Ang Labing Makaiikag nga mga Hitabo sa Miaging Tuig

PAGLABAY sa laing mabungahong tuig sa pag-alagad sa Diyos, kita adunay daghang katarongan sa pagmaya. Sa dihang atong repasohon ang pipila sa labing makaiikag nga mga hitabo sa dakong buluhaton nga gibuhat sa Diyos pinaagi sa iyang mga alagad, kita makaingon gayod: “Ikaw nagpurongpurong sa tuig sa imong pagkamaayo”!—Sal. 65:11.

“MAAYONG BALITA” DIHA SA INTERNET

Ingong mga Saksi ni Jehova, ato gayong ginatuman ang sugo nga ‘iwali ang maayong balita sa gingharian sa tibuok gipuy-ang yuta ingon nga pagpamatuod ngadto sa tanang kanasoran’ sa dili pa moabot ang kataposan. (Mat. 24:14) Latas sa katuigan, ang bag-ong mga teknolohiya nakatabang sa pagpakaylap sa “pulong sa gingharian.” (Mat. 13:18-23) Sa milabayng 11 ka tuig,  atong gigamit ang atong opisyal nga Web site nga www.watchtower.org sa paghatag ug mga impormasyon bahin sa Bibliya ngadto sa publiko pinaagi sa Internet. Ang mosusi sa maong Web site makakat-on sa kamatuoran sa Bibliya diha sa 314 ka pinulongan ug makatan-aw sa mga ulohang sama sa “Beliefs and Activities,” “Current Topics,” “God and Your Future,” “Medical Care and Blood,” ug “Publications Available.”

Ang mga tawo moabli sa atong Web site aron sa pagbasag Bibliya. Kada adlaw kapin sa 6,300 ka tawo ang magbasa sa Bag-ong Kalibotang Hubad sa Balaang Kasulatan diha sa Internet sa napulo ka pinulongan. Ang kasagarang mga basahon sa Bibliya nga ginabasa diha sa Web site mao ang Salmo, Proverbio, ug ang mga asoy sa Ebanghelyo sa kinabuhi ni Jesus.

Kada semana adunay piniling mga artikulo gikan sa Ang Bantayanang Torre o Pagmata! ang ginadugang sa Web site diha sa 12 ka pinulongan—ilabina ang mga artikulo nga para sa publiko. Daghan ang nangutana bahin sa atong doktrina, kon sa unsang paagi ginadumala ang atong mga tigom, ug kon sa unsang paagi gisuportahan sa pinansiyal ang atong buluhatong pagsangyaw. Kining mga pangutanaha matubag diha sa Web site pinaagi sa pagklik sa brosyur nga Jehovah’s Witnesses—Who Are They? What Do They Believe? Ang basahong Ang Kataposan sa Bakak nga Relihiyon Haduol Na! mabasa na diha sa www.watchtower.org sa 252 ka pinulongan, nga may mga bahin nga gipakita sa video diha sa lima ka senyas nga pinulongan.

NAKAKAPLAG SA KAMATUORAN DIHA SA INTERNET

Unsay mga resulta sa pagbutang niining mga publikasyona diha sa Internet? Adunay aberids nga kapig 60,000 ka tawo ang mosusi sa www.watchtower.org matag adlaw! Daghan ang nagpuyo diha sa mga dapit diin diyutay ra ang mga Saksi o diha sa mga nasod diin gidili o gipig-otan ang atong buluhaton. Apan kadtong nangita sa kamatuoran makakaplag niini pinaagi sa pagsusi sa atong Web site.

“Ganahan kaayo kong magtuon ug Bibliya,” nag-ingon si Bryon, “pero kon manimba mi sa akong mga higala, igo ra man silang magkanta-kanta o magdula-dula.” Si Bryon nagpadayon  sa iyang pagtungha ug pagkaatleta. Nagtuon siyag lima ka pinulongan ug nakatungha sa kolehiyo nga walay bayad, apan wala kini makatagbaw sa iyang espirituwal nga panginahanglan. Busa siya miampo nga iya untang makaplagan ang kamatuoran.

“Gusto gayod akong masayod sa kamatuoran,” miingon si Bryon. “Nakadesidir ako sa pagsusi sa mga Saksi ni Jehova diha sa Internet kay may kaila akong mga Saksi sa tunghaan nga nag-ingon nga Jehova ang ngalan sa Diyos. Akong gitan-aw ang Web site sa mga Saksi ug gibasa ang brosyur nga Unsay Gikinahanglan sa Diyos Kanato? Sa kataposan, natubag ra gayod ang akong mga pangutana.” Si Bryon mihangyo ug usa ka pagtuon sa Bibliya, kusog nga miuswag, ug nagpahinungod sa iyang kinabuhi kang Jehova niadtong 2004. Siya karon regular payunir na ug gustong magmisyonaryo aron mapuslan ang iyang nakat-onan nga mga pinulongan.

“ANG DIYOS NAGAUBAN KANINYO”

Makalipay gayod ang pagkahibalo nga linibo ka tawo nga “gikan sa tanang pinulongan sa mga nasod” ang nagasusi sa www.watchtower.org kada adlaw! May aberids nga 94 ka tawo kada adlaw ang magpil-ap sa porma nga “Would You Welcome a Visit?” diha sa Web site.—Zac. 8:23.

Usa si Denise nga may mga pangutana bahin sa doktrina sa mga Saksi ni Jehova, apan nagpanuko siya sa pagtambong sa Kingdom Hall sa ilang dapit. Busa nakahukom siya sa pagsusi sa Internet ug nakita niya ang www.watchtower.org. Ang impormasyon didto mao ang nakapakombinsir kang Denise nga iya nang nakaplagan ang kamatuoran, apan nagpanuko siya sa paghangyo ug pagtuon sa Bibliya kay nahibalo nga kinahanglan siyang mohimog mga kausaban aron mahiuyon ang iyang kinabuhi sa mga sukdanan sa Bibliya. Upat ka beses siyang nagpil-ap sa porma nga “Would You Welcome a Visit?” apan wala gayod niya iklik ang Submit.

Sa Marso 2007, gipil-apan ni Denise ang porma sa ikalimang higayon. Niining higayona iya nang giklik ang Submit nga naghangyo nga magpaduaw. Ang iyang hangyo gipasa ngadto sa  kongregasyon sa ilang dapit, ug gihangyo sa mga ansiyano ang usa ka sister nga ginganlag Vonnie sa pagduaw kang Denise. Sulod sa unang semana sa pagduaw ni Vonnie, si Denise mitambong na sa mga tigom sa Kingdom Hall.

Sa hinapos nga bahin sa Septiyembre, gilabay ni Denise ang tanan niyang relihiyosong mga butang, mibiya sa kanhi niyang relihiyon, ug mikuwalipikar nga mahimong di-bawtismadong magmamantala. Kusog ang iyang pag-uswag ug sa iyang duha ka anak nga lalaki, ug ang iyang otso anyos nga anak nga lalaki nagpalista sa Teokratikanhong Tunghaan sa Ministeryo. Sa Enero 2008, si Denise nabawtismohan, ug duha ka bulan sa ulahi—eksakto nga usa ka tuig gikan sa iyang pagpil-ap sa porma diha sa Web site—siya mikuwalipikar sa pag-oksilyare payunir. “Kon wala pa ang Web site,” si Denise miingon, “dili unta ako makasugilon niining akong eksperyensiya.”

