NIADTONG 1991, nahimong independenteng nasod ang Georgia pagkapildi sa Soviet Union. Pero tungod sa kausaban sa politika, nagkagubot ang mga tawo ug lisod na kaayo ang panginabuhi. Si Genadi Gudadze, nga tigdumala sa sirkito niadtong panahona, nahinumdom nga ang mga tawo maglinya tibuok adlaw aron lang makakuhag pan.

Kasagaran, sangyawan sa mga Saksi ang mga tawong naglinya. “Niadtong lisod nga panahon, interesado kaayo sa kamatuoran ang mga tawo. Daghan ang mihatag sa ilang adres kay gusto nilang magpa-Bible study,” miingon si Genadi.

 Kada human sa tigom, basahon sa mga brader ang ngalan ug adres niadtong mihangyog Bible study. Dayon, adtoon sila sa mga igsoon.

Si Brader Levani Sabashvili, nga ansiyano sa Tbilisi niadtong panahona, nahinumdom sa magtiayon nga gustong magpaduaw. Siya miingon: “Daghang mga igsoon ang miboluntaryo nga adtoon ang nalistang mga adres. Pero wala gyoy miboluntaryo nga moduaw sa maong magtiayon. Layo kaayo ang ilang balay, ug daghan mig mga Bible study.”

Paglabayg pipila ka bulan, ang magtiayon mihangyo na sab nga magpaduaw. Wala madugay, nagpadala silag ikatulong hangyo ug giapilan nilag mubong sulat nga unta ang mga Saksi dili paninglan sa dugo sa mga tawo. (Buh. 20:26, 27) Si Levani miingon: “Panahon to sa Bag-ong Tuig, maong naglikay mi nga mobisita sa mga tawo. Pero kinahanglan na namo silang duawon.”

Nalipay gyod ang magtiayong Roini ug Nana Grigalashvili dihang usa ka adlaw, giduaw sila ni Levani uban sa usa ka brader bisag tugnaw kaayo ang panahon. Nagpa-Bible study dayon sila. Karon, regular payunir na si Roini ug Nana, apil ang ilang mga anak.

Mapasalamaton kaayo kadtong mga midawat sa kamatuoran. Busa gigamit nila ang ilang panahon, kusog, ug materyal nga mga butang aron sangyawan sab ang uban. Apil kanila si Badri ug Marina Kopaliani, nga bisag dunay mga anak, kanunayng mobiyahe ngadto sa lagyong mga lugar aron sangyawan ang mga tawo.

Kada Sabado ug Dominggo, si Badri ug Marina, kauban ang ilang tin-edyer nga mga anak nga si Gocha ug Levani,  mangadto sa Dusheti. Nindot kaayo ni nga bukirong probinsiya sa northern Tbilisi. Usahay, mobiyahe silag mga 150 kilometros agi sa kurbadahong kalsada paingon sa lagyong mga lugar.

Usa ka adlaw, si Badri ug ang iyang asawa gidala sa usa ka babaye ngadto sa iyang gitrabahoan. Si Badri miingon: “Pagsulod namo, dunay mga 50 ka tawo nga naghulat didto! Nakulbaan ko, pero miampo ko kang Jehova. Dayon akong gihisgotan ang mga ilhanan sa kataposang mga adlaw nga mabasa sa Mateo kapitulo 24. Dunay natingala ug nangutana, ‘Nganong wala man mi tudloi ani sa among mga pari?’”

Daghang sinserong Georgian ang nakadungog bahin sa kamatuoran panahon sa Memoryal sa kamatayon ni Jesus. Pananglitan, sa 1990, tungod sa Memoryal nga gihimo sa  balay ni Sister Ia Badridze didto sa Tbilisi, daghan sa iyang mga silingan ang nahimong interesado.

Gipagamit ni Sister Badridze ang iyang apartment para sa Memoryal. Gitabangan siya sa iyang mga anak sa paghinlo ug paghawan sa sala. Pero asa man siyag lingkoranan para sa mga bisita? Sa Georgia, naandan sa mga pamilya nga mag-arkilag mga lamesa ug lingkoranan para sa dagkong salosalo. Pero natingala ang mga nagpaarkila kay lingkoranan ray iyang giarkilahan, maong gipangutana siya: “Dili ka moarkilag lamesa? Asa man mo mangaon?”

