Sa 2005, ang branch nag-asayn kang Tin Wa Ng, usa ka Bethelite nga kamaong mosultig Chinese, ingong espesyal payunir aron sangyawan ang daghang Chinese sa nasod. Siya natawo ug nagdako sa Dominican Republic. Ang iyang ginikanan taga-China nga mibalhin sa Santo Domingo.

Sa Enero 1, 2008, naporma ang Mandarin Chinese nga kongregasyon sa Santo Domingo, ug sa 2011 naporma ang usa ka grupo sa Santiago. Ang 70 ka magmamantala, 36 ka regular payunir, ug daghang oksilyare payunir nagdumalag Bible study sa aberids nga 76 kada bulan.

Sa 2007, diha nay 27,466 ka magmamantala sa 376 ka kongregasyon, ug 49,795 ka Bible study. Apan wala pay kongregasyon para sa ubay-ubayng grupo nga nagsultig Iningles. Busa sa Abril 2008, giasayn sa branch si Donald ug Jayne Elwell sa Santo Domingo aron sa pagpormag English nga grupo. Kining gamayng grupo sa madasigong magmamantala nagsurbi una aron mahibaloan kon diin nagpuyo ang mga tawong nagsultig Iningles. Dayon ilang giorganisar ang teritoryo aron makobrehag maayo.

Ingong resulta, padayong midako ang English nga grupo sa Santo Domingo, ug sa Hulyo 2009, naporma ang kongregasyon nga may 39 ka magmamantala. Ingon sab niana ang gihimo sa ubang dapit sa nasod. Pagka-Nobyembre 2011, diha nay pito ka English nga kongregasyon ug usa ka grupo.

Si Lorys, nga may Usher Syndrome, nagdako nga walay ginikanan. Natawo siya nga amang ug anam-anam nga nabuta pag-edad ug 16. Makakita siya gamay kon dunay adlaw, pero wa gyod siyay makita inigkagabii. Ang bugtong paagi nga siya makakomunikar sa magabii maoy pinaagig tactile signing o pagkapkap sa gisenyas sa iyang kaestorya.

Nahimamat sa usa ka magtiayong payunir si Lorys niadtong 23 anyos pa siya. Nianang panahona, duna siyay kaipon nga usa pod ka amang ug may usa ka tuig silang anak nga babaye nga dili amang. Misugot si Lorys nga motambong ug tigom ug natandog siya sa iyang nakat-onan.

 Si Lorys mihimo dayog mga kausaban. Pananglitan, dihang iyang nakat-onan nga sayop ang pagpuyopuyo, iyang giingnan ang iyang kaipon nga ipalegal ang ilang kaminyoon. Iyang gipatin-aw nga dili niya ikompromiso ang moral nga mga sukdanan sa Bibliya. Tungod sa iyang pagkaprangka, miuyon ang iyang kaipon nga magpakasal sila.

 Human sa kasal, si Lorys nahimong dili bawtismadong magmamantala ug wala madugay, siya nagpabawtismo. Tungod sa iyang pagtuon uban sa mga Saksi, si Lorys nakakat-on ug American Sign Language (ASL). Sukad niana, siya nagtabang sa iyang anak nga makakat-og ASL ug nagtudlo sab niya sa kamatuoran.

Dili gyod malimtan sa mga taga-Dominican Republic ug taga-Haiti ang adlawng Martes, Enero 12, 2010, dihang gitay-og sa kusog kaayong linog ang Haiti. Dihadiha, ang Nagamandong Lawas sa mga Saksi ni Jehova nagtugot sa branch sa Dominican Republic sa pagpadalag pinansiyal nga tabang sa branch sa Haiti. Kay dakodakong kantidad ang ipadala, ang doktor sa Bethel nga si Evan Batista, nga may gitas-ong 6’3” ug  may timbang nga 127 kilos, maoy giasayn sa pagdala sa kuwarta.

Panalangin gyod ang pagpadala kang Brader Batista kay pag-abot niya didto, giingnan siya nga gikinahanglan kaayo ang doktor. Daghan sa grabeng nasamdan ang gidala sa Assembly Hall tupad sa branch sa Haiti aron matambalan. Dihang nahibaloan sa mga igsoon nga usa ka doktor sa branch ang nagdala sa kuwarta, ilang gitawgan ang branch sa Dominican Republic ug gihangyo kon puwede bang magpabilin si Brader Batista sa Haiti. Siyempre misugot ang branch, ug busa gisugdan ang dakong buluhaton sa pagtabang sa atong mga igsoon sa Haiti—pipila lang ka oras human sa linog.

Ang Purchasing Department sa branch sa Dominican Republic mikontak dayon sa ilang mga suplayer ug pagkaon. Ingong resulta, kapig 6,800 ka kilong bugas, beans, ug uban pang pagkaon ang gipadala sa Haiti sa adlawng Huwebes, Enero 14, sa alas 2:30 sa buntag. Kini mao ang kinaunhang hinabang nga miabot gikan sa gawas sa nasod. Nianang adlawa sab, miabot ang tulo pa ka doktor gikan sa Dominican Republic, nga mibiyaheg pito ka oras paingon sa branch sa Haiti. Gabii na sila nakaabot, pero imbes moderetso sa ilang sak-anan, ilang giadto ang mga nasamdan ug sila nagtrabaho hangtod tungang gabii. Pagkasunod adlaw, miabot ang lain pang upat ka doktor ug upat ka nars gikan sa Dominican Republic. Sila nag-opera sa mga pasyente ubos sa lisod kaayong kahimtang diha sa giayom-ayom nga operating room sa Assembly Hall. Pagkasunod semana, kapig 300 ka pasyente ang natambalan niining 12 ka boluntaryo.

Matag adlaw ang mga pasyente nga kritikal ug kondisyon dal-on sa Dominican Republic aron matambalan. Usahay, ang mga sakyanan nga gigamit sa pagdalag  hinabang mao poy gamiton sa pagdalag mga pasyente ngadto sa lainlaing ospital sa Dominican Republic. Ang branch nag-organisar ug mga Patient Visitation Group aron dasigon ang mga igsoong nasamdan ug maseguro nga makadawat silag tambal ug mga suplay. Ang lokal nga mga kongregasyon nagtaganag pagkaon ug kasak-an para sa paryente nga kauban sa mga naapektohan.

Ang makugihon ug masakripisyohong paningkamot sa katawhan ni Jehova human sa maong trahedya nagpamatuod sa mga pulong sa Proverbio 17:17: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” Kini nga mga kasinatian nagpakita nga pinaagi sa iyang espiritu ug sa Kristohanong panag-igsoonay, si Jehova nag-atiman sa iyang mga alagad bisan pag atubangan sa kamatayon. Ang paghatag ug mga hinabang nagpadayon sa pipila ka bulan. Ang mga Saksi ni Jehova nakaapod-apod ug kapin sa 450,000 ka kilong hinabang, apil ang 400,000 ka pinutos nga pagkaon. Mga 78 ka igsoong doktor ug nars uban sa dili maihap nga mga boluntaryo gikan sa lainlaing nasod ang naghatag sa ilang panahon ug kahanas aron tabangan ang mga igsoon. *