Makaiikag nga Report sa Miaging Tuig

BISAN pa sa makapaguol nga kahimtang sa kalibotan, ang mga Saksi ni Jehova nagpahimulos ug laing mabungahong tuig sa ilang sagradong pag-alagad. Tungod sa panalangin sa Diyos, ang kamatuoran sa maayong balita “nagapamunga ug nagalambo sa tibuok kalibotan.” (Col. 1:5, 6) Segurado kami nga ang taho niining tuiga makapadasig ug makapalig-on sa inyong pagtuo.

 BAG-ONG KAHIKAYAN SA PAG-OKSILYARE PAYUNIR

Ang mga igsoon nalipay kaayo sa dihang ang mag-oksilyare payunir sa bulan sa Abril makapili sa 30 o 50 nga kinahanglanong oras. Kana nga kahikayan gipahimuslan sa daghang igsoon nga sagad dili makaoksilyare payunir. Libolibong magmamantala ang nakaoksilyare payunir sa unang higayon, ug ang mga payunir kanhi nakapayunir pag-usab. Dugang pa, ang daghan nga wala makaoksilyare payunir migugol ug mas daghang oras sa pagsangyaw. Unsay resulta?

Kadaghanan sa mga sangang buhatan mitahog mga pag-uswag nga labaw kaayo kay sa nangaging kinatas-ang mga ihap. Sa tibuok kalibotan, 2,657,377 ka magmamantala ang nag-oksilyare payunir—mga lima ka pilo kay sa kinatas-ang ihap sa miaging tuig! Otsenta porsiyento sa pamilyang Bethel sa tibuok kalibotan—16,292 sa 20,290 ka Bethelite—ang nakig-ambit niini nga pribilehiyo sa pag-alagad. Makalipay gayod ang pagkahibalo nga ang mga alagad ni Jehova dakog nahimo diha sa pagsangyaw niadtong Abril kay sa bisan unsang bulan sa tibuok kasaysayan.

Sa kapig usa ka tuig lamang human sa kusog kaayong linog nga nakapatayg mga 300,000 ka tawo, ang Haiti may bag-ong kinatas-ang mga ihap sa taho sa pagsangyaw sa Abril. Sa 17,009 ka magmamantala didto, 6,185 ang nag-oksilyare payunir. Ang espesyal nga  kampanya sa pagpanagtag sa brosyur nga Sa Dihang ang Imong Minahal Mamatay, nga bag-ong giluwatan sa Haitian Creole, nagtaganag gikinahanglan kaayo nga paghupay ug paglaom sa nagbangotang mga tawo.

Ang mga igsoon sa Nigeria nakaatubang ug lahi nga problema sa bulan sa Abril. Sa upat ka adlaw nga gigahin para sa eleksiyon (nga tulo niana maoy Sabado), gidid-an sa gobyerno ang mga tawo sa paglakawlakaw gikan sa 7:00 s.b. hangtod sa 5:00 s.h. gawas kon ang tuyo may kalabotan sa eleksiyon. Apan ang kadasig sa pagpayunir wala maawop. “Kami nagasulat kaninyo uban ang dakong kalipay ug apresasyon sa talagsaong kahigayonan nga among natagamtam niining bulana,” misulat ang usa ka kongregasyon. Sa laing kongregasyon, 92 sa 127 ka bawtismadong magmamantala ang nag-oksilyare payunir, lakip ang tanang ansiyano ug ministeryal nga alagad. Sa Bethel, 555 sa 688 ka membro ang nag-oksilyare payunir.

 Ilang Nasagubang ang Problema. Si Jeannette, nga nagpuyo sa kabukiran sa Burundi, kanunayng nangandoy  nga makapayunir, apan tungod sa sakit sa kasingkasing, siya dili makalakawg layo o makatungas. Siya nalipay sa pagkadungog nga gipaubsan ang kinahanglanong oras sa oksilyare payunir sa Abril. Aron matuman ang iyang pangandoy, gihikay sa mga ansiyano nga siya mosangyaw sa teritoryo duol sa iyang balay. Dugang pa, ang mga payunir ug magmamantala nagdala sa ilang mga gitun-an sa Bibliya ngadto sa iyang balay aron didto sila magtuon. Pagkatapos sa bulan, si Jeannette nalipay nga nakasugod ug upat ka pagtuon sa Bibliya. “Gusto kong makapayunir pag-usab,” siya miingon, “ug ako masaligon nga si Jehova motabang kanako.”

Sa isla sa Grenada, usa ka batan-ong sister nga amang nagpayunir bisag siya may depekto sa tiil nga nakapalisod sa iyang paglakaw. “Lisod gayod ang paglakaw ug lagyong distansiya aron makasakayg bus paingon sa teritoryo,” siya miingon. Dugang pa, siya walay trabaho, ug tim-os nga miampo alang sa tabang ni Jehova. Nahiuyon sa iyang pag-ampo, iyang gisuportahan ang iyang kaugalingon pinaagig pagbaligyag mga ginansilyo ug gama-sa-kamot nga mga burluloy. “Bug-os kong nakasuportar sa pagsangyaw,” miingon siya sa ulahi, “ug gibati ko ang pagpaluyo ug pagdasig sa mga igsoon. Kana nakapalipay gayod kanako!”

Si Toshi, usa ka 101 anyos nga sister sa Japan, ikag nga miaplay ingong oksilyare payunir sa Abril. Kay dili makagawas sa pasilidad nga iyang gipuy-an, siya nagsangyaw pinaagig mga sulat ingon man ngadto sa mga caregiver nga mosulod sa iyang kuwarto. “Kay bungolbungol na man ko,” miingon si Toshi, “ang akong pagsulti kusog kaayo. Ingong resulta, ang mga tawo sa duol makadungog usab.”

Si Felix, usa ka paralitiko sa Costa Rica, midesidir sa pag-oksilyare payunir. Apan, unsaon niya kana paghimo? Atubangan sa ilang balay, gibutang ang usa ka  lamesa nga may literatura aron makasangyaw siya sa mga lumalabay. Pagkatapos sa bulan, si Felix gikapoy sa pisikal apan nalig-on sa espirituwal ug nalipay nga nakasugod ug upat ka pagtuon sa Bibliya.

Daghang batan-ong magmamantala ang naikag usab sa pag-apil sa espesyal nga kalihokan sa Abril. Pananglitan, sa Espanya, ang 11 anyos nga si Sandra ug iyang 7 anyos nga igsoong si Alejandro gustong makagugol ug dugang oras sa pagsangyaw. Kay nadasig sa masibotong espiritu sa kongregasyon ug sa ilang ginikanan, si Sandra ug Alejandro nangandoy nga mag-oksilyare payunir. Apan unsaon nila paghimo kana nga dili pa man sila bawtismado? Silang duha nag-eskedyul nga mogugol ug oras nga sama sa ilang ginikanan diha sa pagsangyaw ug unya nagpraktis ug mga presentasyon panahon sa ilang Pamilyahanong Pagsimba. Abi sa ginikanan nga ang ilang mga anak kapoyon sa dili pa matapos ang bulan. Apan wala momenor ang kadasig sa duha ka batan-ong magmamantala. Pagka-Abril 30, ang tanan sa pamilya nakakab-ot sa ilang tumong nga 30 oras gawas kang Alejandro nga kulang pag tulo. Busa sa kataposang adlaw, siya miuban ug sangyaw sa iyang amahan aron makab-ot ang iyang tumong. Nalipay kaayo sila nga napuliki ug nagmatagbawon sa pag-alagad ingong nahiusang pamilya!

 “Nag-ampo ko kada adlaw,” matod ni Jean, “nga ako ug ang akong bana, si Philip, makasangyawg 30 ka oras.” Apan si Philip, nga magtatan-aw sa distrito kaniadto hangtod nasakit ug cerebral aneurysm, nagpondo na lang sa usa ka ospital sa Espanya, nga di na makalihok ni makasulti. Mga mata na lang niya ang iyang paagi sa komunikasyon, nga mopilok ug kas-a alang sa oo ug kaduha alang sa dili.

