Pagsangyaw ug Pagpanudlo sa Tibuok Yuta
Pagsangyaw ug Pagpanudlo sa Tibuok Yuta
ALANG sa iyang mga tinun-an sa unang siglo, ang mga pulong ni Jesus daw makapatingala. Iyang gitagna nga sila dumtan sa tanang nasod—sila pagapatyon ug makaagom ug kasakitan. Dugang pa, daghan ang mapandol ug luiban. Apan si Jesus miingon nga ang maayong balita igawali sa tibuok yuta. (Mat. 24:9-14) Magmalamposon kaha ang buluhatong pagsangyaw bisan pa sa pagsupak? Sa mosunod nga mga panid, imong makita ang tubag sa maong pangutana.
2010 Katibuk-ang Ihap
Sangang Buhatan: 116
Kayutaan nga Nagtaho: 236
Kongregasyon: 107,210
Mitambong sa Memoryal: 18,706,895
Miambit sa Memoryal: 11,202
Kinatas-ang Ihap sa Magmamantala: 7,508,050
Aberids nga Magmamantala Kada Bulan: 7,224,930
Porsiyento sa Pag-uswag Kon Itandi sa 2009: 2.5
Nabawtismohan: 294,368
Aberids nga Oksilyare Payunir Kada Bulan: 287,960
Aberids nga Payunir Kada Bulan: 844,901
Oras nga Nagugol sa Kanataran: 1,604,764,248
Aberids nga Pagtuon sa Bibliya Kada Bulan: 8,058,359
Sa 2010 nga tuig sa pag-alagad, ang mga Saksi ni Jehova nakagastog kapin sa $155 milyones sa pag-atiman sa mga espesyal payunir, misyonaryo, ug nagapanawng mga magtatan-aw sa ilang mga asaynment.
◼ Sa tibuok kalibotan, dunay 20,062 ka ordinadong ministro nga nag-alagad sa mga sangang buhatan. Ang tanan maoy membro sa Tibuok-Kalibotang Orden sa Linaing Bug-os Panahong mga Alagad sa mga Saksi ni Jehova.
AFRICA
KAYUTAAN 57
POPULASYON 888,219,101
MAGMAMANTALA 1,222,352
PAGTUON SA BIBLIYA 2,596,614
GRUPO NGA NANGITA SA KAMATUORAN. Sa usa ka gamayng baryo sa Madagascar, 80 ka tawo ang mibiya sa National Protestant Church. Nagtukod silag kaugalingong simbahan ug nangita sa matuod nga relihiyon, nga gisusi ang matag relihiyon sa ilang dapit. Sila nakahinapos nga ang mga Katoliko wala magtuon sa Bibliya ug sa Lutheran Church dunay pagkabahinbahin. Ilang nakita nga ang mga Pentecostal wala magtudlo sa kamatuoran, ug ang mga Seventh-Day Adventist daghag gidili. Dayon ilang giduol ang usa sa atong mga igsoon ug gihangyo
siya nga tudloan silag Bibliya. Miuyon dayon ang igsoon.Gihikay sa pipila ka magmamantala nga duawon kining mga interesado. Nahimamat sa mga igsoon ang 26 kanila nga nagtigom sa simbahan nga ilang gitukod, ug sila andam nang mamati sa mensahe sa Bibliya. Gamit ang kapitulo 15 sa librong Gitudlo sa Bibliya, gipatin-aw sa mga igsoon kon unsaon pagkaplag ang relihiyon nga giuyonan sa Diyos. Sila natagbaw sa gipresentar nga impormasyon. Sa dihang mibalik ang mga igsoon, 73 ang namati kanila. Ug sa ikatulong pagduaw, 142 ang mitambong!
NASAAG NGA TEXT. Aron dasigon ang iyang gitun-an sa Bibliya, gi-text ni Menen nga usa ka Saksi sa Ethiopia ang tinuig nga teksto sa 2009 ngadto kaniya. Apan sayop nga numero ang iyang napadad-an. Sublisubli kining gibasa sa babayeng nakadawat niini: “‘Bug-os magpamatuod sa maayong balita.’—Buhat 20:24, NW.” Kay siya mahinadlokon sa Diyos, siya miuyon sa mensahe apan wala mahibalo kon unsaon kini paghimo. Nalibog usab siya kon unsa ang “NW” [New World Translation] sa tumoy. Milabay ang mga semana, apan nagpabilin gihapon kini sa iyang hunahuna maong iyang gitawgan ang nag-text. Wala magtuo ang sister nga nasaag ang iyang text, apan iyang gipahimuslan ang kahigayonan nga masangyawan ang maong babaye. Ingong resulta, ang babaye nagtuon sa Bibliya kaduha kada semana.
