Pagsangyaw ug Pagpanudlo sa Tibuok Yuta

DUGAY na kanhi, nakita ni apostol Juan diha sa panan-awon ang di-maihap nga dakong panon “gikan sa tanang kanasoran ug mga tribo ug katawhan ug mga pinulongan.” Sila mao ang mga nakalabang sa “dakong kasakitan” ug mosulod sa bag-ong kalibotan. (Pin. 7:9, 14) Ang mga ihap ug kasinatian sa mosunod nga mga panid nagpakita nga ang dakong panon padayong gitigom ug nagakadaghan. Dili ba kini makapalig-on sa imong pagtuo nga ang mga saad ni Jehova matuman gayod?

 AFRICA

KAYUTAAN 57

POPULASYON 949,533,064

MAGMAMANTALA 1,267,314

PAGTUON SA BIBLIYA 2,819,310

IYANG SULAT NAKAHUPAY. Si Iris nga taga-South Africa, tigpadalag sulat-pahasubo ngadto sa mga namatyag minahal. Pasukipan niya kanag mga tract nga Ang Tanang Pag-antos Matapos Na sa Di-Madugay! ug Unsay Paglaom Alang sa Namatay nga mga Minahal? Di pa dugay, nakadawat siyag balos gikan sa usa ka lalaki nga ginganlag Sidney, kinsa namatyag asawa human sa 38 ka tuig nga malipayong kaminyoon. “Bisag giprangkahan na ko sa espesyalistang mga doktor nga di na magdugay ang akong minahal,” siya miingon, “sa dihang siya namatay ako mibatig kayugot, kalibog, kawalay-kasegurohan, ug tumang kaguol. Nagpasalamat ko sa Ginoo tungod sa mga tawong sama kanimo. Dalayegon kaayo ang imong paggahig panahon ug pagpaningkamot nga ipaambit ang mga saad sa Diyos ngadto sa mga tawong wala gani nimo mailhi, ug ang imong mga pahayag sa pagtuo tipigan ko sa akong kasingkasing alang sa lisod nga mga panahon sa unahan. Pagkabasa nako sa imong sulat ug sa mga tract, medyo nahupayan ko ug natin-awan.”

WALA IDAYON ANG ABORSIYON. Si Gloria maoy usa ka batan-ong sister sa Benin, ug samtang nagsangyaw siya sa usa ka estudyante sa unibersidad nga si Arnaud, may nanawag sa cell phone ni Arnaud. Iya diay tong amigo nga nagkinahanglag tabang, mao nga nananghid siyang mobiya. Si Gloria midalidalig kuot sa iyang bag ug gihatag  kaniya ang magasin nga iyang nakuptan. Gidawat kadto ni Arnaud nga way tan-aw-tan-aw ug siya mibiya.

Ang amigo ni Arnaud mitelepono kay mabdos ang iyang trato ug nagplano siya nga pugson ang iyang trato nga ipakuha ang iyang gimabdos. Sa pagpaingon ni Arnaud sa iyang amigo, iyang gitan-aw ang magasin. “Nakurat ko pagkakita nako sa pulong ‘aborsiyon’ diha sa hapin sa magasin,” miingon siya sa ulahi. Ang nahatag ni Gloria mao diay ang Hunyo 2009 nga Pagmata! nga nag-ulohang “Aborsiyon—Nganong Kontrobersiyal Kini?” Human nila mabasa kini, nakadesisyon ang amigo ni Arnaud nga dili na idayon ang aborsiyon. Sa ulahi, ang trato sa iyang amigo nanganak ug guwapang batang babaye.

DI ANGAYNG MAHADLOK SA TAMBALAN. Si King, nga usa ka regular payunir, mibalhin sa usa ka lugar sa Zimbabwe diin may dakong panginahanglan. Samtang nagsangyaw kauban sa pipila ka sister, siya mipaingon sa balay sa usa ka iladong tambalan. Bisag ang mga sister nagpanuko sa pagpakigsulti sa maong babaye, si King nakadesisyon nga tanyagan siyag pagtuon sa Bibliya. Pagkakita sa tambalan kanila, nagtuo siya nga sila mga kostumer ug nangutana kon unsay ilang tuyo. Gipakita ni King ang librong Unsay Tinuod nga Gitudlo sa Bibliya? ug gitanyagan siyag pagtuon sa Bibliya. Iya kanang gidawat. “Nahingangha mi kay daghan kaayo siyag pangutana,” miingon si King. “Busa gihikay namo nga mabalikan siya ug matun-an sa Bibliya.” Tulo ka semana sa ulahi ilang gidapit siya sa tigom sa kongregasyon, ug siya mitambong. Iyang gisunog ang tanan niyang gamit sa espiritismo ug kusog nga  miuswag sa espirituwal. Paglabayg pipila ka bulan, siya nabawtismohan.

“PALIHOG IAMPO NGA MADUAW KO NILA!” Napulo ka tuig kanhi, si Patrick nga taga-Angola mibalhin sa United States. Regular siyang nakigkontak sa iyang inahan, si Felicidade, pinaagig telepono. Apan di pa dugay, magkakitaay na sila pinaagig Internet video call. Usa ka higayon nga nakigsulti siya sa iyang inahan, si Patrick nakamatikod nga siya may kauban sa kuwarto ug nangutana kon kinsa siya. Ang iyang inahan, nga Saksi ni Jehova, miingon, “Usa ka sister nga miduaw gikan sa among kongregasyon.”

Dayon, si Patrick miingon: “Nganong ang mga Saksi wala man moduaw nako? Napulo ka tuig na ko dinhi, ug bisag kas-a wala sila moduaw nako. Palihog iampo nga maduaw ko nila!”

Si Felicidade ug ang sister medyo natingala ug mitubag: “Sige, iampo ka namo.”

Paglabay rag tulo ka adlaw, usa ka Saksi ni Jehova ang miduaw sa balay ni Patrick. Siya natingala kaayo mao nga nangutana siya sa iyang inahan kon gihikay ba niyang may moduaw kaniya didto. Wala siya maghikay niana. Si Patrick mihinapos nga ang pagduaw kaniya maoy tubag sa Diyos sa pag-ampo ug siya midawat ug pagtuon sa Bibliya. Siya misugod dayon sa pagtambong sa tanang tigom. Sa dihang siya ug ang iyang inahan nagkita pag-usab pinaagig video call, magarbohon niyang gipakita kon unsa nang kapituloha sa librong Gitudlo sa Bibliya ang iyang gitun-an. Gibalita usab niya nga mipalit siyag amerkana aron isul-ob sa tigom.

 KATINGAD-ANG HANGYO SA PAGPABAWTISMO. Sa unang adlaw sa 2010 nga distritong kombensiyon sa Brazzaville, Republic of the Congo, ang usa ka batan-ong lalaki nga ginganlag Edvard mihangyo nga magpabawtismo. Sa gipangutana kon unsay iyang kongregasyon, siya mitubag: “Mossaka.” Sanglit walay mga Saksi sa maong layo nga  baryo, ang mga brader natingala kon nganong gusto niyang magpabawtismo.