“Sa gisultihan ko siya bahin sa pag-oksilyare payunir,” matod ni Jean, “gusto niyang mag-oksilyare payunir.” Apan unsaon niya pagkab-ot sa iyang tumong?

Sa nangaging mga bulan, si Jean ug Philip nakasangyaw sa mga pasyente, nanuaw nga mga paryente, ug mga kawani sa ospital. “Giplano namo nga sa Abril kami mosangyawg mga usa ka oras kada adlaw diha sa among ward samtang nagmata si Philip aron makaapil siya sa panaghisgot pinaagig pagpamilok.”

Apan pagka-Marso, si Philip gibalhin sa usa ka isolation ward. Bisan pa niana, nasunod gihapon nila ang ilang eskedyul, nga nakigsultig pipila ka minutos sa mga trabahante sa ospital sa lainlaing higayon sa tibuok adlaw. Usa sa mga nars nga midawat sa librong Unsay Tinuod nga Gitudlo  sa Bibliya? mitan-aw sa mata ni Philip ug misaad nga mobalik pagkaugma aron mobasag mga teksto. Pagbalik sa nars, siya gipabasa ni Jean sa Juan 17:3 ug gipasaysay kon unsay iyang nasabtan. Sa nagpadayon sila sa paghisgot, ipaila ni Philip pinaagig pagpamilok kon husto ba ang tubag sa nars. Bisan sa dihang ang nars wala maasayn sa ward ni Philip, siya misulod gihapon didto sa pagsulti kang Philip nga siya nag-ampo kang Jehova nga tabangan siya nga masuod Kaniya.

Ang mga alagad ni Jehova nag-isip niining espesyal nga kalihokan ingong usa ka paagi sa pagpakitag gugma sa silingan, apresasyon sa halad ni Jesu-Kristo, ug debosyon ngadto sa ilang langitnong Amahan. Sila mahinamong nagpaabot sa Marso 2012, sa dihang makapili na usab sila sa 30 o 50 nga kinahanglanong oras sa maong bulan.

 MGA TUNGHAAN NGA NAGTUDLO SA MGA DALAN NI JEHOVA

Gitun-an pag-ayo sa organisasyon ni Jehova ang tagna sa Isaias 2:3: “Manungas kita ngadto sa bukid ni Jehova, ngadto sa balay sa Diyos ni Jacob; ug siya magatudlo kanato bahin sa iyang mga dalan.” Pananglitan, samtang nagsilaob ang Gubat sa Kalibotan II, ang matinumanon ug maalamong ulipon nakaamgo nga ang mga tawo sa tanang kanasoran kinahanglan pang tudloan ni Jehova una matapos ang sistema sa mga butang ni Satanas. Busa, gihimo ang mga kahikayan sa pag-organisar ug mga tunghaan sama sa Watchtower Bible School of Gilead ug Teokratikanhong Tunghaan sa Ministeryo. Di pa dugay, ang Nagamandong Lawas naghimog dugang kausaban sa mga tunghaan nga nagtaganag linaing pagbansay.

Sa Oktubre 2010, ang Ministerial Training School gitawag nag Bible School for Single Brothers. Ang tagsaanong mga brader nga ansiyano o ministeryal nga alagad padayong makaaplay sa maong tunghaan nga molungtad ug duha ka bulan. Sa pagkakaron, 37,445 na ang nakabenepisyo niana sa tibuok kalibotan, nga daghan kanila nag-alagad ingong payunir, nagapanawng magtatan-aw, misyonaryo, ug Bethelite.

Ang bag-ong tunghaan nga Bible School for Christian Couples nga molungtad ug duha ka bulan nagsugod sa Hulyo 2011 ug unang gipahigayon sa Patterson, New York. Ang mga magtiayon makaaplay kon sila  makasultig Iningles, nag-edad ug 25 ngadto sa 50, maayog panglawas, minyo sa labing menos duha ka tuig, regular payunir sa labing menos duha ka tuig nga walay hunong, ug kon ang bana ansiyano o ministeryal nga alagad sulod na sa duha ka tuig. Sugod sa 2012, ang mga klase sa Bible School for Christian Couples ipahigayon diha sa mga dapit nga gigamit karon sa Bible School for Single Brothers.

Ang Bible School for Christian Couples gidisenyo sa paghatag ug linaing pagbansay sa mga magtiayon  aron sila magamit nga mas bug-os pa ni Jehova ug sa iyang organisasyon. Ang kadaghanan sa mograduwar mag-alagad ingong mga regular payunir kon diin mas dako ang panginahanglan diha sa ilang kaugalingong nasod. Hinuon, ang ubay-ubay iasayn ingong temporaryong mga espesyal payunir ug ang pipila bansayon pa gani ingong magtatan-aw sa sirkito. Ang pipila tingali iasayn sa laing nasod kon sila kuwalipikado ug andam modawat niana.

Kadtong moaplay niini nga tunghaan angayng hamtong sa espirituwal ug masakripisyohon. Ang mga instruktor sa Bible School for Single Brothers mao gihapon ang mga instruktor niining bag-ong tunghaan, nga halos parehas rag kurikulum. Dunay mga subject nga para lang sa mga brader, ug sa maong panahon ang mga asawa mosangyaw. Alang sa interesadong moaplay, ang dugang impormasyon ug mga kinahanglanon itagana diha sa mga miting nga himoon panahon sa distritong mga kombensiyon.

Ang Nagamandong Lawas naghimog kausaban sa Watchtower Bible School of Gilead. Sugod sa ika-132 nga klase, nga nagsugod sa Oktubre 24, 2011, ang makatungha mao lamang ang mga magtiayon nga anaa sa linaing bug-os panahong pag-alagad, sama sa mga misyonaryong wala pa makatungha sa Gilead, espesyal payunir, nagapanawng magtatan-aw, ug Bethelite. Kon ang magtiayon larino sa Iningles, ikarekomendar sila sa Komite sa Sanga sa ilang nasod.

Ang mga graduwado sa Gilead iasayn ingong mga misyonaryo, nagapanawng magtatan-aw, o Bethelite aron mahimong mas organisado ug mouswag ang kalihokan sa kanataran ug sa sangang buhatan. Kadtong maasayn sa kanataran ipadala sa mga lugar nga dakog populasyon diin sila mas dakog malampos diha sa  buluhatong pagsangyaw ug sa kalihokan sa kongregasyon. Ang mga Komite sa Sanga makahangyo gihapon nga padad-ag mga graduwado sa Gilead kon dunay linaing panginahanglan sa ilang teritoryo. Sila usab makarekomendar ug kuwalipikadong mga igsoon nga anaa sa linaing bug-os panahong pag-alagad gikan sa ilang teritoryo aron motungha sa Gilead. Sa pipila ka kahimtang, ang mga Komite sa Sanga makahangyo nga pabalikon sa ilang nasod ang mga mograduwar.

Ang School for Branch Committee Members and Their Wives himoon sa pinulongang Iningles kaduha sa usa ka tuig sa Patterson. Sa pipila ka kahimtang, ang mga membro sa Komite sa Nasod dapiton usab. Ang mga membro sa Komite sa Sanga nga nakatungha na sa nangagi dapiton nga motungha sa ikaduhang higayon ug ilang makauban ang mga brader nga motungha sa unang higayon. Ang mga asawa sa mga membro sa Komite sa Sanga motambong sa halos tanang klase uban sa ilang mga bana. Hinuon, ang pipila ka subject bahin  sa organisasyonal nga pamaagi hisgotan uban lamang sa mga brader, ug sa maong panahon ang mga asawa magtrabaho sa lainlaing asaynment sa Bethel.

Dugang pa, duha ka klase sa School for Traveling Overseers and Their Wives himoon sa Patterson kada tuig. Ang mga klase nga gipahigayon karon sa United States naglakip ug mga brader nga nakatungha na kaniadto, nga naglangkob sa halos katunga sa mga estudyante sa matag klase. Ang mga asawa sa mga nagapanawng magtatan-aw patambongon sa kadaghanang sesyon sa klase.

