Pagsangyaw ug Pagpanudlo sa Tibuok Yuta

APRIKA

KAYUTAAN 57

POPULASYON 848,582,269

MGA MAGMAMANTALA 1,122,493

MGA PAGTUON SA BIBLIYA 2,202,217

Rwanda

Samtang nagpauli gikan sa eskuylahan, ang usa ka nuybe anyos nga batang babaye nakakitag dakong kantidad nga kuwarta sulod sa usa ka gamay nga bag diha sa dalan. Ang iyang pamilya, nga nagtuon sa Bibliya uban sa mga Saksi, nakahukom sa pagpadapat sa ilang nakat-onan sa Bibliya. Busa ilang gipangita ang tag-iya ug giuli ang kuwarta. Gipangutana sa tag-iya ang bata, “Kon hatagan ti kag kuwarta ingong ganti sa imong pagkamatinud-anon, unsa may imong paliton?”

“Mopalit kog Bibliya,” matod pa sa bata.

Kay natingala, ang tawo miingon, “Abi nakog mopalit kag mga sinina o sapatos kay morag daan na man god kaayo nang imong gisul-ob.” Ang bata miinsistir nga mas gusto niyang makabaton ug Bibliya. Gustong masayod ang maong tawo kon nganong giuli man sa pamilya ang kuwarta. Pagkahibalo niya nga sila nagtuon ug Bibliya uban sa mga Saksi ni Jehova, mipalit siyag duha ka Bibliya, ang usa alang sa batang babaye ug ang lain alang sa iyang pamilya. Iyang gihangyo usab ang mga Saksi sa pagduaw sa iyang pamilya aron sa pagtuon sa Bibliya uban kanila. Ang duha ka pamilya miuswag gayod sa ilang pagtuon sa Bibliya.

Republika sa Sentral Aprika

Sa tabang ni Jehova, nabuntog ni Theodora ang iyang sobrang pagkamaulawon. Bisan tuod nagdako siya diha sa usa ka Kristohanong panimalay, talagsa ra kaayo siyang motambong sa mga tigom sa Kingdom Hall tungod sa iyang pagkamaulawon. Dihang misugod na siya ug tambong, gusto niyang walay katapad sa lingkoranan, dili makigsulti  kang bisan kinsa ug mouli dayon inigkahuman sa paniklop nga awit ug pag-ampo. Wala madugay kanunay na siyang motambong apan talagsa rang makiglamano niadtong mangomosta kaniya. Paglabay sa panahon, siya mokomento na sa mga tigom ug moduol na sa uban aron mangomosta kanila. Dako kaayong hagit ang pagsangyaw alang kaniya. Dihang giyagayagaan siya sa iyang silingang mga babaye, daw kaundangon si Theodora sa pagsangyaw, apan siya miampo kang Jehova alang sa kalig-on. Karon siya usa na ka bawtismadong sister, nag-oksilyare payunir ug maayo nang mokomento panahon sa mga tigom. Siya nagdumalag upat ka pagtuon sa Bibliya, nga ang usa kanila may silingan nga nagyagayaga kaniya.

Madagascar

Usa ka magtatan-aw sa sirkito kauban sa iyang asawa ang nagpaingon sa usa ka kongregasyon nga anaa sa baryo. Sa ilang pagpaingon didto, ilang nahinagbo ang usa ka grupo sa mga kawatan ug baka nga nagbitbit ug mga atsa ug bangkaw. Human makaampo sa hilom alang sa kaisog, ang asawa sa magtatan-aw sa sirkito mitanyag kanila sa tract nga Kinabuhi sa Malinawong Bag-ong Kalibotan. Siya miingon: “Karong panahona, kita nagkinabuhi sa kahadlok. Apan, sa dili madugay ang Diyos maglaglag sa mga daotan ug magtukod ug usa ka bag-ong kalibotan diin maghari ang kalinaw.” Usa kanila ang namati pag-ayo ug midawat sa tract.

Paglabayg usa ka tuig panahon sa usa ka asembliya, dihay lalaki nga miduol sa asawa sa magtatan-aw sa sirkito ug nangutana kon nahinumdom pa ba siya kaniya. Ang lalaki miingon nga kauban siya sa mga kawatan nga iyang nahinagbo sa lapokong dalan ug siya kadtong midawat sa tract. Dayon siya miingon: “Gikan ming nangawat niadtong nagkahinagbo ta. Nakapamalandong gyod ko sa imong gisulti. Nakaingon ko sa akong kaugalingon: ‘Wala mi mahadlok sa mga polis ug mga sundalo tungod kay makaikyas ra man mi nila. Apan unsaon nako pag-ikyas sa Diyos kon iya nang laglagon ang mga daotan?’ Mao nga nakadesidir ko nga mosusi pag dugang. Akong giadto ang among silingan nga nagtuon sa Bibliya uban sa usa ka espesyal payunir. Miuyon ko nga magtuon usab sa Bibliya uban kaniya, ug karon magpabawtismo na ko niining asembliyaha.”

 Mozambique

Niadtong 1992, si Madalena, nga mao pay pag-30 anyos, naaksidente sa sakyanan nga tungod niana naparalisar ang katunga sa iyang lawas. Human sa maong panghitabo, talagsa na lang siyang makagawas sa ilang balay. Tulo ka tuig sa ulahi, dihay mga Saksi nga nakig-estorya sa iyang amahan sa gawas sa ilang balay. Ang iyang amahan mao ang lider sa usa ka tradisyonal nga relihiyosong grupo, nga magtapok-tapok diha sa ilang nataran. Sa dihang nadunggan ni Madalena ang ilang panaghisgot ug ang pagpangomosta sa mga brader bahin kaniya, iya silang gipadayon. Siya natandog pag-ayo sa tim-os nga interes nga gipakita sa mga brader kaniya! Siya midawat ug pagtuon sa Bibliya ug naikag pag-ayo sa iyang nakat-onan. Tungod sa iyang kadasig, gitabangan siya sa mga Saksi sa daghang praktikal nga paagi, lakip ang pagtabang kaniya nga makatambong sa mga tigom. Tungod niana, niadtong 2002 si Madalena nabawtismohan isip simbolo sa iyang pagpahinungod kang Jehova.