Gipatin-aw ni Edvard sa mga ansiyano nga sa 2007, siya gitun-an sa iyang lolo sa brosyur nga Gikinahanglan ug sa 14 ka kapitulo sa librong Gitudlo sa Bibliya didto sa Brazzaville. Unya si Edvard miuli sa iyang ginikanan sa Mossaka. Sanglit walay mga Saksi didto, gihangyo ni Edvard ang iyang amahan nga tabangan siya pagtuon sa nahibiling mga kapitulo sa librong Gitudlo sa Bibliya. Ang iyang amahan maoy mangutana, ug si Edvard maoy motubag. Sa maong paagi natapos niya ang libro. Iyang gibati nga kinahanglang itudlo niya sa uban ang kamatuoran nga iyang nakat-onan. Busa, sa Oktubre 2009, siya misangyaw nga nag-inusara sa Mossaka gamit ang brosyur nga Gikinahanglan. Iyang girekord ang iyang oras sa pagsangyaw ug regular nga nagpadala sa iyang taho ngadto sa iyang apohan sa Brazzaville. Apan wala kini ihatag sa iyang apohan ngadto sa kongregasyon.

Sa ulahi, ang sangang buhatan, nga wala mahibalo bahin kang Edvard, nag-asayg temporaryong mga espesyal payunir sa Mossaka sulod sa tulo ka bulan. Duha na lang ka adlaw una matapos ang ilang asaynment, si Daniel nga usa sa mga espesyal payunir nakakita kang Edvard nga nagdumalag pagtuon sa Bibliya gamit ang brosyur nga Unsay Gikinahanglan sa Diyos Kanato? Busa si Daniel miduol kang Edvard ug nakigsulti kaniya. Si Edvard miingon: “Nagsangyaw ko. Magmamantala na man ko. Pangutan-a si Papa.” Si Daniel nakigkita sa amahan, kinsa nagpamatuod sa gisulti ni Edvard. Gigamit sa mga espesyal payunir ang nahibiling duha ka adlaw sa pagbansay kang Edvard diha sa ministeryo. Sa ilang pagbiya, si Edvard padayong nagsangyaw nga masiboton, nga nagdumalag kapig napulo ka pagtuon sa Bibliya. Gipahinungod usab niya ang iyang kinabuhi kang Jehova.

Sa pagkahibalo niini, duha ka ansiyano ang nakigtagbo kang Edvard sa unang adlaw sa kombensiyong nahisgotan  na, ug girepaso ang mga pangutana alang niadtong gusto nga mahimong di-bawtismadong magmamantala. Nahingangha sila sa iyang ekselenteng mga tubag. Nahibaloan sa mga ansiyano gikan sa mga espesyal payunir nga sulondan ang panggawi ni Edvard, ug siyam ka bulan na siyang nagsangyaw. Busa, naaprobahan siya ingong di-bawtismadong magmamantala. Kay may naeskedyul nga distritong kombensiyon sa pinulongang Lingala pagkasunod semana, gihikay sa mga ansiyano nga repasohon uban kang Edvard ang mga pangutana alang sa bawtismo sa semana sa maong kombensiyon. Nadayag nga nasabtan niya ang kamatuoran ug siya nabawtismohan sa Lingala nga kombensiyon sa Hulyo 2010. Dayon, eksaktong usa ka semana human maaprobahi ingong di-bawtismadong magmamantala, ang mga ansiyano nagpahibalo nga si Edvard bawtismado na.

Human sa iyang bawtismo, siya nag-oksilyare payunir sulod sa duha ka bulan sa Brazzaville. Gihikay sa mga ansiyano nga matun-an siya sa librong “Magpabilin Kamo sa Gugma sa Diyos,” ug unya siya miuli sa Mossaka. Di pa dugay, usa ka espesyal payunir ang giasayn sa maong teritoryo. Sa Abril, si Edvard—nga oksilyare payunir niadto—uban sa espesyal payunir, nag-abiabig 182 ka interesado nga mitambong sa Memoryal. Siya nagdumalag 16 ka pagtuon sa Bibliya, ug 7 kanila nagtambongan na sa mga tigom, nga gidumala sa duha ka brader. Sa 2011, 15 anyos ang edad ni Edvard.

 MGA NASOD SA AMERICA

KAYUTAAN 55

POPULASYON 941,265,091

MAGMAMANTALA 3,780,288

PAGTUON SA BIBLIYA 4,139,793

“DILI AKSIDENTE NGA NADAYAL NAKO ANG IMONG NUMERO.” Si Sundie, usa ka sister sa United States, diha sa balay sa dihang may babayeng nanawag sa telepono nga nangita sa tawong wala mailhi ni Sundie. Iyang giingnan ang nanawag nga sayop ang numero nga iyang nadayal. Ang babaye mitubag nga siya buta ug usahay masayop sa pagdayal. Sa ilang pag-estorya, ang babaye miingon nga gusto niyang makontak ang iyang anak nga lalaki aron isulti ang makapasubong balita. Nadayagnos sa mga doktor nga siya may kanser. Naguol siya pag-ayo ug gibasol niya ang Diyos sa nahitabo kaniya. Nakaamgo si Sundie nga kinahanglan niyang ipaambit ang mensahe sa Bibliya sa babaye. Siya midalidalig ampo alang sa kaisog, dayon mibasag pipila ka teksto nga makapahupay ug makapadasig kaniya. Iyang gipatin-aw nga ang Diyos dunay ngalan ug gidasig niya nga gamiton kana dihang mag-ampo ug magmaespesipiko sa mga pag-ampo. Gipasalamatan sa babaye si Sundie tungod sa pagpamati ug pagdasig kaniya. “Para nako, dili aksidente nga nadayal nako ang imong numero,” matod sa babaye.

Human maghatagayg numero ug adres, si Sundie nagpadalag audio rekording sa librong Gitudlo sa Bibliya ug iyang gihikay nga may payunir nga sister sa ilang lugar nga makaduaw kaniya. Si Sundie miingon, “Mapasalamaton ko nga si Jehova nagbansay pag-ayo kanato  kon unsaon paghupay sa mga tawo sa lainlaing kahimtang.”

ANG TRACT NAGTUBAG SA ILANG PANGUTANA. Ubay-ubayng sister ang tigsangyaw sa kadalanan duol sa usa ka dakong ospital sa Puerto Rico. Usa kanila miduol sa duha ka tawo nga paspas nga naglakaw paingon sa ospital. Kay nakita sa sister nga sila nagdali, iyang gihatag kanila ang tract nga Ikaw ba Adunay Espiritu nga Dili-Mamatay? Kasagaran, dili siya motanyag sa maong tract diha sa kadalanan, apan kadto na lay nabilin. Sa ulahi, ang duha ka tawo miduol sa laing sister ug misugilon nga sila nakadawat ug tract sa pagpaingon nila sa ilang paryente nga grabeng nasakit. Niadtong higayona, naghisgot sila kon may espiritu ba nga magpabiling buhi inigkamatay, ug ang tract nagtubag niana. Sila miingon nga kini dakog natabang kanila.

SULAT PARA KANG JEHOVA. Ang 7 anyos nga si Joshua maoy usa ka estudyante sa United States. Sa bulan sa Disyembre, ang maestra nag-asayn sa klase nga magsulat kang Santa Claus. Sa dihang si Joshua matinahorong mibalibad, ang maestra miingon nga makasulat siya kang bisan kinsa. Nakahunahuna siya sa pagsulat kang Jehova. “Salamat sa imong gisaad nga paraiso,” siya misulat. “Salamat sa imong Anak nga si Jesus nga naghatag sa iyang kinabuhi. Salamat sa paglalang sa mga butang nga nakahatag namog kalipay. Gihigugma ko ikaw, Jehova nga Diyos.”  Kining sulata, lakip ang sulat sa ubang bata, gipatik diha sa usa ka lokal nga mantalaan.

