Sa sinugdanan sa katuigang 1990, daghang kongregasyon sa Georgia ang gidumala ug usa lang ka ansiyano o ministeryal. Kay dako kaayo ang teritoryo ug lagyo ang pinuy-anan sa mga igsoon, kasagaran gibahin ang kongregasyon sa lainlaing mga grupo nga mag-iyahayg tigom.

Si Joni Shalamberidze ug Pavle Abdushelishvili—nga parehas nakaalagad sa lagyong mga teritoryo—giasayn nga motabang sa Telavi, usa ka siyudad sa Kakheti. Dunay 300 ka magmamantala ang kongregasyon didto, pero walay ansiyano. Kini gibahin sa 13 ka grupo nga magtigom sa magkalahing lokasyon.

Wala madugay, namatikdan ni Joni ug Pavle ang hinungdan kon nganong hinay ang pag-uswag sa mga igsoon. Si Joni miingon: “Ang mga igsoon dunay lapad nga  kaumahan ug ubasan. Kay naandan sa managsilingan nga magtinabangay sa pagtrabaho sa uma, pirmeng makauban sa atong mga igsoon ang mga tagagawas.”—1 Cor. 15:33.

Misugyot si Joni ug Pavle nga magtinabangay ang mga igsoon sa pagpangani. Kon ila ning himoon, makabenepisyo sila sa maayong panag-ubanay samtang nagtrabaho sa uma. (Eccl. 4:9, 10) Si Joni miingon, “Mas nagkasuod ang mga igsoon sa kongregasyon.” Pagbiya ni Joni ug Pavle sa Kakheti human sa tulo ka tuig, duna nay lima ka ansiyano ug 12 ka ministeryal.

Kay gilimitahan ang atong buluhaton hangtod sa mga tuig 1990, ang mga Saksi magtigom sa ginagmayng grupo alang sa Pagtuon sa Kongregasyon sa Bibliya ug sa Pagtuon sa Bantayanang Torre. Kini nga mga tigom, bisag makapadasig, wala gidisenyo aron bansayon ang mga igsoon sa pagsangyaw.

Pero nausab ang kahimtang dihang nahunong na ang Komunistang pagmando. Nianang panahona, nagpadalag direksiyon ang organisasyon nga ilakip sa ilang senemanang mga tigom ang Teokratikanhong Tunghaan sa Ministeryo ug ang Tigom sa Pag-alagad.

Si Naili Khutsishvili ug ang iyang igsoong babaye nga si Lali Alekperova dunay makalingawng mga kasinatian sa maong panagkatigom. Si Lali miingon: “Eksayted kaayo mi adtong panahona. Malipayon kaayo ang tanan kay mahatagan nag bahin ang mga sister.”

“Sa usa ka pasundayag,” si Naili miingon, “ang tagbalay nagbasag newspaper dihang dunay nanuktok sa pultahan. Dihang iyang gipadayon, misulod ang duha ka sister gikan  mismo sa pultahan sa tigomanan ug misaka sa stage!” Si Lali midugang, “Bisag nabag-ohan mi sa mga tigom niadto, nakatabang to namo nga mahimong epektibo sa pagsangyaw.”

Sulod sa daghang katuigan, pipila ka igsoon ang nagkopyag mga literatura diha sa ilang balay gamit ang demanong makina. Kay nagkadako ang panginahanglan alang sa mga publikasyon, ang mga igsoon nangitag mga kompaniya nga moimprenta sa atong mga magasin sa barato nga presyo.

Ang mga igsoon maayong mangitag paagi aron maandam ang master copy sa ipaimprentang mga publikasyon. Ilang hubaron ang magasin ngadto sa pinulongang Georgian. Dayon, ila ning i-type sumala sa layout sa orihinal nga magasing Iningles. Guntingon nila ang mga hulagway sa Iningles nga magasin ug ipapilit sa master copy. Pagkahuman, mangita sila sa newspaper ug Georgian nga mga letra nga nindot ug porma. Ila ning guntingon ug isapaw sa mga letra sa orihinal nga cover page. Ila dayong ipadala ang master copy sa imprentahanan.

Dihang nauso na ang computer, duha ka batan-ong brader nga si Levani Kopaliani ug Leri Mirzashvili ang mieskuyla aron makakat-on sa paggamit niini. Si Leri miingon: “Wa gyod miy hibangkaagan, maong nalisdan mi. Pero sa tabang ni Jehova, kami nay nag-type ug nag-layout sa among mga magasin.”

Sukad niadto, ang mga kongregasyon sa tibuok Georgia nakadawat nag upat ug kolor nga mga magasin, nga gipaimprenta sa lokal nga imprentahanan. Pero sa kadugayan, nalisdan sila sa pagtagana sa nagkadakong  panginahanglan alang sa mga literatura. Apan niana mismong panahona, ang mga igsoon sa Georgia nakadawat ug tabang gikan sa organisasyon ni Jehova.

Sa 1992 internasyonal nga kombensiyon sa St. Petersburg, Russia, nakahigayon ang mga igsoon sa Georgia nga mailaila ug maestorya ang mga representante sa sangang buhatan sa Germany. “Gisultihan mi nila kon unsay mga paagi sa paghubad sa atong mga publikasyon,” matod ni Genadi Gudadze. “Miingon sab sila nga duna ra unyay moduaw namo aron tabangan mi sa buluhatong paghubad.”

Dili sayon ang pag-imprentag mga publikasyon sa pinulongang Georgian. Kay lahi man ug porma ang ilang mga letra, dili pa mabasa sa Multilanguage Electronic Publishing System (MEPS) ang alpabetong Georgian. Busa kinahanglan pa silang mohimog porma sa maong mga letra aron makakomposo ug makaimprentag mga publikasyon sa pinulongang Georgian.