Dili ba ang katawhan sa Diyos malipay sa pagpahimulos sa edukasyon nga gitagana ni Jehova? Si Jesus mismo miingon: “Kini nahisulat diha sa mga Manalagna, ‘Ug silang tanan mahimong mga tinudloan ni Jehova.’” (Juan 6:45; Isa. 54:13) Kami masaligon nga tungod niining mga kausaban, mas mopaspas pa ang pagsangyaw sa maayong balita sa tibuok gipuy-ang yuta sa dili pa moabot ang kataposan.

 KUSOG KAAYONG LINOG SA JAPAN

Ang mga balita sa tibuok kalibotan nagtahog sunodsunod nga mga kalamidad sama sa linog, tsunami, buhawi, bagyo, baha, sunog, ug pagbuto sa bolkan. Bisag dili nato mahisgotan dinhi ang tanang kalamidad nga nahitabo di pa dugay, ang kalig-on sa mga Saksi ni Jehova sa pagsagubang niana maayong pagkapasundayag sa atong mga igsoon sa Japan.

Sa Biyernes, Marso 11, 2011, sa 2:46 s.h., ang Japan gitay-og sa linog nga may gikusgong 9.0. Miresulta kanag tsunami nga mipayhag sa daghang lungsod ug mga baryo duol sa kabaybayonan sa Pasipiko. Mga 20,000 ka tawo ang kompirmadong namatay o kaha wala gayod hikaplagi. Sa apektadong mga lugar, upat ka Kingdom Hall ang nalumpag ug ang laing upat dili na magamit. Mga 235 ka balay sa mga igsoon ang gibanlas o grabeng naguba, ug kapig usa ka libo ang kinahanglang ayohon.

Tungod sa linog ug tsunami, grabeng nadaot ang usa ka nukleyar nga planta mao nga mihungaw ang radyasyon. Gipabakwet sa gobyerno ang mga molupyo sa palibot sa planta, ug sa usa lang ka gabii, daghang lugar ang naawaaw. Ang mga igsoon niining mga lugara napugos usab sa pagbiya, ug duha ka kongregasyon ang “nahanaw.”

Sa kapig 14,000 ka Saksi ni Jehova sa mga dapit nga grabeng naapektohan, 12 ang namatay, 5 ang naangol, ug 2 ang wala pa hikit-i. Ang daghan nga nakalingkawas niining makalilisang nga kalamidad nawad-ag mga balay, kabtangan, ug mga minahal.

 “Nakahimo pa ko pagpasakay sa akong inahan nga baldado diha sa kotse, ug misugod pagdrayb paingon sa usa ka dangpanan,” matod ni Kiyoko nga taga-Ofunato. “Dayon nanimahong aso. Migawas ko sa kotse ug nakita nako nga ang bul-og sa tubig mitabon sa among balay. Unya ang tubig mipaingon kanamo! Gitabangan nako ang akong inahan sa pagkatkat ngadto sa habog nga riles sa tren. Nakita gayod namo ang pagkaanod sa among kotse.”

Human sa linog, usa ka batan-ong brader nga si Koichi misulay pag-adto sa balay sa iyang ginikanan, nga lima ka kilometros lang gikan sa dagat, didto sa Ishinomaki. Apan sa nagkaduol na siya, iyang nakita nga punog tubig ang lugar. “Kay walay sakayan, wala ko makaabot didto.” Tulo ka semana human sa linog, sa morge na niya nakita ang iyang amahan, ug paglabay sa laing tulo ka semana, ang iyang inahan.

Human gayod sa linog, si Masaaki nga taga-Shichigahama midesidir nga iparking ang iyang kotse didto sa Kingdom Hall, nga usa ka kilometro gikan sa dagat.  Si Masaaki nahinumdom: “Nakakita kog sister nga mibakwet usab didto. Abi nakog di na makaabot didto ang tsunami. Apan wala madugay, nakaabot na didto ang itom nga tubig! Misugod paglutaw ang among mga kotse. Akong gibuksan ang bentana, migawas, ug mitungtong sa atop sa kotse, apan ang kotse sa sister gibanlas ug wala na nako makita! Miampo ko kang Jehova nga tabangan siya.

“Nag-ulan ug niyebe niadtong panahona, ug pwerte nakong basaa ug nangurog. Mituang ang ulan, apan ang hangin grabe ka tugnaw. Pagkataudtaod mitikyop na ang kagabhion. Midan-ag ang matahom nga mga bituon. Mibarog ko sa atop sa akong kotse, nga samag isla diha sa bugnaw kaayong tubig. May uban pa sama nako nga natanggong diha sa nagtipun-og nga mga gun-ob o sa atop sa mga bilding. Nabalaka ko nga basig di na ko mabuntagan. Aron malingaw ko, akong gipahayag gikan sa memorya ang pakigpulong nga akong gihatag sa miaging duha ka semana. Haom ang maong ulohan: ‘Kinsay Makatabang Kanimo Panahon sa Kasakitan?’ Human niana, gikanta ko ang bugtong awit nga akong nasag-ulo: ‘Akong Amahan, Akong Diyos ug Higala.’ Gibalikbalik nako kanag kanta. Samtang nagkanta, akong gihinumdoman ang akong kinabuhi ingong alagad ni Jehova, ug mitulo ang akong luha.

“Dayon dihay misinggit gikan sa balay tabok sa karsada, ‘Okey ra ka? Anhaon ti ka!’” Ang tawong misinggit nakagamag balsa gamit ang nanglutawng mga kahoy ug nagluwas sa mga tawo sa palibot. Sa tabang niya, si Masaaki nakasulod sa usa ka balay agi sa bentana sa ikaduhang andana. Sa ulahi, nahupayan siya sa pagkahibalo nga ang sister sa naanod nga kotse naluwas ra.

Si Kohei ug Yuko naghinamhinam sa ilang kasal nga himoon sa Kingdom Hall sa Rikuzentakata pagka-Sabado, Marso 12. Human sila magparehistro sa ilang kasal  sa city hall sa Biyernes, mihapak ang linog. Nadungog ni Kohei ang pasidaan sa awtoridad bahin sa tsunami ug midali siya pag-adto sa habog nga lugar. “Dili na klaro ang siyudad sa akong tan-aw,” siya nahinumdom. “Pipila na lang ka dagkong bilding ang makita. Hangtod niadtong tungora, nabalaka pa ko bahin sa among mga kalihokan pagkagabii, apan nakaamgo ko nga grabe gyod diay ang nahitabo.”

Gigugol ni Kohei ug Yuko ang adlawng Sabado sa pagtabang sa mga igsoon sa kongregasyon. “Nakadawat mig hinabang gikan sa silingang mga kongregasyon,” matod ni Kohei. “Nalipay ko sa dihang miingon ang akong asawa nga siya nalipay kaayo nga nakagugol mi sa among panahon ug kusog alang sa mga igsoon. Nagpasalamat ko kang Jehova sa paghatag kanakog buotang asawa. Gibanlas sa tsunami ang among bag-ong balay, sakyanan, ug tanang kabtangan. Apan mapasalamaton kaayo ko kang Jehova sa inigsoong gugma nga gipakita kanamo.”

Pisikal, Espirituwal, ug Emosyonal nga Tabang. Ang sangang buhatan sa Japan nag-organisar dayon ug tulo ka Disaster Relief Committee ug balikbalik nga nagpadalag mga hawas ngadto sa apektadong mga lugar. Sa dihang ang mga magtatan-aw sa sona nga si Geoffrey Jackson ug Izak Marais gikan sa hedkuwarter miduaw sa Japan niadtong Mayo, giduaw usab nila ang mga igsoon sa usa ka lugar nga grabeng napayhag. Usa ka espesyal nga tigom ang gipahigayon alang sa apektadong mga kongregasyon, mao nga pinaagig telephone hookup, mga 2,800 ka igsoon sa 21 ka Kingdom Hall ang napalig-on sa gugma ug kahangawa sa mga igsoon sa tibuok kalibotan.