Sa Enero 2008, adunay bag-ong gidugang diha sa Web site nga www.pr418.com—ang audio nga mga rekording sa pipila ka publikasyon nga pwedeng ma-download diha sa 17 ka pinulongan. Daghan kaayo ang nainteres niini, ug kapin sa usa ka milyong publikasyon ug indibiduwal nga mga artikulo ang gina-download kada bulan! Daghang magmamantala ang nagapaminaw sa mga artikulo sa magasin samtang nagabiyahe paingon sa trabahoan o eskuylahan.

MGA HUBAD NGA NAGTAGANA SA PANGINAHANGLAN

Makapalipay gayod ang pagkahibalo nga kita gipaluyohan sa mga manulonda samtang kita nag-awhag sa mga tawo sa “matag nasod ug tribo ug pinulongan” sa paghimaya sa Diyos! (Pin. 14:6, 7) Aron matabangan ang mga tawo nga makakat-on sa mensahe sa Bibliya diha sa pinulongan nga ila gayong masabtan, ang mga Saksi ni Jehova karon nagpatik ug literatura diha sa mga 450 ka pinulongan.

Ang librong Unsay Tinuod nga Gitudlo sa Bibliya? bag-o pang giluwatan diha sa pinulongang Tetum, ang pinulongan sa East Timor, apan wala pay igong mga kopya nga mabatonan. Si Maria, nga usa ka bag-ong estudyante nga naggamit sa librong Gitudlo sa Bibliya diha sa pinulongang Indonesian, wala pa  makabaton niining libroha diha sa pinulongang Tetum. Iyang gihangyo ang nagtudlo kaniya sa Bibliya nga iyang hulamon ang Tetum nga libro sa duha lang ka adlaw. Sa misunod nga mga adlaw, maikagon niyang gisubli ang tanan niyang natun-an. Mas daghang kamatuoran ang tin-aw niyang nasabtan karon diha sa kaugalingon niyang pinulongan kay niadtong Indonesian nga libro pay ilang gigamit sa pagtuon. Gani dili na buot sa iyang magtutudlo nga bawion kaniya ang Tetum nga libro. Si Maria nagpadayon sa pagtuon ug pagtambong sa mga tigom.

Iningles ug Swahili ang mga pinulongan nga kasagarang gigamit sa Kenya diha sa gobyerno ug sa negosyo. Apan, minilyong taga-Kenya ang mas gustong mogamit sa Kikuyu, Kikamba, Luo, ug ubang lokal nga pinulongan. Busa, ang pagpatik ug literatura niining mga pinulongana nakatabang gayod sa pagpukaw sa interes sa mga tawo sa pagsimba kang Jehova. Sa dihang gigamit na sa Kongregasyon sa Siaya ang mga basahon ug gidumala ang mga tigom diha sa pinulongang Luo, ang mga ansiyano misulat: “Mas masabtan na karon sa mga igsoon ang ginatudlo. Ang mga bata mas maminaw na sa mga tigom. Sukad nga kami nagahatag ug mga pakigpulong nga naggamit ug mga laraw diha sa Luo nga pinulongan, miuswag ug 60 porsiyento ang gidaghanon sa tumatambong.”

Sa Nicaragua, mas daghan ang nagsultig Miskito nga pinulongan kay sa Kinatsila, ug kapin sa 200 ang mitambong sa Miskito nga distritong kombensiyon. Ang uban naningkamot gayod nga makatambong. Pananglitan, ang 13 ka igsoon nga gikan sa gamayng lungsod sa Asang sa Coco River naghimog gakit ug kini ang ilang gisakyan diha sa suba sulod sa duha ka adlaw paingon sa lungsod sa Waspam. Dayon sila misakay sa likod sa trak dekarga sulod sa lima ka oras paingon sa siyudad nga pagahimoan sa kombensiyon. Kini ang unang distritong kombensiyon nga natambongan sa kadaghanan sa grupo. Nalipay gayod silang nakadungog sa programa diha sa ilang kaugalingong pinulongan. Kay naggasto na man ang tanan nilang kuwarta sa pagpaingon sa kombensiyon, ang ubang mga delegado nag-amotay aron may ikaplete sila sa pagpauli.

 Ang mga Miskito nga nanambong sa kombensiyon nalipay gayod sa pagluwat sa librong Unsay Tinuod nga Gitudlo sa Bibliya? diha sa ilang pinulongan. Ang ilabinang mapasalamaton mao ang mga payunir. Una pa niini, sila naggamit sa Kinatsila nga librong Gitudlo sa Bibliya diha sa ilang mga gitun-an sa Bibliya ug hubaron ang mga parapo ug pangutana niini ngadto sa Miskito nga pinulongan. Karon mas masentro na ang ilang pagtagad sa pagtudlo sa mga kamatuoran sa Bibliya kay sa paghunahuna kon unsaon kini paghubad.

Ang Quechua maoy usa ka pinulongan sa mga Amerikanong-Indian sa Amerika del Sur. Ang pipila ka Quechua nga magmamantala sa Peru misulat: “Sa kataposang bahin sa among presentasyon, among sultihan ang tagbalay nga naa miy dalang mga basahon sa Quechua nga pinulongan. Ang uban mihilak ug gihalokan ang mga basahon kay natandog pag-ayo nga nakabaton niini diha sa ilang pinulongan.” Ang sangang buhatan sa Peru misulat: “Mapasalamaton gayod kaayo ang mga igsoon nga nagpuyo sa mga dapit diin Quechua ang pinulongan.  Human mabasa ang librong Unsay Tinuod nga Gitudlo sa Bibliya? sa Quechua, ang usa ka brader miingon nga sa kataposan iya nang nasabtan ang kahulogan ug bili sa lukat ni Kristo. Ang mga magbabasa nagpadalag mga patatas, mga pie, kinahon nga prutas, ug uban pang mga butang ngadto sa sangang buhatan agig pasalamat.”

Ang organisasyon naningkamot usab sa paghubad sa literatura ngadto sa mga pinulongan nga gisulti sa lagyong mga isla sa Pasipiko. “Nagpasalamat ako kang Jehova kay siya nahinumdom kanamo,” miingon ang usa ka sister ngadto sa usa ka misyonarya sa isla sa Pohnpei sa Micronesia. “Kaniadto, inigkadawat namo ug Iningles nga Bantayanang Torre molabay una ang pipila ka bulan ayha pa kami makadawat ug Ponapean nga Bantayanang Torre.” Nagpasiaw siyang midugang, “Tingali ulahi usab nga moabot ang Armagedon dinhi. Apan karon kami nagtuon na niini nga dungan sa tibuok kalibotan, ug sama usab kini kanindot sa Iningles nga magasin. Mapasalamaton gayod kami nga ang Nagamandong Lawas nagaatiman kanamo.”