Ang ginikanan ni Madalena nakadayeg pag-ayo sa pag-atiman sa mga Saksi sa ilang anak. Ang iyang inahan misugod pagtambong sa mga tigom ug mibiya sa relihiyon nga gipangunahan sa iyang bana. Sa sinugdan, miingon ang amahan ni  Madalena nga dili gayod niya talikdan ang iyang relihiyon, apan paglabay sa panahon siya misugod usab pagtambong sa mga tigom. Gipit-os siya sa iyang mga parokyano nga dili na motambong kay siya god ang ilang lider! Bisan pa niana, siya nakadesisyon na sa pagbiya sa iyang relihiyon, nga nagsunog sa tanan niyang relihiyosong gamit. Niadtong 2007 siya ug ang iyang asawa nabawtismohan. Ang tibuok pamilya miuswag gayod sa espirituwal.

Zimbabwe

Si Decibel, nga nag-edad ug nuybe anyos, nagsangyaw sa iyang mga klasmet ug mga magtutudlo. Usa ka adlaw niana iyang namatikdan nga daw masulub-on ang iyang maestra, mao nga giduol siya ni Decibel ug gipangutana kon nganong magul-anon man siya. Ang maestra miingon nga namatay ang anak sa iyang igsoong babaye. Gisaaran siya ni Decibel nga duna siyay ihatag nga makahupay kaniya. Nakakuha siyag brosyur nga Sa Dihang ang Imong Minahal Mamatay gikan sa iyang ginikanan ug gidala niya kini pagkaugma. Gibasa sa maestra ang pipila ka parapo sa maong brosyur ug nakahilak siya sa kalipay. Sa ulahi, mihimo siyag gamay nga sulat alang sa ginikanan ni Decibel aron pasalamatan sila sa pagmatuto sa ilang anak ug sa paghupay nga gihatag ni Decibel kaniya panahon sa iyang kaguol.

Ghana

Si Abigail, kinsa nagpuyo sa habagatang Ghana kauban sa iyang mga apohan nga Presbyteriano, gitudloan nga ang mga Saksi ni Jehova maoy mini nga mga propeta. Sa dihang iyang nahibaloan nga ang iyang ginikanan, nga nagpuyo sa laing dapit sa maong nasod, nagtuon uban sa mga Saksi, siya nabalaka pag-ayo ug misulat sa pagkombinsir kanila nga moundang sa ilang pagtuon. Kay wala man makombinsir ang iyang mga ginikanan sa maong sulat, siya mibiyaheg kapin sa 1,000 ka kilometros aron makigsulti kanila. Nakurat si Abigail sa pagkahibalo diha sa iya mismong Bibliya nga ang impiyerno dili usa ka dapit nga sakitanan sa mga daotan. Siya misugod pagtuon sa Bibliya ug pagtambong sa mga tigom sa Kingdom Hall kauban sa iyang ginikanan ug unya nahimong dili-bawtismadong magmamantala. Di pa dugay, si Abigail nabawtismohan sa usa ka sirkitong asembliya.

 MGA NASOD SA AMERIKA

KAYUTAAN 55

POPULASYON 898,130,531

MGA MAGMAMANTALA 3,449,038

MGA PAGTUON SA BILIYA 3,548,101

Dominica

Niini nga isla daghang babaye ang manglaba sa tampi sa suba, nga magpauga sa ilang linabhan diha sa dagkong mga bato. Usa sa mga babaye ang nakamatikod nga adunay naglutawlutaw diha sa tubig duol sa dapit nga iyang gilabhan ug daw pamilyar kini kaniya. Pareho kini sa publikasyon nga iyang gitun-an matag semana uban sa usa ka Saksi ni Jehova. Gibulad una niya kini diha sa bato ug nagpadayon sa paglaba.

Pagkahapon, sa dihang gipanguha na niya ang mga linabhan, iyang nalimtan ang libro. Apan nakit-an kini sa mga mangingisda nga gikan sa lawod, ug usa kanila ang mipunit niini. Gibasa dayon niya kini kay nainteres siya sa titulo niini nga Unsay Tinuod nga Gitudlo sa Bibliya? Sa ulahi, samtang nagsangyaw ang duha ka payunir nga sister diha sa iyang baryo, iyang nahimamat sila. Gipatin-aw niya sa duha ka sister nga 144,000 lamang ang moadto sa langit ug nga ang Gingharian sa Diyos natukod niadtong 1914. Siya usab miingon nga sa dili madugay ang yuta himoon nang paraiso. Sa dihang gipangutana siya sa mga sister kon giunsa niya pagkahibalo niana, iyang giestorya kanila kon sa unsang paagi iyang nakit-an ang libro, ug midugang sa pag-ingon nga iyang gibasa kini adlaw-adlaw. Iyang gipakita kanila ang libro nga medyo daot na.

Usa sa mga payunir nahinumdom nga mao tong libroha ang nakuha sa iyang gitun-an sa Bibliya didto sa suba. Nasugdan ang usa ka pagtuon sa Bibliya uban sa mangingisda. Siya naghinamhinam sa ilang panaghisgot matag semana ug maayo ang iyang pag-uswag.

 Bolivia

Lisod ang pagsangyaw diha sa rehiyon sa Amazon sa Bolivia apan makapatagbaw. Usa ka grupo sa napulo ka payunir nga mga brader ug sister—nga naghuot diha sa gamayng demotor nga sakayan nga kargadog mga tolda, mga lutoan, ug kinarton nga literatura sa Bibliya—ang mibiyaheg mga 800 kilometros diha sa Subang Beni gikan sa Rurrenabaque padulong sa Riberalta. Sila nakaduaw ug kapin sa 70 ka hilit nga mga komunidad ug nakapahimutag kapin sa 800 ka libro maingon man mga brosyur ug tract. Sila nakasugod ug duolan sa 700 ka pagtuon sa Bibliya sa interesadong mga tawo ug mibalik aron dumalahan ug pagtuon ang kapin sa 200 kanila. Sa pagbiya sa mga Saksi sa maong mga baryo, ang kanunay nilang madunggan nga isulti sa mga tawo mao, “Ayaw usa mog lakaw, tudloi pa mig dugang.” Diha sa usa ka gamayng lungsod, dihay tawo nga naguol pag-ayo sa pagkahibalo nga mobiya na ang mga Saksi, kay gusto pa niyang magpadayon sa pagtuon uban kanila. Siya miingon: “Puslan mang inyo nang nasugdan, humana na lang.”

