Yuta Duolag 70% sa isla sa Hispaniola ang sakop sa Dominican Republic; ang kapig 30% niini sakop sa Haiti. Ang nasod dunay tropikal nga mga kalasangan, tag-as nga kabukiran, kabakhawan, ug mga desyerto. Ang kinatas-ang bukid sa Dominican Republic mao ang Pico Duarte, nga may gitas-ong 3,175 metros ibabaw sa lebel sa dagat. Kadaghanan sa baybayon niini dunay puti nga balas, ug duna poy tabunok nga mga walog, sama sa Cibao Valley.

Katawhan Kadaghanan sa mga molupyo dunay European ug African nga kagikan. Daghan pod ug gagmayng grupo nga lainlaig kagikan; taga-Haiti ang kinadak-an niini nga mga grupo.

 Pinulongan Kinatsila ang opisyal nga pinulongan.

Panginabuhi Ang industriya sa pagmina, asukar, kape, ug tabako mao ang pangunang panginabuhian. Ang turismo ug mga pabrika nakaamot sa di pa dugayng pag-uswag sa ekonomiya.

Klima Dili kaayo init ang klima sa isla, nga moaberids ug 25 degrees Celsius kada tuig. Sigeg ulan sa bukirong bahin sa amihanan-sidlakan kon itandi sa mas init nga mga rehiyon. Usahay, ang isla makasinatig kusog nga mga bagyo.

Kultura Ang pangunang pagkaon maoy humay, beans, ug utanon. Ganahan pod ang mga taga-Dominican Republic ug seafood, mga prutas, atsal, ug piniritong saging. Ang pipila niini makita diha sa ilado kaayong potahe nga La Bandera Dominicana (ang bandera sa Dominican Republic). Hilig kaayo silag baseball, musika, ug sayaw, labi na ang merengue. Ganahan silang motugtog ug gitara, tambol, plawta, ug marimba.