ANG BATANG PAYUNIR. Si Persis nga taga-Cameroon nahimong dili bawtismadong magmamantala sa sayis anyos pa siya. Ang iyang unang report dunay 10 ka pagtuon sa Bibliya. Abi sa sekretaryo ug nasayop ang bata. Sa dihang gipangutana si Persis, siya miingon nga napulo gayod ka lainlaing estudyante ang iyang gidumalahag pagtuon. Ang sekretaryo dugang nangutana: “Giunsa nimo
pagkahibalo sa imong oras nga wala man kay relo?” Siya miingon nga ang ilang reses usa ka oras. Mosugod dayon siyag sangyaw ug mohunong inigbagting. Ang iyang kasibot nakadasig sa iyang inahan ug ig-agaw, nga sa ulahi nahimong dili bawtismadong mga magmamantala. Si Persis, nga karon 10 anyos, bawtismado na ug nag-oksilyare payunir samtang nagtungha. Ang iyang otso anyos nga amigang si Aasy usa na usab ka dili bawtismadong magmamantala. Ang usa ka gitun-an sa Bibliya miingon bahin kanila: “Sa tigom malipay kong makakitag mga bata nga motimbaya kang bisan kinsa, ilabina sa mga tigulang, sa dili pa sila molingkod tupad sa ilang ginikanan. Wala ko kakitag ingon niini sa among simbahan. Ang mga batang nagdako nga ingon niana mahimong mas maayong mga tawo sa katilingban sa umaabot.”MGA NASOD SA AMERICA
KAYUTAAN 55
POPULASYON 918,834,998
MAGMAMANTALA 3,673,750
PAGTUON SA BIBLIYA 3,967,184
SIYA WALA MANUKTOK. Si Miriam nga taga-Bolivia usa na ka semanang nag-ampo sa Diyos. Ang iyang pag-ampo ingon niini: “Palihog tabangi ko nga makaila kanimo, apan dili pinaagi sa mga Saksi ni Jehova. Dili ko gustong manuktok sila sa akong pultahan.”
Sa hinapos nianang semanaha mibagting ang telepono. Ang mitawag mao ang espesyal payunir nga si Candy, kinsa mitanyag nga hatdan niyag mga magasin si Miriam sulod sa usa ka oras. Siya miuyon. Sulod sa usa ka oras diha na si Candy sa iyang pultahan. Iya dayong giablihan ug gipadayon si Candy. Dayon si Miriam nagbahasbahas ug naglingolingo, dayag nga napugos lang. Nangutana si Candy kon unsay problema. “Dili ko makatuo!” matod ni Miriam. “Kapin nag semana kong nag-ampo sa Diyos alang sa giya, pero giklaro ko sa akong pag-ampo nga dili ko gustong tabangan sa mga Saksi ni Jehova nga kanunayng manuktok sa akong pultahan! Ug dayon ikaw mitelepono inay manuktok! Sukad sa imong pagtawag mga usa ka oras na, nag-ampo ko sa Diyos nga dili ka moanhi. Ug ikaw mianhi! Dili ko makatuo! Gusto gayod niya nga kamong mga Saksi ni Jehova ang motabang kanako.” Nasugdan dayon ang pagtuon.
ILA SIYANG GIBIYAAN ARON MAMATAY. Si Pasensi maoy iladong pangulo o kapiten kanhi sa usa ka baryo sa
Suriname ug suod nga kaalyado sa granman—ang dakodako o hari—sa tibuok ilaya ubay sa suba. Magarbohong gidepensahan ni Pasensi ang lokal nga mga tradisyon. Iyang gisupak ang mga Saksi ni Jehova kay iyang gihunahuna nga sila makadaot sa ilang mga tradisyon.Sa ulahi, usa ka batan-ong lalaki ang nangangkon nga dunay abilidad sa pag-ila kon kinsay mga barangan sa baryo. Ang iyang mga sumusunod miuban kaniya nga nagsakayan diha sa suba ug ilang bun-ogon ug kuhaon ang tanang kabtangan niadtong gidudahan. Dakong kantidad ang ibayad aron “mahinloan” gikan sa daotang espiritu ang gidudahang barangan. Usa sa inosenteng mga biktima mao si Pasensi, kinsa gibun-og ug gibiyaan aron mamatay. Bisag ang iyang higala nga granman walay mahimo kay nahadlok nga patyon ug madaot ang iyang reputasyon kon motabang siyag usa ka gidudahang barangan. Ang mga higala ug paryente gidid-an sa pagtabang. Apan ang umagad nga lalaki ni Pasensi nagbatog kaisog ug gidala siya sa baryo diin ang kadaghanan
mga Saksi ni Jehova. Gihisgotan sa mga igsoon ang situwasyon ug, bisag nameligro usab, sila mitabang. Ilang gisakayg baroto si Pasensi paingon sa pikas baryo diin dunay brader nga manedyer sa gamayng erport. Gikan didto, siya gidala sa siyudad aron matambalan.Si Pasensi, nga naayo na sa iyang mga bun-og, natandog sa gugma nga gipakita sa mga tawo nga iyang gisupak kaniadto. Siya nagtuon ug Bibliya ug nabawtismohan sa Disyembre 2009. Si Pasensi usa na karon ka masibotong magwawali sa maayong balita, ug bisag 80 anyos na, siya nag-oksilyare niadtong Abril 2010.