Canada

Sulod sa daghang tuig si Normand nagtrabaho sa usa ka planta nga lunsayanag metal didto sa Montreal. Panahon sa mubong pahulay sa trabaho, siya regular nga magbasa sa Pagsusi sa Kasulatan sa Adlaw-adlaw diha sa kantina. Siya makita sa iyang  mga kauban sa trabaho nga magbasa niana, ug ang uban misugot nga ilang hisgotan ang inadlawng teksto. Niining mubo nga panaghisgot, gipaningkamotan pag-ayo ni Normand nga ipadapat ang mga punto ilabina diha sa pamilyahanong kinabuhi ug sa pagpakiglabot sa isigkatawo. Mitambong usab ang usa ka membro sa mga tagdumala sa planta ug sa ulahi gipatawag si Normand ngadto sa iyang opisina aron dayegon siya, nga nag-ingon nga ang maong panaghisgot makatabang sa kinabuhi sa mga empleyado ug magpalambo sa mas maayong mga relasyon.

Sa dihang miabot nag kapin sa 30 ang nanambong sa maong panaghisgot, gihangyo sa tagdumala si Normand nga himoon kana sa ginagmayng mga grupo diha sa lainlaing dapit sulod sa planta. Siya miingon: “Sa pagkakaron, ako nagdumalag tulo ka grupo matag adlaw, nga gitawag sa akong mga kauban nga adlaw-adlawng mga pahinumdom. Ganahan kaayo sila niini nga panaghisgot. Gani sa dihang dili ko makatrabaho, usa kanila ang mopuli sa pagdumala niana. Unya, kon motrabaho na ko, ila kong pangutan-on sa mga punto nga wala nila hisabti.” Si Normand nakatabang sa iyang mga kauban sa trabaho sa pagpamalandong ug usa ka teksto sa Bibliya adlaw-adlaw sulod sa miaging lima ka tuig. Tungod niana, kapin sa 40 ka tawo, iyang mga isigkatrabahante ug ilang mga pamilya, ang midawat sa kamatuoran.

Barbados

Si Sister Barker, nga nag-edad ug 89 anyos, gustong makasugod ug usa ka pagtuon sa Bibliya. Tungod sa iyang panglawas, dili na siya makapamalaybalay, busa siya misulay pagsangyaw pinaagig telepono—apan wala siyay nasugdan nga pagtuon sa Bibliya. Kay nadasig sa usa ka bahin diha sa tigom maylabot sa pag-ampo, siya miampo kang Jehova nga tabangan siya nga makasugod ug usa ka pagtuon sa Bibliya. Pipila ka adlaw sa ulahi, dala ang iyang Bibliya ug mga magasin ug kay determinadong sangyawan si bisan kinsa nga molabay, siya mipuwesto diha sa atubangan sa iyang balay, bisag dili kaayo daghang tawo ang mangagi diha niana. Iyang gitanyagan ug magasin ang usa ka lalaki nga nagpauli gikan  sa trabaho. Paglabay sa usa ka semana, iyang nahimamat pag-usab ang maong lalaki diha sa atubangan sa iyang balay. Kay nainteres man ang lalaki sa mga magasin nga iyang napahimutang, iyang gitanyagan siya sa librong Gitudlo sa Bibliya maingon man sa pagtuon sa Bibliya. Nalipay gayod siya sa dihang miuyon ang maong lalaki. Iyang gisugdan ang ilang pagtuon sa hinapos sa Marso 2008. Nahibaloan niya sa ulahi nga dili ra diay layo ang gipuy-an sa maong lalaki gikan sa iyang balay. Sulod sa pipila ka semana, ang maong lalaki misugod na pagtambong sa mga tigom. Ang sister miingon, “Nahibalo ko nga si Jehova motubag sa mga pag-ampo, apan wala ko magdahom nga tubagon dayon niya kini!”

Chile

Sa dihang ang usa ka payunir nga sister sa Santiago nanaog gikan sa taksi diha sa sentro sa siyudad sa iyang teritoryo, iyang nabiyaan ang iyang polder. Kini adunay daghang magasin lakip ang iyang kopya sa Atong Ministeryo sa Gingharian, nga may ngalan niyang nasulat. Tungod niana ug sa tabang sa ubang mga Saksi nga nakita sa taksi drayber nga nagsangyaw sa maong dapit, nakaplagan ra niya ang sister duha ka adlaw sa ulahi. Sa dihang iyang giuli sa payunir ang polder, Ministeryo na lay nahibilin. Wala na ang mga magasin. Nangayog pasaylo ang taksi drayber ug miingon nga gibasa-basa sa lainlaing mga pasahero ang mga magasin unya inigkanaog mangayo silag usa ka kopya. Busa napahimutang ang tanang magasin sa usa lang ka adlaw nga walay magmamantala nga nanagtag niini!

 Nicaragua

Si Ernesto, nga hepe kaniadto sa usa ka piniling grupo sa mga sundalo, nagpuyo sa gamayng lungsod duol sa Caribbean Coast. Nahimamat siya ni Jairo, nga usa ka espesyal payunir gikan sa laing lugar sa maong nasod, samtang namalaybalay ug gitanyagan siyag pagtuon sa Bibliya. Bisan pag mibalibad si Ernesto, wala mohunong si Jairo, ug sa kadugayan gidawat ra ang iyang gitanyag nga pagtuon. Sa ilang panaghisgot, gibutyag ni Jairo nga ang iyang amahan komander kanhi sa rebeldeng mga sundalo nga nakiggubat sa mga sundalo sa gobyerno sa duol lang nga lugar apan siya namatay sa gubat. Si Ernesto nagpadayon sa iyang pagtuon ug misugod pag-uswag, samtang siya may gitago nga sekreto kang Jairo, nga sa kataposan iya rang gibutyag. Tungod sa grabeng kaguol, iyang gitug-an kang Jairo nga siya ang hepe sa grupo sa mga sundalo nga nakabihag sa iyang amahan ug nga siya mismo ang nakaingon sa kamatayon niini. Siyempre, nakurat si Jairo, apan nahibalo siyang tinuod kadto kay ang makahahadlok nga mga detalye nga giasoy ni Ernesto mitakdo sa giingon kaniya kanhi sa kaubang mga sundalo sa iyang amahan. Abi ni Ernesto ug didto ra matapos ang ilang panaghigala. Apan imbes mayugot kaniya, gipadayon ni Jairo ang ilang pagtuon. Si Ernesto miuswag ug nabawtismohan uban sa iyang asawa. Siya ug si Jairo nagpabiling higala hangtod karon.