ANG PAMILYA MISANONG. Si Alejandro, usa ka brader sa Colombia, gustong mosangyaw sa iyang mga paryente. Kay layo ang iyang mga paryente, iyang gisulatan sila ug gipadad-ag pipila ka kopya sa Bantayanang Torre ug Pagmata! Sa dihang gibasa sa iyang paryenteng si Pablo ang mga magasin ug gisusi ang mga teksto sa Bibliya, iyang nasabtan nga sayop ang gitudlo sa Simbahang Katoliko. Sa kalipay, iyang gipaambit kana sa uban nilang paryente, nga nakasabot usab sa kamatuoran ug namiya sa Katolikong relihiyon.

Wala madugay, 15 kanila misugod sa pagtigom matag gabii aron magtuon sa Bibliya gamit ang mga magasin.  Kay gusto pang makakat-on ug dugang, sila nangitag mga Saksi sa duol nga mga lungsod, apan wala silay nakit-an. Kasamtangan, sila nagsugod pagpaambit sa ilang nakat-onan ngadto sa ilang mga silingan. Ngadtongadto, ilang nabalitaan nga dunay Kingdom Hall sa usa ka lungsod nga mga usa ka oras ang biyahe. Miadto dayon sila aron mangayog tabang.

Karon, dunay regular payunir nga tig-adtoan sa ilang lugar kas-a sa usa ka semana aron magdumalag usa ka pagtuon sa Bibliya uban sa 26 ka tawo—pamilya ni Alejandro ug 11 pa ka interesado. Sila moabang ug sakyanan aron ang kadaghanan kanila makatambong sa pakigpulong publiko ug Pagtuon sa Bantayanang Torre.

NASAYOP BA GAYOD SILA PAGDUAW NIADTONG BALAYA? Usa ka adlaw, ang usa ka sister nasakit ug nagpapuli siya sa ubang Saksi sa pagdumalag pagtuon sa Bibliya diha sa usa ka hilit nga lugar sa Ecuador, nga Quichua ang pinulongan. Ang mga brader wala makatino kon asa nagpuyo ang pamilya, apan nangutana sila sa usa ka balay kon sila ba ang pamilyang nagtuon sa Bibliya. Giabiabi sila pag-ayo sa pamilya sa maong balay, nga morag sila ang nagpaabot. Human na lang sa pagtuon nga nasayran sa mga brader nga kining pamilyaha wala pa sukad makatuon! Gusto diay nilang magtuon sa Bibliya mao nga sila milihok nga samag nagtuon na. Karon duna nay laing pamilya nga nagtuon sa Bibliya sa maong lugar, ug ang pamilyang gitun-an sa sister nga wala makaplagi niadtong adlawa nagpadayon usab sa pagtuon.

NAKASANGYAW TUNGOD SA CUPCAKE. Si Caleb maoy 6 anyos nga taga-Canada. Ang unang adlaw sa ilang klase maoy adlawng natawhan sa usa niya ka klasmet, busa ang inahan, si Natalie, nanghatag ug cupcake. Si Caleb matinahorong mibalibad. Unya, si Natalie miduol kang Caleb ug nangutana kon duna ba siyay allergy sa pagkaon. “Wala man,” mitubag si Caleb, “alagad ko ni Jehova.”

 Human sa klase, si Natalie miduol sa inahan ni Caleb ug nangutana, “Saksi ni Jehova ka? Pagtubag niyag oo, nalipay si Natalie. Siya diay nagtuon na uban sa mga Saksi sa tin-edyer pa, apan nahunong tungod sa pagsupak sa iyang pamilya. Sa dihang gipangutana kon gusto ba ni Natalie nga ipadayon ang pagtuon sa Bibliya, siya misugot.

DILI KABUBUT-ON SA DIYOS. Si Laly, nga taga-Peru, natawong bungol. Sa dihang nangutana siya sa iyang inahan bahin niini, giingnan siya nga kini kabubut-on sa Diyos. Naguol si Laly ug nayugot sa Diyos. ‘Nganong iya kong gisilotan?’ naghunahuna siya.

Paglabay sa panahon, si Laly naminyo sa usa ka bungol nga batan-ong lalaki. Ang ilang panganay natawo nga may Down syndrome. Kay nabalaka ug nasuko, nangutana na usab siya sa iyang inahan, “Nganong ang akong anak natawong ingon niini?” Giingnan siya sa iyang inahan nga moadto sa pari. Ang tubag sa pari parehas ra sa tubag sa iyang inahan, “Kabubut-on kana sa Diyos.”

Sa grabeng kalagot, si Laly miingon: “Nganong pintas kaayo ang Diyos? Nadawat na nako nga bungol ko ug kini silot sa Diyos kanako, apan nganong silotan man ang akong anak? Mao pay iyang pagkatawo. Unsa may iyang sala?” Sukad niadto, dili na siya interesado bahin sa Diyos ug wala na mosimba.

 Paglabay sa pipila ka tuig, si Laly nasangyawan ug Saksi ni Jehova nga makamaog senyas nga pinulongan, ug gitanyagan siyag pagtuon sa Bibliya. Siya mibalibad ug miingon nga dili siya motuo ug Diyos. Mapailobong gipatin-aw sa sister nga ang Diyos nga dili niya gustong mailhan mao si Jehova, ug gusto sa Diyos nga hatagan siyag kahigayonan nga maayo sa iyang pagkabungol ug pagkaamang. Kay di motuo, giingnan ni Laly ang sister nga pamatud-an kana. Gibuksan sa sister ang Isaias 35:5 ug gibasa kini: “Nianang panahona ang mga mata sa mga buta mabuka, ug ang igdulungog sa mga bungol mabuksan.” Nakurat niini si Laly. Siya midawat ug pagtuon sa Bibliya ug miuswag hangtod nga nabawtismohan. Ang iyang anak kuyog niya pirme sa tigom ug nakakat-on usab ug senyas nga pinulongan. Padayong nag-uswag ang iyang pagpabili sa mga saad sa Bibliya, ug karon siya regular payunir na.

 ASIA UG ANG TUNGANG SIDLAKAN

KAYUTAAN 47

POPULASYON 4,194,127,075

MAGMAMANTALA 664,650

PAGTUON SA BIBLIYA 629,729

DUHA KA PANGUTANA NGA WALA NILA MATUBAG. Sa usa ka nasod sa Asia diin gipig-otan ang atong buluhaton, usa ka 24 anyos nga lalaki ang midawat ug pagtuon sa Bibliya aron pamatud-an nga sayop ang pagtulon-an sa mga Saksi ug husto ang mga doktrina sa Katoliko. Apan sa wala madugay, siya nakaamgo nga ang mga Saksi ni Jehova nagtudlo sa kamatuoran.