ABI NIYAG SINATI NA SIYA SA BIBLIYA. Ang bangasong si Eric nagdalag Bibliya sa dihang mitambog tigom sa United States. Sa dihang gitimbaya siya sa usa ka brader, siya nangutana dayon bahin sa atong mga pagtulon-an. Iyang gibalibaran ang librong Gitudlo sa Bibliya, kay Bibliya lang ang gusto niyang gamiton. Mobasa siyag 20 ka panid sa Bibliya kada adlaw ug wala na siya mahinumdom kon kapila na niya nabasa ang tibuok Bibliya. Human sa tigom, kapig tulo ka oras silang nag-estoryahay sa brader. Sa mopauli na, si Eric miingon, “Ako nadismaya.” Nangutana ang brader kon ngano. Si Eric mitubag: “Abi nakog sinati na kaayo ko sa Kasulatan. Karon akong naamgohan nga wala gyod diay koy kahibalo niini.” Dayon iyang gidawat ang librong Gitudlo sa Bibliya.
Pagkasunod adlaw, gisugdan nila ang pagtuon. Sa miaging gabii, gipulawan niyag basa ang unang napulo ka kapitulo sa maong libro. Siya nakaingon, “Mao na gayod kini ang kamatuoran!” Sila nagtuon tulo ngadto sa upat ka oras matag adlaw, lima ka adlaw kada semana. Siya nangandam ug mitambong sa tanang tigom uban sa iyang pamilya. Sa unang semana siya nagpadalag mga sulat sa pagbiya sa tulo ka relihiyon, namarbas, ug
mihukom nga dili na mosaulog ug mga pista opisyal. Sa ikaduhang semana siya nagpaenrol sa Teokratikanhong Tunghaan sa Ministeryo, ug sa upat lang ka semana siya nahimong dili bawtismadong magmamantala. Siya nabawtismohan sa Abril 2010, unom lang ka bulan sukad sa una niyang kontak sa mga Saksi!SIYETE ANYOS NGA NABAWTISMOHAN. Si Paola, nga nagpuyo sa kasadpang Mexico, gipadako sa iyang mga apohan. Ang iyang lola misugod sa pagtuog Bibliya uban sa mga Saksi sa dihang si Paola singko anyos. Si Paola namati usab sa pagtuon ug ang kamatuoran natisok sa iyang linghod nga kasingkasing. Bisan tuod wala mopadayon ang iyang lola, si Paola misugod sa pagtambong sa mga tigom. Magpatabang siya sa iyang mga apohan sa pag-ilis ug sa pagtabok paingon sa Kingdom Hall.
Sa dihang kamao na siyang mobasa ug mosulat, si Paola nagpaenrol sa Teokratikanhong Tunghaan sa Ministeryo
ug nahimong magmamantala. Tungod sa iyang gugma kang Jehova, siya nabawtismohan sa edad nga siyete. Dihang gipangutana kon nganong mitambong siya sa mga tigom ug masibotong misangyaw bisan pag walay tabang sa iyang pamilya, si Paola, nga karon diyes anyos na, mitubag: “Nagustohan nako ang mga pakigpulong kay nadasig ko niini nga padayong magtuon ug Bibliya ug makalikay sa kasamok. Ug ako misangyaw kay gusto nakong tudloan ang mga tawo kon unsay himoon ni Jehova alang kanila sa umaabot ug tungod kay ang Bibliya makahatag kanilag kalipay bisan karon.”GISANGYAWAN ANG MGA NASAYOP SA PAGTELEPONO. Sa Dominican Republic, usa ka sister ang nakadawat ug daghang sayop nga tawag sa telepono nga nakabalda sa iyang trabaho. Human sa pipila ka adlaw, siya nakahunahuna, ‘Puwede nakong magamit kini nga kabaldahan aron makasangyaw.’ Sa unsang paagi? Kon dunay masayop ug tawag, siya mangayog pasaylo nga nasayop ang tawag, dayon siya mangutana, “Imo na bang nabasa ang Bibliya karong adlawa?” Bisag ibutang sa uban ang telepono, ang pipila miingon nga wala pa nila mabasa ang Bibliya. Dayon siya mangutana, “Nahibalo ka ba nganong importante kini?” Dayon iyang basahon ang Salmo 1:1-3. Usa ka opisyal sa gobyerno ang nakig-estorya kaniyag dugay ug miingon nga wala siyay Bibliya. Gihikay sa sister nga hatdan siyag Bibliya ug mga literatura. Duha ka semana sa ulahi mitawag ang opisyal aron pasalamatan ang sister ug ang mga literatura.