Ang mga Disaster Relief Committee ug ang mga boluntaryo napuliki sa pagtaganag mga hinabang. Ang pangunang panginahanglan maoy pagkaon, tubig, ug gas. Gihikay usab sa mga komite nga magpadalag mga besti nga lainlaig gidak-on ngadto sa apektadong mga  kongregasyon. Ang mga tigomanan napunog hinanger nga mga besti ug gibutangag mga salamin.

Mapasalamaton gayod ang apektadong mga igsoon nga si Jehova nagtagana sa ilang pisikal ug emosyonal nga panginahanglan! Napalig-on sila ilabina sa Kristohanong mga tigom. “Ang mga tigom nakahatag kanakog kalinaw sa hunahuna,” misulat ang usa ka sister. “Para nako, kini samag espirituwal nga salbabida.”

Mensahe sa Paglaom. Ang mga igsoong Hapon alisto sa pagpaambit sa kahupayan gikan sa Pulong sa Diyos ngadto sa desperadong mga tawo. Usa ka grupo sa mga magmamantala sa usa ka siyudad nga wala maigo sa kalamidad ang misangyaw sa kadalanan nga nagdalag dakong karatula, “Nganong Dunay Kalamidad? Ang tubag anaa sa Bibliya.” Daghan ang nainteres, ug ang mga igsoon nakapahimutag 177 ka librong Gitudlo sa Bibliya sa usa lang ka adlaw ug tunga.

Sa apektadong mga lugar, unang giduaw sa mga Saksi ang mga gitun-an sa Bibliya ug mga balikduaw ug dayon ang mga silingan aron hupayon sila. “Sa dihang gibasa nako ang Mateo 6:34 ngadto sa usa ka tagbalay,” matod ni Akiko, “siya mihilak. Daghan diay siyag gikabalak-an. Sa dihang akong gisaysay kaniya kon sa unsang paagi ang Bibliya makatabang kanato sa pagbatog kalinaw sa hunahuna, siya miuyon ug nagpasalamat. Kini nakadugang sa akong pagpabili sa gahom sa Kasulatan sa pagtandog sa kasingkasing sa mga tawo.”

“Dunay daghang relihiyon,” miingon ang usa ka tawo, “apan kamo lamang ang miduaw kanamo bisan niining dili normal nga panahon.” Ang laing tawo matinahorong miingon, “Katingalahan gayod nga kamo nagsangyaw gihapon bisag panahon sa krisis.” Ang usa ka ansiyano mikomento: “Daghan ang nalipay nga kami miduaw. Sila miingon, ‘Kamo ang unang miduaw kanamo sukad nahitabo ang kalamidad. Balik baya mo ha!’”

 BAG-ONG KALIBOTANG HUBAD DIHA SA 106 KA PINULONGAN!

Ang Hulyo 15, 2011, Biyernes, maoy halandomong adlaw sa Latvia ug Lithuania ug usa ka talagsaong bahin sa kasaysayan sa mga Saksi ni Jehova didto. Sa usa ka pakigpulong nga nadungog sa duha ka nasod pinaagig hook-up, giluwatan ni Stephen Lett, membro sa Nagamandong Lawas, ang Bag-ong Kalibotang Hubad sa Kristohanon Gregong Kasulatan diha sa Latvian ug Lithuanian, nga maoy ika-99 ug ika-100 nga pinulongan diin kana nahubad. Sa milabayng pito ka tuig, gihatagag dakong pagtagad sa Nagamandong Lawas ang paghubad sa Bibliya. Ingong resulta, ang gidaghanon sa pinulongan nga napatik ang Bag-ong Kalibotang Hubad nadoble kon itandi sa 2004, ug ang mga maghuhubad sa tibuok kalibotan padayong nagkugi sa paghubad sa Bibliya ngadto sa uban pang pinulongan.

Sama sa imong mahanduraw, ikag kaayong gidawat sa mga igsoon ang Bibliya diha sa ilang pinulongan. Usa ka brader sa Central African Republic miingon: “Maayo nga duna kay Bibliya, apan mas labing maayo nga imong masabtan kana sa imong kaugalingong pinulongan. Ang  Bag-ong Kalibotang Hubad sa pinulongang Sango motuhop gayod sa kasingkasing. Pagbasa nako sa mga Ebanghelyo, mahanduraw na nako ang mga karakter sa Bibliya ug kon unsay ilang gibati.” Usa ka batan-ong sister nga taga-Ethiopia mipahayag sa gibati sa kadaghanan sa dihang siya miingon: “Ang pulong ‘salamat’ dili paigo sa pagpahayag sa akong apresasyon. Nagsige kog ampo kang Jehova nga makabaton mig Bag-ong Kalibotang Hubad sa among pinulongan. Karon, iyang gitubag kana!”

 MGA BALITA GIKAN SA LAINLAING NASOD

Usa ka Daogdaogan sa Russia Nahilom. Usa ka edarang sister, si Vera, naproblema sa daghang katuigan tungod sa usa ka silingan nga wala makaangay sa mga Saksi ni Jehova. Gihulga siya sa maong tawo ug gibiaybiay atubangan sa iyang mga apo, nga tigduawan kaniya. Kay gihinumdoman pirme ang Roma 12:18, si Vera nagpabiling kalmado ug wala makiglalis kaniya. Sa Enero 2011, ang silingan misamot ka agresibo. Kay nahadlok nga patyon, si Vera mireport sa usa ka polis, nga nakaadto na diay sa iyang balay sa Marso 2010 uban sa usa ka opisyal sa lungsod. Ang ilang tuyo kaniadto mao ang pagsusi kon siya ug ang ubang Saksi nga nagtigom sa iyang balay nalangkit ba sa ekstremistang kalihokan. Apan niining higayona, nasayran sa polis kon unsay problema. Gibadlong sa polis ang silingan ug gipamultag 3,000 rubles (mga $100 U.S.) tungod sa pagpanghulga. Human niana, si Vera wala na samoka sa iyang silingan. Gisulatan niya ang departamento sa kapolisan aron magpasalamat. Natingala siya nga nakadawat siyag balos gikan sa hepe. Ang hepe nagpasalamat sa maayo niyang gipamulong bahin sa polis nga mitabang kaniya. Siya miingon usab: “Ang imong nindot nga komento, sa panahong ang mga tawo ngil-ad ug sinultihan bahin sa mga polis, nagpakita nga ikaw may pagsalig kanamo.” Si Vera miingon nga ang polis tigduaw na kaniya sa pagsusi kon maayo ba ang iyang kahimtang.

 Ang “Basurero” sa Turkey. Duha ka tawo nga bag-o pang nagtuon sa Bibliya mitambong sa distritong kombensiyon. Sila misulat: “Kami samag nagdamgo. Ang tanan mapahiyomon, mahigalaon, ug matinahoron. Human sa sesyon sa buntag, naglakawlakaw mi ug wala mi mobati nga estranghero. Unya miduol ang brader nga nakasugod namog pagtuon sa Bibliya. Nagbitbit siya ug sudlanag basura. Gusto namong likayan siya kay abi namog basurero siya, ug di mi gustong mailhang higala sa timawa nga basurero. Busa mipalayo mi ug misagol sa mga tawo. Sa among hunahuna, ‘Nganong ang nagtuon namo sa Bibliya usa ra ka basurero, ug dili usa ka ispiker sa plataporma?’

“Apan sa nagpadayon ang among pagtuon, among nasayran nga ang ‘basurero’ nga nagdumala namog pagtuon sa Bibliya membro diay sa Komite sa Sanga ug nag-alagad sa sangang buhatan sa mga Saksi ni Jehova. Kami padayong miuswag ug nagpahinungod sa among kinabuhi kang Jehova, nga nakasabot nga ang maong igsoon mapaubsanong migawi ingong ‘mas ubos.’ (Luc. 9:48) Gipabilhan gayod namo ang hinungdanong leksiyon nga among nakat-onan sa unang dakong tigom nga among natambongan!”