Venezuela

Diha sa kasadpang bahin sa nasod, ang mga igsoon sa lungsod sa Machiques nagsangyaw sa talagsa rang makobrehan nga teritoryo nga gipuy-an sa mga nitibo duol sa utlanan sa Colombia. Ang tanan namati! Ang kapitan sa komunidad sa Yukpa nagtugot sa pagsaulog sa Memoryal sa unang higayon diha sa ilang lugar. Ang mga silingan ug ang eskuylahan sa maong dapit nagpahulam sa ilang mga lingkoranan, ug kapin sa 200 ang nanambong. Pagkahuman sa tigom, ang kapitan matinahorong mipahayag: “Buot namong pasalamatan ang mga Saksi ni Jehova. Hinaot nga dili kini ang kataposan ninyong pagduaw. Inyo kaming gitudloan sa kamatuoran, mao nga malipay gayod kami sa pag-abiabi kaninyo sa sunod ninyong pagbalik!” Kapin na sa 50 ang gidumalahag pagtuon sa Bibliya sa balay kada semana.

 ASIA UG ANG TUNGANG SIDLAKAN

KAYUTAAN 47

POPULASYON 4,026,656,360

MGA MAGMAMANTALA 618,088

MGA PAGTUON SA BIBLIYA 538,957

Taiwan

Usa ka sister misulat: “Nalipay ko nga nahimamat ang akong igsoong lalaki sa amahan, nga wala pa gyod nako makita sukad tungod kay siya ug ang iyang pamilya atua man nagpuyo sa layo ug lisod pang adtoon ang ilang lugar. Siyempre, nalipay ang akong amahan ug ang ubang membro sa among pamilya sa pagkahibalo nga ang akong igsoon ug ang iyang pamilya naningkamot gayod sa pagduaw kanamo. Sanglit wala may mga Saksi sa ilang lugar, nanghinaot ko nga ila untang dawaton ang maayong balita. Nalipay gyod ko nga ang asawa ug ang anak nga babaye sa akong igsoon interesado sa Bibliya! Apan, unsaon kaha nako sila pagtabang sa pagkakat-on pag dugang bahin sa mga katuyoan ni Jehova kon makauli na sila sa ilang hilit nga lugar? Akong nasayran nga duna silay kompiyuter ug maka-Internet sila. Busa namalit mi sa akong bana ug Webcam, ug sa nakauli na sila, among gipadayon ang among pagtuon sa Bibliya pinaagi sa Internet. Wa ko magdahom nga epektibo diay kaayo kini nga paagi sa pagtuon. Among makita ang ilang reaksiyon samtang sila magbasa sa ilang kaugalingong Bibliya ug sa libro nga among gigamit sa pagtuon. Tungod niini akong nahibaloan kon unsay angay nakong buhaton sa pagtabang kanila. Mapasalamaton kami nga pinaagig Internet among mapaambit ang kamatuoran ngadto sa among mga paryente.”

Nepal

Si Purnamaya, nga nag-edad ug 16 anyos, nagpuyo sa usa ka gamayng lungsod sa Nepal. Gisangyawan siya sa iyang uyoan,  ug nasugdan ang pagtuon. Karon, bisag duha ka oras ug tunga ang biyahe sa bus paingon sa kongregasyon, siya kanunayng nagtambong sa mga tigom kas-a sa usa ka semana. Dili kini sayon alang kaniya. Ang iyang ginikanan pulos sanlahon, busa pobre kaayo sila. Sayo sa buntag, si Purnamaya magpulpog ug mga bato nga himoong graba aron makatabang sa mga galastohan sa iyang pamilya, gawas pa sa iyang mga buluhaton sa balay sama sa pagpangluto ug pagpanglaba. Dugang pa, siya usab nag-eskuyla. Ang pletehan sa bus paingon sa mga tigom maoy katumbas sa usa ka adlaw nga suweldo sa usa ka trabahante. Usahay, dasigon siya sa iyang ginikanan nga diha na lang mosimba sa duol nga simbahan sa ilang dapit. Apan nahibalo si Purnamaya nga sa Kingdom Hall lamang siya makakat-on bahin kang Jehova, busa iyang gihimo ang kutob sa iyang maarangan aron makatambong. Di pa dugay, iya pa ganing nabaligya ang iyang relo nga regalo sa iyang lola. Siya maayong mokomento panahon sa tigom ug nagpaambit sa iyang mga nakat-onan ngadto sa iyang mga katagilungsod. Makapadasig kaayo siya sa tanan nga nakaila kaniya.