Sa dihang nahibaloan sa iyang pamilya nga nagtuon siyag Bibliya, gipatawag siya sa usa ka miting sa pamilya ug gipugos nga mobalik sa Katolikong Simbahan. Kay siya midumili, gitigom sa pamilya ang tanan nilang paryente sa baryo aron pugson siya pagbiya sa iyang bag-ong tinuohan. Bisag ilang gikulata siya, ang batan-on wala mokompromiso. Dayon gisumbong nila siya ngadto sa pari, ug gipaatubang sa konsilyo sa parokya. Giingnan sa batan-on ang konsilyo nga siya mobalik sa simbahan kon ang pari makatubag sa duha ka pangutana: Unsay ngalan sa Diyos? Nganong gitugotan sa simbahan ang mga membro niini nga mokaog dugo nga gidili man kini sa Bibliya? Kay ang pari wala makatubag sa mga pangutana, iyang gisagpa ang batan-on  aron kono “pagawson ang demonyo gikan sa iyang lawas.” Dayon ang miting natapos.

Human niadto, gitigom sa pamilya ang tanan niyang higala aron pugson siya pagluhod atubangan sa imahen ni Maria. Bisag ila na usab siyang gikulata, wala gihapon siya mokompromiso. Dayon, may gisabot ang iyang pamilya nga usa ka guwapang dalaga nga mosulti kaniya nga makigminyo kon mobalik siya sa simbahan. Ang batan-on miingon nga siya mobalik kon ang dalaga makatubag sa duha ka pangutana nga iya nang gisukna sa pari. Ang dalaga mibiya ug wala na mobalik. Sa kataposan, human siya pig-oti ug pito ka bulan, ang batan-on milayas sa ilang baryo ug mibalik sa siyudad, diin iyang gikontak ang mga igsoon. Usa ka bulan sa ulahi, siya nahimong di-bawtismadong magmamantala. Siya nabawtismohan sa sirkitong asembliya sa Marso 2011.

SISTER GIDEPENSAHAN SA OPISYAL SA PRISOHAN. Ang usa ka sister nga regular payunir sa South Korea miduaw sa iyang anak nga lalaki nga napriso tungod sa Kristohanong neyutralidad. Samtang naghulat, gitunolan niyag tract ang usa ka lalaki nga naglingkod tupad niya. Dayon, ang lalaki misinggit, “Ngano god mong mga membro niining bakak nga relihiyon magsangyaw man bisan dinhi?” Nadunggan kana sa 30 o 40 ka bisita diha sa lawak-hulatanan. Unya, usa ka opisyal sa prisohan ang mitingog ug mibadlong sa lalaki: “Ang ila mao ang matuod nga relihiyon. Ang ubang relihiyon bakak. Nakapaniid ko niining mga tawhana sa daghang katuigan sa akong pagtrabaho dinhi, ug nakita nako nga sila ray nagtuman kon unsay ilang gitudlo.” Ang mapasipalahong lalaki nahilom.

SINULAT SA BUNGBONG. Pagsugod ni Harindra sa pagtuon sa Bibliya, siya nag-inusara pagpuyo sa usa ka dakong siyudad sa Nepal sulod na sa napulo ka tuig kay nagtrabaho siya didto aron makasuportar sa iyang  pamilya sa baryo. Siya dili antigong mobasa ug mosulat, busa ang Saksi nagtuon sa Bibliya uban niya gamit ang brosyur nga Tagamtama ang Kinabuhi sa Yuta sa Walay Kataposan! Iningles nga brosyur ang ilang gigamit kay walay Nepali niadtong panahona. Usa ka adlaw, giduaw siya sa iyang asawa gikan sa baryo. Natingala ang asawa pagkakita nga si Harindra nagtuon sa Iningles nga brosyur. Gawas pa, dili na siya moinom ug mangulata. Pagkahibalo sa asawa nga siya nausab tungod sa pagtuon sa Bibliya, ang asawa misugod sa pagtuon ug sa pagtambong sa tigom sa ilang baryo. Gusto ni Harindra nga makakat-og dugang bahin kang Jehova maong midesisyon siya nga magtuon sa pagbasa ug pagsulat. Gihangyo niya ang nagdumala sa pagtuon nga isulat ang mga letrang Nepali diha sa papel ug iyang gipilit kana sa bungbong sa iyang kuwarto hangtod nalukop kana. Unya gipraktis niyag basa ang tanang bag-ong pulong ug letra hangtod nga antigo na siyang mobasa. Ngadtongadto, gipaapas niya ang iyang pamilya sa siyudad aron magkausa sila sa pagpuyo ug sa pagsimba kang Jehova. Human sa duha ka tuig, si Harindra nabawtismohan. Karon siya ug ang iyang pamilya magkauban sa pagtambong sa mga tigom, ug si Harindra may mga asaynment na nga pagbasa sa Bibliya sa Teokratikanhong Tunghaan sa Ministeryo. Matod niya, “Miuswag gayod ang among kinabuhi tungod sa pag-edukar ni Jehova kanamo.”

WALA IBAYLO SA $200,000. Ang usa ka babayeng si Zarkhanum sa Azerbaijan maoy espiritista. Sulod sa 15 ka tuig, gituohan nga siya may extrasensory perception ug makatagnag kapalaran. Nagtuo usab ang mga tawo nga siya makasumpo sa pangdaot ug makapanambal. Si Zarkhanum nainila, ug daghan sa iyang mga kliyente, sama sa tag-as ug ranggo nga mga opisyales ug ilang mga asawa, nagbayad kaniyag $2,000 ngadto sa  $4,000 (U.S.) sa usa ka sesyon. Busa, siya nadato. Bisan pag may espiritistikanhong gahom, gibati niyang gutom sa espirituwal, ug daghang pangutana ang nakahasol kaniya. Ang iyang kaminyoon dili malamposon, ug mibati nga way tumong ang iyang kinabuhi. Usa ka adlaw samtang gipahungaw niya ang iyang mga problema ngadto sa Diyos, may mituktok sa pultahan. Iya kanang gibuksan, ug duha ka sister ang misangyaw kaniya. Si Zarkhanum nakapamalandong pagkadungog niya nga mapahimut-an ang Diyos dili lang sa pulong kondili sa buhat usab. Daghan siyag nailhang tawo nga relihiyoso apan dili diyosnog binuhatan. Nahibalo usab siya nga sala ang espiritismo. Siya midawat ug pagtuon sa Bibliya. Ngadtongadto, misugod siya paggamit sa ngalan ni Jehova diha sa pag-ampo ug nakita niya nga gitubag ang iyang mga pag-ampo. Apan, nalisdan siya pagbiya sa espiritismo kay kanunay siyang gihasi sa mga demonyo ug gikulata pa gani. Sa kataposan, sa tabang ni Jehova, nakalingkawas siya sa impluwensiya sa mga demonyo ug gisunog ang daghan niyang butang nga nalangkit sa espiritismo ug sa bakak nga relihiyon.

Sa wala madugay, si Zarkhanum nahimong masibotong magmamantala sa maayong balita, ug siya nabawtismohan sa Mayo 2011. Human sa iyang bawtismo, siya miaplay dayon ingong oksilyare payunir. Wala siya maglisod sa pagkab-ot sa gikinahanglang oras kay bisan sa wala pay bawtismo, mogugol na siyag kapig 70 ka oras sa usa ka bulan bisag may problema sa panglawas. Duha ka bulan una sa iyang bawtismo, gitanyagan siyag $200,000 (U.S.) sa asawa sa usa ka opisyal sa gobyerno aron kontrahon ang pangdaot nga mao konoy hinungdan sa sakit nga mitultol sa pagkaputol sa iyang tiil. Gibalibaran kana ni Zarkhanum, ug gipaadtoan hinuon niyag duha ka Saksi ang maong babaye sa ospital aron sangyawan. Ang atong masibotong sister regular nga  nagsangyaw sa iyang kanhing mga kliyente, nga nagsulti kanila nga ang iyang gibuhat kanhi daotan sa panan-aw sa Diyos. Ingong resulta, ang usa kanila, nga maoy nagpailaila kaniya ngadto sa asawa sa opisyal sa gobyerno, misugot nga magtuon sa Bibliya ug nagsugod na pagtambong sa tigom.