Gidaot ang mga Saksi sa Armenia. Ang kaylap nga pagpangdaot batok sa mga Saksi ni Jehova nagsugod diha sa media human ibalita nga ang batan-ong lalaki nga nagpatay sa iyang ginikanan sa siyudad sa Sevan usa kono ka Saksi ni Jehova. Ang media gipadad-an dayog deklarasyon nga nagpanghimakak niana. Apan, nagpadayon ang pagdaot, ug gisibya sa telebisyon ang usa ka espesyal report nga nag-insistir nga ang batan-on maoy Saksi ni Jehova. Ang gigamit nga mga pulong sa paghisgot sa mga Saksi mangil-ad ug matamayon, ug dihay kapsiyon sa maong programa nga nagkanayon  “Ang Mangtas ug Tuotuohong mga Berdugo ni Jehova.” Giawhag pa gani niini ang mga tawo sa paggamit ug puwersa inigduaw sa mga Saksi. Ingong resulta, midaghan ang nasuko sa mga Saksi ni Jehova sa maong nasod. Ang estasyon sa TV gipaylan ug reklamo aron bakwion ang sayop nga impormasyon, mangayog pasaylo, ug mobayad ug danyos tungod sa pagdaot sa atong maayong ngalan ug reputasyon. Sa dihang giimprenta kining 2012 Tinuig nga Basahon, ang estasyon sa TV wala pa mobakwi sa ilang pangdaot, apan nagpadayon na ang negosasyon aron masulbad kini sa malinawong paagi.

Umaabot nga mga Inhenyero sa Venezuela. Usa ka grupo sa mga batang kinder molabay kada buntag sa ginatukod nga Kingdom Hall sa lungsod sa San José de Guaribe. Pirme silang mohunong ug motan-aw kadiyot, nga nalingaw sa ginahimo didto. Usa ka adlaw panahon sa klase, nangutana ang maestra kon unsang propesyon ang ilang gusto inigdako nila. Nakurat siya sa dihang daghan ang mitubag nga gusto nilang “mag-inhenyero sama sa mga Saksi ni Jehova”! Kay nahibulong, gidala niya ug sa laing maestra ang tibuok klase ngadto sa dapit sa konstruksiyon. Pag-abot nila, gilibot sila sa mga igsoon didto. Pwerteng lipaya sa mga bata, ilabina kay gipasul-ob silag mga hard hat nga lainlaig kolor. Ang mga maestra daghag pangutana, ug maayong pamatuod ang nahatag.

 Mas Daghang Magasin Giimprenta sa Canada. Aron magamit sa maalamong paagi ang mga kahinguhaan sa organisasyon, gihikay sa Nagamandong Lawas nga ang sangang buhatan sa Canada maoy magsuplay sa Bantayanang Torre ug Pagmata! sa tanang kongregasyon sa Bermuda, Guyana, Canada, United States, ug sa kadaghanang isla sa Caribbean. Busa, sugod sa 2011 nga tuig sa pag-alagad, ang sangang buhatan sa Canada nag-imprentag 12 ka pilo nga mas daghang magasin, diha sa 30 ka pinulongan, nga halos 25 porsiyento sa tanang magasin nga giimprenta sa tibuok kalibotan.

Ang Bethel sa Finland Gibuksan sa Publiko. Uban sa pagtugot sa Nagamandong Lawas, giorganisar ang usa ka espesyal nga kampanya nga nagpokus sa mga Saksi ni Jehova ug sa mensahe nga ilang gisangyaw sa Finland sulod na sa usa ka siglo. Ang mga igsoon masibotong nanagtag sa Agosto 2010 nga Pagmata! nga ang ulohan sa hapin maoy “Mga Saksi ni Jehova—Kinsa Sila?” Kini miresulta sa daghang maayong panaghisgot bahin sa atong buluhaton. Dayon, sa kataposan sa Agosto, ang sangang buhatan sa Finland gibuksan sa publiko. Ang tibuok pamilyang Bethel nakigbahin sa pagpatin-aw sa buluhaton nga gihimo didto. Dihay mga displey nga naghatag ug kasayoran sa mga bisita bahin sa atong buluhaton. Ang ubang Bethelite nagsul-ob ug karaang mga besti ug ilang gipakita kon giunsa paggamit ang mga plakard sa dekada sa 1940 ug 1950 nga nagpahibalo sa mga pakigpulong publiko. Ubay-ubayng departamento ang nag-andam ug mga sobenir alang sa mga bisita. Mga 1,500 ang miduaw sa Bethel. Ingong resulta, ang mga mantalaan, radyo, ug TV maayog report bahin sa atong buluhaton.

Kagubot sa Côte d’Ivoire. Sa pagsugod sa 2011 nga tuig sa pag-alagad, gidahom ang dugang pag-uswag tungod sa  23,019 ka pagtuon sa Bibliya nga gidumala sa 8,656 ka magmamantala. Apan, sa hinapos sa Nobyembre 2010, ang nasod nagkagubot tungod sa kontrobersiyal nga resulta sa eleksiyon. Pagka-Marso ang giyera nakaabot sa Abidjan nga sentro sa negosyo ug kini mihangtod sa Abril 2011, busa daghang sibilyan ang nanghawa sa siyudad ug sa nasod. Lakip sa nangalagiw ang daghan natong igsoon, nga nagbiya sa ilang mga balay ug kabtangan.

Sa maong malisod nga yugto, ang neyutral nga baroganan sa atong mga igsoon sagad nanalipod kanila. Usa ka higayon, ang mga sundalo misulod sa eskuylahan sa elementarya diin may seminar ang mga magtutudlo ug mga magtatambag. Ang tanan gimandoan sa paghapa ug paghatag sa ilang mga butang. Sa dihang gitunol sa brader ang iyang bag nga punog publikasyon, nailhan dayon sa mga sundalo nga siya Saksi ni Jehova. Ilang gibalik ang iyang bag, kuwarta, ug cell phone, ug miingon: “Dili ka hulga namo.”

 PAGPAHINUNGOD SA MGA SANGANG BUHATAN NAGHIMAYA SA DIYOS

Sa Disyembre 18, 2006, gisugdan ang konstruksiyon aron padak-an ang sangang buhatan sa Chile, nga naglakip sa bag-ong dos-andanas nga opisina, tres-andanas nga puy-anan, ug mas dakong bodega. Pagka-Oktubre 16, 2010, dihay 5,501 nga mitambong sa programa sa pagpahinungod, ug si David Splane nga membro sa Nagamandong Lawas ang mihatag sa diskurso diha sa Kinatsila.

Niadtong Pebrero 19, 2011, dihay 210 nga mitambong sa pagpahinungod sa gipadak-ang opisina sa Burkina Faso. Ang diskurso gipahayag ni John Kikot, gikan sa tibuok-kalibotang hedkuwarter. Ang buluhatong pagsangyaw didto gidumala sa sangang buhatan sa Côte d’Ivoire hangtod sa Mayo 2011 sa dihang ang Burkina  Faso nailalom sa pagdumala sa sangang buhatan sa Benin. Ang maayong panggawi panahon sa konstruksiyon nakadayeg pag-ayo sa ngalan ni Jehova. “Walay sininggitay,” matod sa usa ka empleyado sa dakong kompaniya sa materyales. “Wala pa gyod mi sukad makasuplayg proyekto sa konstruksiyon nga may mga trabahanteng sama nila ka kalmado ug malipayon.”

Dihay dakong pagmaya sa dihang ang bag-ong pasilidad sa sangang buhatan sa Hong Kong gipahinungod niadtong Agosto 27, 2011. Ang bag-ong mga opisina anaa sa ika-19 nga andana sa 37-ka-andanang bilding nga nag-umbaw sa Victoria Harbor. (Tan-awa ang arrow sa ubos.) Si Stephen Lett, membro sa Nagamandong Lawas, maoy naghatag sa pakigpulong sa pahinungod ngadto sa 290 ka maikagong mamiminaw nga nanglingkod sa komedor, mga opisina, ug sa shipping area. Ang hamugaway nga mga opisina maoy para sa mga departamento sa Translation, Service, Audio/Video, Purchasing, Shipping, ug Accounting.

