Kalihokan sa mga Saksi ni Jehova sa Modernong Kapanahonan

Samoa

Ang asoy sa mga Saksi ni Jehova niining dapita nga gitawag ug “Gigikanan sa Polynesia” nagpakita sa ilang debosyon, pagkamaisogon, ug pagkamaunongon. Hibaloa kon sama sa unsa ang pagsangyaw sa mga komunidad sa tropiko nga relihiyoso kaayo ug sinati sa Bibliya nga tungod niana aduna silay talagsaong bokabularyo kon mag-ampo o maghisgot bahin sa Diyos. Imong mailhan ang mga Saksi kinsa nagpadayon sa pag-alagad kang Jehova bisan pa sa grabeng mga balatian. Basaha ang asoy mahitungod sa usa ka pamilya nga mobaktas ug 22 kilometros agi sa kabukiran aron makatambong sa mga tigom, ug sayra kon nganong ang pipila ka bata diha sa usa ka baryo maninggit, “Nia na ang Armagedon!”

Kayutaan sa Kanhing Yugoslavia

Ang talagsaong asoy sa pagtuo ug kaisog nadayag diha sa usa ka rehiyon nga kaylap ang pagpatay ug pagdumot tungod sa etniko ug relihiyosong mga kabingkilan. Maylabot sa usa ka grupo sa mga Saksi nga natanggong sa usa ka siyudad ug nakalahutay sa usa sa kinadugayang paglikos sa mga sundalo sa modernong panahon, ang usa ka brader nag-ingon: “Kami mga Croatiano, Serbiano, ug Bosniano—ang rasa sa mga tawo nga nagpinatyanay sa gawas—apan kami nahiusa sa putling pagsimba.” Malig-on gayod ang imong pagtuo sa dihang imong mabasa kon giunsa paghupot sa mga igsoon ang ilang integridad panahon sa kalinaw ug panahon sa gubat.