Sa Hunyo 1947, tulo ka graduwado sa Watchtower Bible School of Gilead—si Charles Fitzpatrick, George Richardson, ug Hubert Gresham—nangabot sa Freetown. Sila ang unang mga misyonaryo nga nangabot.

Nakita sa mga misyonaryo nga ang mga magmamantala dasig sa pagsangyaw, pero kinahanglan pa silang bansayon sa pagpanudlo. (Mat. 28:20) Busa ilang gitudloan sila kon unsaon pagbalikduaw ug pagdumalag Bible study. Gipaambit usab nila ang bag-ong instruksiyon bahin sa mga tigom sa kongregasyon ug sa teokratikanhong organisasyon. Usa ka miting publiko ang gipahigayon sa Wilberforce Memorial Hall. Nalipay ang mga misyonaryo kay 450 ang mitambong! Sa ulahi, gisugdan sa mga misyonaryo ang senemanang Magazine Day. Kini nga pagbansay nakapalig-on sa kongregasyon ug nag-andam kanila alang sa umaabot nga pag-uswag.

Kasamtangan, ang mga misyonaryo nalisdan sa klima. Ang 1948 nga taho sa sangang buhatan miingon: “Lisod sagubangon ang klima sa Sierra Leone. Sa usa ka tuig, ang ting-ulan dangtag unom ka bulan, ug ang ulan kusog ug way hunong nga tagduha ka semana usahay. Sa ting-init, makapagba ang kainit ug grabe ka igang.” Ang taga-Europe nga unang mibisita sa Sierra Leone nagtawag niini nga lubnganan sa mga puti. Dagsang ang malarya, yellow fever, ug ubang sakit sa tropiko. Ang mga misyonaryo sunodsunod nga nasakit ug kinahanglang mobiya.

 Siyempre, nasubo ang mga magmamantala sa panghitabo. Pero wala sila mohunong. Tali sa 1947 ug 1952, ang kinatas-ang ihap sa magmamantala miuswag gikan sa 38 ngadto sa 73. Sa Waterloo, usa ka lungsod duol sa Freetown, ang kugihang mga payunir mitabang sa pagtukod ug bag-ong kongregasyon. Naporma ang bag-ong mga grupo sa Kissy ug Wellington, sa gawas sa Freetown. Ang Sierra Leone daw andam nang mouswag. Sa unsang paagi mahitabo kini?

Sa Nobyembre 1952, ang kapig 30 anyos ug yagpisog lawas nga Amerikano mikawas sa pantalan sa Freetown ug miduyog sa kakisaw sa siyudad. Ang bisita, si Milton G. Henschel nga gikan sa tibuok-kalibotang hedkuwarter, nahinumdom: “Nahingangha ko pagkakitag usa ka modernong siyudad nga mas hinlo kay sa ubang siyudad sa kalibotan. . . . Sementadong dalan, daghag kustomer nga mga tindahan, bag-ong mga kotse, ug way-kataposang pagngadto-ngari sa mga tawo.”

Si Brader Henschel mibaktas paingon sa puy-anan sa misyonaryo sa Freetown, duha ka bloke gikan sa nabantog nga Kahoyng Duldol. Iyang gipahibalo sa mga igsoon didto nga ang Sierra Leone makadawat ug dugang tabang. Pagka-Dominggo, 253 ang nagdasok sa Wilberforce Memorial Hall aron mamati sa makapahinam nga mga pahibalo: Ang Sierra Leone makabatog sangang buhatan, magtatan-aw sa sirkito, ug mga sirkitong asembliya; ang grupo sa Kissy mahimong kongregasyon; ug kobrehan ang mas daghang probinsiya. Labihang lipaya sa mga mamiminaw!

Si Brader Henschel miasoy: “Nagsige silag ingong kusheh, pulong sa kahinangop nga nagkahulogang ‘maayo kaayo!’ Malipayon kaayo sila. Ang mga panon sa  nanambong gabii nang namiya sa tigomanan, . . . ang uban nanganta pa.”

Ang bag-ong abot nga misyonaryong si William Nushy maoy gitudlo nga magdumala sa bag-ong sangang buhatan. Si William nagtrabaho kanhi ingong tigbangka sa mga kasino sa United States. Dihang nahimong Kristohanon, miundang siya sa maong trabaho ug nangupot pag-ayo sa matarong nga mga prinsipyo—nga tungod niana gihigugma ug gitahod siya sa mga magmamantala sa Sierra Leone.