 LEGAL NGA REPORT

Ang matinumanong propetang si Jeremias may katarongan sa pagsalig nga dili gayod siya biyaan sa Diyos nga Labing Gamhanan. “Sila makig-away gayod batok kanimo, apan sila dili makadaog kanimo. Kay ako magauban kanimo, sa pagluwas kanimo ug sa pagpalingkawas kanimo,” mao ang giingon ni Jehova. (Jer. 15:20) Sumala sa gipakita sa mosunod nga mga report, ang mga alagad ni Jehova karon nakasinati sa iyang pagsuportar samtang nagatuman sa ilang komisyon sa pagsangyaw bisan pa sa pagsupak.—Mat. 24:9; 28:19, 20.

 Armenia Si Vahan Bayatyan, usa ka Saksi ni Jehova, gisentensiyahag duha ka tuig ug tunga nga pagkapriso kay midumili sa pagsundalo tungod sa diktar sa konsensiya. Sa dihang napildi ang iyang mga kaso ug mga pag-apelar sa mga korte sa Armenia, kana gisang-at ngadto sa European Court of Human Rights (ECHR). Sa Oktubre 27, 2009, ang hukom sa pito ka huwes sa ECHR maoy batok kang Brader Bayatyan ug pabor sa Armenia. Apan, ang usa ka huwes nga dili uyon sa desisyon nagtuo nga ang hukom sa Korte “nahisupak sa mga sukdanan sa Europe bahin sa isyu sa dili pagsundalo tungod sa diktar sa konsensiya.” Busa, kay hinungdanon man ang maong isyu, ang ECHR misugot  nga ang kaso isang-at ngadto sa Grand Chamber, nga gilangkobag 17 ka huwes.

Sa Hulyo 7, 2011, ang panel sa 17 ka huwes, diin 16 ang mipabor ug 1 lang ang mikontra, mihukom nga ang Armenia naglapas sa katungod ni Brader Bayatyan maylabot sa kagawasan sa konsensiya. Ang Korte nagpahayag nga kini “kombinsido nga ang aplikante midumili sa pagsundalo tungod sa iyang relihiyosong pagtuo, nga tim-os niyang gihuptan ug kini mosumpaki gayod sa iyang obligasyon sa pagsundalo.” Gipanghinaot nga tungod nianang hinungdanong hukom sa korte, pagawson ang 69 ka naprisong mga brader sa Armenia ingon man ang mga brader nga may samang kaso sa Azerbaijan ug Turkey. a

Bulgaria Sa Abril 17, 2011, kapig 100 ka tawo, apil mga babaye, bata, ug tigulang, malinawong nagsaulog sa Memoryal sa kamatayon ni Kristo sa Kingdom Hall sa Burgas. Sa gawas, mga 60 ka lalaki ang nagpundok ug nagsugod paglabayg dagkong bato sa mga Saksi nga diha sa pultahan. Sila midasdas aron mosulod sa  Kingdom Hall, apan sila gibabagan sa mga brader. Gitawgan ang kapolisan, apan wala dayon sila molihok. Nasamdan ang pipila ka Saksi sa maong pag-atake, ug lima ang gidalag ambulansiya sa ospital. Bisan pa niana, nakasaulog ra ang kongregasyon sa Memoryal. Ang katawhan sa Bulgaria matinahoron sa mga Saksi ni Jehova ug kadtong hitaboa dili kasagaran, nga miresulta hinuon sa positibong publisidad. Gihikay sa Nagamandong Lawas nga ang 13 ka sangang buhatan magdala niana sa atensiyon sa mga embahada sa Bulgaria sa ilang mga nasod. Ingong resulta, gisaway sa gobyerno sa Bulgaria ang maong hitabo, ug gikiha sa piskal ang walo sa mga nangatake.

South Korea Kapig 800 ka Saksi ni Jehova ang anaa sa prisohan sa South Korea kay midumili sa pagsundalo tungod sa diktar sa konsensiya. Sukad sa 1950, kapig 16,000 ka Saksi ni Jehova ang gisentensiyahag kapig 31,000 ka tuig nga pagkapriso tungod sa pagdumili sa pagsundalo. Nganong wala mokompromiso ang daghan kaayong batan-on?

Ang matag batan-ong lalaki nga modumili sa pagsundalo mohimog personal nga desisyon base sa diktar sa iyang konsensiya. Pananglitan, si Kim Ji-Gwan misaysay sa dihang gihusay siya: “Ako natandog pag-ayo sa gitudlo sa Bibliya sama sa ‘ang mga tawo dili na makakat-on sa gubat’ ug ‘higugmaon mo ang imong silingan sama sa imong kaugalingon.’ Akong nakat-onan usab nga ang gugma nga gibase sa prinsipyo makatukmod kanato sa paghigugma sa mga kaaway. Base niini ug sa uban pang teksto, ug tungod sa akong hugot nga pagtuo, nakadesisyon ko nga dili magsundalo.”—Isa. 2:4; Mat. 5:43, 44; 22:36-39.

Sa pagkakaron, ang South Korea walay gitaganang alternatibong pagserbisyo sa komunidad alang sa batan-ong  mga lalaki. Sa paningkamot nga masulbad ang maong isyu, napulo ka kaso ang giapelar ngadto sa Constitutional Court sa Korea. Sa Nobyembre 11, 2010, gipamatian sa korte ang oral nga mga argumento, apil ang isyu kon ang Korea naglapas ba sa katungod sa mga lungsoranon niini kay kini wala man magtaganag alternatibong serbisyo alang niadtong modumili sa pagsundalo tungod sa diktar sa konsensiya.

Hinuon, niadtong Marso 24, 2011, ang United Nations Human Rights Committee (UNHRC) mipakanaog sa hukom nga ang South Korea nakalapas sa mga sukdanan nga giila sa lainlaing nasod maylabot sa tawhanong katungod sa dihang gipriso niini ang 100 ka Saksi ni Jehova nga midumili sa pagsundalo. (Kining 100 ka brader miapelar sa UNHRC tungod sa ilang pagkapriso.) Dugang pa, ang paborableng hukom sa Grand Chamber sa ECHR sa kaso ni Brader Bayatyan (tan-awa ang report sa Armenia sa  panid 34-35) gisubmitir ngadto sa Constitutional Court sa Korea aron magamit sa ilang pagdesisyon sa gitingob nga napulo ka kaso. Bisan pa niana, sa Agosto 30, 2011, ang Constitutional Court, nga wala gayod magtagad sa hukom sa UNHRC, misuportar sa Balaod sa Serbisyo Militar ug sa padayong pagpriso niadtong modumili sa pagsundalo tungod sa diktar sa konsensiya. Kay nakita nga may panagsumpaki tali sa Balaod sa Serbisyo Militar ug sa kagawasan sa konsensiya nga gitagana sa konstitusyon, ang duha sa siyam ka huwes wala mouyon niana ug miawhag sa pagbatog alternatibong pagserbisyo sa komunidad.

Turkey Sa Hulyo 31, 2007, ang atong mga igsoon didto nalipay nga narehistro na ingong relihiyosong organisasyon. Bisag may mga problema pa bahin sa  neyutralidad ug sa paggamit sa atong mga Kingdom Hall, ang buluhaton sa Gingharian padayong nag-uswag niining nasora. Sa Abril 26, 2011, ang Ministry of National Education for the Turkish Republic nagpadalag opisyal nga direktiba nga ‘ang mga Saksi ni Jehova dili obligado sa pag-apil sa relihiyosong klase sa tunghaan.’ Ang Ministry nangatarongan nga “bisag ang mga Saksi ni Jehova dili motuo sa pipila ka doktrina sa Kristiyanidad—ang mga Saksi ni Jehova maoy Kristohanong relihiyon.” Ang maong desisyon nakapalipay sa batan-ong mga Saksi nga gihatagag mugbong grado sulod sa katuigan kay dili moapil sa relihiyosong klase.