PAGSANGYAW DIHA SA PRISOHAN. Sa India, duha nato ka sister ang gidakop tungod sa pagsangyaw ug gisentensiyahag lima ka adlaw nga pagkapriso. Usa kanila miasoy: “Sa didto na mi sa prisohan, ang mga polis nangutana kon nganong gipriso mi, ug kadto nakahatag namog kahigayonan sa pagsangyaw. Sanglit gideretso man mig dala sa estasyon sa polis gikan sa pagsangyaw, daghan mig nadalang magasin ug tract. Gisangyawan namo ang tanan ug nakapahimutang mig daghang literatura. Kaming duha nagdinasigay, nag-ampo, ug nagbasa sa mga basahon nga among dala.

“Sa ulahi, gibalhin mi sa laing prisohan sa siyudad. Gipangutana dayon mi sa mga priso kon nganong napriso mi. Nakahigayon na usab mi sa pagsangyaw ug sa pagpaila nga kami mga Saksi ni Jehova. Usa ka babayeng  guwardiya ang nakadungog kanamo ug miingon, ‘Gipriso mo kay nagsangyaw mo sa gawas, ug karon nagsangyaw na pod mo dinhi sa sulod!’” Ang atong mga sister nagplano karon nga duawon ang mga priso nga nagpakitag interes sa kamatuoran.

ANG POLIS NAKAMATIKOD SA GUGMA. Duha ka sister sa Bethlehem ang nagpaingon sa gagmayng tindahan aron mosangyaw. Sa kalit, may duha ka babaye nga miduol ug mahinamong nangutana sa Kinatsila kon sila ba mga Saksi ni Jehova. Ang mga babaye mga Saksi diay nga taga-Mexico nga nanuroy sa Israel uban sa usa ka grupo sa mga turista, ug ilang nailhan ang literatura nga dala sa mga sister. Silang upat naghalog, naghagkanay, nagpaletrato, ug nagbayloayg adres. Human niana, ang mga sister nga taga-Mexico mibalik sa ilang grupo, ug ang duha ka lokal nga sister misangyaw na sa mga tindahan.

Pipila ka oras sa ulahi, usa ka polis ang miduol sa mga sister ug nangutana kon sila ba mga Katsila. Mitubag sila nga dili. Ang polis miingon nga nagtan-aw siya sa dihang silang upat nagkita, ug abi niyag sila karaang managhigala o kaha paryente. Ang mga sister misaysay nga sila mga Saksi ni Jehova, ug bisag ang mga Saksi naggikan sa lainlaing nasod o mao pay pag-ilaila, sama na silag pamilya kay sila may gugma sa usag usa. Nakadayeg kaayo ang polis nga siya mikuhag literatura ug nangutana kon asa makakuhag dugang impormasyon bahin sa atong relihiyon. Gihikay nga may makaduaw kaniya.

“BASIG DUNAY USA NGA MAMATI.” Si Yusuke maoy batan-ong payunir nga nakig-uban sa usa ka English nga grupo sa Japan. Usa ka adlaw, iyang nasayran nga modunggo pagkabuntag ang usa ka barko sakay ang mga turista gikan sa lainlaing nasod. Busa misayo siyag bangon ug midrayb ug duha ka oras ngadto sa pantalan sa Nagasaki bisag kusog ang ulan. Samtang nagtindog  sa pantalan, abi sa nangawas nga mga pasahero nga siya tiggiyag mga turista ug giduol siya. Ingong resulta sa sayop nga pagtuo sa mga turista, si Yusuke nakapahimutag 70 ka magasin ug 50 ka brosyur sa lainlaing pinulongan sa tunga lang sa oras.

Siya mibalik sa iyang kotse aron mokuhag dugang literatura, ug sa iyang pagbalik, nakita niya ang usa ka batan-ong lalaking pasahero nga nag-inusara. Sa dihang miduol si Yusuke, ang batan-on nangutana sa Iningles kon siya ba Saksi ni Jehova. Pagtubag ni Yusuke ug oo, ang batan-on mihilak. Gidala siya ni Yusuke sa kapehanan aron mag-estorya.

Ang batan-on mao ang 21 anyos nga si Jason. Siya miingon nga ang iyang ginikanan aktibong mga Saksi ug siya di-bawtismadong magmamantala hangtod sa mga 20 anyos siya. Unom ka bulan kanhi, siya mihunong sa pagpakig-uban sa mga Saksi ni Jehova ug misakayg barkong panglulinghayaw nga modunggo sa lainlaing nasod sa Asia, kay nagtuo nga dili siya makahibalag kanila didto. Apan kay nagdaot ang iyang tiyan, wala siya makakawas sa Thailand, Vietnam, o Taiwan. Sa Japan na siya unang nakakawas, ug ang unang nakig-estorya niya maoy Saksi  ni Jehova! Nakahunahuna dayon si Jason, ‘Dili gyod ko makalikay kang Jehova,’ ug kadtoy hinungdan nga siya mihilak.

Sa kapehanan, gihisgotan ni Yusuke kang Jason ang pipila ka parapo sa librong Gugma sa Diyos aron pasaligan siya nga si Jehova nahigugma gihapon kaniya. Gidasig ni Yusuke si Jason nga dili mobiya sa organisasyon. Ikasubo nga kadiyot ra ang ilang panag-uban. Ang barko milarga niadtong gabhiona paingon sa Inchon, South Korea, diin si Jason nagplanong mosuroyg pipila ka adlaw.

Si Yusuke naghunahuna kon unsa pay iyang mahimo sa pagtabang kang Jason ug siya nahinumdom sa usa ka brader nga iyang nahimamat sa internasyonal nga kombensiyon sa South Korea. Ang brader antigog Iningles ug nagpuyo sa Inchon. Giteleponohan siya ni Yusuke niadtong gabhiona. Siyempre, si Jason wala mahibalo niana. Pagkawas ni Jason sa barko pagkabuntag, gisugat siyag dakong karatula, “Welcome to Korea, Jason!” Kadto gikuptag lima ka mapahiyomong Saksi. Wala na idayon ni Jason ang iyang plano sa pagsuroy ug nakig-uban hinuon sa mga igsoon. Natandog kaayo siya sa dihang iyang nadungog ang eksperyensiya sa kaedad niyang mga brader nga nangapriso tungod sa ilang pagtuo. Mitambong usab siyag Memoryal didto.

Si Jason miuli sa United States, naaktibo pag-usab, ug mihangyo sa mga ansiyano nga tun-an siyag kaupat sa usa ka semana. Iyang nahuman pagtuon ang librong Gitudlo sa Bibliya ug Gugma sa Diyos ug nakuwalipikado sa bawtismo. Siya nabawtismohan 107 ka adlaw human sa unang pagpakigsulti ni Yusuke kaniya. Siya nag-oksilyare payunir pagkasunod bulan.

Si Yusuke nahinumdom nga niadtong tugnaw, nag-ulan nga buntag, gusto kaayo niyang moadto sa Nagasaki bisag walay kauban. Siya naghunahuna, “Basig dunay usa nga mamati didto.”