Sa laing sayop nga tawag, usa ka batan-ong babaye nangutana, “Saksi ka ba ni Jehova?” Sa dihang miingon ang sister nga siya Saksi, ang babaye mihilak ug miingon nga siya dili aktibong Saksi. Gidasig siya sa sister ug gihikay nga dunay motabang niya. Siya karon aktibo na usab.
ASIA UG ANG TUNGANG SIDLAKAN
KAYUTAAN 47
POPULASYON 4,587,021,833
MAGMAMANTALA 652,251
PAGTUON SA BIBLIYA 601,306
“ANG SAMARITANA.” Usa kadto ka adlaw sa ting-init sa Kazakhstan. Samtang nagsangyaw, nakakita ang payunir nga brader ug sister ug babayeng nagkalos sa atabay. Ang brader nangayog tubig, ug samtang nag-inom, gisangyawan sa sister ang babaye. Nainteres ang babaye ug gidapit ang mga payunir sa ilaha aron makakat-on pag dugang. Taudtaod silang nag-estoryahay, ug gibinlan nila siyag literatura. Ang sister misaad nga mobalik human sa duha ka adlaw.
Busa siya mibalik uban sa iyang inahan nga Saksi usab. Ilang naabtan ang babaye nga nagpaabot sa gawas sa iyang balay bitbit ang literatura nga gibilin kaniya. Iya kining giuli sa sister ug miingon: “Basahon ni sa mga Saksi ni Jehova! Gikan sa Russia ang inyong relihiyon!”
Ang inahan mihangyo sa babaye nga mobasag teksto sa Bibliya sa dili pa mobiya. Kay gustong ipakita sa babaye ang ngalan sa Diyos, iyang gipakli ang Exodo 3:15 ug gibasa: “Si Jehova nga Diyos sa inyong mga katigulangan, ang Diyos ni Abraham, ang Diyos ni Isaac ug ang Diyos ni Jacob, nagpadala kanako nganhi kaninyo.” Sa katingala sa mga sister, gipadayon sila sa babaye. Unsay nakapausab sa iyang hunahuna? Ang babaye diay dunay mga katigulangan nga ginganlag Abraham, Isaac, ug Jacob. Siya miingon nga kon si Jehova mao ang Diyos sa iyang mga katigulangan, dili niya balibaran ang iyang mga Saksi. Sa sunod nga pagduaw, nasugdan ang pagtuon sa Bibliya. Gusto kaayo niyang mokat-on mao nga ang pagtuon gihimo kaduha kada semana. Bisan pa sa pagsupak sa iyang mga anak nga lalaki, siya miuswag ug karon usa na ka dili bawtismadong magmamantala. Dugang pa, ang iyang umagad nga babaye ug ang inahan niini nagtuon sa Bibliya ug tigtambongan na sa mga tigom. Tungod kay ang unang pagsangyaw nahisama sa asoy sa Juan 4:3-15, siya nailhan sa kongregasyon ingong “Samaritana.”
“DUNA KOY MGA PANGUTANA.” Usa ka edarang payunir nga sister sa Cyprus misulat: “Usa ka Miyerkoles sa buntag, dili maayo akong pamati, apan inay magpondo sa balay, gusto kong mosangyaw sa kadalanan. Busa miampo ko kang Jehova, nga mihangyong dunay motapad nakog lingkod aron akong sangyawan ug masugdag pagtuon sa Bibliya. Wala madugay dihay miabot nga batan-ong lalaki nga taga-Nepal. Nagkupot kog mga magasin, ug wala pa gani ko makasulti, nangutana siya kon bahin sa unsa ang mga magasin. Sa ako siyang giingnan nga bahin kini sa Bibliya, siya miingon: ‘Ma’am, wala koy lingaw karon, mahimo bang motapad nimo? Duna koy mga pangutana sa Bibliya.’
