Dihang nalinawlinaw na, namalik ang mga igsoon sa kanhi nilang gipuy-an. Ang mga kongregasyong nabungkag panahon sa gubat, ilabina sa sidlakang bahin sa Sierra Leone, naporma pag-usab. Ang mga espesyal payunir sa usa ka lugar mitaho: “Sa una namong tigom, 16 ang mitambong, 36 sa sunod, unya 56, ug 77 ang mitambong sa Memoryal! Nalipay mi kaayo!” Naporma ang 9 ka bag-ong kongregasyon, busa 24 na tanan. Miabot ang napulo ka bag-ong misyonaryo sa Gilead, nga mas nakadasig sa pagsangyaw! Sa 2004 nga Memoryal, ang mitambong 7,594—kapig lima ka pilo sa gidaghanon sa magmamantala! May samang pag-uswag sa Guinea.

Ang Nagamandong Lawas mipagawas dayog pondo aron itabang sa namalik nga mga igsoon. (Sant. 2:15, 16) Ang ibalhinbalhing mga grupo sa boluntaryo nagtukod o nag-ayog 12 ka Kingdom Hall ug usa ka Assembly Hall sa Koindu. Nagtukod sab silag 42 ka simpleng tisa nga balay para sa pamilyang nagub-ag balay. Usa ka biyudang sister nga kapig 70 anyos, nga nanaligdig ang mga luha sa kalipay ug nagbarog duol sa iyang balay nga inaptag sin, miingon: “Salamat, Jehova! Salamat, Jehova! Salamat, mga igsoon!”

Ang sangang buhatan misugod sab pagpanukod ug Kingdom Hall gamit ang pondo nga gitagana para sa kabos nga mga nasod. Si Saidu Juanah, ansiyano ug payunir sa Bo West Congregation, miasoy: “Usa ka sister  miingon nako, ‘Kon makabati gani ko nga tukoran tag Kingdom Hall, mopakpak gyod ko sa akong mga kamot, hasta tiil!’ Dihang akong gipahibalo nga tukoran mig bag-ong Kingdom Hall, ang sister kalit nga nakatindog, nga mipakpak ug misayawsayaw pa—‘gipakpak’ gyod tuod niya ang iyang mga kamot ug tiil!”

Sa 2010, gipahinungod sa Waterloo Congregation ang bag-ong Kingdom Hall nga puwedeng gamiton nga Assembly Hall para sa 800 ka tawo. Sa adlaw nga gipalit ang lote, dihay mipuhal sa presyo pero ang tag-iya miingon, “Gusto nako nga relihiyosong bilding ang tukoron sa akong lote imbes negosyohanan.”

Ubos sa kahikayan sa pagtabang sa kabos nga mga nasod, 17 ka Kingdom Hall ang natukod sa Sierra Leone, ug 6 sa Guinea. Daghan ang nadasig sa pagtambong ug tigom tungod niining simple pero desenteng mga dapit sa pagsimba.

Dihang daghan na ang naaktibo, ang sangang buhatan mihikay ug duha ka bulang kampanya sa pagsangyaw sa mga teritoryo nga panagsa rang makobrehan. Sila nakapahimutag mga 15,000 ka libro ug daghan silag nindot nga eksperyensiya. May pipila nga nangutana kon magtukod ba silag kongregasyon sa maong mga lungsod. Ngadtongadto, natukod ang duha ka kongregasyon. Sa usa ka hilit nga balangay, nakaplagan sa mga brader ang duha ka sister nga namakwet panahon sa gubat ug wala nay kontak sa organisasyon. Sila nag-organisar dayon ug regular nga mga tigom ug nakasugod ug mga Bible study didto.

Sa 2009, ang sangang buhatan nakadungog nga may mga Saksi kuno sa usa ka balangay sa lasang sa Guinea.  Dihang gipasusi kana sa mga brader, nasayran sa sangang buhatan nga dihay retiradong brader nga mipauli sa iyang natawhang balangay. Sa wala pa siya mamatay, may na-Bible study siya nga mga lalaki. Usa kanila mituo kang Jehova ug misugod pagpaambit sa iyang nakat-onan. Nagpahigayon sab siyag mga tigom gamit ang mga basahon sa namatayng brader. Ang grupo 20 ka tuig nang nagsimba kang Jehova una madiskobrehi sa usa ka magmamantala. Ang sangang buhatan nagpadala dayog mga brader aron tabangan sila sa espirituwal. Sa 2012, may mitambong nga 172 sa Memoryal sa kamatayon ni Kristo.

Di pa dugay, nagkadaghan ang nakaplagan nga ‘nawalang mga karnero.’ Sila kadtong nahilayo sa kongregasyon o kaha napalagpot. Daghan kanila nagbag-o ug namalik sa kamatuoran. Sila malipayong gidawat sa katawhan ni Jehova.—Luc. 15:11-24.

Dihang nakig-ambit sa maayong balita, si apostol Pablo nahimong “tanang butang ngadto sa tanang matang sa katawhan.” (1 Cor. 9:22, 23) Sa susama, ang mga alagad ni Jehova sa Sierra Leone ug Guinea nagpasibo sa ilang paagi aron makasangyaw sa lainlaing tawo. Pananglitan, tagda kon giunsa sa pipila ka magmamantala pagpangatarongan sa dili-panatikong mga Muslim, ang kinadak-ang relihiyon sa duha ka nasod.

