Gipanalanginan gyod ni Jehova ang paningkamot sa iyang mga alagad sa Dominican Republic. Sa 1994 diha nay aberids nga 16,354 ka magmamantala sa 259 ka kongregasyon. Tungod niana, nagkadako ang panginahanglan para sa kuwalipikadong mga ansiyano ug ministeryal nga alagad. Nianang tuiga, giaprobahan sa Nagamandong Lawas nga ipahigayon sa Dominican Republic  ang Ministerial Training School, nga karon gipulihan sa School for Kingdom Evangelizers.

Sa Oktubre 2011, mga 600 na ka estudyante ang migraduwar gikan sa 25 ka klase nga gipahigayon sa nasod. Karon, kapig katunga sa migraduwar ang anaa sa lainlaing matang sa bug-os panahong pag-alagad, 71 ang espesyal payunir, ug 5 ang nag-alagad sa sirkito. Sa branch gipahigayon ang unang 10 ka klase, pero ang misunod nga mga klase didto na gipahigayon sa kaugalingon niining pasilidad sa Villa González.

Sa Septiyembre 22, 1998, ang Dominican Republic gihapak sa Bagyong Georges nga may gikusgong 190 kilometros kada oras ug miresultag grabeng kadaot. Libolibo ang nawad-ag balay ug kapig 300 ang nangamatay. Sa  tabang sa Regional Building Committee, nag-organisar ang Disaster Relief Committee ug relief center sa Kingdom Hall sa La Romana. Mga 300 ka boluntaryo ang mitabang, apil ang mga igsoon gikan sa 16 ka nasod.

Tanantanan, 23 ka Kingdom Hall ug kapig 800 ka balay sa mga igsoon ang kinahanglang ayohon o tukoron pag-usab. Pananglitan, si Carmen, usa ka edarang regular payunir, nahugno pag-ayo dihang gipayhag sa bagyo ang balay nga iyang gipuy-an sulod sa 38 ka tuig. Pero puwerte niyang lipaya dihang miabot ang usa ka team sa 15 ka brader aron tukoran siyag bag-ong balay. “Mahunahunaon gyod si Jehova kanamo,” miingon si Carmen, “ug iya gyod ming giatiman. Pagkanindot sa balay nga gitukod sa mga igsoon para nako. Ang akong mga silingan miingon: ‘Ginaatiman gyod sa mga Saksi ni Jehova ang ilang mga igsoon; nahigugma gyod sila sa usag-usa.’” Daghan sab ang nakakomento niana sa tibuok nasod tungod sa pagtabang sa mga boluntaryo sa ilang mga igsoon.

Dakong kadaot ang gipahinabo sa Bagyong Georges, pero ang mahigugmaong pagtabang sa katawhan ni Jehova nakahatag ug pisikal ug espirituwal nga paghupay sa mga igsoon. Labaw sa tanan, ang sakripisyo sa mga boluntaryo nakadayeg kang Jehova, ang tinubdan sa tinuod nga paghupay.

Tungod sa paspas nga pagdaghan sa mga tinun-an, midako sab ang panginahanglan sa dugang mga Kingdom Hall. Busa sa Nobyembre 2000, sa tabang sa programa para sa kabos nga mga nasod, gisugdan ang pagpanukod ug Kingdom Hall sa Dominican Republic. Tungod niana, ang kongregasyon matukoran nag komportable ug nindot  nga Kingdom Hall sulod lang sa walo ka semana. Pagka-Septiyembre 2011, mga 145 na ka Kingdom Hall ang natukod o naayo sa duha ka grupo sa pagpanukod.

Kini nga mga bilding ingon man ang mga boluntaryo nakahatag ug maayong pamatuod. Pananglitan, sa usa ka gamayng lungsod sa amihanan-kasadpang bahin sa nasod, ang mga igsoon nakakitag lote nga puwedeng tukorag Kingdom Hall. Gipangutana sa usa ka espesyal payunir ang tag-iya kon iya bang ibaligya ang lote. “Nag-usik-usik ra mog panahon,” mitubag ang tag-iya, “dili nako ibaligya ang akong lote, ilabinag tukoran ninyog simbahan.”

Wala madugay human niana, ang tag-iya sa lote miadto sa Puerto Plata aron duawon ang iyang edarang igsoong lalaki nga Saksi ni Jehova. Pag-abot niya, iyang nahibaloan nga gisagop sa usa ka Saksing pamilya ang iyang masakitong magulang. Ila siyang gipadoktor ug giuban sa mga tigom ug sa pagsangyaw. Gipangutana niya ang iyang magulang kon pilay iyang gibayad sa pamilya nga nag-atiman niya. Kini mitubag: “Wala koy gibayad kay mga igsoon nako sila.”

Natandog pag-ayo ang tag-iya sa yuta sa kaayo sa mga Saksi maong iyang gitawagan ang espesyal payunir ug giingnan nga gusto na niyang ibaligya ang lote. Gipalit sa mga igsoon ang lote ug gisugdag tukod ang Kingdom Hall. Kaniadto, ang asawa sa tag-iya sa yuta negatibo kaayog panglantaw sa mga Saksi ni Jehova. Pero dihang iyang nakita ang pagtinabangay sa mga igsoon samtang nagtukod, siya nakaingon: “Karon pa ko kakitag ingon niini ka buotan nga mga tawo, ug nagkahiusa gyod sila.”