“Siyempre miuyon ko, kay mao kanay akong giampo kang Jehova! Ang lalaki miingon: ‘Ang una nakong pangutana, Unsay tinuod nga gitudlo sa Bibliya?’ Sa kakurat, wala dayon ko katingog! Akong gikuha sa bag ang librong Unsay Tinuod nga Gitudlo sa Bibliya?
ug gipakita kaniya. Pagkakita niya sa libro, iya kong gitan-aw ug nangutana, ‘Di ba ang ulohan niini nga libro mao ang akong pangutana?’ Busa nakasugod dayon kog pagtuon sa Bibliya diha sa lingkoranan sa parke! Regular na karon ang iyang pagtuon ug pagtambong sa mga tigom, ug gusto na niyang magpaenrol sa Teokratikanhong Tunghaan sa Ministeryo. Akong nakita ang kahinungdanon sa bug-os nga pagsalig sa kusog ug paggiya ni Jehova diha sa ministeryo, bisan pag usahay luya akong lawas.”GITUN-AN SA APOHAN ANG NAGPATAY SA IYANG APO. Ang apong lalaki ni Miguel gipatay pipila na ka tuig ang milabay. Ang kriminal, si Esmeraldo, nadakpan apan wala moangkon sa korte. Apan pinasukad sa mga ebidensiya, siya gisentensiyahang mabilanggo.
Sa ulahi, ang usa ka ansiyano midapit kang Miguel nga mosangyaw sa prisohan sa Pilipinas diin didto gibilanggo si Esmeraldo. Nagpanuko si Miguel,
kay nahibalo nga tua didto ang nagpatay sa iyang apo. Apan siya miuban ug miduyog sa pagtudlo sa mga priso nga nagtuon ug Bibliya. Panahon sa pagtuon, iyang nakita si Esmeraldo nga nagpaingon kaniya. Aron walay mahitabong kasamok, malumong miingon si Miguel: “Esmer, mianhi ko dili aron makig-away kondili aron magpakitag gugma sa mga sama nimo. Tan-awa, among gitun-an ug Bibliya kining tawhana. Dili unta kini mahitabo nimo kon nagtuon ka sa Pulong sa Diyos. Apil namo sa pagtuon ug Bibliya.” Wala makatuo si Miguel nga miapil si Esmeraldo sa tibuok pagtuon. Natandog sa iyang nadunggan, siya miangkon kang Miguel nga siya ang nagpatay sa apo niini ug nangayo siyag pasaylo.Ang ansiyano, nga wala makabati sa ilang panag-estoryahay, nakamatikod nga maayo ang ilang panaghisgot, busa iyang giingnan si Miguel nga tun-an si Esmeraldo. Sa primero, nahadlok si Miguel kay nahibalo nga dili lang ang iyang apo ang gipatay niining tawhana, apan siya misugot. Nalisdan si Esmeraldo sa pagsunod sa mga sukdanan sa Diyos; apan ang iyang paningkamot nagbunga, ug niadtong Pebrero 1, 2010 siya nabawtismohan ingong simbolo sa iyang pagpahinungod kang Jehova. Si Miguel, agig pagpasaylo sa nahimo ni Esmeraldo, naningkamot karon nga mapamub-an ang sentensiya ni Esmeraldo aron siya bug-os pang makapaambit sa kamatuoran.
EUROPE
KAYUTAAN 47
POPULASYON 739,193,855
MAGMAMANTALA 1,575,094
PAGTUON SA BIBLIYA 830,888
NATUMAN ANG IYANG DUHA KA PANGANDOY. Ang 19 anyos nga si Nelena nga taga-Bulgaria dunay duha ka pangandoy kaniadto—ang mabawtismohan ug mag-oksilyare payunir. Apan duna siyay sakit nga motor ug sensory neuropathy, nga sa pagkakaron wala pay tambal. Makaginhawa siya sa tabang sa usa ka aparato, ug tungod niini maglisod siya paglihok. Tungod sa iyang kahimtang, daw dili niya makab-ot ang una niyang pangandoy, ang magpabawtismo, kay dili man siya makabiya sa apartment aron motambog asembliya. Busa sa 18 anyos na siya, gihimo ang usa ka pakigpulong sa bawtismo diha sa iyang gipuy-an ug gibawtismohan siya sa usa ka bathtub.
Komosta ang iyang pangandoy nga mag-oksilyare payunir? Kon maayo ang panahon, siya usahay makaginhawa sulod sa usa ka oras o kapin pa nga walay aparato. Busa siya nag-oksilyare payunir, ug usa ka magmamantala ang motulod sa iyang wheelchair dihang mamalaybalay.