Malaysia

Panahon sa pagmando sa Britanya, libolibong mga trabahador ang gidala ngadto sa Malaysia sa pagtrabaho sa plantasyon sa goma. Sila gipapuyo sa mga baryo diha sa mga plantasyon, ug kadaghanan sa mga baryo naglungtad gihapon karon. Ubay-ubay niining mga baryoha ang lisod kaayong adtoon ug  dili makita diha sa mapa. Samtang nagsangyaw sa teritoryo nga wala maasayn ug kongregasyon, napalgan sa usa ka kongregasyon ang usa ka baryo diha sa plantasyon sa goma. Duha ka batan-ong lalaki nga hapit nang mag-20 anyos, nga nakadawat nag mga magasin, ang interesado gayod sa buluhatong pagsangyaw sa mga igsoon. Ilang gigiyahan ang mga igsoon ngadto sa ubang mga baryo. Kining mga batan-ona suheto kaayo sa lugar. Sakay sa ilang mga motorsiklo, ilang gigiyahan ang mga igsoon nga nag-awto subay sa lapokong mga karsada diha sa plantasyon, nga nagbiyahe ug mga 45 minutos gikan sa usa ka baryo ngadto sa laing baryo. Ilang gigiyahan ang mga igsoon diha sa mga plantasyon nga wala pa masangyawi sukad sa mga Saksi. Samtang nagsangyaw ang mga igsoon, ang duha ka batan-on nag-awhag sa mga tagabaryo sa pagdawat sa mga magasin ug sa pagbasa gayod niini. Tanan-tanan, tulo ka hilit nga mga baryo ang ilang naadtoan. Tungod sa pagkamatinabangon niining duha ka batan-ong lalaki, ang mga igsoon nakahatag ug dakong pamatuod sa mga tawo nga wala pa sukad makadungog sa maayong balita. Sa hinapos sa semana, ang 50 ka magmamantala niining kongregasyona nakapahimutang ug kapin sa 5,000 ka magasin.

 UROPA

KAYUTAAN 47

POPULASYON 733,775,190

MGA MAGMAMANTALA 1,542,507

MGA PAGTUON SA BIBLIYA 789,219

Rusya

Si Tatyana adunay kanser sa utok. Human sa iyang operasyon pipila ka tuig ang milabay, siya gibutang sa usa ka lawak para sa mga pasyente nga gamay rag paglaom nga mamaayo. Usa ka Ortodoksong pari ang miduaw sa maong lawak aron ang mga pasyente makakumpisal sa ilang mga sala sa dili pa sila mamatay. Namatikdan ni Tatyana ang usa ka babaye diha sa lawak nga naningkamot intawon sa pagbangon aron hatagan ug kuwarta ang pari. Pagbiya sa pari, gipangutana ni Tatyana ang babaye kon nahupayan ba siya. Ang babaye masulub-ong mitubag, “Wala, wala gyod tawon koy nasabtan sa iyang gipanulti.” Dayon gisangyawan siya ni Tatyana sa maayong balita bahin sa paglaom sa pagkabanhaw. Ang babaye nagpasalamat kang Tatyana ug miingon, “Mas tawhay na karon ang akong pamati!” Ang manedyer sa klinika nakadungog bahin sa nahitabo ug gisultihan ang pari nga dili na mobalik. Hinunoa, gibutang si Tatyana sa laing lawak aron iyang masangyawan usab ang uban. Ang manedyer sa klinika nangayo usab ug adres kon asa gipahigayon ang mga tigom sa mga Saksi ni Jehova. Sa wala pa maospital, si Tatyana miampo kang Jehova nga hatagan siyag kusog aron makapadayon siya sa pagsangyaw. Siya kombinsido gayod nga gitubag ni Jehova ang iyang pag-ampo. Nianang bulana siya mitaho ug kapin sa 100 ka oras! Bisan tuod migrabe ang iyang sakit sukad niadto ug dili na siya makagawas sa balay, siya padayong ginaduaw sa iyang mga nasangyawan niadtong pirme pa siyang magpaospital.

Georgia

Duha ka temporaryong espesyal payunir nga mga sister ang giasayn sa usa ka lugar nga walay mga Saksi ni Jehova.  Samtang gisuhid nila ang ilang bag-ong teritoryo, sila nangasaag. Tungod sa ilang pagbinaktas diha sa taga-tuhod nga niyebe ug sa pagpaningkamot nga makita ang dalan pauli, sila gipangkapoy ug gikuray na sa katugnaw. Sa kataposan, nakakita silag mga tunob nga nagpadulong sa usa ka balay, mao nga ilang giadto ang maong balay ug nangayo silag katahoran. Usa ka batan-ong babaye nga ginganlag Khatuna ang migawas sa geyt ug gipasulod dayon sila sa balay, nga tungod niana sila mapasalamaton kaayo kay nahuwasan sila sa ilang katugnaw. Sa dihang nahibaloan sa pamilya ni Khatuna nga ang duha maoy mga Saksi ni Jehova, si Khatuna miingon nga samtang naglakaw-lakaw pa ang mga sister didto sa niyebe kay nangasaag, siya ug ang iyang pamilya nag-ampo sa Diyos nga unta mahibalo sila sa kamatuoran. Pipila ka minutos sa ulahi, ang duha ka payunir nanganha sa ilang balay. Si Khatuna miingon nga gitubag gayod ang ilang pag-ampo! Karon, upat ka membro niini nga pamilya ang nagtuon sa Bibliya, ug ang duha kanila—si Khatuna ug ang iyang ugangang babaye—maoy di-bawtismadong mga magmamantala.

Britanya

Si Reston, nga wala pa gayod makasulay sa direktang pagtanyag ug pagtuon sa Bibliya, nakahukom sa pagsulay niini. Sa wala pa siya motuktok sa unang pultahan, nag-ampo una siya kadiyot, nga naghangyo kang Jehova sa pagtabang kaniya nga dili mag-ukon-ukon. Unya iya dayong gitanyagan ug pagtuon sa Bibliya ang tagbalay nga si Andy, kinsa midawat sab dayon. Si Reston determinado nga mobalik nianang adlawa aron hatdan siya ug kopya sa libro nga Unsay Tinuod nga Gitudlo sa Bibliya? Sa iyang pagpadulong didto sakay sa bus, namatikdan ni Reston nga ang drayber mao ang regular niyang ginahatdan ug Bantayanang Torre ug Pagmata! Kay nadasig sa sanong ni Andy nianang buntaga, siya nakadesisyon sa pagtanyag sa drayber ug libreng pagtuon sa Bibliya inig-abot nila sa ilang destinasyon.