 EUROPE

KAYUTAAN 47

POPULASYON 736,505,919

MAGMAMANTALA 1,589,052

PAGTUON SA BIBLIYA 843,405

NAKAKAPLAG SILAG BILILHON KAAYONG BUTANG. Si Ani nga taga-Bulgaria miadto sa Holland aron motrabahog pipila ka bulan. Usa ka adlaw, kay nagmasulob-on, siya mihunong sa asiras ug miampo sa Diyos nga magpadalag “mga dakodako” gikan sa ilang simbahan. Samtang siya nag-ampo, dihay duha nato ka sister nga miagi ug mihunong aron sangyawan siya. Giisip ni Ani nga kadto tubag sa iyang pag-ampo, busa siya namati kanila ug misugod pagtambong sa tigom. Bisag wala makasabot si Ani sa gihisgotan sa tigom, iyang nakita ang gugma taliwala sa mga Saksi. Kadto lahi sa kawalay-panaghiusa sa iyang gianibang simbahan sa Bulgaria, ug siya nakombinsir nga nakakaplag siyag bililhon kaayong butang. Sa iyang pagpauli sa Bulgaria, ang sister nga nagdumala niyag pagtuon sa Holland mikuyog aron tabangan siya pagkontak sa mga Saksi sa Sofia. Tungod niana, misamot ang interes ni Ani ug mibati nga nakaplagan niya ang matuod nga relihiyon.

Wala madugay, si Ani ug ang iyang bana, si Ivo, nag-uban na sa pagtuon ug pagtambong sa mga tigom. Samtang nagpadayon ang ilang pagtuon, may pipila nga miduyog kanila. Ang usa mao si Assen, nga pastor sa usa ka relihiyosong grupo. Siya miduaw kang Ani ug Ivo aron pamatud-an nga sayop ang mga Saksi ni Jehova, apan sa wala madugay iyang naamgohan nga nasayop siya. Misukna siyag lalom nga mga pangutana bahin sa Bibliya.  Busa, gitanyagan siyag pagtuon, nga gidawat niya uban sa iyang pamilya. Gipadayon pa ni Assen ang pagdumalag mga serbisyo sa ilang relihiyon, apan ang gitudlo niya mao na ang kamatuoran nga iyang nakat-onan gikan sa librong Gitudlo sa Bibliya. Wala madugay, ang diakono sa grupo nga si Dencho gustong magtuon sa Bibliya. Ngadtongadto, tulo ka pamilya gikan sa grupo nagtuon na usab. Sanglit daghan na ang nagtuon uban sa mga Saksi ni Jehova, gihunong nila ang ilang serbisyo sa simbahan ug nanambong na sa mga tigom sa kongregasyon. Si Dencho nahimong magmamantala ug nagdumalag mga pagtuon sa Bibliya uban sa ubay-ubay niyang higala. Ingong resulta sa pagsangyaw kang Ani didto sa Holland, mga 30 ka tawo karon ang nagtuon sa Bibliya ug nagtambong sa mga tigom.

GIBASA LANG NIYA ANG MGA TEKSTO BAHIN SA KAMINYOON. Sa Czech Republic, usa ka brader ug iyang asawa ang nagdumalag pagtuon sa Bibliya diha sa Kingdom Hall uban sa batan-ong magtiayon gikan sa Mongolia. Bisag ang Saksing magtiayon naningkamot sa pagkat-og Mongolian, problema nila ang komunikasyon kay dili pa kaayo sila antigo niana. Hinuon, ang Mongolian nga magtiayon morag madinawaton sa kamatuoran uban ang kamapaubsanon ug kamapailobon. Usa ka gabii, ang asawa ray miabot sa tigom. Miingon siya nga nagplano siyang biyaan ang iyang bana kay nagkabangi sila. Pipila ka gutlo sa ulahi, ang bana miabot, nga wala gani motan-aw sa iyang asawa. Klaro nga seryoso ang ilang problema. Gidala sa brader ang bana sa librarya sa Kingdom Hall aron hisgotan ang problema. Apan kay ang brader dili kaayo antigog Mongolian, wala niya hisabti kon unsay problema sa magtiayon ug dili makahatag ug eksaktong tambag. Midesidir siya nga basahan lang niyag Bibliya ang bana. Busa gibasa niya ang tanang teksto nga iyang nahinumdoman bahin sa kaminyoon ug komunikasyon. Ang bana morag  natandog sa matag teksto nga gibasa. Sa kalit, siya migawas sa librarya, miduol sa iyang asawa ug mihalok kaniya. Sa ilang pagbiya sa tigomanan, miinsistir ang bana nga siyay magdala sa bag sa iyang asawa, sanglit iyang nakat-onan nga siya angayng motabang sa iyang asawa.

Pagkaugma, sila samag bag-ong minyo ug malipayong naghisgot bahin sa ilang dulot nga pagpabili kang Jehova ug sa maalamong tambag sa Bibliya bahin sa kaminyoon. Sa ulahi, namauli sila sa Mongolia aron atimanon ang duha nila ka anak. Walay kongregasyon sa ilang lungsod. Ang asawa nabawtismohan sa Oktubre, ug ang bana nag-uswag usab ug hapit nang mabawtismohan.

“NGANONG GIBUHATAN KO NIYA SA INGON?” Sa Ukraine, usa ka sister nga payunir, si Olha, misangyaw sa usa ka drayber ug trak nga tigdeliber ug pagkaon. Nangutana si Olha, “Duna pa ba kitay masaligan?”

“Wala na,” tubag sa drayber. “Gibiyaan ko sa akong asawa ug gidala pa niya ang among 2 anyos nga anak lalaki. Unsa pay iyang gusto? Nagkugi kog trabaho kada adlaw—gibuhat ko ang tanan para niya. Gihatag nako bisag unsay iyang gusto—singsing, sapatos, kuwentas—naa dayon! Para niya ang tanan, busa nganong gibuhatan ko niya sa ingon?”

Ang sister nangutana kon unsa ka dakong panahon ang iyang gigugol uban sa iyang asawa ug anak. Siya mitubag: “Unsa pay akong panahon uban nila nga hangtod tungang gabii man ko magtrabaho? Pagka-alas kuwatro sa buntag motrabaho na pod ko. Motrabaho pa gani kog Sabado ug Dominggo.”

Gipakitaan siya ni Olha sa Oktubre 2009 nga Pagmata! nga naghisgot sa espesyal nga serye, “Mga Sekreto sa Malamposong Pamilya.” Gipunting niya ang unang sekreto, “Ang Angayng Unahon.” Human mahisgoti ang maong ulohan, ang drayber morag natandog ug miingon: “Abi nakog kuwarta ang makapalipay sa pamilya ug ang  ubang butang dili na hinungdanon, apan dili diay. Nasabtan nako kon unsay nakulang ug kon unsay gikinahanglan sa akong asawa.”

Paglabay sa usa ka semana, nahibalag pag-usab ni Olha ang drayber nga miingon nga iyang gibasa ang magasin, namalandong pag-ayo, ug gihinuktokan ang daghang butang. Iyang giteleponohan ang iyang asawa, ug sila nagkauliay. Unya gihatagan siya ni Olha sa librong Kalipay sa Pamilya. Pagkasunod semana, sa dihang nakita ni Olha ang trak, lahi na ang drayber. Ang bag-ong drayber miingon nga ang kanhing drayber miundang na sa trabaho ug mibalhin sa laing dapit uban sa iyang pamilya. Hinuon, nagbilin siyag mensahe: “Salamat kanimo, Olha, ug sa imong Diyos, si Jehova, kay gitabangan ko nimo nga mahiusa pag-usab ang akong pamilya. Kon makahimamat kog mga Saksi, pirme kong makigkontak nila.”