Ang mga igsoon sa Marshall Islands sa amihanang Pasipiko nalipay bahin sa bag-ong edisyon sa Bantayanang Torre nga para sa publiko diha sa Marshallese nga pinulongan. Kining mga igsoona ganahan kaayong mobasa ug mga sugilanon sa kinabuhi, apan ang nangaging mga edisyon sa Bantayanang Torre walay igong luna para sa mga sugilanon sa kinabuhi, busa adunay usa nga mohubad sa maong mga asoy gikan sa Iningles nga magasin. Busa, malipayon kaayo sila sa dihang ang unang sugilanon sa kinabuhi gipatik sa Marshallese nga pinulongan diha sa edisyon para sa publiko. Usa ka 16-anyos nga lalaki miingon: “Sulod sa daghang tuig ginatan-aw ko ang Iningles nga magasin ug akong makita ang mga hulagway diha sa mga sugilanon sa kinabuhi ug nangandoy nga mabasa ang artikulo. Karon, ako na kining mabasa.”

Ang pagbaton bisag usa lang ka basahon diha sa kaugalingong pinulongan makapabag-o sa kinabuhi sa mga tawo. Diha sa usa ka nasod sa Central Asia diin gidili ang atong buluhaton, kaylap nga gipanagtag ang brosyur nga Unsay Gikinahanglan  sa Diyos Kanato? Usa ka batan-ong lalaki ang nakadawat niini ug natandog kaayo siya sa iyang nabasa nga siya miadto sa suba nga duol sa ilaha ug “gibawtismohan” ang iyang kaugalingon. Dihang iyang nasayran nga kinahanglan diay siyang magtuon ug Bibliya, maikagon siyang misunod ug sa wala madugay siya nabawtismohan sa hustong paagi. Siya karon naggugol ug mas daghang panahon sa pagpaambit sa maayong balita ngadto sa uban.

PAG-USWAG SA PAGHUBAD SA BIBLIYA

Gipabilhan gayod sa mga Saksi ni Jehova ang usa ka tukma ug tin-aw nga hubad sa Pulong sa Diyos, ang Bibliya. Tungod niini, ang katawhan sa Diyos nalipay nga nakabaton sa Bag-ong Kalibotang Hubad, sa tibuok o sa bahin niini diha sa kapin sa 70 ka pinulongan. Bisan tuod makapalipay gayod nga maluwatan sa unang higayon ang Bag-ong Kalibotang Hubad diha sa usa ka pinulongan, ang adlaw-adlaw nga paggamit niini diha sa personal nga pagtuon, mga tigom sa kongregasyon, ug sa pagsangyaw sa kanataran, mao gayod ang makapalihok sa kasingkasing sa mga tawo ug makaimpluwensiya sa ilang hunahuna.

Ang sangang buhatan sa Rusya nakadawat ug mga sulat nga nagpasalamat sa kompletong edisyon sa Bag-ong Kalibotang Hubad diha sa Ruso nga pinulongan. “Bisag daghang beses na nakong nabasa ang Bibliya,” misulat ang usa ka babaye, “ang pagbasa niini nga hubad maorag una pa gayod nakong higayon sa pagbasa ug Bibliya! Usahay mapunog luha ang akong mga mata ug maghinamhinam ako samtang ang mensahe sa Bibliya nagtandog sa akong kasingkasing.”

 Ang pagkatin-aw sa hubad nagtukmod sa usa ka babaye sa pag-ingon: “Human nako basaha ang Genesis kapitulo 18 karong adlawa, nadasig ako sa pagsulat kaninyo. Ang pagpakigsulti ni Abraham kang Jehova nga nahisulat sa mga bersikulo 23-32, nakatandog gayod kanako. Bisan pag ikalimang beses na nako kining pagbasa sa Bibliya, kini pa lang ang unang higayon nga akong gipamalandong ang maong panagkabildo. Nakasabot ko sa gibati ni Abraham ug “naminaw” ko pag-ayo sa panag-estorya nila ni Jehova. Ang pagpatalinghog ni Jehova kang Abraham nakapalugmaw sa mga luha sa akong mga mata. Kini nga hubad nagpabuhi sa maong situwasyon. Wala lamang nako makita ang mga hiyas ni Jehova apan gibati ko usab kini.”

“Salamat sa kompletong Bag-ong Kalibotang Hubad!” misulat si Svetlana nga taga-Moscow. “Sa kataposan dili na kami malibog sa pagbasa sa ‘Daang Tugon’ tungod sa kinaraan ug lisod sabton nga pagkahubad! Sayon kaayo kining basahon!”

Laing magbabasa misulat: “Sa trabahoan akong gisangyawan ang akong trabahante nga si Irina bahin sa kamatuoran. Sa sinugdan, igo lang nakong kutloon ang mga teksto. Apan sa dihang akong gipakita kaniya ang sulondang pag-ampo nga gihatag ni Jesus diha sa akong Bibliya, siya nangutana, ‘Mao ba kini ang Amahan Namo nga pag-ampo?’ Human mabasa ang mga pulong ni Jesus, nalipay gayod siya sa pag-ingon: ‘Pagkanindot! Yano kaayong pagkasulti! Kanunay na akong makadungog niini nga pag-ampo pero wala gyod ko kasabot. Apan dinhi tin-aw kaayo kini ug simple! Gusto ko niini nga Bibliya. Hatagi kog usa ha! Pangitai kog Bibliya nga sama niini!’ Ako mitubag, ‘Ang hatagan lang namog Bibliya mao kadtong gusto gayod nga mobasa niini.’ Siya seryosong mitubag: ‘Sa una dili ko ganahang mobasa ug Bibliya. Bisag daghan kog Bibliya kaniadto, ako tong gipanghatag tanan, pero karon gusto na gyod kong mobasa niini!’”

Ang usa ka brader misulat bahin sa Bag-ong Kalibotang Hubad sa Kristohanon Gregong Kasulatan sa Ukrainian nga pinulongan: “Gusto kong magpasalamat niining talagsaong gasa gikan kang Jehova ug sa iyang organisasyon. Nalingaw ko sa pagbasa niini nga Bibliya ug kanunay ko kining ginadala bisan asa.  Simple ug daling masabtan ang mga pulong nga gigamit. Nakaabot kini sa akong kasingkasing ug dali na nakong masabtan ang tanang doktrina sa Bibliya.”

Daghan usab ang nalipay sa pagkadawat sa mga Bibliya diha sa Serbian ug Croatian nga pinulongan. “Sayon kaayo kining basahon,” misulat ang usa ka sister sa Croatia, “ug mas daling masabtan kay sa Bibliya nga among gigamit sa daghang katuigan. Ang mga tambag sa Kasulatan mas daling makatandog kanako, ug akong gibati nga mas nakaila ako kang Jehova karon.”

Sa Nobyembre 2, 2007, giluwatan ni Brader Geoffrey Jackson sa Nagamandong Lawas ang Bag-ong Kalibotang Hubad sa Kristohanon Gregong Kasulatan sa Samoan nga pinulongan. Diyutay ra ang mabatonang mga kopya sa karaang Bibliya nga Samoan ug mahal pa, mao nga nalipay kaayo ang mga igsoon kay makabaton na dayon sila karon ug mga Bibliya. Human gamita ang Bibliya sa pipila ka bulan, usa ka brader nag-ingon, “Lisod kaayong sabton ang karaang Bibliya, apan kining bag-ong Bibliya tin-aw ug sayon kaayong sabton.”