Sa kasamtangan, usa ka tigulang babaye nga pasahero sa bus ang nakaila kang Reston nga Saksi ug iyang gihangyo siya sa pagduaw sa iyang higala nga nagsakit aron iampo kini. Si Reston miingon nga malipay siyang makigsulti sa iyang higala ug palig-onon kini pinaagi sa Bibliya. Gamit ang usa na lang niya ka kopya  sa librong Gitudlo sa Bibliya, iyang gipasundayag sa pasahero kon sa unsang paagi makatabang ang pagtuon sa Bibliya. Ang maong babaye miingon nga buot niyang magtuon niana. Usa ka batan-ong lalaki nga naglingkod atbang nila ang namati sa ilang panaghisgot. Nainteres siya sa mga hulagway sa libro. Busa malipayong gihatag ni Reston kaniya ang libro. Pag-abot sa bus sa destinasyon niini, gitanyagan ni Reston ang drayber ug libreng pagtuon sa Bibliya. Sa iyang katingala, ang drayber malipayong midawat ug miingon nga daghan siyag mga pangutana bahin sa Bibliya. Si Reston miadto dayon sa balay sa igsoon nga anaa lang sa duol sa pagkuhag laing kopya sa librong Gitudlo sa Bibliya ug sa kataposan nakaabot ra gayod siya sa balay ni Andy nianang gabhiona. Malipayong gidawat ni Andy ang libro. Nasugdan ang pagtuon sa Bibliya, ug wala magdugay gipadapat ni Andy ang iyang nakat-onan. Si Andy ug ang drayber sa bus nagtambongan na karon sa mga tigom, ug si Reston nagdumalag 15 ka pagtuon sa Bibliya, nga ang tanan nagsugod pinaagi sa direktang pagtanyag ug pagtuon sa Bibliya. Karon maneguro na siya sa pagdalag ubay-ubayng kopya sa librong Gitudlo sa Bibliya sa dihang siya mosangyaw.

 Si François ug Monica, uban sa ilang duha ka anak, mibalik sa ilang awto human sa ilang pagsangyaw nianang buntaga. Apan, ang ilang anak nga si Shaé, nga duha ka tuig ug tunga ang edad, dili gustong mosakay sa awto hangtod nga dili niya ikahatag ang kataposan niyang tract. Taudtaod, may awto nga mihunong sa pikas bahin sa karsada, ug duha ka babaye ang nanaog. Malipayong gitunol ni Shaé kanila ang tract nga Kinabuhi sa Malinawong Bag-ong Kalibotan, ug si Monica ang nagpatin-aw niana. Ang babaye nga ginganlag Sierra nagpakitag interes ug gidapit si Monica sa pag-adto sa iyang balay aron tun-an ug Bibliya ang duha niya ka manghod nga babaye. Sa unang pagtuon, si Sierra nangutana kon pwede bang tun-an usab ug Bibliya ang duha niya ka anak nga lalaki. Sa ulahi, ang pag-umangkon ni Sierra miapil usab. Si Sierra moapil usab panahon sa pagtuon ug mosuknag daghang pangutana. Sa ulahi, siya mismo miuyon nga magtuon. Dayon ang iyang bana nagtuon usab. Sunod, ang inahan ni Sierra, ug ang uban pang membro sa pamilya ug mga higala mihangyo usab ug pagtuon sa Bibliya. Ang determinasyon ni Shaé nga mahatag ang kataposan niyang tract miresulta ug 11 ka pagtuon sa Bibliya. Upat sa mga estudyante ang regular nga nagtambongan sa mga tigom sa kongregasyon.

Italya

Si Jennifer sakop sa Milan Russian Congregation. Makadaghan na niyang nakaestorya sa telepono si Valentina nga taga-Ukraine apan wala pa gayod sila magkahimamat sukad. Usa ka adlaw niana, nagsabot sila nga magkita sa estasyonan sa tren. Aron mailhan ni Jennifer si Valentina, giingnan siya ni Valentina nga magdyaket siyag pula. Pag-abot ni Jennifer sa estasyonan nakakita siyag babaye nga nagdyaket ug  pula nga morag dunay gipangita. Busa giduol siya ni Jennifer ug gitimbaya, “Hello, ikaw ba si Valentina?” Mitando ang babaye, mao nga si Jennifer mipadayon, “Ako diay si Jennifer.” Apan wala na motubag ang babaye. Kay natingala, gipangutana siya ni Jennifer, “Dili ba ako may imong gipaabot?”

“Dili baya,” mitubag ang babaye. Taga-Ukraine tuod siya, Valentina ang iyang ngalan, ug nagdyaket siyag pula; apan duna siyay laing gipaabot! Mikatawa si Jennifer ug gipatin-aw ang situwasyon. Gipaambitan na lang siya ni Jennifer ug usa ka punto gikan sa Bibliya nga iyang giandam para sa laing Valentina. Maikagong naminaw si Valentina. Human niana, iyang gipakita kang Jennifer ang usa ka papel nga iyang gisulatan sa tibuok Salmo 91, ug miingon nga ganahan kaayo siyang mobasag Bibliya. Nasugdan ni Jennifer ang usa ka pagtuon sa Bibliya uban niini nga Valentina. Komosta na man ang Valentina nga iya gyong gikasabot? Wala madugay, nagkahimamat ra sila ni Jennifer, ug siya usab nagsugod pagtuon sa Bibliya.

Romania

Giduaw sa usa ka brader ang iyang kaila ug ang asawa niini ug nakigsulti kanila bahin sa Kasulatan. Sila ilabinang nainteres sa gitudlo sa Bibliya bahin sa relasyon sa bana ug asawa, apan wala gayoy panahon nga magtuon niini. Ang maong magtiayon gusto nga himsog kanunay ug lawas, ug ang bana magdyaging ug walo ka kilometros adlaw-adlaw. Human sa daghang pagpaningkamot nga mapadayon ang ilang panaghisgot bahin sa Kasulatan, ang brader nakadesisyon sa paghangyo sa bana kon makauban ba siya sa pagdyaging. Ang lalaki malipayong miuyon. Apan, kay wala man maanad sa pagdyaging ang brader, iyang naamgohan nga ang pagsangyaw samtang nagdyaging dili diay sayon! “Nakasangyaw ko,” matod pa sa brader, “nga nagsul-ob ug pangdyaging ug walay dalang Bibliya, nga nagkutlo ug sinag-ulong mga teksto sa Bibliya.” Human sa daghang adlaw nga pagdyaging, mitubo ang interes sa magtiayon, ug nasugdan ang regular nga pagtuon sa Bibliya sa balay. Karon ang bana usa na ka di-bawtismadong magmamantala. Masiboton kaayo siya sa ministeryo ug nagpalista sa Teokratikanhong Tunghaan sa Ministeryo uban sa iyang anak nga lalaki ug babaye.