United States Niadtong Mayo 2011, ang Kansas Court of Appeals mihatag ug paborableng desisyon sa kasong Mary D. Stinemetz v. Kansas Health Policy Authority. Ang korte mihukom nga ang pagdumili sa estado sa pagtugot  kang Sister Stinemetz nga maoperahan nga dili abonohag dugo sa gawas sa estado maoy paglapas sa iyang pederal ug konstitusyonal nga katungod. Sanglit dili mabatonan sa Kansas ang operasyon nga walay pag-abono sa dugo nga gikinahanglan sa sister, ang korte mimando sa estado nga tugotan ang atong igsoon nga maoperahan sa gawas sa estado. Kini kadaogan dili lang para kang Sister Stinemetz kondili sa ubang magmamantala usab sa United States, kansang medikal nga galastohan ginabayran sa gobyerno.

Sa Agosto 10, 2011, ang Korte Suprema sa Kansas misuportar sa paborableng desisyon nga gihatag kang Monica McGlory, nga Saksi ni Jehova, bahin sa kustodiya sa iyang anak. Gusto sa amahan nga siya ang makabaton sa kustodiya sa ilang anak, ug dili ang inahan nga si Sister McGlory kay (1) siya dili motugot sa pag-abonog dugo, (2) iyang gikuyog ang bata sa balaybalay nga pagsangyaw, ug (3) gipahilayo kono niya ang bata gikan sa iyang amahan ug sa komunidad pinaagi sa pagtudlo sa ilang anak bahin sa Armagedon.

Ang Korte Suprema sa Kansas mikompirmar sa mga prinsipyo sa konstitusyon nga naestablisar sa 1957, dihang kini mipahayag: “Ang relihiyosong kagawasan, nga gigarantiyahan sa atong konstitusyon, angay nga padayong ipatuman, ug ang gitudlo ngadto sa bata maylabot sa relihiyon dili gayod himoong basehan sa mga hukom bahin sa kustodiya sa bata.” Bahin sa isyu sa pag-abonog dugo, ang korte miingon: “Ang among mga desisyon sa mga kaso [bahin sa kustodiya] dili mahimong ibase sa wala pa mahitabong aksidente o sakit nga nagkinahanglan tingalig [abono sa dugo].”

 France Sa Hunyo 30, 2011, dihay dakong kalipay sa dihang ang ECHR midesisyon pabor sa Association of Jehovah’s Witnesses of France. Kadto nagtapos sa 16 ka tuig nga legal nga pakigbisog tungod sa dako kaayo, kontrobersiyal nga 60 porsiyentong buhis sa mga donasyon nga nadawat sa sangang buhatan. Mga Saksi lamang ang relihiyon nga gisingil sa maong buhis. Sa katibuk-an, gusto sa gobyerno sa France nga ang mga Saksi ni Jehova mobayad sa 58 ka milyong euro (kapig $82,000,000 U.S.), nga labaw kaayo sa kantidad sa mga propidad sa Asosasyon. Human nga ang tanang korte sa France mikompirmar sa maong buhis, kana giapelar ngadto sa ECHR sa Pebrero 2005.

Sa Hunyo 30, 2011, ang tanang pito ka huwes sa ECHR mipahayag nga kon ang Korte mopabor sa France, ang mga Saksi ni Jehova mababagan na sa pagtuman sa ilang relihiyon. Mihukom ang Korte nga ang mga probisyon bahin sa katungod sa relihiyon nga gitagana sa European Convention on Human Rights mapadapat sa mga Saksi ni Jehova. Kini nga desisyon maoy basehan sa ubang kaso maylabot sa kagawasan sa relihiyon diha sa mga nasod nga ilalom sa ECHR, sama sa Armenia, Bulgaria, Georgia, ug Russia. Matikdi usab nga sa unang higayon, ang gobyerno sa France nahukmang nakalapas sa probisyon sa European Convention bahin sa kagawasan sa relihiyon. Ang gobyerno sa France wala na moapelar.

Russia Sa Hunyo 10, 2010, gihatag sa ECHR ang makasaysayanhong legal nga kadaogan ngadto sa mga Saksi ni Jehova batok sa gobyerno sa Russia sa kasong Jehovah’s Witnesses of Moscow v. Russia. Bisag ang gobyerno sa Russia mihangyo nga kana isang-at ngadto  sa Grand Chamber sa Korte nga may 17 ka huwes, kana gibalibaran sa panel sa Grand Chamber niadtong Disyembre 13, 2010, mao nga dili na mausab ang desisyon sa Hunyo 10. Ang maong desisyon nag-ingon nga ang gobyerno sa Russia “dunay legal nga obligasyon . . . nga hunongon na ang paglapas nga nadiskobrehan sa Korte ug tul-iron ang epekto niana kutob sa mahimo.” Apan, hangtod karon, wala kana tumana sa gobyerno. Hinunoa, kini nakakitag bag-ong mga paagi sa paghasi ug pagbabag sa kagawasan sa mga Saksi sa pagtuman sa ilang relihiyon.

Pananglitan, sayo sa buntag sa Agosto 25, 2011, gi-raid sa mga polis ang 19 ka balay sa Saksi sa siyudad sa Taganrog ug gikompiskar ang mga literatura, computer, ug rekord sa kongregasyon. Ang maong pag-atake morag konektado sa naunang hukom sa Korte Suprema sa Russia nga paphaon ang mga Saksi sa Taganrog ug ideklarar nga ekstremista ang 34 nato ka basahon. Gilakip sa gobyerno ang 63 nato  ka basahon diha sa Pederal nga Listahan sa Ekstremistang Basahon, base sa desisyon sa mga korte sa Russia.

Dugang pa, ang atong mga igsoon nabiktima sa labing menos 950 ka kaso sa pag-raid, pag-atake, pagdakop, ug pagbilanggo. Ang mga awtoridad sa Russia nagpasakag 11 ka kasong kriminal batok sa atong mga igsoon, ug daghang Kingdom Hall ang gidaot. Ang mga awtoridad nagtaod pa ganig mga kamera aron panid-an ang balay sa labing menos usa ka pamilya ug sekretong mikonektar sa mga linya sa telepono ug nagbasag mga e-mail sa daghang igsoon sa paningkamot nga makamugnag mga kasong kriminal ubos sa kontra-ekstremistang balaod.

Usa sa minugnang mga kaso naglangkit sa 35 anyos nga si Aleksandr Kalistratov, sa siyudad sa Gorno-Altaysk, kinsa giakusahan nga “nakahaling ug relihiyosong pagdumtanay o pagkontrahanay” ubos sa kontra-ekstremistang balaod nga gisaway pag-ayo sa mga tigdepensa sa tawhanong katungod. Panahon sa mga pagbista, nga milungtad gikan sa Oktubre 7, 2010 hangtod sa Marso 18, 2011, walay usa sa 71 ka testigo nga gisukitsukit ang nakapamatuod nga si Aleksandr nakahimo o kaha nagplano sa bisan unsang krimen. Gisusi pag-ayo sa korte ang literatura ug mga pagtulon-an sa mga Saksi ni Jehova, ug sa Abril 14, 2011, ang huwes mihukom nga dili sad-an si Aleksandr. Apan, giapelar kana sa piskal, ug sa Mayo 26, 2011, ang Korte Suprema sa Altay Republic nagbalik sa kaso ngadto sa ubos nga korte aron husayon pag-usab sa bag-ong huwes. Busa, si Brader Kalistratov, bisag nahukman nang dili sad-an, moatubang na usab ug mga husay sa korte nga basig moresulta sa sayop nga hukom nga siya ekstremista.

 Di ikatingala nga ang atong buluhaton nabaniog sa gamayng siyudad sa Gorno-Altaysk tungod sa maong kaso nga naglangkit kono sa ekstremistang kalihokan. Komosta ang lokal nga mga Saksi nga nameligro usab nga kasohan?