Usa ka sister nagsugilon bahin sa usa ka pagtuon sa Bibliya diin gikutlo ang Santiago 4:8 sa gitun-ang basahon. “Akong gihangyo ang gitun-an nga bisag nahibalo na kami sa teksto,” matod sa nagdumala, “kinahanglang basahon namo kini diha sa Bag-ong Kalibotang Hubad. Sa sinugdan abi namog sayop ang teksto nga among gibasa pero sa dihang amo kining gitan-aw pag-usab husto ra diay. Ang sister nga miuban nako sa pagtuon morag nakurat ug miingon, ‘Nausab lagi ning tekstoha no?’ Karon tin-aw na namong nasabtan nga ang ‘pagduol’ nagpasabot nga kita angayng magbaton ug suod nga relasyon kang Jehova, usa ka punto nga wala ipasiugda sa karaang Bibliya. Natandog gayod ang among kasingkasing ug buot kaming makabaton ug suod nga relasyon kang Jehova.”

Paglabay sa pipila ka panahon human maluwati ang Ininsek nga Bag-ong Kalibotang Hubad, ang mga misyonaryo sa Taiwan misulat: “Among gipakita ang Bag-ong Kalibotang Hubad sa usa ka abogado nga tigbasa sa atong mga magasin. Gusto siyang mahibalo kon nganong gikinahanglan ang usa ka bag-ong hubad. Human ipakita kaniya ang pipila lang ka teksto, nakadayeg  gayod siya ug miingon nga kining hubara mas daling masabtan kay sa Union Version nga Bibliya nga iyang ginabasa.” Ilang gipakita usab ang Bibliya ngadto sa usa ka babaye nga membro sa Parliamento, nga nagbilin niini sa iyang opisina. Ang usa ka anawnser sa radyo kinsa hinawayon sa mga Saksi ni Jehova nakakita sa maong hubad diha sa opisina sa babaye, gikuha kini, ug gibasa ang pipila ka bahin niini. Kay nakadayeg pag-ayo, iyang gitawagan ang mga misyonaryo ug mihangyo ug kopya sa maong Bibliya.

Ang usa ka Kirghiz nga sister nga maglisod ug basa tungod sa problema sa mata naghunahuna nga hago kaayo ang pagbasa ug Bibliya. Apan, nausab ang iyang hunahuna sa dihang nakabaton siyag Bag-ong Kalibotang Hubad sa Kristohanon Gregong Kasulatan diha sa Kirghiz nga pinulongan. Malipayon na kaayo siya karon nga magbasa sa Bibliya tungod sa sayon ug tin-aw nga pagkahubad.

“Maayo kaayo kining pagkahubad!” nag-ingon ang usa ka sister. “Dili ko masipyat kon magbasa kog kusog. Gusto nako ning balik-balikon ug basa. Morag akong gitun-an pag-usab ang kamatuoran.”

“Ganahan kaayo ko sa Ebanghelyo ni Mateo diha sa American Sign Language (ASL),” misulat ang usa ka sister nga may diperensiya sa igdulungog ngadto sa Nagamandong Lawas. “Ang Bibliya buhi ug nagtandog sa akong kasingkasing karon. Akong masabtan kon unsay personalidad ni Jesus, akong makita ang ekspresyon sa iyang nawong, ang iyang pagkamabination, ug ang iyang dakong gugma sa katawhan. Ganahan kaayo ko sa akong ASL nga kopya sa Ebanghelyo ni Mateo. Apan . . . mahimo ba ninyong paspasan ug himo ang ubang ASL nga mga basahon sa Bibliya?”

Ang usa ka maayong hubad sa Bibliya makapatin-aw gayod sa mensahe sa Pulong sa Diyos, nga makapalapos sa kahayag sa matuod nga mensahe diha sa kasingkasing sa magbabasa. Tungod niini, kadtong nangandoy nga masuod sa ilang langitnong Amahan malipay gayod sa dihang ang Bag-ong Kalibotang Hubad mabatonan na sa ilang kaugalingong pinulongan—ang pinulongan nga makapatandog sa ilang kasingkasing.

 NAGPADALAG DAGHANG MAMUMUO SA ALANIHON

Ingong resulta sa pagpayano sa mga buluhaton sa sangang buhatan, ubay-ubayng membro sa pamilyang Bethel sa Amerika ang gidapit sa pag-alagad sa ubang asaynment. Samtang ang uban gipadala ngadto sa mga sangang buhatan sa ubang mga nasod, ginatos ang giasayn ingong espesyal ug regular nga mga payunir sa lainlaing dapit sa Amerika. Unsay ilang gibati sa dihang sila gibalhin? Sa unsang paagi ilang nasagubang ang mga kalisdanan diha sa ilang bag-ong asaynment? Sa unsang paagi nakapahimulos ang mga kongregasyon?

“Sulod sa daghang tuig,” nahinumdom si Todd ug Leslie, “kami naghangyo sa ‘Agalon sa pagpangani nga magpadalag mga mamumuo ngadto sa iyang pagpangani.’ Wala kami magdahom nga mahilakip kami sa tubag! Karon among nakita nga ang kamot ni Jehova maoy nagadumala sa mga butang, ug giisip namo nga usa ka pribilehiyo nga si Kristo ‘nag-isip kanamo nga kasaligan pinaagi sa pagtudlo kanamo sa usa ka ministeryo.’”—Mat. 9:37, 38; 1 Tim. 1:12.

Sa pagpalandong sa unang mga bulan diha sa ilang bag-ong asaynment, si Franco miingon: “Wala gayod kami mahibalo sa akong asawa kon unsa pa ka dako ang panginahanglan diha sa kanataran sa Amerika. Sa dihang nakaabot kami sa among bag-ong asaynment, kami nakakaplag ug daghang pagtuon sa Bibliya.” Sa pagpahayag sa gibati sa daghang payunir, si Curtis ug Karolynne nag-ingon: “Kami malipayon kaayo sa pagdawat sa among asaynment diha sa kanataran! Higayon na namo kini sa pagpakita kang Jehova nga kinasingkasing gayod namong tumanon ang among pagpahinungod ngadto kaniya.”

PAGSALIG SA “AGALON SA PAGPANGANI”

Natural lang nga mobatig kabalaka dihang maasayn sa kanataran human sa daghang tuig nga pag-alagad sa Bethel. “Makakita kaha mig baratong puy-anan?” nangutana ang usa ka magtiayon, “ug unsaon namo pagbalhin gikan sa pagkamagmamantala ngadto sa paggugol ug 120 o 130 ka oras kada bulan sa pagsangyaw sa kanataran ug sa pagdasig usab sa mga  igsoon sa kongregasyon?” Sa unsang paagi sila ug ang uban nakasagubang sa ilang bag-ong mga kahimtang?