Si Nelena nagdumala usab ug pagtuon sa Bibliya pinaagig voice call diha sa Internet. Usahay tun-an sa mga sister sa kongregasyon ang ilang mga gitun-ag Bibliya didto sa balay ni Nelena aron siya makapakig-ambit. Busa katulo naka-oksilyare payunir si Nelena sa miaging tuig. Siya miingon: “Nalipay ko nga akong natuman ang akong duha ka pangandoy. Kini mas nakapasuod kanako sa akong mahigugmaong Maglalalang nga si Jehova.”SIYA NAGKORBATA NA. Usa ka sister sa Armenia ang gibiaybiay sa iyang gitrabahoan kay siya Saksi ni Jehova. Usa ka kauban niya sa trabaho ang kanunayng mobiaybiay niya ug moingon nga “ang mga tawong nagkorbata” nagdani sa sister sa ilang relihiyon. Kay wala molampos ang daghang pagpangatarongan sa sister, midesisyon siya nga pasagdan na lang kini ug agig pagsundog kang Jesu-Kristo, siya “wala motubag.” (Mat. 27:12) Paglabay sa panahon, napotbol ang maong trabahante tungod sa iyang dili maayong panggawi ug sa pagbiaybiay sa sister. Mga bulan sa ulahi, dihay lalaki nga nangita kaniya sa iyang gitrabahoan. Siya ang kauban niya sa trabaho kanhi nga kanunayng nagbiaybiay kaniya. Wala siya makatuo sa pamostura niini. Bisan pag iyang gibiaybiay kaniadto ang mga Saksi kay nagkorbata, siya karon nagkorbata na ug nagdalag bag. Iyang giingnan ang sister: “Pasayloa ko sa akong pagbiaybiay nimo kaniadto. Karon ako nang nakaplagan ang kamatuoran.” Ang lalaki diay nagtuog Bibliya uban sa mga Saksi ni Jehova, ug bisag supak ang iyang pamilya, siya nabawtismohan ug usa na ka regular payunir.
“KAILA BA MO NI MRS. NADIA?” Si Nadia maoy usa ka payunir sa kongregasyon sa amihanang Italy. Niadtong Septiyembre 2009 nakaestorya niya sa intercom ang usa ka lalaki nga misagbat dayon ug miingon nga bag-o pang
namatay ang iyang asawa ug dili siya gustong makigsulti kaniya. Pagkasunod Dominggo, mibalik si Nadia aron ipaabot ang iyang pahasubo ug ipaambit ang paglaom sa pagkabanhaw, apan mao lang gihapon ang reaksiyon sa lalaki. Ang Pagtuon sa Bantayanang Torre nianang hapona dunay kasinatian sa usa ka sister nga nagpadalag sulat sa usa ka namatyan. Nahunahunaan ni Nadia ang iyang nakaestorya sa intercom, busa siya mihimog sulat-pahasubo nga naundan usab ug mga impormasyon bahin sa pagkabanhaw. Duha ka adlaw sa ulahi, iya kanang gihulog sa mailbox sa lalaki.Human sa pipila ka adlaw, nagsangyaw si Nadia sa kadalanan ug iyang giduol ang usa ka lalaki nga mga 70 kapin ang edad aron basahag Bibliya. Ang lalaki nangutana kon siya ba usa ka Saksi ni Jehova, ug mitando si Nadia. Miingon ang lalaki nga giduaw siyag Saksi nga nagbilin kaniyag nindot nga sulat nga nakatandog gayod kaniya. Dayon siya nangutana, “Kaila ba mo ni Mrs. Nadia?” Silang duha nakurat, ug si Nadia mipaila ug mihimog kahikayan nga duawon siya uban sa iyang bana. Ang lalaki dili lang kay nagtuon ug Bibliya kondili nagtambongan na sa tigom.
DILI NILA MAATO UG DUMALA ANG TANAN. Upat ka bawtismadong Saksi ang nagpuyo sa lungsod sa Bujanovac sa
habagatang Serbia. Malipayon kaayo sila nga dihay 460 nga mitambong sa ilang Memoryal sa 2010! Ang mga ansiyano sa silingang kongregasyon regular nga nagpahigayog tigom sa Bujanovac diha sa giabangang pasilidad. Moaberids silag kapin sa 50—ang kadaghanan Roma ug kagikan. Tungod sa daghang interesado, ang mga espesyal payunir dinhi dili na makaato sa pagdumalag pagtuon sa tanan. Busa ila lang dumalahan kadtong nangandam sa dihang motambong sa tanang tigom.KAPIG GATOS NA ANG EDAD! Si Elin, ang kinatigulangang magmamantala sa Sweden, 110 anyos na—ang edad nga naabot ni Josue. (Jos. 24:29) Nagpuyo siya sa puy-anan sa mga tigulang ug iyang gipahimuslan ang matag higayon sa pagsangyaw sa mga mobisita ug sa tanang anaa didto. Nakapahimutang siyag daghang libro. Sa dihang ang usa ka ansiyano namalaybalay uban sa iyang anak nga babaye, ilang nahimamat ang usa ka batan-ong babaye kinsa miingon nga si Elin nakasangyaw kaniya ug gihatagan siyag libro. Miresulta kinig nindot nga panag-estoryahay. a
NAKIT-AN ANG MGA LIBRO DIDTO SA SIMBAHAN. Si Tatyana, nga taga-Belarus, wala magdahom nga motawag kaniya ang usa ka batan-ong babaye nga dili niya kaila. Gusto sa batan-on nga matubag ang iyang mga pangutana sa Bibliya.
