Panahon sa malisod nga mga tuig sa pagdili, sila Lennart ug Virginia Johnson, ug Roy ug Juanita Brandt nagpabilin sa ilang asaynment ingong misyonaryo. Si Lennart miingon: “Ako ug si Roy Brandt gipatawag aron sukitsukiton. Una pa niana, ang mga opisyales sa gobyerno ni Trujillo nagpatawag sab kang Brader Manuel Hierrezuelo.” Ikasubo, si Manuel gipatay panahon sa pagsukitsukit, pero nagmatinumanon siya hangtod sa kataposan. Unsay nahitabo kang Lennart ug Roy? Si Lennart midugang: “Pag-abot namo gibulag mi una gisukitsukit, ug girekord ang among mga tubag. Wala nay nahitabo human niadto, pero duha ka bulan sa ulahi gibalita sa mga mantalaan nga gitangtang na ang pagdili sa mga Saksi ni Jehova ug makapadayon na mi sa among buluhaton.”

Sa wala pa ang pagdili niadtong 1950, dihay 261 ka magmamantala sa Dominican Republic nga nakigbahin sa pagsangyaw. Sa gitangtang ang pagdili niadtong Agosto 1956, diha nay 522 ka magsasangyaw. Nalipay gyod ang mga igsoon sa pagkahibalo nga gawasnon na silang makasangyaw human sila gipriso, gidid-an, ug gipanid-an sulod sa unom ka tuig.

Unsay sanong sa katawhan ni Jehova sa maong kausaban? Ila dayong gisugdan ang pag-organisar sa buluhaton! Nangita silag lugar nga katigoman ug naghimog bag-ong mga mapa sa teritoryo ug mga rekord sa kongregasyon. Nalipay ang mga igsoon nga puwede na silang makaorder ug makadawat ug literatura. Gipahimuslan nilag maayo ang ilang kagawasan sa pagsangyaw.  Ingong resulta, sulod lang sa tulo ka bulan, sa Nobyembre 1956, diha nay 612 ka magmamantala nga nakigbahin sa pagsangyaw.

Milihok dayon ang Katolikong mga pari aron daoton ang mga Saksi. Tungod sa kasabotan ni Trujillo ug sa Vatican, gipangusgan sa mga pari ang pag-impluwensiya sa gobyerno nga wagtangon ang mga Saksi. Gipadal-ag memorandum sa pari nga si Oscar Robles Toledano ang State Secretary of the Interior nga si Virgilio Álvarez Pina, nga naghangyo sa gobyerno nga suportahan siya sa iyang paningkamot nga “paamgohon ang mga taga-Dominican Republic sa kapeligrohan nga dala sa sektang ‘Saksi ni Jehova’.”

Gipatin-aw ni Toledano ang iyang pangunang tumong nga mao ang “pagdaot sa buluhaton sa mga Saksi ni Jehova aron wala silay madani.” Girekomendar sab  sa memorandum ni Toledano nga idili sa nasod ang mga publikasyon, “ilabina ang librong ‘The Truth Shall Make You Free’ ug magasing Watchtower.”

Ang mga lider sa relihiyon ug ang ilang mga kakunsabo diha sa administrasyon ni Trujillo miapil sa planong pag-atake sa mga Saksi. Sa Hunyo 1957, ang presidente sa Dominican Party nga si Francisco Prats-Ramírez nagpadalag memorandum kang Trujillo, nga nag-ingon: “Duna koy giplanong mga miting aron masumpo ang makadaot ug rebelyosong tinamdan sa mga Saksi ni Jehova.”

Miepekto dayon ang ilang pagpangdaot. Ang librong Trujillo—Little Caesar of the Caribbean mipatin-aw: “Sa ting-init sa 1957, giimprenta sa mga mantalaan sa Dominican Republic ang sunodsunod nga mga akusasyon sa dagkong opisyal sa Gobyerno nga ‘rebelyoso ug makadaot’ kuno ang buluhaton sa mga Saksi ni Jehova. Nagsugod kini dihang ang mga Saksi gidaot sa Heswitang pari nga si Mariano Vásquez Sanz diha sa estasyon sa radyo nga gipanag-iya ni Trujillo, ang La Voz Dominicana [ang Tingog sa Dominican Republic]. Miingon siya nga mga komunista sila ug gitawag silang ‘masinupakon, malinglahon, kriminal, ug traydor.’ Human niana, usa ka sulat nga pinirmahan sa mga arsobispong sila Ricardo Pittini ug Octavio Antonio Beras ang nag-awhag sa mga pari nga protektahan ang ilang mga membro gikan niining ‘peligrosong apostasya.’”

Milampos gyod ang panagkunsabo sa Simbahan ug Estado. Sa Hulyo, ang Kongreso sa Dominican Republic nagpasag balaod nga nagdili sa mga Saksi ni Jehova. Wala madugay, ang mga igsoon gidagmalan ug gikulata sa mga polis. Mga 150 ka igsoon ang gidakop.