GUSTO NIYAG ILHANAN GIKAN SA DIYOS. Usa ka batan-ong lalaki sa Latvia nainteres sa mensahe sa Bibliya mga 15 ka tuig kanhi sa dihang gisangyawan siya sa mga Saksi. Putolputol ang iyang pagtuon sa Bibliya, apan wala siya magtuo nga ang Bibliya—nga usa “lamang” ka basahon—makatabang kaniya sa pagkaplag sa Diyos. Siya nagdahom nga ang Diyos magpadayag kaniya sa personal, tingali sa milagrosong paagi. Busa mihunong siya pagtuon sa Bibliya ug wala na makigkontak sa mga Saksi. Pipila ka tuig sa ulahi, nakasinati siyag daghang problema, busa siya miampo sa Diyos alang sa tabang. Wala  gihapoy milagrong nahitabo, apan sa dihang midungaw siya sa bentana, nakakita siyag duha ka sister nga nagsangyaw. Human mag-ampo pag-usab pipila ka semana sa ulahi, nakita na usab niya ang maong mga sister nga milabay. Paglabayg usa ka semana miampo na usab siya, ug nakita niya sa ikatulong higayon nga milabay ang mga sister nga nagsangyaw. Nakahinapos siya nga kadto usa gayod ka ilhanan gikan sa Diyos! Siya migawas dayon ug giingnan ang natingalang mga sister nga gusto niyang ipadayon ang pagtuon sa Bibliya nga iyang gihunong pipila ka tuig kanhi. Ngadtongadto, nabuntog niya ang iyang mga problema ug siya nasuod sa Diyos. Sa unsang paagi? Sa tabang sa Bibliya! Siya nabawtismohan sa distritong kombensiyon sa 2010.

BISAG ANG MGA ANGLIT DUNAY DALUNGGAN. Sa Denmark, kini nga panultihon nagpasabot nga ang mga bata daghag mapunit nga impormasyon sa panagsultihay sa dagkong tawo kay sa atong gituohan. Mga 16 ka tuig kanhi, usa ka Danish nga sister nagdumalag pagtuon sa Bibliya uban sa usa ka babaye nga may tulo ka anak nga lalaki.  Silang tulo sagad moapil sa maong pagtuon, nga gihimo sa balay sa sister ug sa iyang bana. Gihunong sa babaye ang pagtuon sa dihang ang iyang kamanghoran, si Ronnie, 8 anyos pa. Samtang nagkahingkod, si Ronnie nakasinatig daghang problema. Apan, usa ka adlaw sa 2008, sa dihang siya 22 anyos na, iyang nakita ang atong mga magasin sa balay sa iyang inahan ug sa kalit nakahunahuna siya nga moduaw sa mga Saksi nga nagtuon kanila sa bata pa siya. Sa 15 minutos lang, nagtimbre na siya sa balay sa Saksing magtiayon, ug sa pagbukas sa brader sa pultahan, si Ronnie mideretsog sulod. Ang brader wala dayon makaila niya, apan siya nalipay nga nagkita sila pag-usab. Gidawat ni Ronnie ang librong Gitudlo sa Bibliya ug miuyon nga magtuon sa Bibliya. Maayo ang ilang pagtuon. Ugaling lang, kay si Ronnie hilig kaayog mga dula sa computer, nga ang pipila bahin sa espiritismo ug kapintasan, ang iyang nakat-onan sagad ilangkit niya sa maong mga dula. Gipatin-aw kaniya sa mga Saksi nga ang atong pagsabot sa espirituwal nga mga butang dili angayng ibase sa hinanduraw nga mga dula. Si Ronnie  nakasabot ug miingon: “Palihog badlonga ko kon mohisgot na ko niana!” Sukad niadto, maayo ang iyang pag-uswag sa espirituwal. Kining batan-ong lalaki, nga unang nakadungog sa kamatuoran sa dihang nagtuon sa Bibliya ang iyang inahan samtang siya ‘anglit pa nga may dalunggan,’ usa na karon ka di-bawtismadong magmamantala.

KAHUPAYAN GIKAN SA KASULATAN. Sa usa ka menteryo sa Britain, namatikdan sa usa ka brader ang usa ka lalaki nga nagluhod daplin sa usa ka lubnganan ug naghilak. Mihangyo ang brader kon makalingkod ba siya tupad niya. Ang lalaki, nga ginganlag Alf, misugot ug unya siya miingon: “Bag-o pang namatay ang akong anak nga babaye. Siya 42 anyos lang. Siya ug ang akong asawa gilubong dinhi.” Mihangyo siyag propesyonal nga tambag gikan sa estado apan gipahulat siyag tulo ka bulan. “Ako dato nga negosyante ug daghag negosyong giapilan,” matod ni Alf, “apan ang tanan walay kapuslanan kon wala ang akong pamilya. Andam kong ihatag ang tanan mahibalik lang sila.” Si Alf miingon nga siya nagtuo ug Diyos, nagtahod sa Bibliya, ug tigsimba, apan may mga pangutana siyang wala matubag. Sa simbahan, sa dihang nangayo siyag kahupayan, gisugo siya sa pagdagkot ug kandila o pagsulat ug nota nga ibitay sa kahoy. “Dili paigo sa gamayng papel ang tanang buot nakong isulti,” siya misumbalik. Ang brader naghupay kang Alf pinaagi sa Kasulatan. Si Alf nagtuon na karon sa Bibliya.

 OCEANIA

KAYUTAAN 29

POPULASYON 38,162,658

MAGMAMANTALA 94,309

PAGTUON SA BIBLIYA 58,465

ILANG GIDAPIT ANG BANA. Usa ka brader sa New Zealand nag-asoy nga sa dihang gihatod niya ang iyang asawa aron magdumalag pagtuon sa usa ka batan-ong inahan, naabtan nila ang iyang bana, busa gidapit nila siya nga moapil sa pagtuon. Miuyon ang bana, ug gihikay nila nga magtuon siya kon anaa ra siya sa balay. Siya ug ang iyang asawa misugot nga motambong sa tigom pagka-Dominggo, ug sila giabiabi pag-ayo ug nakapahimulos sa programa. Sa sunod nilang pagtambong, ang bana mikomento panahon sa Pagtuon sa Bantayanang Torre. Ang tun-anang artikulo naghisgot bahin sa pamilyahanong pagsimba, ug siya nangutana kon unsaon pagdumalag pagtuon uban sa iyang asawa ug 4 anyos nga anak. Miingon usab siya nga gusto niyang ipadapat ang ubang butang nga iyang nadunggan sa tigom. Ang interesadong magtiayon nagpadayon sa pagtuon, pagtambong sa tigom, ug sa pag-uswag sa espirituwal. “Mapasalamaton kaayo mi nga among gidapit ang bana nga moapil sa pagtuon,” matod sa brader.

