibliya. Kaniadto, dili sila buot makig-estorya sa mga Saksi, apan tungod sa akong pagtabang kanila nausab ang ilang tinamdan. Dihadiha nilang gidawat ang pagtuon ug karon tigtambongan na sila sa mga tigom.”

Slovakia

Nahibalag sa magtiayong espesyal payunir ang duha ka batan-ong lalaki nga taga-Afghanistan. Sa ilang mubong pag-estar sa Slovakia, ang mga batan-on nagpakitag interes sa Bibliya. Ang mga payunir miduaw kanila sa daghang higayon ug naghatag kanila sa libro nga Unsay Tinuod nga Gitudlo sa Bibliya? Gipasundayag usab sa mga payunir kon unsaon pagdumala ang pagtuon sa Bibliya aron makahimo sila sa pagtuon niana sa personal o pinaagi sa tabang sa uban.

 Oceania

KAYUTAAN 30

POPULASYON 36,829,259

MGA MAGMAMANTALA 96,691

MGA PAGTUON SA BIBLIYA 51,122

New Zealand

Usa ka hapon sa dihang namalaybalay ang usa ka brader nga si Paul, nakahibalag siyag usa ka babaye. Gidawat sa babaye ang brosyur nga gitanyag kaniya ni Paul ug miingon nga bag-o pa lang siyang giingnan sa iyang paryente nga gikinahanglan niya ang kamatuoran. Nianang buntaga, nag-ampo ang babaye ug gisangpit niya ang ngalan ni Jehova nga duna untay moduaw kaniya. Si Paul miingon, “Paglabay sa tulo ka oras, ako miabot sa iyang balay. Dugang pa, ako siyang naduaw sa panahon nga kasagarang wala siya sa iyang balay.” Malipayon niyang gidawat ang pagtuon sa Bibliya, ug siya padayong nag-uswag.

Australia

Ang batan-ong magtiayon nga si Armando ug Elvira nagpuyo sa East Timor, nga gidumala sa sanga sa Australia. Niadtong 2006 padayong giatake sa laing etnikong grupo ang ilang dapit, ug tungod niini sila napugos sa pagbiya didto. Sila mibakwet sa kampo sa mga kagiw, nga nagdalag duha lamang ka butang—ang Bibliya ni Armando ug ang brosyur nga Unsay Gikinahanglan sa Diyos Kanato? Sa dihang nakontak nila pag-usab ang mga igsoon, si Armando ug Elvira nagsugod pagtuon duha ka beses sa usa ka semana ug nagtambongan na sa mga tigom sa kongregasyon. Gisangyawan usab ni Armando ang iyang mga paryente, nga nagpuyo sa usa ka gamayng balangay nga upat pa ka oras ug tunga kon biyaheon gikan sa Dili. Sa dihang nagpakitag interes ang iyang pamilya sa mensahe sa Gingharian, iyang gisabot ang mga payunir sa Baucau, nga kinahanglan pang mobiyaheg usa ka oras ug tunga sa pagtudlo  kanila sa kamatuoran. Kapig 20 ka tawo ang nagtapok ug naminaw sa mga payunir. Ang amahan ni Armando, nga lider-lider sa maong grupo miingon nga buot nilang ilabay ang ilang mga imahen, apan nabalaka sila nga basin dili na sila mapanalipdan batok sa daotang mga espiritu. Gipasaligan sila sa mga payunir nga tabangan gayod sila ni Jehova. Busa, ilang gilabay ang ilang mga imahen. Karon aduna nay kapin sa 25 ka tawo ang nagtuon sa Bibliya sa maong dapit. Nagtinguha si Armando nga mabawtismohan sa dili madugay, samtang si Elvira padayong nag-uswag.

Guam

Sa isla sa Saipan, nga gidumala sa sanga sa Guam, ang usa ka sister nalipay gayod sa pagkahibalo nga ang iyang bana, nga kanhi usa ka magsusupak, sekreto diayng nagabasa sa mga publikasyon nga iyang gibilin sa balay. Gawas pa sa Bantayanang Torre ug Pagmata!, nakabasa na siyag mga Tinuig nga Basahon ug sa librong Sekreto sa Kalipay sa Pamilya. Usa ka adlaw niana, iyang gipatawag ang iyang asawa ug lima ka anak para sa gitawag niyang “importanteng miting sa pamilya.” Kini talagsaon gayod, kay ang tuyo diay sa amahan mao ang paghatag ug mga tambag sa iyang tulo ka anak nga babaye bahin sa kaminyoon. Naghimo siyag listahan sa mga hiyas nga angayng batonan sa usa ka maayong pamanhonon. Kining dili magtutuong amahan natandog pag-ayo sa iyang nabasa bahin kang Sheila Winfield da Conceição sa Nobyembre 1, 2006, nga Bantayanang Torre, ug sama sa gihimo ni Sheila, naghimo usab siyag listahan sa mga hiyas sa usa ka maayong pamanhonon. Iyang gitambagan ang iyang mga anak nga makigminyo lamang sa usa ka Saksi ni Jehova ug mangitag pamanhonon nga nahigugma kang Jehova ug mas daghag nahibaloan sa Bibliya kay kanila. Buot gayod niya nga masinati usab sa iyang tulo ka anak nga babaye ang kalipay nga nasinati ni Sheila diha sa iyang nabasa nga magasin. Kini nakatandog sa ilang kasingkasing ug nakahatag kanilag paglaom nga sa umaabot moalagad ra usab kang Jehova ang ilang amahan.