Si Saidu Juanah, kanhi Muslim, misaysay: “Ang mga Muslim nagtuo nga si Adan gilalang gikan sa abog, apan una pa niana siya nabuhi na sa paraiso sa langit. Sa pagpasabot nila, ako mangutana, ‘Asa gikan ang abog?’

“‘Sa yuta,’ motubag sila.

 “‘Busa diin gilalang si Adan?’ mangutana na sab ko.

“‘Sa yuta,’ motubag sila.

“Aron maklaro ang punto, basahon nako ang Genesis 1:27, 28 ug mangutana, ‘Ang langitnong mga linalang manganak ba?’

“‘Dili. Walay lalaki ni babaye sa mga anghel,’ motubag sila.

“‘Sa gisugo sa Diyos si Adan ug Eva nga manganak, diin man sila?’ mangatarongan ko.

“‘Sa yuta,’ motubag sila.

“‘Busa dihang ipasig-uli sa Diyos ang Paraiso, asa man unya ang Paraiso?’ mangutana ko.

“‘Dinhi sa yuta,’ tubag nila.”

Si Saidu miingon, “Tungod sa maong pangatarongang base sa Kasulatan, daghang sinserong Muslim ang padayong mamati ug modawat ug literatura sa Bibliya.”

Tagda si Momoh, Muslim nga tag-iyag tindahan nga gustong mahimong Imam. Dihang ang mga misyonaryong Saksi nangatarongan base sa Kasulatan, si Momoh nainteres. Siya mitambong ug usa ka sesyon sa sirkitong asembliya ug nakaangay sa iyang nadunggan. Upat ka adlaw sa ulahi, siya ug ang iyang asawa, si Ramatu, ug lima ka anak mitambong sa Memoryal sa kamatayon ni Jesus. Gisugdan dayon ni Momoh ang seryosong pagtuon sa Bibliya. Human sa pipila ka pagtuon, wala na siya mamaligyag sigarilyo. Ingnon niya ang mamalitay nga kana makadaot sa lawas ug supak sa Diyos. Siya nag-study sab sa iyang asawa ug mga anak sa tindahan. Kon may mamalit samtang nag-study, pahulaton niya sila kay ang Bible study importante kaayo sa iyang pamilya. Dihang gipalegal nila ang ilang kaminyoon,  misupak pag-ayo ang ilang mga pamilya. Si Momoh ug Ramatu lig-ong mibarog, ug maisogong nagpamatuod sa mga paryente, nga sa ulahi nakadayeg sa maayo nilang panggawi. Si Momoh nabawtismohan sa 2008, ug si Ramatu sa 2011.

Ang katawhan ni Jehova maisogong nagtuboy sa moral nga mga sukdanan sa Diyos, apil sa iyang panglantaw bahin sa dugo. (Buh. 15:29) Nagkadaghang medikal nga propesyonal sa Sierra Leone ug Guinea ang nagtahod sa ilang baroganan.

Sa 1978, ang mga igsoon nanagtag sa pulyetong Jehovah’s Witnesses and the Question of Blood sa mga  doktor, nars, administrador sa ospital, abogado, ug huwes sa tibuok Sierra Leone. Wala madugay, usa ka nagbati nga sister nag-internal bleeding, pero ang mga doktor dili motambal niya kon dili siya magpaabonog dugo. Hinuon, may doktor nga misugot kay nakabasa sa maayong pangatarongan sa pulyetong Blood. Ang sister nanganak ug himsog nga batang lalaki ug naayo.

Sa mga 1991, si Dr. Bashiru Koroma, siruhano sa Kenema Hospital, nakabasa sa brosyur nga Sa Unsang Paagi ang Dugo Makaluwas sa Imong Kinabuhi? Kay nakadayeg niini, siya misugod pag-Bible study ug pagtambong sa tigom. Dihang ang usa ka nuybe-anyos nga lalaking Saksi naaksidente ug grabeng nadaot ang usa ka organo sa iyang lawas, ang mga doktor midumili pag-opera kaniya kon dili magpaabonog dugo. Ilang giingnan ang iyang ginikanan, “Hala, iuli nang inyong anak aron didto mamatay!” Ang mga ginikanan miduol kang Dr. Koroma, nga malamposong nakaopera sa bata.

Sa wala madugay, si Dr. Koroma nahimong Brader Koroma—hugot nga tigdepensa sa pagpanambal nga dili moabonog dugo. Siya gitamay sa ubang doktor tungod sa iyang baroganan, pero ang iyang mga pasyente nangaayo. Sa ulahi, ang pipila niya ka kauban nagpatabang kaniya sa lisod nga mga operasyon.

Sukad sa 1994, ang Hospital Information Desk sa sangang buhatan sa Freetown nagtukod ug mga Hospital Liaison Committee sa Sierra Leone ug Guinea. Sila mahigugmaong nagtabang sa mga Saksi nga nasakit ug nakakombinsir ug daghang doktor nga tahoron ang atong baroganan bahin sa dugo.