MEMORYAL SA LAYONG ISLA. Ang isla sa Reao, nga may 362 lang ka molupyo, giasayn sa Vaiete Congregation, nga usa sa 18 ka kongregasyon sa Tahiti. Ang Reao maoy mga 1,350 kilometros sidlakan sa Tahiti. Wala pa sukad ikapahigayon ang Memoryal niining islaha, ug 30 ka  tuig na nga wala kini maadtoi sa mga Saksi. Si Manoah, nga magtatan-aw sa pag-alagad sa Vaiete Congregation, gustong mag-organisar ug gamayng grupo aron mosangyaw niining islaha sa semana sa Memoryal, ug saulogon kana didto. Ugaling lang, ang tiket sa ayroplano para nilang magtiayon mokantidad ug mga 65,000 francs ($740 U.S.), ug dili gayod sila makaarang niana. Apan sa ulahi, si Manoah nakadawat ug bonus sa iyang trabaho nga 65,000 francs! Nakahinapos dayon sila nga si Jehova nagpanalangin sa maong kahikayan. Pito ka magmamantala ang nangadto sa Reao, ug 47 ang mitambong sa Memoryal. Karon, ang mga magmamantala sa Tahiti nagdumalag mga pagtuon sa Bibliya uban sa mga interesado sa Reao pinaagig telepono.

WALAY PANAHON SA PAGPAMAHAW. Adunay susamang kasinatian sa Vanuatu, diin ang usa ka kongregasyon nagsuportar sa usa ka grupo sa 11 ka magmamantala sa layong isla nga gitawag ug Ambrym. Ang mga ansiyano sa kongregasyon nagdasig sa eksperyensiyadong mga magmamantala nga palandongon ang pag-adto sa Ambrym sulod sa pipila ka adlaw aron mosangyaw uban sa grupo una pa ang Memoryal. Si Marinette, usa ka eksperyensiyadong regular payunir ug retiradong maestra, misanong. Siya, ug ang uban pa, midesisyon nga moadto sa tuyo nga makasugod ug bag-ong mga pagtuon sa Bibliya. Human makasangyawg kadiyot, nasorpresa siya kay halos di na siya makabiya sa balay nga iyang gisak-an. Si Marinette nahinumdom: “Hapit di na ko makaligo o makapamahaw kay ang mga tawo naglinya na sa gawas alang sa pagtuon sa Bibliya. Ako nagsangyaw  sa tibuok adlaw nga way biyabiya sa balay! Nakadumala kog 31 ka pagtuon sa Bibliya nianang semanaha.” Ang maong grupo migugol ug usa ka semana sa Ambrym, nga nagkugi sa pagsangyaw sa maayong balita, ug 158 ang mitambong sa Memoryal. Ang grupo nawili nga mobiya sa isla. “Unsaon nimo pagbiya niining lugara nga daghan kaayo ang giuhaw sa kamatuoran!” matod ni Marinette. Ang sangang buhatan nagpadalag temporaryong mga espesyal payunir aron atimanon ang mga interesado sa maong dapit.

MAAYOG SANONG ANG PRINSIPAL. Sa usa ka hayskul sa Solomon Islands, ang mga estudyante kinahanglang motindog ug mokantag relihiyosong mga awit sa South Seas Evangelical Church. Ang duha ka batan-ong sister mihangyo sa prinsipal nga dili sila moapil kay kana supak sa ilang konsensiya. Ang prinsipal nagpasalamat kanila tungod sa matinahorong pagduol kaniya ug miingon nga dili sila kinahanglang mokanta kondili makalingkod ra kauban sa ubang estudyanteng Saksi.

Dayon, ang prinsipal mihangyo kanila nga may usa gikan sa kongregasyon nga makigsulti kaniya bahin sa mga Saksi ni Jehova ug sa edukasyon. Usa ka misyonaryo ang miadto, ug sulod sa usa ka oras ug tunga, ilang gihisgotan ang atong mga pagtulon-an ingon man ang mga problema nga giatubang sa mga batan-on. Ang prinsipal miingon nga tigbasa siyag Pagmata! ug tigbilin siyag mga kopya niana sa faculty room. Sa dihang  gitanyagan siya sa misyonaryo sa librong Mga Pangutanang Gisukna sa mga Batan-on—Mga Tubag nga Mosaler, Tomo 2, nangayo siyag 16 ka kopya para sa mga magtutudlo ug 367 para sa mga estudyante. Upat ka gatos ka libro ang gideliber ug giapod-apod.

Tungod sa kaisog niining duha ka batan-ong sister sa pagduol sa prinsipal, usa ka maayong pamatuod ang nahatag, ug nakadawat silag daghang komento nga mapuslanon gayod kining libroha. Ang usa ka batan-ong babaye, kansang mga ginikanan bag-o pang nagbulag, miingon nga ang libro mao gayod ang iyang gikinahanglan nga makatabang kaniya sa pagsagubang sa iyang mga problema. Ang duha ka sister padayong nag-oksilyare payunir, ug regular nga naghatod ug mga magasin sa prinsipal.

MATINUMANON BISAG GILUTOS. Sa laing lugar sa Solomon Islands, usa ka misyonaryo ang nagdumalag pagtuon sa Bibliya uban sa usa ka babaye, nga nganlan natog Lisa. Maayo ang iyang pag-uswag sa espirituwal bisan pag mobaktas siyag kapig duha ka oras ngadto sa Kingdom Hall uban sa iyang gagmayng kaluhang anak nga lalaki, ug duha pa ka batang babaye. Kinahanglan usab niyang antoson ang grabeng pagsupak sa iyang bana. Gibun-og siya ug gisunog ang iyang mga sinina nga pangtigom, Bibliya, ug ubang literatura. Nangabit pa gyod ang iyang bana. Bisan pa niining tanan, si Lisa nabawtismohan ug padayong nag-alagad kang Jehova.

Sa miaging tuig, gibiyaan sa bana ang iyang kabit ug mihangyo nga tun-an siya sa Bibliya kay natandog sa kaayo ni Lisa bisan pag iyang gilutos. Segurado nga si Lisa nalipay gayod sa kausaban sa iyang bana. Misamot pa ang iyang kalipay kay naporma ang usa ka grupo duol sa ilang balay, ug karon wala nay usa ka oras ang iyang baktason paingon sa tigom. Sa tabang sa iyang bana, siya nakaoksilyare payunir usab.

[Blurb sa panid 66]

“Nganong pintas kaayo ang Diyos? . . . Nganong silotan man ang akong anak? Mao pay iyang pagkatawo. Unsa may iyang sala?”

[Blurb sa panid 68]

Giingnan sa batan-on ang konsilyo nga siya mobalik sa simbahan kon ang pari makatubag sa duha ka pangutana

[Blurb sa panid 72]

“Gipriso mo kay nagsangyaw mo sa gawas, ug karon nagsangyaw na pod mo dinhi sa sulod!”

[Diagram/Mapa sa panid 84]

(Alang sa aktuwal nga pagkahan-ay, tan-awa ang publikasyon)

Tahiti → → → 1,350 kilometros → → → Reao

[Hulagway sa panid 56]

Ibabaw: Nagdumalag pagtuon sa Bibliya sa Republic of the Congo (tan-awa ang  panid 59)

[Hulagway sa panid 61]

Si Edvard (tuo) uban ni Daniel sa usa ka tiyanggihan

[Hulagway sa panid 64]

Samaniego, Nariño, COLOMBIA

[Hulagway sa panid 67]

Ang senyas ug pinulongan nga mga publikasyon mabatonan na karon sa 59 ka pinulongan

São Paulo, BRAZIL