“Niining lisod nga panahon, ang Bibliya nahimong mas bililhon,” matod sa atong sister nga si Inna. “Ang mga igsoon nagkasuod nga samag pamilya, ug ako mas nasuod kang Jehova!” Bisag gidili ang pipila nato ka basahon, daghang pagtuon ang nasugdan gamit lang ang Bibliya. Ang gidaghanon sa mga magmamantala sa Altay Republic miuswag ug 24 porsiyento. Ang oras nga gigugol sa pagsangyaw miuswag ug 33 porsiyento. Ang mitambong sa Memoryal mas taas ug 16 porsiyento kay sa miaging tuig, nga doble sa gidaghanon sa mga magmamantala sa tibuok republika!

Kasamtangan, ang mga Saksi ni Jehova sa Russia nagpayl ug 13 ka bag-ong aplikasyon sa ECHR batok sa gobyerno sa Russia. Usa sa mga aplikasyon nagtutol sa desisyon sa Korte Suprema sa Disyembre 8, 2009, ug ang lain nagtutol sa desisyon sa Korte Suprema sa Altay Republic nga nagdeklarar nga ekstremista ang 18 nato ka basahon.

[Footnote]

[Blurb sa panid 14]

“Kini nahisulat diha sa mga Manalagna, ‘Ug silang tanan mahimong mga tinudloan ni Jehova’”

[Blurb sa panid 25]

“Ang pulong ‘salamat’ dili paigo sa pagpahayag sa akong apresasyon”

[Kahon sa panid 12]

Ilang Giingon Bahin sa Pag-oksilyare Payunir:

• “Ako nakaoksilyare payunir sa unang higayon. Dili ikabatbat sa mga pulong ang akong pagpasalamat sa maong kahigayonan!”

• “Salamat kaayo niining bag-ong kahikayan. Nakahatag kini nakog dakong kalipay.”

• “Kadto maoy talagsaong bahin sa kasaysayan sa among kongregasyon.”

• “Ang daghan kaayong oksilyare payunir nakaamot sa kalinaw ug panaghiusa sa kongregasyon.”

• “Duol na gyod ang Armagedon!”—Komento sa di-Saksi nga nakamatikod sa atong gipauswag nga kalihokan sa Abril.

[Kahon sa panid 43]

‘NANAGHUGYAW SA KALIPAY’

NAGKAGRABE ang kagul-anan sa kalibotan kay kini gimandoan sa suko kaayo nga si Satanas. (Pin. 12:12) Sa kasukwahi, ang mga alagad ni Jehova ‘nanaghugyaw sa kalipay tungod sa maayong kahimtang sa kasingkasing.’ (Isa. 65:13, 14) Sila padayong nagdapit sa daghan kutob sa mahimo sa pagsimba sa matuod nga Diyos kay nahibalo nga “ang tanan nga modangop [kang Jehova] managmaya; sila managhugyaw sa kalipay hangtod sa panahong walay tino.”—Sal. 5:11.

 [Chart/Mga graph sa panid 26]

(Alang sa aktuwal nga pagkahan-ay, tan-awa ang publikasyon)

MABATONAN SA 106 KA PINULONGAN

Kompletong Bag-ong Kristohanon Gregong

Kalibotang Hubad: 62 Kasulatan: 44

Afrikaans American Sign Language

Albanian Amharic

Arabic Azerbaijani

Armenian Azerbaijani (Cyrillic)

Bulgarian Brazilian Sign Language

Cebuano Cambodian

Chichewa Chitonga

Chinese (Simplified) Colombian Sign Language

Chinese (Traditional) Estonian

Cibemba Ewe

Croatian Fijian

Czech Gun

Danish Haitian Creole

Dutch Hiligaynon

Efik Hindi

English Hiri Motu

Finnish Italian Sign Language

French Kannada

Georgian Kazakh

German Kikaonde

Greek Kiribati

Hungarian Latvian

Igbo Lithuanian

Iloko Luganda

Indonesian Luvale

Italian Malayalam

Japanese Mexican Sign Language

Kinyarwanda Myanmar

Kirghiz Nepali

Kirundi Pangasinan

Korean Papiamento (Curaçao)

Lingala Punjabi

Macedonian Russian Sign Language

Malagasy Sango

Maltese Silozi

Norwegian Sranantongo

Ossetian Tamil

Polish Thai

Portuguese Tok Pisin

Romanian Tongan

Russian Tumbuka

Samoan Ukrainian

Sepedi Uzbek

Serbian Vietnamese

Serbian (Roman)

Sesotho

Shona

Sinhala

Slovak

Slovenian

Spanish

Swahili

Swedish

Tagalog

Tsonga

Tswana

Turkish

Twi (Akuapem)

Twi (Asante)

Xhosa

Yoruba

Zulu

[Mga graph]

◀ 76% ◁ 24%

Pagka-2011, labing menos 76 porsiyento sa populasyon sa kalibotan makabaton nag “Bag-ong Kalibotang Hubad” (tibuok o bahin) sa ilang kaugalingong pinulongan

110

100

90

80

70

60

50

40

30

20

10

0

1950 1955 1960 1965 1970 1975 1980 1985 1990 1995 2000 2005 2010

[Graph sa panid 8]

(Alang sa aktuwal nga pagkahan-ay, tan-awa ang publikasyon)

Sa Tibuok Kalibotan, 2,657,377 Magmamantala ang Nag-oksilyare Payunir

2.5 (MILYON)

2.0

1.5

1.0

0.5

0

2008 2009 2010 2011

[Mapa sa panid 35]

(Alang sa aktuwal nga pagkahan-ay, tan-awa ang publikasyon)

UNITED STATES

FRANCE

BULGARIA

TURKEY

ARMENIA

AZERBAIJAN

RUSSIA

SOUTH KOREA

[Hulagway sa panid 6]

Ibabaw: Mga payunir ug magmamantala nagdala sa ilang mga gitun-an sa Bibliya ngadto sa balay ni Jeannette aron didto sila magtuon. (Tan-awa ang  panid 8-9)

[Hulagway sa panid 7]

Mga regular ug oksilyare payunir nga paingon sa pagsangyaw sa Madrid, Espanya

[Hulagway sa panid 10]

Si Toshi nagsangyaw sa caregiver sa usa ka nursing home

[Hulagway sa panid 11]

Si Alejandro ug iyang amahan sa Sant Celoni, Barcelona, Espanya, sa kataposang adlaw sa bulan

[Hulagway sa panid 13]

Watchtower Educational Center sa Patterson, New York, U.S.A.

[Hulagway sa panid 18]

Kingdom Hall sa Rikuzentakata, Japan

 [Hulagway sa panid 22]

Ibabaw: Gigawas sa mga boluntaryo ang mga gun-ob gikan sa balay sa usa ka igsoon sa Shibata, Miyagi

[Hulagway sa panid 22]

Wala: Membro sa Komite sa Sanga nga nagpakigpulong sa balay sa usa ka igsoon sa Rikuzentakata

[Hulagway sa panid 22]

Ubos: Mga boluntaryo naghikayg paniudto alang sa nanambong sa espesyal nga asembliya diha sa apektadong lugar

[Hulagway sa panid 24]

Lithuanian ug Latvian nga mga hubad

[Mga hulagway sa panid 31]

Makasaysayanhong timaan sa Yankee Stadium, New York, U.S.A.

[Hulagway sa panid 32]

Opisina sa Burkina Faso

[Hulagway sa panid 32]

Sangang buhatan sa Chile

[Hulagway sa panid 33]

Mga boluntaryo sa konstruksiyon sa opisina sa Burkina Faso

[Mga hulagway sa panid 33]

Bag-ong pasilidad sa sangang buhatan sa Hong Kong

[Hulagway sa panid 34]

European Court of Human Rights, sa Strasbourg, France

[Mga hulagway sa panid 38]

Mga estudyante nagpakita sa ilang mga report kard sa eskuylahan. Sila nalipay kay wala na obligaha nga moapil sa relihiyosong klase

[Hulagway sa panid 41]

Mga Saksi nagsangyaw sa Gorno-Altaysk, Republic of Altay