Niadtong hapit nang mahuman ang katuigang 1970, ang pamilyang Datikashvili mibiya sa Georgia ug mibalhin sa United States. Usa sa ilang mga anak, si Marina, ang nakakat-on sa kamatuoran. Dako kaayo siyag natabang sa mga brader sa Brooklyn Bethel sa paghimog mga Georgian nga letra nga i-install sa MEPS. Wala madugay, ang ubang tract ug ang brosyur nga “Tan-awa! Ginabag-o Ko ang Tanang Butang” naimprenta sa Germany.

Sa 1993, si Michael Fleckenstein ug ang iyang asawa nga si Silvia, nga gikan sa sangang buhatan sa Germany, miabot sa Tbilisi aron motabang sa pag-organisar sa buluhatong paghubad. “Di ko kalimot sa among  panag-estoryahay didto sa St. Petersburg,” si Michael miingon. “Paglabayg 18 ka bulan, miadto mi sa Tbilisi. Nasorpresa mi kay naa na silay team sa mga maghuhubad!”

Human sa pipila ka bulan, duna nay 11 ka regular nga maghuhubad nga nagtrabaho sa opisina diha sa gamayng apartment. Mapasalamaton kaayo sila sa pagbansay nga ilang nadawat gikan sa organisasyon ni Jehova, kay duna nay regular nga suplay sa espirituwal nga pagkaon ang mga kongregasyon.

Human mapildi ang Soviet Union, nagkagubot ug nag-away ang mga nasod nga kanhing sakop niini, apil ang Georgia. Busa peligroso na kaayo ang pagbiyahe, ilabina ang paggawas o pagsulod sa nasod.

Usa ka adlaw, niadtong Nobyembre 1994, si Aleko Gvritishvili kauban ang duha ka brader mibiyahe tabok sa border sa nasod. Gipahunong sila sa armadong mga tawo ug gipanaog sa ilang sakyanan. “Nasuko kaayo sila pagkakita sa atong mga publikasyon,” si Aleko miingon. “Gipalinya  mi nila nga morag ila ming pamusilon. Miampo gyod mig taman kang Jehova. Paglabayg mga duha ka oras, usa kanila miingon, ‘Lakaw na mo, ug dad-a inyong mga basahon. Mobalik pa gani mo, rakrakan ug pabuthan namo inyong sakyanan. Mamatay gyod mo!’”

Bisag gihulga, padayon gihapong gihatod sa mga brader ang atong mga publikasyon. Si Brader Zaza Jikurashvili, nga nagsakripisyo pag-ayo sa paghatod ug mga literatura sa Georgia, miingon: “Nasayod ming gikinahanglan gyod sa atong mga igsoon ang espirituwal nga pagkaon. Gipaluyohan mi sa among buotang mga asawa.”

Si Aleko miingon, “Pamilyado ang kadaghanan sa mga brader nga tighatod sa mga literatura.” Nganong ila ning gihimo bisag peligroso ang kahimtang? Siya mipadayon: “Tungod sa among dakong gugma ug pasalamat kang Jehova. Gusto sab namong ipabati sa mga igsoon nga gihigugma ug gipangga sila ni Jehova.”

Tungod sa pagsakripisyo sa atong mga igsoon, wala gyod maundang ang paghatod ug mga literatura bisag peligroso kadtong mga tuiga. Wala madugay, ang mga brader nakakitag mas luwas nga ruta ug makataboktabok na sa Germany ug Georgia.

Dihang miarang-arang ang kahimtang sa politika niadtong 1995, nangandam ang mga Saksi alang sa ilang unang distritong kombensiyon. Sa ting-init sa 1996, mga 6,000 ka delegado gikan sa Georgia ang mitambong sa distritong mga kombensiyon sa tulo ka lugar: sa Gori, Marneuli, ug sa Tsnori.

Nalipay kaayo ilabina ang mga nanambong sa kombensiyon sa Gori. Nahinumdoman nila tong panahon nga  nabalaka sila kon mapuno ba nila ang awditoryum panahon sa Memoryal. Karon, kapig 2,000 ang posibleng manambong, pero wala silay nakitang dakong awditoryum alang niini nga kombensiyon. Nakadesisyon sila nga himoon ang kombensiyon sa patag nga lugar sa usa ka nindot nga bukid, nga duol ra sa siyudad.

Si Brader Kako Lomidze, nga membro sa Komite sa Kombensiyon niadto, miingon: “Human sa kombensiyon, wala dayon manguli ang mga igsoon. Nanganta sila ug nagdinasigay. Makita gyod sa tanan nga ang mga alagad sa Diyos nagkahiusa ug naghigugmaay.”—Juan 13:35.

Sugod sa 1996, dunay gihimong kahikayan nga ang mga traveling overseer mobisita sa mga kongregasyon sa Georgia sulod sa usa ka semana. Busa may gitudlong bag-ong mga traveling overseer aron madugangan ang mga brader nga nag-alagad sa mga sirkito sa western ug eastern Georgia.

Tungod sa mga paghago ug pag-alagad sa mga traveling overseer, miuswag ang mga kongregasyon ug natabangan nga mosunod pag-ayo sa mga instruksiyon sa organisasyon. (1 Tes. 1:3) Sugod sa 1990 hangtod 1997, paspas kaayo ang pag-uswag. Duna ray 904 ka magmamantala niadtong 1990. Pero paglabayg pito ka tuig, 11,082 na ang gidaghanon sa mga magmamantala!

Sa milabayng mga katuigan, dili pa kaayo mamatikdan ang espirituwal nga pag-uswag sa Georgia. Pero karon, dayag na kaayo ni. Ug daghan pang panalangin ang ihatag ni Jehova sa iyang mga alagad niining nasora.