Sulat Gikan sa Nagamandong Lawas

Minahal nga mga Isigka-Saksi ni Jehova:

Usa gayod ka dakong pribilehiyo nga kita nagdala sa ngalan sa Soberano sa Uniberso, si Jehova! Kanang ngalana molungtad sa walay kataposan, dili mahanaw, ug walay-ikatandi. Kabubut-on mismo ni Jehova nga kita magdala sa iyang ngalan, ug ilabina sukad niadtong tuig 1931, kita nailhan nianang talagsaon nga ngalan. (Isa. 43:10) Busa mapasigarbohon gayod kitang magpaila nga kita usa sa mga Saksi ni Jehova.

Ang Yawa naningkamot gayod sa pagwagtang sa ngalan sa Diyos. Ubos sa iyang pagmando, ang kanasoran nagtamay sa ngalan ni Jehova. Ang Dakong Babilonya, ang tibuok-kalibotang imperyo sa bakak nga relihiyon, nagdumot sa ngalan sa Diyos ug nagtangtang niana sa daghang hubad sa Bibliya. Sa kasukwahi, gituboy ni Jesus ang ngalan sa iyang Amahan, nga giuna kana paghisgot diha sa modelong pag-ampo nga iyang gitudlo sa iyang mga sumusunod. Siya miingon: “Busa, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan.’” (Mat. 6:9) Sa ulahi, sa iyang kinasingkasing nga pag-ampo ngadto sa iyang Amahan, siya miingon: “Gipadayag ko ang imong ngalan sa mga tawo nga imong gihatag  kanako gikan sa kalibotan.” (Juan 17:6) Sanglit buot natong sundogon ang panig-ingnan ni Jesus, kita mas determinado karon nga ipaila gayod ang ngalan ni Jehova sa tibuok yuta.

Ang tinuig nga teksto sa 2009 nga “Bug-os magpamatuod sa maayong balita,” nagpalihok kanato nga tumanon sa bug-os ang atong ministeryo. (Buh. 20:24) Dayag gayod nga gipanalanginan pag-ayo ni Jehova ang atong mga paningkamot sa miaging tuig sa pag-alagad. Usa ka dakong pamatuod ang nahatag ngadto sa tibuok kalibotan alang sa kahimayaan ug kadungganan sa ngalan ni Jehova. Ang bag-ong kinatas-ang ihap nga 7,313,173 ka magmamantala miduyog sa pagsangyaw sa tanan ug sa pagpanudlo niadtong matinud-anog kasingkasing nga nangitag kasulbaran sa daghang problema nga ilang giatubang kada adlaw. Ang 18,168,323 nga mitambong sa Memoryal sa kamatayon ni Kristo nagpaila nga minilyon pa ang motawag sa ngalan ni Jehova sa dili pa ang kataposan niining daotang sistema sa mga butang.

Samtang gitugot pa ni Jehova, padayon kitang magmasiboton sa pagsangyaw sa maayong balita, nga himoon ang tanang paagi aron masangyawan ang mga tawo sa atong teritoryo. (Mat. 24:14; Mar. 13:10) Hinaot nga maningkamot kita sa pagpaila sa ngalan ug katuyoan ni Jehova sa daghang tawo kutob sa mahimo, diha man sa pagsangyaw sa balaybalay, sa kadalanan, pinaagig sulat ug telepono, o sa di-pormal nga paagi.

Makasalig gayod kita nga sa dili madugay si Jehova molihok na sa pagbalaan sa iyang ngalan. (Ezeq. 36:23)  Duol na gayod ang panahon nga pahilomon na kadtong tanan nga nagpasipala niini. Pagkamakapalipay kana nga adlaw alang sa tanang maunongong mga alagad ni Jehova, kinsa nagpaila sa iyang ngalan ug nagtuboy sa iyang pagkasoberano sa tibuok uniberso.

Ang mahigugmaong pag-atiman ni Jehova sa iyang katawhan nadayag gayod diha sa ‘Padayon sa Pagbantay!’ nga Distrito ug Internasyonal nga mga Kombensiyon nga gihimo sa daghang bahin sa yuta sa 2009. Kini nga mga kombensiyon nahimong hinungdanong bahin sa kasaysayan sa organisasyon ni Jehova, nga nagpalihok kanato nga magmabinantayon pa gayod alang sa adlaw ni Jehova. —Mar. 13:37; 1 Tes. 5:1, 2, 4.

Maayo kaayo si Jehova kanato ug buot gayod niya nga magmalipayon kita. Siya nagpahigda kanato sa mga sibsibanan nga malunhaw ug nagtultol kanato sa daplin sa mga dapit-pahulayan nga maayong pagkatubig.—Sal. 23:1, 2; 100:2, 5.

Makalaom kamo nga si Jehova padayong magpanalangin kaninyo samtang kamo pabiling magmakugihon sa buluhaton sa Gingharian sa umaabot pa nga mga bulan!

Uban ang among mainitong Kristohanong gugma sa tibuok-kalibotang panag-igsoonay,

Inyong mga igsoon,

Nagamandong Lawas sa mga Saksi ni Jehova