Ang pipila nakakitag balay nga barato ang abang dihang kataposang adlaw na sa pagpangita ug kapuy-an diha sa ilang bag-ong asaynment. Pananglitan, usa ka dalagang sister nga si Jessica ang mibisita sa iyang asaynment ug nangitag balay nga kaabangan sulod sa duha ka semana pero wala siyay nakit-an. Usa ka adlaw na lang una siya mobalik sa Bethel aron sa pag-impake sa iyang mga gamit, siya nalipay pag-ayo sa dihang usa ka ansiyano didto nagtanyag ug usa ka gamayng balay nga iyang kaabangan sa ubos nga kantidad.

Giingnan ni Jeff ug Cynthia ang manedyer sa paabangang apartment nga sila mga Saksi ni Jehova. “Nakaila ko sa mga Saksi ni Jehova,” matod pa sa manedyer, “ug dili ko angayng mabalaka kaninyo. Tabangan mo ni Jehova sa pagbayad sa inyong abang!”

“Ang among naeksperyensiyahan nagpahinumdom kanamo nga kinahanglan kaming mosalig kanunay kang Jehova,” nag-ingon si Eric ug Melonie. “Matag adlaw among makita nga kami gitabangan ni Jehova. Kini nakapalig-on gayod sa among pagtuo.”

MATINABANGONG MGA KONGREGASYON

Ang mahigugmaong sanong sa mga kongregasyon nakatabang gayod niining mga payunir sa pagpasibo sa ilang bag-ong mga asaynment. Ang usa ka magtatan-aw sa sirkito nagtaho nga daghang kongregasyon ang mabinationg naghisgot bahin sa “among mga espesyal payunir.” Siya midugang, “Ang sirkito sa kinatibuk-an maabiabihon gayod kanila ug mahigugmaong nagtabang kanila.” Usa ka lokal nga brader misulat: “Gusto kong magpasalamat sa sangang buhatan. Panalangin gayod kanamo ang maong mga payunir!”

Ang usa ka kongregasyon sa Kansas adunay 100 ka teritoryo nga wala na masangyawi sa daghang bulan. Karon, uban sa tabang sa usa ka magtiayong espesyal payunir, ang dakong bahin sa maong teritoryo regular nang ginakobrehan. Ang mga  ansiyano misulat: “Karon lang kami nakaamgo kon unsa diay ka mapuslanon kini nga kahikayan.”

Samtang ang mga kongregasyon mao ang “makapalig-on nga tabang” ngadto sa mga payunir, nakapahimulos usab ang lokal nga mga magmamantala. (Col. 4:11) Ang usa ka magtatan-aw sa sirkito nagtaho, “Ang kadasig ug kasibot sa mga payunir nakadasig gayod sa mga igsoon.” Ang laing nagapanawng magtatan-aw misulat, “Ang daling makita diha sa mga espesyal payunir mao ang ilang gugma ug kalipay, nga nakadasig usab sa uban sa pagpakita niining mga hiyasa.”

Ang usa ka magtiayon nalipay sa pagtabang sa napulo ka di-aktibong magmamantala nga maaktibo pag-usab. Dugang pa, maayo kinig epekto sa mga ansiyano. “Dako gayod ug tabang kanamo nga adunay usa ka timbang ug nabansay nga brader sulod sa kongregasyon,” misulat ang usa ka ansiyano. “Mao gayod kini ang gikinahanglan sa kongregasyon ug sa lawas sa mga ansiyano.”

“ISIGKAMAGBUBUHAT SA DIYOS”

Si Jehova nagapanalangin sa mga magmamantala sa Gingharian ug daghang malipayong eksperyensiya. Pananglitan, usa niana ka tingtugnaw, si Steve ug Gaye namalaybalay. Sa ilang unang pultahan, nakasugod silag pagtuon sa Bibliya uban sa usa ka magul-anong tigulang nga lalaki. Sulod sa duha ka semana siya mitambong sa tigom sa Kingdom Hall, diin ilang nahisgotan kon unsa siya ka buotan sa pagpadayon kanila sa ilang unang pagduaw. “Wala ako magpasulod ninyo tungod kay ako buotan,” siya mitubag. “Ako kamong gipasulod kay nahibalo ko nga moabot mo. Tulo ka adlaw na kong nag-ampo alang sa tabang.” Karon ang maong tigulang tigtambongan na sa mga tigom ug hapit nang magpabawtismo.

Usa ka adlaw sa dihang si Ray ug Jill nagbiyahe, sila mihunong ug giestorya ang usa ka tawo nga naglakaw sa pikas nga bahin sa dalan. Ilang gihatagan ug literatura ang maong tawo ug gitanyagan ug pagtuon sa Bibliya. Siya midawat sa mga magasin ug miingon nga siya kaniadto nagtuon sa Bibliya uban sa mga Saksi ni Jehova. Bag-o lang siyang mibalhin sa maong  lugar ug malipayong misugot nga ipadayon ang iyang pagtuon sa Bibliya.

Ang tanan nga padayong magsakripisyo sa pag-alagad kang Jehova nasayod nga ‘ang Diyos dili kay dili-matarong nga kalimtan ang ilang buhat ug ang gugma nga ilang gipakita alang sa iyang ngalan.’ (Heb. 6:10) Sama nga ang lawas sa tawo adunay daghang sangkap nga magtinabangay, ang matag usa ka membro sa kongregasyon makaamot usab alang sa espirituwal nga pag-uswag ug katahom niini. ‘Ang Diyos nagpahiluna sa mga [membro sa kongregasyon], ang matag usa kanila, sumala sa iyang gikahimut-an,’ ug ‘ang tanang ubang mga [membro] magamaya’ kon magtinabangay ang matag usa. (1 Cor. 12:18, 26) Kini nga pagtinabangay sa “mga isigkamagbubuhat sa Diyos” naghatag ug himaya kang Jehova, nga mao ang “nagpadayon sa pagpatubo niini.”—1 Cor. 3:6, 9.

PAGTUKOD SA LEGAL NGA PAAGI SA MAAYONG BALITA

Giingnan ni Jesus ang iyang mga apostoles: “Kamo pagadumtan sa tanang katawhan tungod sa akong ngalan.” (Mat. 10:22) Dahomon sa matuod nga mga tinun-an nga ang mga magsusupak nga ‘binakak nga mosulti kanila sa tanang matang sa kadaotan tungod kaniya.’ (Mat. 5:11) Sa unsang paagi ang mga tinun-an ni Jesus karon ‘nagtukod sa legal nga paagi sa maayong balita’?—Fil. 1:7.

Armenia

Gikan sa Abril 2007 hangtod sa Abril 2008, ang mga opisyales sa aduwana sa Armenia nag-ingon nga dili nila ipagawas ang kapin sa pito ka toneladang mga Bibliya ug literatura sa Bibliya gawas kon bayran ang dako kaayong buhis. Sa Abril 2008, gipagawas ang unang kargamento sa literatura human mapugos sa pagbayad ug buhis ang mga igsoon, samtang ang ubang kargamento padayong gihawiran sa aduwana. Gipaningkamotan sa mga igsoon nga masulbad ang maong problema diha sa legal nga paagi.

