Sulat Gikan sa Nagamandong Lawas

Minahal nga mga Isigka-Saksi ni Jehova:

Malipay gayod kami sa pagsulat kaninyo minahal nga mga igsoon! Kami mibati sama sa gibati ni apostol Juan, kinsa miingon nga siya ‘nahigugma gayod’ sa iyang mga isigkamagtutuo ug nalipay nga sila “nagalakaw diha sa kamatuoran.” (2 Juan 1, 4) Bulahan gayod kita nga nakabaton sa kamatuoran! Kini nagpahigawas kanato gikan sa Dakong Babilonya ug sa mga doktrina ug tradisyon niini nga nagpasipala sa Diyos. Ang atong pagsugot sa Diyos nakatabang kanato nga mahimong mahigugmaon, maluloton, ug maluluy-on. Ug tungod sa kamatuoran kita makapahimulos ug hinlong baroganan atubangan sa Diyos ug may kalaoman nga mabuhi sa walay kataposan.

Mapasalamaton usab kita sa espiritu ni Jehova, nga sa adlaw-adlaw naggiya ug nagpalig-on kanato! Nakaseguro kami nga nalipay kamo sa pagkahibalo kon sa unsang paagi mahigugmaong gigamit ni Jehova ang iyang espiritu sa paggiya ug pagpalig-on kanato sa di pa dugay nga “Giniyahan sa Espiritu sa Diyos” nga Distritong mga Kombensiyon. Samtang nagkagrabe ang mga kahimtang sa kalibotan, hinungdanon nga mosalig kita sa gamhanang espiritu ni Jehova sa pagtultol kanato latas sa makuyaw nga mga adlaw sa atong unahan.

Segurado kami nga matandog gayod kamo samtang magbasa sa kulbahinam nga kasinatian sa atong mga igsoon diha sa Tinuig nga Basahon, kinsa nag-antos ug grabeng paglutos tungod sa ilang pagtuo. Ug dalayegon kaayong  hunahunaon nga daghan kanila nga nagmatinumanon maoy bag-o pang nabawtismohan o dili pa gani bawtismado sa dihang sila gilutos. Gimahal gayod nato sila tungod sa ilang pagkamaunongon ug sa pagbarog dapig sa pagkamatarong! Sa pagkatinuod, ang ilang maayo kaayong panig-ingnan nagpalig-on sa atong determinasyon nga padayong magmatinumanon dapig sa Gingharian bisag unsa pang kalisdanan ang mahimong modangat kanato.—1 Tes. 1:6-8.

Nahibalo kami, minahal nga mga igsoon, nga daghan kamog mga problema, sa panalapi man o sa uban pa, nga kinahanglan ninyong sagubangon aron ang inyong pamilya padayong magkahiusa diha sa gugma. Tingali ang uban kaninyo naglisod pa gani sa pagpakigbahin nga regular sa pagsangyaw ug sa pagsuportar sa uban pang kalihokan sa kongregasyon. Mao nga, human sa daghang panaghisgot ug pag-ampo, mihimo kamig mga kausaban sa mga tigom sa kongregasyon sugod sa Enero 1, 2009. Hinaot nga inyo gayong pahimuslan kining maong kahikayan aron makagahin kamog dugang panahon para sa inyong personal ug pamilyahanon nga pagtuon.

Diha sa mga asembliya ug mga kombensiyon niining tuiga, makapalipay gayod ang pagkakita nga daghan ang nabawtismohan. Lakip kanila ang mga bata pa kaayo. Dalayegon kaayo kamong mga ginikanan tungod sa pagmatuto sa inyong mga anak sa pagpabili sa kamatuoran ug sa pagdasig kanila sa pagpahinungod sa ilang kinabuhi sa pag-alagad kang Jehova samtang bata pa. Bisan tuod sila nag-atubang ug daghang pagsulay diha sa eskuylahan, sila mikuwalipikar alang sa bawtismo, ug kana nagpamatuod lang sa maayong pagbansay nga ilang nadawat gikan kaninyo.—Sal. 128:1-6.

Gusto usab namong hisgotan ang dakong pag-uswag sa mga pagtuon sa Bibliya—diin dakog naamot niini ang atong  kugihang mga misyonaryo ug mga espesyal payunir. Kaming mga membro sa Nagamandong Lawas nagpabili gayod sa hinungdanong papel sa atong mga igsoon sa tibuok kalibotan sa pag-ingon ug “Umari ka!” ngadto sa mga matinud-anog kasingkasing, nga nagdapit sa tanang giuhaw sa ‘pag-inom sa tubig sa kinabuhi nga walay bayad.’ (Pin. 22:17) Mainiton namong giabiabi sa atong tibuok kalibotang organisasyon ang 289,678 nga nagpasimbolo sa ilang pahinungod pinaagi sa pagpabawtismo sa miaging tuig!

Maayo nga pahinumdoman nato kanunay ang atong kaugalingon sa giingon ni apostol Juan, kinsa misulat: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Kita nagkinabuhi na gayod sa panahon diin duol nang ‘mahanaw’ kining kalibotana! Maalamon gayod nga atong buhaton pag-una ang kabubut-on sa Diyos ug ‘magpadayon kita sa pagbantay.’ (Mat. 24:42) Kon ato kanang buhaton, dili gayod kita magbasol, ug atong anihon ang mga panalangin sa mahigugmaong kalulot ni Jehova.—Isa. 63:7.

Kami nanghinaot nga ang mga kasinatian gikan sa daghang kayutaan nga ania niining Tinuig nga Basahon makadasig kaninyo sa pag-una sa intereses sa Gingharian diha sa inyong kinabuhi. Buot namong mahibalo kamo nga kami kanunay nga naghunahuna ug nag-ampo alang kaninyo ug nga kami nagmahal pag-ayo kaninyo. Hinaot dagaya kamong panalanginan ni Jehova.

Inyong mga igsoon,

Nagamandong Lawas sa mga Saksi ni Jehova