Sulat Gikan sa Nagamandong Lawas

Minahal nga mga Isigka-Saksi ni Jehova:

Kami nalipay sa pagsulat kaninyo, minahal nga matinumanong mga alagad ni Jehova, nga karon kapin nag pito ka milyon. Sa dihang makahimamat kitag isigkamagtutuo gikan sa laing bahin sa kalibotan, mobati dayon kitag inigsoong pagmahal kaniya. (Juan 13:34, 35) Segurado nga bation mo usab kana inigbasa nimo sa makaiikag nga mga asoy sa pagtuo ug pagkamaunongon sa imong mga igsoon sa lainlaing nasod nga gisaysay niining Tinuig nga Basahon.

Ang mga report sa tibuok kalibotan nagpakita nga daghan kaninyo ang may regular nga Pamilyahanong Pagsimba. Ang uban kaninyo nga adunay gagmayng anak naggamit ug lainlaing paagi aron kini makapainteres sa mga bata. (Efe. 6:4) Ang relasyon sa magtiayon mas nalig-on tungod sa pagtuon nga magkauban. (Efe. 5:28-33) Sa pagkatinuod, nakabenepisyo ang mga indibiduwal ug mga pamilya niining kahikayan sa matukiong pagtuon sa Pulong sa Diyos.—Jos. 1:8, 9.

Alang niadtong nabiktima sa nangaging mga kalamidad, kami misimpatiya kaninyo. Kami nagpasalamat sa daghang igsoon nga makugihong nakigbahin sa kahikayan sa panghinabang panahon sa kalamidad. (Buh. 11:28-30; Gal. 6:9, 10) Gawas pa, sa matag kongregasyon, dunay mga igsoon nga nakakita sa materyal nga panginahanglan  sa ubang igsoon ug kinabubut-ong nagtabang kanila. Sama ni Dorcas sa unang siglo, kamo “daghag maayong mga buhat ug mga gasa sa kaluoy.” (Buh. 9:36) Makasalig kamo nga si Jehova nakakita niini ug siya magabalos kaninyo.—Mat. 6:3, 4.

Sa pipila ka kayutaan, ang inyong katungod giyatakan niadtong nagtuis sa mga balaod aron ‘magmugnag kasamok pinaagig mando.’ (Sal. 94:20-22) Kay kamo nahibalo nga kini gitagna ni Jesus, kamo maisogong nagsagubang sa paglutos ug padayong nagsalig kang Jehova. (Juan 15:19, 20) Kamo makaseguro, minahal nga mga igsoon, nga gilakip namo kamo sa among mga pag-ampo samtang kamo nagpadayon sa “pagdepensa atubangan sa tanan nga mangayo kaninyog katarongan sa paglaom nga anaa kaninyo.”—1 Ped. 3:13-15.

Among giapresyar ang milyonmilyon nga nagpabiling hinlo sa moral bisan pag si Satanas malimbongong nagpasiugda sa imoralidad. Niining panahona nga ubos kaayo ang sukdanan sa moral sa kalibotan, kamo ‘nagbaton ug gahom diha sa Ginoo ug diha sa pagkagamhanan sa iyang kusog.’ (Efe. 6:10) Inyong ‘gisul-ob ang kompletong armadura gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.’ (Efe. 6:11, 12) Hibaloi nga si Jehova naggamit sa inyong panig-ingnan ingong tubag sa pagbiaybiay ni Satanas!—Prov. 27:11.

Nalipay kami nga sa 2011 dihay 19,374,737 nga mitambong sa Memoryal sa kamatayon sa atong Ginoo. Usa ka hinungdan nianang makapahinganghang  gidaghanon mao nga daghan kaninyo ang nag-oksilyare payunir sa bulan sa Abril. Milyonmilyon ang nakadungog sa hiniusang tingog sa pagdayeg kang Jehova gikan sa iyang maunongong mga Saksi! (Roma 10:18) Kon ikaw usa sa 2,657,377 nga nag-oksilyare payunir nianang bulana o kaha migugol ug mas daghang oras sa pagsangyaw, kami nalipay gayod tungod sa inyong masakripisyohong tinamdan ug kadasig sa buluhaton.—Sal. 110:3; Col. 3:23.

Sa miaging tuig, dihay 263,131 nga nagpabawtismo ingong simbolo sa ilang pagpahinungod kang Jehova. Kami nagpasalamat kang Jehova tungod niini, ug kaninyong tanan tungod sa inyong pagduyog kanamo sa pagdapit sa uban: “‘Umari ka!’ Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” (Pin. 22:17) Ilabina human mahisgoti ang lainlaing detalye sa natukod nang Gingharian sa Diyos panahon sa atong 2011 nga distritong mga kombensiyon, kita mas maikagong moingon, “Paanhia ang Gingharian sa Diyos!” Kay nadasig sa pasalig ni Jesus nga “Ako moabot sa madali,” kita kinasingkasing nga moduyog kang apostol Juan sa pagtubag: “Amen! Umari ka, Ginoong Jesus.”—Pin. 22:20.

Samtang nagpaabot kamo nianang kulbahinam nga hitabo, magmasaligon nga kami nahigugma gayod sa matag usa kaninyo, minahal nga mga igsoon, kinsa nagpamatuod sa inyong gugma kang Jehova “sa buhat ug sa kamatuoran”!—1 Juan 3:18.

Inyong mga igsoon,

Nagamandong Lawas sa mga Saksi ni Jehova