 OCEANIA

KAYUTAAN 30

POPULASYON 37,545,115

MGA MAGMAMANTALA 97,329

MGA PAGTUON SA BIBLIYA 55,266

Australia

Usa ka brader nga payunir misulat: “Usa ka doktor nga ginganlag Pam ang mihangyo nga regular nako siyang hatdan ug bag-ong gula sa mga magasin. Puliki kaayo siya, ug gani sulod sa unom ka bulan kas-a ra nako siyang naabtan sa iyang balay, busa ako lang ibilin ang mga magasin sa iyang pultahan uban sa usa ka mahigalaong sulat. Human sa pito ka bulang paningkamot nga mahimamat siya, nagbilin kog mga magasin diha sa iyang pultahan nga may imbitasyon para sa umaabot nga distritong kombensiyon. Nagbilin sab ko ug numero sa telepono, apan wala gyod siya motawag nako. Pagka Nobyembre, human sa kombensiyon, miadto na usab ko sa ilaha ug nakakitag sulat diha sa pultahan gikan kang Pam.

“Si Pam misulat nga ganahan kaayo siya sa mga magasin ug gani iya kining ipabasa sa iyang mga kauban sa trabaho. Ug ang iyang mga kauban sa trabaho magpabasa usab niini ngadto sa ilang mga pasyente sa ospital. Dayon siya miingon nga giganahan kaayo siya sa kombensiyon. Iyang nabasa ang imbitasyon ug nagpayl siya ug tulo ka adlaw nga bakasyon sa trabaho aron makatambong. Siya miingon nga iyang gipaseroks ang imbitasyon ug gipamutang kini diha sa butanganag sulat sa iyang mga kauban sa trabaho nga may nota nga naghangyo kanila sa pagpahibalo kaniya kon interesado ba silang motambong. Sa hinapos sa semana, 16 sa iyang mga kauban—mga doktor tanan—ang nagpayl usab ug tulo ka adlaw nga bakasyon sa trabaho aron makatambong. Kining 17 ka interesado nakatambong gayod sa tulo ka adlaw nga kombensiyon tungod sa usa lang ka  imbitasyon nga gibilin diha sa pultahan! Si Pam regular na karon nga nagtuon sa librong Gitudlo sa Bibliya ug nag-organisar ug ginurupong panaghisgot uban sa iyang mga kaubang nanambong sa kombensiyon.”

Usa pa ka brader nag-asoy: “Samtang milabay ako sa usa ka balay nga dili magpaduawg mga Saksi, akong namatikdan ang usa ka lalaki ug babaye diha sa balkon nga naguol ug naghilak. Sa akong paminaw dili maayong sayloan lang nako sila kay akong nakita nga nagkinahanglan gayod silag tabang, mao nga ako silang giduol ug gipangutana kon unsay akong ikatabang. Ang magtiayon mipadayon nako ug mipahungaw sa ilang problema. Tulo ka tuig na nilang wala makita ang ilang anak nga babaye. Ang asawa kinahanglang operahan kay may kanser, ug wala siya mahibalo kon makalahutay ba siya sa operasyon. Nahadlok siya nga basin dili na gyod niya makita pag-usab ang iyang anak. Pipila ka adlaw una pa niini, sila nangayog tabang sa ilang pastor, apan wala gayod siya magpakabana sa ilang kahimtang ug wala gayoy gihimong aksiyon. Ako silang gipaambitan ug Kasulatanhong mga paghupay bahin kang Jehova nga siya may kahingawa sa mga nagmagul-anon.

“Paglabay ug mga usa ka oras, may nanuktok sa pultahan. Nagtuo kog ang ilang pastor kadto. Apan, ang nagbarog diha sa pultahan maoy usa ka batan-ong babaye nga maayog pamesti. Siya ang ilang anak nga dugay na nilang gipangita! Emosyonal kaayo ang maong gutlo, busa nananghid ko nga mobiya. Apan sa akong katingala ang anak miingon nga mas maayo nga magpabilin ko kay duna siyay isulti sa iyang ginikanan. Siya miingon nga kaniadto siya nag-inom-inom ug nagdroga ug nagdaot sa iyang kinabuhi, apan ang pagtuon sa Bibliya maoy nagtukmod kaniya sa pagpauli ug pagpakig-uban pag-usab sa iyang ginikanan. Di pa dugay, siya nabawtismohan ingong Saksi ni Jehova.”

Pipila ka adlaw sa ulahi ang pastor miduaw ug ilang giingnan siya nga mibalik na ang ilang anak tungod kay siya usa na ka Saksi ni Jehova. Ang pastor mibiya sa balay nga walay timik. Sa iyang pagbiya, gitawag siya sa bana ug giingnan nga kuhaon  ang sulat nga anaa sa lamesa—usa ka sulat nga nagpahibalo nga mobiya na sila sa ilang relihiyon.

Papua New Guinea

Usa ka grupo sa 23 ka igsoong lalaki ug babaye miadto sa talagsa rang masangyawan nga teritoryo. Lisod kaayo ang panaw, sila magbaktas lang, motungas ug mga bukid ug motabok ug mga suba. Sa usa ka baryo nahimamat sa usa ka sister ang ministrong Anglikano kinsa nalipay pag-ayo sa nadungog niyang katin-awan bahin sa Daniel 2:44. Iyang giingnan ang sister, “Daw sama kamig nasaag nga mga karnero dinhi.” Siya midawat ug mga magasin ug brosyur ug mihangyo usab ug Bibliya.