Dayon nasugdan ang nindot nga panaghisgot. Diin niya nakuha ang numero ni Tatyana? Ang babaye miingon nga samtang siya misimba, nakit-an niya ilalom sa lingkoranan ang librong Gitudlo sa Bibliya ug ang Bag-ong Kalibotang Hubad diin nasulat niana ang numero ni Tatyana. Nganong naabot sa simbahan ang mga libro? Kini diay gidala sa inahan sa usa ka batang babaye nga gitun-an ni Tatyana ug Bibliya. Dayag nga buot sa inahan nga ipasusi sa pari ang mga libro kon angay ba kining basahon sa iyang anak. Sa wala mahibaloing hinungdan, nahabilin ang mga libro ilalom sa lingkoranan. Nakit-an kini sa babaye ug iyang gidala sa balay. Ang iyang pagtelepono mitultol sa dugang panaghisgot sa Bibliya.NASANGYAWAN TUNGOD SA NAWALANG AMERKANA. Si Elena nga usa ka espesyal payunir nakakitag nindot nga amerkana diha sa dalan sa Minsk, Belarus. Ang amerkana limpiyo ug morag wala ilabay. Iya kining gipunit ug nakakitag $1,200 (U.S.) sa bulsa niini. Iyang gitan-aw ang palibot ug iya dayong nakit-an ang lalaki nga lagmit maoy tag-iya. Nagdali kini nga daw dunay gipangita. Giapas siya ni Elena. Siya usa ka negosyanteng taga-Bangladesh nga nagpuyo sa Moscow. Nalipay kaayo siya nga nauli kaniya ang amerkana uban ang kuwarta. Gusto niyang masayran kon nganong giuli sa sister ang amerkana, ug gani migukod pa kaniya. Ang sister miingon nga usa siya sa mga Saksi ni Jehova. Ang lalaki miingon nga pipila ka adlaw sa miagi, duha ka Saksi ang iyang gikaestorya. Mga 30 minutos siyang nakig-ergo kanila ug gidepensahan ang iyang relihiyon. Ang lalaki nangutana kang Elena kon sa unsang paagi siya kapasalamatan. Ang sister miingon nga dili siya magpabayad apan ang labing maayong paagi sa pagpasalamat mao ang pagtuon sa Bibliya uban sa mga Saksi inigbalik niya sa Moscow. Ang lalaki miuyon niini.
OCEANIA
KAYUTAAN 30
POPULASYON 39,384,408
MAGMAMANTALA 101,483
PAGTUON SA BIBLIYA 62,367
PAGBUNTOG SA SULIRAN SA PAGSULTI. Si Hamish, usa ka 23 anyos nga brader sa Australia, adunay grabeng suliran sa pagsulti nga tungod niana dili siya masabtan o kaha dili gayod makasulti. Apan kini wala makahanaw sa iyang kasibot sa pagpakigpulong o sa pagsangyaw. Pananglitan, kon duna siyay bahin sa Kingdom Hall, i-tayp ni Hamish ang iyang manuskrito sa usa ka instrumento nga maoy mobasa niana. Sa dihang magpakigpulong, ibutang niya sa podyum ang instrumento ug gamit ang keyboard pilion niya ang iyang i-play. Dayon pinaagig mikropono, madunggan kini sa mamiminaw. Kon ang iyang bahin may pakig-ambit sa mamiminaw, iyang pasalamatan ang ilang mga komento gamit ang instrumento. Sama usab niini ang iyang himoon sa dihang magsangyaw—mag-andam siyag mga presentasyon ug mga teksto ug kinahanglang paspas ang iyang pagtayp! Tungod niini, daghan siyag balikduaw. Sa 2007, si Hamish gitudlo ingong ministeryal
ug sukad niadto kadaghan siya mag-oksilyare payunir kada tuig.NADAOT ANG IYANG PRINTER. Si David, nga tig-ayog kompiyuter sa New Caledonia, gitawgan sa usa ka babaye nga nadaotag printer kay dili niini ma-print ang usa ka dokumento. Dali ra kining naayo ni David, apan nakurat siya sa iyang nabasa sa dokumento: “AYAW mig duawa. Si Jesus ania na sa among panimalay. Wala na mi magkinahanglag laing relihiyon.”
Si David miingon sa tagbalay: “Lain pay ato, sa nag-ayo ko sa inyong printer, akong nabasahan ang dokumento. Puwede bang mahibaloan nganong inyong gisulat kini?”
Siya mitubag: “Magsige man god ug bisita ang mga Saksi ni Jehova kada hinapos sa semana ug gisamokan na mi nila. Sultihan tika, wala gyoy Saksi nga makasulod ining among panimalay.”