Kazakhstan

Duha ka brader nga gikan sa hedkuwarter sa mga Saksi ni Jehova, nga miduaw aron sa pagdasig sa mga igsoon sa Kazakhstan, ang gidakop human sa usa ka linaing miting didto sa siyudad sa Almaty. Sila gidala sa estasyon sa polis, gisukitsukit,  ug dayon gidala atubangan sa huwes sa usa ka korte, nga naghukom kanilang sad-an tungod sa “misyonaryong kalihokan.” Bisag gibuhian ra sila sa ulahi, adunay gihimong mga paningkamot aron maabsuwelto ang duha ka brader sa ilang kaso. Di pa dugay, gipangronda sa mga awtoridad ang kabalayan sa atong mga igsoon aron pahunongon ang mga tigom alang sa pag-ampo ug pagtuon sa Bibliya. Gipugngan usab sa korte ang relihiyosong mga kalihokan sa tulo ka kongregasyon nga legal nga narehistro, ug ang mga ahensiya sa gobyerno kanunayng nagbalda sa teokratikong mga kalihokan sa usa ka rehiyon sa amihanang bahin sa Caspian Sea.

Tajikistan

Ang Relihiyosong Komunidad sa mga Saksi ni Jehova sa Tajikistan legal nga narehistro sa 1994, nga nagtugot kanila sa pagtigom alang sa pagsimba. Apan niadtong Oktubre 11, 2007, ang departamento sa kultura midesisyon sa pagdili sa pagsimba sa mga Saksi ni Jehova. May gihimo nang mga lakang ang mga igsoon sa pagpamatuod sa mga awtoridad nga ang mga Saksi ni Jehova maoy malinawon ug mahigugmaong mga tawo nga dili hulga sa kahusay sa katilingban.

Uzbekistan

Ang kahimtang sa mga Saksi ni Jehova sa Uzbekistan nagkagrabe. Sayo sa 2008, usa sa mga Saksi ni Jehova ang nasentensiyahan ug upat ka tuig nga pagkabilanggo sa kampo diin ang usa pugson sa pagtrabaho tungod sa pagsunod  sa iyang relihiyon. Ang uban gidakop, gibilanggo, gisentensiyahan, ug gipamulta tungod sa paglapas sa balaod bahin sa mga relihiyosong organisasyon ug mga lagda bahin sa pagwali sa relihiyosong mga doktrina. Gironda usab ang mga tigom, girekisa ang pribadong mga balay, gikompiskar ang mga literatura, ug gibilanggo ang mga igsoon. Daghan sa atong mga igsoon ang gibalikas ug gikulata sa mga polis.

Daghang opisyales niining dapita nag-ingon nga ang mga lider sa relihiyon maoy naghulhog sa maong daotang mga buhat. Manghinaot lang kita nga sa dili madugay makita sa mga awtoridad nga dili gayod husto ang ilang gibuhat ug tugotan ang atong mga igsoon nga “magpadayon sa pagkinabuhi nga mahusay ug malinawon uban ang bug-os nga diyosnong pagkamahinalaron ug pagkaugdang.”—1 Tim. 2:1, 2.

Gresya

Adunay duha ka paborableng desisyon ang gipakanaog sa hataas nga mga korte sa Gresya maylabot sa katungod sa tagsa-tagsa ka tawo nga dili magsundalo tungod sa diktar sa ilang tanlag nga gibase sa ilang relihiyosong pagtuo. Si Konstantinos Kotidis sundalo kaniadto sa Unyon Sobyet sulod sa daghang katuigan sa wala pa siya mobalhin sa Gresya ug nahimong Saksi ni Jehova. Sa dihang gipatawag sa mga awtoridad si Brader Kotidis sa pagserbisyo sa militar, siya wala tugoti nga mohimog kapuli nga serbisyo para sa komunidad. Sila miinsistir nga tungod kay siya sundalo na kaniadto, wala siyay katarongan nga mobalibad tungod sa diktar sa iyang tanlag. Hinuon,  ang Konseho sa Estado mimando nga ang usa nga nagsundalo kaniadto ug kansang tanlag mausab sa ulahi tungod iyang relihiyosong pagtuo mahimong tugotan nga mobuhat ug kapuli nga serbisyo para sa komunidad.

Sa laing kaso, si Stylianos Ioannidis wala dawata sa trabaho diha sa usa ka publikong institusyon kay siya nabilanggo kanhi tungod sa diktar sa iyang tanlag mao nga wala niya makompleto ang iyang mga obligasyon sa militar. Apan, ang Konseho sa Estado mimando nga human mabilanggo ang mga tawong midumili sa pagsundalo tungod sa tanlag, sila kahatagan ug eksemsiyon sa pagserbisyo sa militar. Miingon usab ang korte nga wala na silay obligasyon sa militar ug busa makatrabaho na sila diha sa publiko. Kini ang unang higayon nga ang Konseho sa Estado pareho ug desisyon sa European Court of Human Rights may kalabotan sa kagawasan sa relihiyon diin ang usa ka Saksi ni Jehova wala hatagig trabaho kay siya gihukmang sad-an kaniadto tungod sa iyang pagdumili sa pagsundalo.

Eritrea

Ang atong mga kaigsoonan sa Eritrea padayong nakaagom ug mabangis ug dili-makataronganong pagtratar. Gibilanggo sa mga awtoridad ang daghang Saksi ni Jehova, nga ang uban gibalhog diha sa hugaw kaayong mga selda. Sa Hulyo 2008, may unom ka bag-ong gipangdakop nga mga brader, lakip ang pipila ka ansiyano nga nanguna sa buluhaton niining nasora. Bisan pa sa daghang paningkamot ug mga apelasyon gikan sa ubang mga nasod alang sa kagawasan, ang gobyerno determinado gihapon sa pagsupak sa pagsimba sa matuod nga Diyos, si Jehova.

Habagatang Korea

Wala ilha sa gobyerno sa Habagatang Korea ang katungod sa tawo sa paghukom nga dili magsundalo tungod sa diktar sa tanlag. Kapin sa 13,000 sa atong mga igsoong lalaki ang nabilanggo sa milabayng 50 ka tuig, ug gibanabana nga aduna pay 500 nga gibilanggo karon. Ang ilang lig-ong baroganan ug Kristohanong panggawi naghatag ug maayo kaayong pamatuod ngadto sa mga opisyales sa bilanggoan ug sa gobyerno, nga nakapahimuot sa atong Diyos nga si Jehova. (1 Ped. 2:20) Sa pagkakaron, may 488 na ka aplikasyon nga  gisang-at ngadto sa Human Rights Committee sa United Nations, nga mihukom pabor sa duha ka kaso sa 2006. Nanghinaot ang atong mga igsoon nga tumanon sa gobyerno ang ilang plano sa paghimog balaod nga maghatag ug kapuli nga serbisyo diha sa komunidad para sa mga dili magsundalo tungod sa diktar sa tanlag.