Ang tanang bisita napaigo ra sa apartment ni Sister Badridze, nga naa sa ika-13 nga andana. Miabot ug 200 ka tawo ang nanambong sa Memoryal! Tungod niana, daghan sa iyang silingan ang nainteres bahin sa mga Saksi ni Jehova.

Niadtong 1992, ang mga igsoon nagaarkilag dagkong mga awditoryum sa lainlaing lugar sa nasod para sa Memoryal. Si Davit Samkharadze, nga taga-Gori, nahinumdom nga gipangutana siya sa usa ka traveling overseer bahin sa ilang mga plano sa Memoryal.

 Pagkahibalo sa traveling overseer nga nagplano silang mag-Memoryal sa balay sa usa ka igsoon, siya nangutana: “Wala bay dakong awditoryum sa inyong siyudad? Unsa kahag mag-arkila mo?” Kapig 1,000 ang mapaigo sa awditoryum, pero kapig 100 ra ang mga magmamantala, maong para nila, dili na kinahanglang moarkilag dakong awditoryum.

Ang traveling overseer misugyot: “Kon ang kada magmamantala makaimbitar ug napulo ka tawo, mapuno ang awditoryum.” Bisag dili ni praktikal para sa mga igsoon, ilang gipaningkamotan pag-ayo nga sundon ni. Nalipay kaayo sila dihang mga 1,036 ang nanambong sa Memoryal! *

Sa 1992, naa gihapoy mga lugar sa Georgia nga wala pa masangyawi sa mga Saksi. Unsaon kaha nila pagsangyaw niining mga lugara nga lisod man kaayo ang kahimtang sa panginabuhi niadtong panahona?

Si Tamazi Biblaia, nga nagpuyo sa western Georgia niadtong panahona, miingon: “Gi-meeting mi sa traveling overseer aron hisgotan kon unsay among himoon. Wala pa kaayo miy ideya sa espesyal payunir nga buluhaton. Pero nahibalo mi nga kinahanglan namong isangyaw ang maayong balita.” (2 Tim. 4:2) Wala madugay, 16 ka payunir ang gipili ug giasayn sa lainlaing lugar sa nasod.—Tan-awa ang mapa.

Pagka-Mayo 1992, dunay gihimong tulo ka oras nga miting sa Tbilisi aron dasigon ang mga payunir nga giasayn sa maong mga teritoryo sulod sa lima ka bulan. Kada bulan,  bisitahon sila sa mga ansiyano aron palig-onon ug hatagag materyal nga tabang kon gikinahanglan.

Duha ka payunir nga sister, si Manea Aduashvili ug Nazy Zhvania, naasayn sa Ozurgeti. Si Manea, nga 60 anyos niadto, nahinumdom: “Dunay interesado nga nagpuyo duol sa Ozurgeti. Busa pag-abot namo didto, amo siyang gikontak aron makigkita niya. Miadto mi sa iyang balay, ug amo siyang naabtan nga naghulat namo, kauban ang mga 30 ka tawo nga iyang giimbitar. Nianang adlawa, nasugdan dayon ang daghang Bible study.”

Sa misunod nga mga bulan, daghan pa silag nakitang mga interesado. Human sa lima ka bulan, 12 ka tawo ang kuwalipikado nang bawtismohan!

Duha ka payunir nga brader, si Pavle Abdushelishvili ug Paata Morbedadze, giasayn sa Tsageri. Ang mga tawo niining lugara debotado kaayo sa karaang mga tradisyon ug sa ilang relihiyon.

 Sa hapit na ang tingtugnaw, ug hapit na pod mahuman ang lima ka bulan nga asaynment sa mga payunir, si Paata gipadala sa laing lugar aron motabang sa paghubad ug publikasyon. Busa kinahanglang modesisyon si Pavle. Siya miingon: “Lisod kaayo kon maabtan kag tingtugnaw sa Tsageri. Pero kinahanglan pang tabangan ang among mga Bible study, maong nagpabilin ko.”

“Mipuyo ko uban sa usa ka pamilya didto,” miingon si Pavle. “Halos tibuok adlaw kong magsangyaw. Pagkagabii, magtapok mi sa sala sa unang andana ug magpaduol sa dapog aron mainitan. Kon mosaka na ko sa kuwarto, magsul-ob kog kalo ug magbukot kog baga nga habol inigkatulog.”

Pagkahuman sa tingtugnaw, dihang gibisita sa mga ansiyano si Pavle, 11 na ang kuwalipikado ingong dili bawtismadong magmamantala. Wala madugay, nagpabawtismo sila.