Si David nangutana: “Nahibalo ba mo nga inyo nang napasulod ang usa kanila?”
Siya mitubag: “Imposible. Dili gayod kana mahitabo!”
Si David miingon: “Usa ako sa mga Saksi ni Jehova! Ug inyo kong gipasulod!” Ang babaye nakurat ug daw naulaw. Malulotong gipatin-aw ni David kon nganong moduaw ang mga Saksi. Giabtag duha ka oras ang ilang pag-estoryahay. Pipila ka adlaw sa ulahi, giduaw pag-usab ni David ang babaye ug ang iyang bana. Sila miingon nga human mapamalandong ang nahitabo, nagtuo sila nga gipadala sa Diyos si David. Busa, dili sila makabalibad sa iyang pagduaw! Karon regular na silang gihatdan ug mga magasin.
NAGDALA KANUNAY UG MGA TRACT. Ang 12 anyos nga si Nathan nga taga-Australia kanunayng magbutag mga tract sa iyang bag ug mosangyaw sa iyang mga higala sa eskuylahan. Usa ka adlaw niana, samtang mipauli, iyang
nakita ang usa ka tigulang nga babaye nga nagtindog sa tugkaran sa iyang balay. Ang babaye mipahiyom, busa mipahiyom pod si Nathan ug gihatagan niyag tract. Giingnan siya sa babaye nga namatay ang iyang bana tulo ka tuig na ang milabay. Busa gihatagan siya ni Nathan ug tract nga Unsay Paglaom Alang sa Namatay nga mga Minahal? Milugmaw ang mga luha sa babaye samtang gisultihan siya ni Nathan bahin sa pagkabanhaw diin iyang makita pag-usab ang iyang bana sa Paraiso. “Apan kanus-a matapos ang tanang pag-antos?” nangutana ang babaye. Mikuha si Nathan ug laing tract, Ang Tanang Pag-antos Matapos Na sa Di-madugay! Dayon nangutana ang babaye kon unsa pay gituohan ni Nathan. Busa siya mikuhag laing tract, Unsay Gituohan sa mga Saksi ni Jehova? Human niana, milakaw si Nathan. Pipila ka semana sa ulahi, iya na usab nga nakita ang babaye sa tugkaran. Gitawag niya si Nathan ug gihalog. “Abi nimo Nathan?” siya miingon. “Human ko nimo hatagig mga tract, duha ka Saksing babaye ang miduaw, ug karon ako nagtuon nag Bibliya!”USA LANG ANG KOPYA SA IMBITASYON SA MEMORYAL. Si Michael miboluntaryo sa pagtukod sa bag-ong sangang buhatan sa Solomon Islands. Human niana, siya mihukom nga mosangyaw sa Mbanika Island, usa ka hilit nga
isla diin didto siya nagpuyo sa bata pa ug tua pod didto ang iyang mga magulang. Walay mga Saksi sa isla. Tagsa ray barkong mobiyahe didto, walay koreyo, ug usa ra ang telepono.Siya miadto sa Mbanika Island uban sa usa ka batan-ong payunir nga si Hansly. Sa ilang pag-abot, mihimo dayon silag gamayng Kingdom Hall nga gama sa nipa ug gidapit ang mga tawo sa pagtambong sa Memoryal. Sanglit usa lang ang ilang imbitasyon, ila lang kining ipakita sa mga tawo ug isaysay ang kahinungdanon sa maong okasyon.
Usa ka adlaw antes sa Memoryal, sila namugsay ug duha ka oras paingon sa pikas bahin sa isla aron imbitahon ang usa ka pamilya nga nagpuyo didto. Apan mga anak ray ilang naabtan. Mihukom si Michael nga ibilin na lang ang kopya sa imbitasyon. Iya kining gihatag sa magulang nga anak nga babaye ug gitugon nga ihatag kini sa iyang papa.
Pagkaugma sa hapon, samtang nangandam si Michael ug Hansly sa Memoryal, nakita nila nga nagsingabot ang pamilya nga nagsakayan. Nabasa sa amahan ang imbitasyon ug miingon nga tingali hinungdanon gayod kini nga okasyon maong iyang gidala ang iyang tibuok pamilya. Nianang gabhiona, 52 ang mitambong. Si Michael ug Hansly mipadayon sa pagsangyaw ug sa pagtuon ug Bibliya niadtong nanambong.
[Footnote]
a Si Elin namatay samtang giandam kini nga basahon.
[Chart sa panid 40-47]
TAHO SA 2010 NGA TUIG SA PAG-ALAGAD SA MGA SAKSI NI JEHOVA SA TIBUOK KALIBOTAN
(Tan-awa ang publikasyon)
[Mapa sa panid 48-50]
(Tan-awa ang publikasyon)