Rwanda

Ang tanang magtutudlo sa Rwanda kinahanglang motambong sa seminar nga gipahigayon niadtong Abril 2008, nga naglakip sa mga magtutudlong Saksi ni Jehova. Walay mga eksemsiyon nga gihimo alang niadtong dili gustong moapil sa mga kalihokan nga naglapas sa ilang nabansay-sa-Bibliya nga tanlag. Ingong resulta, mga 215 ka Saksi nga wala motambong ang gitangtang sa pagkamagtutudlo, ug duha ka sister ang gipriso sulod sa pipila ka semana. Ang maong seminar naglakip sa mga isyu bahin sa politika ug militar, ug ang nanambong gisugo sa pag-apil sa politikanhong mga kalihokan ug nasyonalistikong mga seremonyas. Kadtong mosulay sa pagbiya sa seminar pugngan sa militar. Sukad niadto, 90 ka anak sa mga Saksi ni Jehova ang gipalagpot sa ilang eskuylahan tungod sa pagdumili sa pagkanta sa nasodnong awit o pagsaludo sa bandera. Kita masaligon nga si Jehova magpalig-on sa atong mga igsoon ug sa ilang mga anak sa pagpabiling matinumanon niining bag-ong miulbo nga paglutos.

Espanya

Giaprobahan sa gobyerno sa Espanya ang usa ka mando sa hari nga naglangkit sa mga Saksi ni Jehova nga anaa sa espesyal nga bug-os panahong pag-alagad, sama sa mga membro sa pamilyang Bethel ug sa nagapanawng mga magtatan-aw. Ang opisyal nga pahibalo nag-ila niadtong anaa sa espesyal nga bug-os panahong pag-alagad ingong “ordinadong mga ministro . . . nga bug-os naggamit sa ilang kinabuhi sa misyonaryo o relihiyosong kalihokan, sa pagpanudlo bahin sa relihiyon, o sa uban pang hinungdanong mga kalihokan nga nagpaluyo sa katuyoan sa ilang relihiyon.” Kini nga balaod miabot sa panahong ang mga awtoridad diha sa pipila ka nasod mikuwestiyon kon ang mga Saksi ni Jehova nga anaa sa espesyal nga bug-os panahong pag-alagad tinuod bang mga ministro nga  may katungod sa pagdawat ug mga benepisyo nga ginahatag ngadto sa mga ministro sa ubang mga relihiyon.

ANG EUROPEAN COURT OF HUMAN RIGHTS

Ang mga Saksi ni Jehova sa Armenia, Austria, Azerbaijan, Georgia, Pransiya, Rusya, Turkey, ug Ukraine adunay 24 ka kaso nga gisang-at ngadto sa European Court of Human Rights (ECHR) sa Strasbourg, Pransiya. Ang mga kaso nalangkit sa pangunang mga katungod sa mga molupyo nga nailalom sa  pagdumala sa European Convention on Human Rights, sama sa katungod nga dili magsundalo tungod sa diktar sa tanlag. Ang ubang kaso nalangkit sa paglutos ug pagpihigpihig tungod sa relihiyon, pagkanselar sa rehistrasyon o pagdili sa legal nga korporasyon nga gigamit sa mga Saksi ni Jehova sa pag-organisar sa ilang buluhaton, pagbabag sa gobyerno sa katungod nga magtigom alang sa pagsimba, ug sa katungod sa ginikanan sa pagmatuto sa iyang anak ingong usa sa mga Saksi ni Jehova.

Austria

Usa ka paborableng desisyon ang gipakanaog sa ECHR niadtong Hulyo 31, 2008, sa kaso nga Jehovah’s Witnesses v. Austria. Ang korte nag-ingon nga ang balaod sa Austria bahin sa relihiyon naglapas sa katungod sa mga Saksi ni Jehova sa kagawasan sa pagsimba kay kini nagsunod sa duha ka matang nga sistema, nga tungod niana namugna ang ubos nga matang nga mga relihiyon ug, busa, mitungha ang ubos nga matang nga mga lungsoranon. Kini nga desisyon miabot human ang 30 ka tuig nga pagpaningkamot sa atong mga igsoon nga maila ingong relihiyosong organisasyon sa Austria. Ang korte mihukom: “[Ang paghulat ug taas nga panahon] morag dili makataronganon alang sa relihiyosong mga grupo nga dugay nang naglungtad sa ubang kayutaan nga dugay na usab nga naglungtad dinhi sa nasod ug busa nailhan na sa mga awtoridad, sama sa mga Saksi ni Jehova.” Karon ang gobyerno sa Austria gimandoan sa pag-usab sa ilang mga balaod, nga magtugot sa atong mga igsoon sa pagbaton ug mga katungod nga sama sa napahimuslan sa dagkong mga relihiyon sa Austria.

Azerbaijan

Sa Nobyembre 2007, usa ka kaso ang gisang-at ngadto sa ECHR nga nagsumbong sa gihimong paglapas sa mga polis sa atong katungod sa kagawasan sa pagsimba. Bisag legal nga narehistro ang mga Saksi ni Jehova sa Azerbaijan, nagkadaghan ang mga igsoon nga gidakop ug gidagmalan. Dagkong grupo sa armadong kapolisan ang nagronda sa malinawong mga tigom sa mga Saksi ni Jehova, nagkompiskar sa mga literatura ug pribadong mga kabtangan, nagdakop ug nagpriso sa mga nanambong, ug nagbalikas ug nagdagmal sa mga igsoon. Tungod  kay nagpadayon man ang pagpangronda sa kapolisan, giisip sa korte nga dinalian ang maong kaso ug gipadali ang imbestigasyon bahin niini. Kita manghinaot nga sa dili madugay tugotan na ang atong mga igsoon nga malinawong magkatigom nga dili na hasion sa kapolisan.

Pransiya

Sa Pebrero 2005, usa ka kaso ang gisang-at ngadto sa ECHR maylabot sa dili makataronganon ug supak sa balaod nga pagbayad ug buhis nga gipahamtang sa gobyerno sa Pransiya ngadto sa Asosasyon sa mga Saksi ni Jehova sa Pransiya. Nagpaabot gihapon kita karon kon tagdon ba sa korte ang maong kaso. Sa kasamtangan, gituis sa mga magsusupak ang atong pagtulon-an nga tungod niini mga 70 ka kaso sa pagpangdaot ug Kingdom Hall ang nahitabo sa miaging tuig. Bisan pa niana, nanghinaot ang atong mga igsoon sa Pransiya nga sa dili madugay ang korte mohukom nga ang gobyerno nagmapihigon, aron mahatagag kahupayan ang mga Saksi ni Jehova niining nasora.