Tulo ka adlaw sa ulahi, sa laing baryo, ang duha ka sister nakigsulti sa duha ka batan-ong babaye kinsa nalipay sa pagpaminaw sa mensahe sa Gingharian. Pag-uli sa ilang amahan gikan sa uma nianang hapona, ilang giestoryahan siya sa ilang nakat-onan bahin sa Bibliya. Ang ilang amahan miingon nga gusto usab niyang madunggan mismo ang maong maanindot nga mensahe. Siya naghikay nga mahimamat ang tanang igsoong lalaki ug babaye ngadto sa payag nga ilang giabtan. Kay lider man ang maong tawo sa ilang baryo, nagpahikay siya ug pagkaon aron ipadala sa mga igsoon. Pagkagabii, siya miabot nga nagbitbit ug lampara, nga gikuyogan sa ubang mga taga-baryo. Sila miingon, “Kami natingala sa pagkakita kaninyo, sanglit mao pa kini unang higayon nga ang mga Saksi ni Jehova miduaw sa among baryo.” Gibasahan sila sa mga igsoon sa Mateo 24:14 ingong hinungdan sa ilang pagduaw. Gipatin-aw kanila ang bahin sa mga panalangin sa Gingharian, ug gibinlan sila ug mga literatura.

Sa ikalimang adlaw sa ilang panaw, ang mga igsoon nakaabot sa usa ka baryo nga mag-ala una na sa hapon. Kay nagtuo ang mga taga-baryo nga didto na sila magpalabay sa kagabhion, ilang giandaman ang mga igsoon ug walay-bungbong nga puy-anan. Apan, ang mga igsoon miingon nga mouli ra pod sila nianang adlawa human nila maestorya ang tanan diha sa baryo. Usa ka maayong pamatuod ang nahatag sa tanan, apil na ngadto sa ilang lider, kinsa midawat ug mga literatura ug sa  baylo nanghatag sa mga igsoon ug mga lubi, saging, ug kapayas.

Fiji

Ang mga payunir diha sa usa ka baryo magbaktas paingon sa ilang mga teritoryo diha sa abogon o lapokon nga mga karsada. Si Nagamma ug ang iyang anak nga babaye, si Reshma, kinsa mga regular payunir, nagdapit kang Ushla, usa ka buta nga sister, sa pag-uban kanila ug pagpayunir sulod sa usa ka bulan. Kinahanglan nila siyang agakon samtang magbaktas ug pipila ka kilometros matag adlaw. Usa niana ka adlaw, dihay pamilya nga naglingkod sa ilang balkon nga nagtan-aw sa tulo ka sister nga naghinayhinay pag-agi diha sa lapokon nga dalan. Dayon ilang nakita ang buta nga sister nga nakatamak sa yanang ug napiskag lapok ang iyang batiis. Nanghunong ang mga sister ug gitrapohan ang iyang batiis. Kay gustong mahibalo kon nganong  magsige silag agi, gisangpit sa amahan sa maong pamilya ang mga sister. Siya miingon: “Kada adlaw ming makakita ninyong molabay dinhi. Asa man mo paingon?” Sila miingon nga moadto sila sa ilang gidumalahan ug pagtuon sa Bibliya. Siya mitubag nga kon importante man gyod kanang ilang mensahe nga kinahanglan silang mobaktas ug layo aron itudlo kana sa mga tawo, gusto usab siyang makadungog niana! Nasugdan ang usa ka pagtuon uban niini nga pamilya.

Guam

Usa ka batan-ong babaye nga ginganlag Liza, nga taga-Pilipinas, nagtrabaho ingong katabang sa balay didto sa isla sa Tinian. Kasagaran sa dihang moduaw ang mga Saksi ni Jehova sa balay nga iyang gitrabahoan, siya mangayo ug mga Bantayanang Torre ug Pagmata! Bisag miingon siya nga ganahan siyang mobasa sa mga magasin, pero ang tinuod iya ra kining idangilag.

Sa tingpamulak sa 2007, si Liza nawad-ag trabaho, ug kay wala man siyay kapuy-an, didto na lang siya natulog sa baybayon. Usa ka adlaw niana, siya minglabay sa Kingdom Hall, diin may duha ka sister nga naglingkod sa gawas. Ilang giagda si Liza sa pagkaon ug mangga, ug siya miduol kanila ug mahigalaong nakig-estorya. Pagkasunod adlaw milabay na sab siya sa Kingdom Hall, ug nakaestorya na pod niya ang mga sister, ug panahon sa ilang panag-estorya siya miingon, “Maayo untag makaanha pod ko sa inyong simbahan.” Bisag medyo naulaw ang mga sister kay wala pa gyod nila madapit siya, ilang gidasig siya sa pagtambong sa tigom nianang gabhiona. Siya misugot, nga nanghinaot nga matabangan siya sa mga Saksi nga makakitag trabaho.

Panahon sa tigom nakadayeg gayod si Liza sa pagkasinsero sa mga igsoon ug sa ilang kahangawa para sa mga tawo. Nakahilak niini si Liza kay ang iyang pangunang tuyo sa pagtambong maoy aron makakitag trabaho. Nakahinumdom usab siya sa mga magasin nga iyang gipangsunog. Kay natandog sa gugma nga gipakita kaniya sa mga igsoon, sukad niadto, siya nagtambongan na sa mga tigom ug regular nga nagtuon sa Bibliya. Siya nakakitag trabaho, mikuwalipikar ingong magmamantala, ug nabawtismohan niadtong Pebrero 2008.

[Hulagway sa panid 45]

Si Madalena

[Hulagway sa panid 48]

Naghimo sa ilang Pagtuon sa “Bantayanang Torre” diha sa demotor nga sakayan

[Hulagway sa panid 50]

Si Sister Barker mapailobong naghulat aron sangyawan si bisan kinsang molabay

[Hulagway sa panid 53]

Si Purnamaya nga nagpulpog ug mga bato aron makatabang sa mga galastohan sa iyang pamilya

[Hulagway sa panid 54]

Nagsangyaw sa usa ka babaye nga taga-India diha sa plantasyon sa goma

[Hulagway sa panid 57]

Si Reston nagtuon uban kang Andy

[Hulagway sa panid 58]

Si Shaé

[Hulagway sa panid 63]

Si Nagamma ug Reshma nag-agak kang Ushla