Dihang nahibaloan sa mga lider sa relihiyon sa Kakristiyanohan nga gihatagan nag kagawasan sa pagsimba ang mga Saksi ni Jehova, puwerte nilang sukoa. Kapig 700 ka lider sa pito ka relihiyon sa Protestante ang nagseminar sa Jakarta aron kombinsihon ang gobyerno nga idili pag-usab ang mga Saksi. Pero wala magpadala ang gobyerno.

Dihang nabaniog sa tibuok nasod nga wala na idili ang mga Saksi, daghang interesado ang misulat sa sangang buhatan aron mangayog literatura o magpa-Bible study. Pagka-2003, kapig 42,000 ang mitambong sa Memoryal, nga kapig duha ka pilo sa gidaghanon sa magmamantala sa nasod. Halos 10,000 ang mitambong sa asembliya sa Jakarta, apil ang taas ug ranggo nga opisyal sa Department of Religious Affairs. Nakadayeg siya sa mga batan-on ug edaran nga nagpakli ug Bibliya aron sundan ang teksto nga basahon sa mamumulong. Iyang gipasaligan ang mga igsoon nga determinado siyang tul-iron ang sayop nga impormasyon bahin sa mga Saksi ni Jehova.

Kay wala nay pagdili, sayon na para sa mga misyonaryo ang pagbalik sa Indonesia. Ang unang mga misyonaryo nga mibalik mao si Josef ug Herawati Neuhardt * (gikan sa Solomon Islands), Esa ug Wilhelmina Tarhonen (gikan sa Taiwan), Rainer ug Felomena Teichmann (gikan sa Taiwan), ug Bill ug Nena Perrie (gikan sa Japan). Dayon nangabot ang bag-ong mga misyonaryo nga giasayn sa North Sumatra, Kalimantan, North Sulawesi, ug uban pang mga lugar.

Pagka-2005, gisugdan sa sangang buhatan ang duha  ka bag-ong eskuylahan sa organisasyon. Si Julianus Benig, usa sa mga instruktor sa Ministerial Training School (School for Kingdom Evangelizers na karon), miingon, “Ganahan kaayo kong motabang sa mga estudyante nga mouswag sa ilang pagpanudlo ug pagdiskurso, ug tabangan sila nga magamit pag-ayo sa organisasyon.” Daghan sa migraduwar ang espesyal payunir o tigdumala sa sirkito na karon. Kadaghanan sa mga brader sa unang klase sa School for Traveling Overseers * nabansay na niadtong gidili pa ang buluhaton. Dihang wala nay pagdili, ang maong eskuylahan nakatabang nila sa pagpadayon sa buluhaton. Ang estudyante sa unang klase nga si Ponco Pracoyo miingon: “Ang eskuylahan nakatabang nako nga magpakitag dugang empatiya ug mahimong mas responsableng tigdumala sa sirkito. Kini makapadasig ug makapalig-on!”

Sulod sa 25 ka tuig nga pagdili, kadaghanan sa mga kongregasyon sa Indonesia nagtigom ra diha sa gagmayng balay. Pipila ra ka kongregasyon ang makaarang sa pagpatukod ug Kingdom Hall, ug lisod kaayong mokuhag bilding permit para niana. Aron tagan-an ang panginahanglan sa kusog nga pag-uswag sa mga kongregasyon, ang sangang buhatan nag-organisar ug Kingdom Hall Construction Desk (Local Design/Construction Department na karon).

Ang Nias Island sa North Sumatra maoy usa sa unang nakabenepisyo sa bag-ong programa sa pagpanukod. “Nalipay kaayo mi pagkadungog namo nga tukoran mig bag-ong Kingdom Hall,” miingon si Haogo’aro Gea, dugay nang membro sa Gunungsitoli Congregation. “Ang sangang buhatan nagpadalag pito ka igsoon nga maoy nagdumala sa konstruksiyon. Nahuman ni sa 2001.” Si Faonasökhi Laoli, membro sa lokal nga komite sa pagpanukod, miingon: “Sa una, sa gagmayng balay ra mi magtigom ug ubos kaayo ang panglantaw sa mga tawo sa mga Saksi ni Jehova. Ang aberids nga manambong 20 ra, pero kalit nga nahimong 40 dihang nahuman ang Kingdom Hall. Sulod sa 12 ka bulan, kini miuswag ug kapig 500 porsiyento. Ang among tigomanan ang kinanindotan sa among lugar, ug tinahod na sa mga tawo ang mga Saksi ni Jehova.”

Pagka-2006, sa Bandung, West Java, ang mga igsoon nagsugod pagpangitag lote nga tukoran sa unang Kingdom Hall. “Dose ka bulan ming nangitag nindot nga lote,” miingon si Singap Panjaitan, ansiyano ug membro sa komite sa pagpanukod. “Pero gikinahanglan namog pirma sa labing menos 60 ka silingan nga dili Saksi aron mahatagan mig bilding permit; 76 ka silingan ang  mipirma. Apil kanila ang impluwensiyadong babaye nga misupak namo sa primero. Dihang nahuman ang Kingdom Hall, among gidapit ang mga silingan ug ang mayor sa Bandung sa pagbisita aron makita kini. Ang mayor miingon, ‘Kini nga dapit sa pagsimba ang sukdanan sa kahinlo ug kahapsay nga angayng sundogon sa tanang simbahan.’” Kining dos-andanas nga Kingdom Hall gipahinungod niadtong 2010.

Sukad sa 2001, kapin na sa 100 ka Kingdom Hall ang natukod sa Indonesia, pero daghan pa ang gikinahanglan.