Rusya

Sa Disyembre 2001, ang mga Saksi ni Jehova sa Rusya nagsang-at ug kaso sa ECHR tungod sa balikbalik nga kriminal ug sibil nga mga sumbong batok sa mga Saksi ni Jehova. Sa Hunyo 2004, giuyonan sa Moscow City Court ang desisyon sa mas ubos nga korte sa pagdili sa kalihokan sa mga Saksi ni Jehova sa Moscow ug sa pagsira sa korporasyon nga ilang gigamit. Kasagaran, ang mga igsoon sa Moscow makatigom gihapon alang sa pagsimba ug makasangyaw sa maayong balita sa Gingharian. Apan sa Moscow ug sa uban pang dapit sa Rusya, adunay daghang hitabo nga gipahunong sa mga awtoridad ang mga tigom ug mga asembliya, ug gidagmalan usab ang atong mga igsoon. Pananglitan, pagka-Hulyo, sa lungsod sa Chekhov, mga 60 kilometros habagatan sa Moscow, gisunog sa wala hiilhing mga tawo ang Kingdom Hall. Bisag gitawag dayon ang mga bombero, ang mga nakasaksi miingon nga wala kaayoy gihimo ang mga bombero sa pagpalong sa kalayo, ug hangtod karon walay imbestigasyon nga gihimo ang mga polis bahin sa maong hitabo. Bisan pa sa mga kalisdanan ug pagsupak, ang atong mga igsoon sa Rusya nagpabiling matinumanon ug nagsalig sa pagpaluyo ni Jehova.

 Si Jehova nagsaad nga walay hinagiban nga buhaton batok kanato ang molampos. (Isa. 54:17) Bisan ang kinalisdang mga kahimtang moresulta sa “pagpauswag sa maayong balita.” Busa, ang mga alagad sa Diyos determinado nga padayong ‘mobarog nga malig-on sa usa ka espiritu, uban ang usa ka kalag nga naningkamot kiliran sa kiliran alang sa pagtuo sa maayong balita, ug sa bisan unsang paagi dili malisang sa ilang mga kaatbang.’ (Fil. 1:12, 16, 18, 27, 28) Palihog “magpadayon [kita] sa pag-ampo” alang sa atong mga igsoon sa tibuok yuta samtang sila nagasalig kang Jehova, ang ilang ‘salipdanan ug Magtatagana ug kaikyasan.’—2 Tes. 3:1; Sal. 18:2.

MGA DEDIKASYON SA MGA SANGANG BUHATAN

Sa Sabado, Nobyembre 10, 2007, nalipay pag-ayo ang sangang buhatan sa Habagatang Aprika sa dihang mga 4,000 ka igsoong babaye ug lalaki ang mitambong sa dedikasyon sa gipadak-ang imprentahanan, lawak kan-anan, ug puy-anan.

Ang mga bisita sa gipadak-ang imprentahanan nahingangha sa pagkakita sa makinang MAN Roland Lithoman nga walay hunong nga nag-imprentag libolibong mga Bibliya ug mga basahon sa Bibliya. Ang bag-ong bookbindery nakahimog kapin sa usa ka milyong kopya sa Bag-ong Kalibotang Hubad diha sa 16 ka pinulongan sa Aprika. Gipakita sa mga bisita ang gipadak-ang mga pasilidad sa shipping diin didto gibutang ang mga literatura sa sangang buhatan nga gigamit sa halos 8,000 ka kongregasyon diha sa napulo ka nasod sa habagatang bahin sa Aprika.

Sa Hunyo 7, 2008, ang gidugang nga bilding diha sa sangang buhatan sa Nigeria gipahinungod didto sa Lagos, nga 360 kilometros habagatan-kasadpan sa Bethel sa Igieduma. Ang sangang buhatan sa Lagos adunay 24 ka kuwartong puy-anan, usa ka bodega, ug usa ka bilding nga dunay mga opisina. Daghan sa mga kalihokan sa sangang buhatan ang ginahimo didto sa Lagos, ang sentro sa ekonomiya sa Nigeria. Ang bag-ong mga pasilidad maoy puy-anan sa mga Bethelite nga tigkuhag mga kargamento gikan sa pantalan ug tigpalit sa mga suplay para sa sangang buhatan, ug sak-anan usab niadtong mangabot ug mobiya  sa erport. Ang sangang buhatan sa Lagos gihimo usab nga temporaryong lokasyon alang sa Tunghaan sa Ministeryal nga Pagbansay hangtod mahuman ang konstruksiyon sa gipadak-ang sangang buhatan sa Igieduma. Dayag nga gipanalanginan gayod ni Jehova ang buluhatong pagsangyaw sa Aprika, maingon nga iyang gipanalanginan ang pagsangyaw sa tibuok yuta.

NASANGKAPAN SA PAGBUHAT SA KABUBUT-ON SA DIYOS

Mapasalamaton gayod kita kang Jehova nga siya nagsangkap kanato sa tanang maayong butang sa pagbuhat sa iyang kabubut-on. (Heb. 13:21) Tungod kay napamatud-an na ni Jehova nga siya “makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna,” bug-os kasingkasing kitang makapahayag: “Ngadto kaniya ang himaya pinaagi sa kongregasyon ug pinaagi ni Kristo Jesus ngadto sa tanang kaliwatan hangtod sa kahangtoran.”—Efe. 3:20, 21.

[Kahon sa panid 25]

Pagparehistro sa Relihiyon—Ngano ug sa Unsang Paagi?

Sa matag nasod lainlain ang paagi sa pagparehistro sa relihiyon. Ang pipila ka nasod, sama sa Armenia ug Azerbaijan, adunay espesipikong mga balaod nga magtugot sa usa ka relihiyosong asosasyon sa pagparehistro aron legal nga ilhon sa gobyerno. Kon maaprobahan kini, ilhon na nianang nasora nga usa ka relihiyon ang maong asosasyon. Sa ubang mga nasod, adunay duha ka matang sa pagparehistro. Ang una maoy para sa dagko ug iladong mga relihiyon. Kini adunay daghang bentaha, nga naglakip sa eksemsiyon sa buhis. Ang ikaduha maoy para sa gagmay, bag-o, ug dili-iladong mga relihiyon.

Ang ubang mga nasod, sama sa Georgia ug Tinipong Bansa sa Amerika, walay espesipikong balaod sa pagparehistro sa mga relihiyon. Sa maong mga kahimtang, ang konstitusyon maghatag sa tanan ug kagawasan sa relihiyon. Bisan tuod walay opisyal nga pag-ila ang tagsa-tagsa ka relihiyosong mga grupo, kini makaparehistro ug usa ka ahensiya nga ilhon sa gobyerno. Kon maaprobahan, ila nang magamit kana nga ahensiya sa paghimo sa ilang mga kalihokan, nga mahimong maglakip sa pag-imprenta ug pagpanag-iyag propiedad.

[Mapa sa panid 21]

(Alang sa aktuwal nga pagkahan-ay, tan-awa ang publikasyon)

AUSTRIA

FRANCE

SPAIN

GREECE

ERITREA

RWANDA

ARMENIA

AZERBAIJAN

RUSSIA

KAZAKHSTAN

UZBEKISTAN

TAJIKISTAN

SOUTH KOREA

[Hulagway sa panid 11]

Kongregasyon sa Siaya nga nagsultig Luo nga pinulongan

[Hulagway sa panid 13]

Sa tibuok o sa bahin, ang “Bag-ong Kalibotang Hubad” mabatonan na sa kapin sa 70 ka pinulongan

[Hulagway sa panid 22]

Si Konstantinos Kotidis

[Hulagway sa panid 22]

Si Stylianos Ioannidis

[Hulagway sa panid 29]

Bag-ong puy-anan sa Lagos, Nigeria

[Hulagway sa panid 29]

Imprentahanan sa sangang buhatan sa Habagatang Aprika