Samoa

Dihay magtiayon gikan sa laing sanga nga giasayn di pa dugay aron sa pag-alagad sa Samoa. Sa unang balay nga iyang  nasangyawan, gitanyag sa brader ang librong Unsay Tinuod nga Gitudlo sa Bibliya? Wala gayod siya magdahom nga padayonon siya niadtong balaya. Apan ang tagbalay nga usa ka retiradong negosyanteng babaye miingon, “Aduna lamang akoy 45 minutos nga bakanteng panahon karong buntaga”—usa ka tubag nga wala pa gayod madunggi sa maong brader sukad. Nasugdan dayon ang usa ka pagtuon. Sa dihang mibalik ang brader ug ang iyang asawa pagkasunod semana, giabiabi sila sa babaye, nga naggunit sa iyang Bibliya ug sa librong Gitudlo sa Bibliya. Dako gayod ang purohan nga magpadayon ang maong pagtuon.

Solomon Islands

Si Emily lang ang bugtong Saksi ug regular payunir sa isla sa San Cristobal. Siya nagdumalag 20 ka pagtuon sa Bibliya, tulo niana ang nahimong di-bawtismadong mga magmamantala lakip na ang iyang mga ginikanan. Ang internasyonal nga mga alagad nga si Lance ug Diane mibakasyon ug mibiyaheg 14 ka oras sa usa ka gamayng dekarga nga barko nga naghuot sa pasahero aron sa pagtabang kang Emily sa pagsaulog sa Memoryal. Si Lance miingon: “Pag-abot namo, gusto unta mi nga matulog, apan among nahunahunaan nga mas maayo kon amo unang duawon ang lider sa balangay. Human namo isulti kaniya ang among tuyo sa maong dapit, ang lider nangutana: ‘Daghan ang wala makadawat niini nga imbitasyon, mahimo ba nga motambong usab sila?’ Malipayon namong gipasaligan siya nga andam kaming moabiabi sa tanang buot motambong.

“Sa hapit nang magsugod ang Memoryal, duna ray duha ka babaye ug pipila ka bata nga nanglingkod. Apan among namatikdan nga daghang tawo ang nagbarog-barog duol sa kakahoyan. Busa amo dayon silang giawhag nga mosulod. Sa dihang mikilumkilom na, among gipaandar ang usa ka gamayng generator ug misiga ang mga suga. Ang tanan naminaw pag-ayo sa pakigpulong sa Memoryal.” Dunay 130 nga mitambong, apil na ang usa ka ministro sa Sabadista nga buot makabatog kopya  sa Bag-ong Kalibotang Hubad tungod kay mas dali kining masabtan kay sa iyang Bibliya. Niining maong linaing okasyon, lima ka bag-ong pagtuon sa Bibliya ang nasugdan.

Papua New Guinea

Sa gawas sa usa ka gamayng lungsod, dihay duha ka balangay nga kusog kaayo ang impluwensiya sa Katoliko, ug tungod niini lisod gayod ang pagsangyaw didto. Niining di pa dugay, giduaw sa mga igsoon ang mga lider sa maong mga balangay aron ilang saysayan sa atong buluhaton ug sa hinungdan kon nganong buot kitang makig-estorya sa tanang tawo. Naatol usab nga bag-o pa lang gyod diayng nagmiting ang usa ka balangay sa paghisgot kon unsaon pagtabang ang mga batan-on sa pagpauswag sa ilang panggawi. Giingnan sa mga igsoon ang mga lider sa maong balangay nga makatabang ang kahibalo sa Bibliya.

Ilang gitugotan ang mga igsoon sa pagsangyaw nga gawasnon, ug daghang batan-on ang nasugdan sa pagtuon. Namatikdan sa mga tawo sa balangay ang dakong kausaban sa tinamdan sa maong mga batan-on sukad sila nagtuon uban sa mga Saksi ni Jehova, ug tungod niini, wala na sila misupak sa atong buluhaton. Sa ngadtongadto, nagtuon usab sa Bibliya ang ilang mga higala ug mga ginikanan, lakip na ang anak nga babaye sa katekista kinsa naghulga sa mga igsoon kaniadto. Iyang giingnan ang iyang anak: “Nasayop gayod ako. Hinaot pasayloon ko sa Diyos ug sa mga Saksi ni Jehova sa akong nahimo.” Karon, duna nay 27 gikan niining duha ka balangay ang tigtambongan sa mga tigom, ug labing menos upat ang nabawtismohan ug nag-oksilyare payunir na. Naningkamot usab sila nga mahimong regular payunir.

[Mapa/Hulagway sa panid 48]

(Alang sa aktuwal nga pagkahan-ay, tan-awa ang publikasyon)

[Hulagway]

Ang parola sa Cape Horn

[Mapa sa panid 63]

(Alang sa aktuwal nga pagkahan-ay, tan-awa ang publikasyon)

San Cristobal

[Hulagway sa panid 44]

Pagdumalag Pagtuon sa “Bantayanang Torre” diha sa balangay sa Antanandava, Madagascar

[Hulagway sa panid 46]

Pagtuon sa librong “Gitudlo sa Bibliya” uban sa grupo sa Pawaga, Tanzania

[Hulagway sa panid 49]

Pagtuon sa CBS sa Sixaola, Costa Rica

[Hulagway sa panid 50]

Si Ramiro nga naggunit sa librong “Gitudlo sa Bibliya”

[Hulagway sa panid 53]

Si Hiroko samtang nagsangyaw sa terminal sa bus

[Hulagway sa panid 58]

Si Helgi (tuo) naghatag sa iyang bahin sa Teokratikanhong Tunghaan sa Ministeryo

[Hulagway sa panid 64]

Si Lance, Diane, ug Emily