SUKAD pa sa mga 1920, naningkamot pag-ayo ang mga Estudyante sa Bibliya aron matudloan ang mga Georgian nga interesado sa kamatuoran. Sa 1924, gibuksan ang usa ka opisina sa Beirut, Lebanon aron dumalahon ang pagsangyaw sa mga lugar sa Armenia, Georgia, Syria, ug Turkey.

Bisag duna nay gihimong pagsangyaw sa Georgia nianang panahona, wala dayon mamatikdi ang mga resulta niini. (Mat. 13:33) Pero wala madugay, daghan na ang nasangyawan sa mensahe sa Gingharian nga nakapausab sa kinabuhi sa daghang tawo sa Georgia.

Tin-edyer pa si Vaso Kveniashvili dihang nahitabo ang ikaduhang gubat sa kalibotan. Kay sakop man ang Georgia  sa Soviet Union, ang iyang papa gipatawag aron magsundalo sa Soviet. Nianang panahona, patay na ang mama ni Vaso. Kinamagulangan si Vaso ug aron masuportahan ang iyang kaugalingon ug ang iyang mga manghod, nagapangawat siya.

Si Vaso miapil sa usa ka gang ug wala madugay, nahimong membro sa sindikato. Siya miingon, “Gibati nako nga mas makahatag dayon ug hustisya ang mga kriminal kay sa gobyerno o katilingban.” Pero sa kadugayan nasabtan ni Vaso nga nangandoy siyag butang nga dili mahatag sa bisan unsang tawhanong organisasyon. Siya miingon, “Nangandoy kog hustisya.”

Wala madugay, gidakop si Vaso tungod sa iyang nahimong mga krimen ug gidala ngadto sa kampo sa Siberia.  Didto iyang nakaila ang usa ka Saksi ni Jehova nga gipriso tungod sa iyang baroganan. “Nakit-an ra gyod nako ang akong gipangita,” matod ni Vaso. “Wala miy mga literatura, pero naningkamot ko pag-ayo aron masabtan ang gitudlo sa igsoon.”

Dihang gibuhian si Vaso niadtong 1964, mibalik siya sa Georgia aron mangitag mga Saksi ni Jehova. Nakigkontak gihapon siya sa piniriso nga Saksi pinaagig sulat. Naguol si Vaso pagkamatay sa maong igsoon, ug nawad-an siyag kontak sa mga Saksi. Halos 20 ka tuig ayha pa siya nakakitag mga Saksi ni Jehova. Hisgotan nato unya kon unsay sunod nga nahitabo.

Para sa batan-ong babaye nga si Valentina Miminoshvili, panalangin kaayo nga nahimo siyang piniriso sa kampo sa Nazi. Didto niya unang nailhan ang mga Saksi ni Jehova.  Nakadayeg kaayo siya sa ilang lig-ong baroganan. Natandog siya pag-ayo sa iyang nakat-onan bahin sa Bibliya.

Pagbalik niya sa Georgia human sa giyera, gisangyaw ni Valentina sa uban ang iyang mga nakat-onan. Nasayran kini sa lokal nga awtoridad, ug gisentensiyahan siyag 10 ka tuig nga pagkapriso sa kampo sa Russia. Nakauban na pod niya ang mga Saksi didto, ug wala madugay, siya nagpabawtismo.

Human siya buhii niadtong 1967, mibalhin si Valentina sa western Georgia ug tinagotago nga nagsangyaw didto. Wala niya damha nga siya diay ang tubag sa usa ka sinserong pag-ampo.

Niadtong 1962, si Sister Antonina Gudadze nga taga-Siberia ug ang iyang bana nga dili Saksi nakadesisyon nga mobalhin sa Georgia, ang yutang natawhan sa iyang bana. Nasayran ni Antonina ang kamatuoran tungod sa mga Saksi ni Jehova nga gipriso didto sa Siberia. Karon nga nagpuyo na sila sa Khashuri, usa ka siyudad sa eastern Georgia, nalayo na siya sa mga igsoon.

Nahinumdom si Antonina kon giunsa pagtubag ni Jehova ang iyang mga pag-ampo. Siya miingon: “Usa ka adlaw, dunay gipadalang package si Mama gikan sa Siberia. Pag-abli nako, dunay mga literatura nga maayo kaayong pagkaputos aron dili mailhan. Padayon ning gihimo ni Mama sulod sa unom ka tuig aron makadawat kog espirituwal nga pagkaon. Nagpasalamat gyod ko kang Jehova tungod sa iyang paggiya, pagdasig, ug pagpangga.”

Pero, wala gihapoy nakitang mga igsoon si Antonina. Siya miingon: “Kanunay kong moampo kang Jehova nga  unta makauban na sab nako ang mga igsoon. Usa ka adlaw, dunay duha ka babaye nga misulod sa tindahan nga akong gitrabahoan. Nangutana sila, ‘Ikaw si Antonina?’ Kay buotan man silag panagway, segurado kong sila ang akong mga igsoon sa pagtuo. Naggakos mi ug naghinilakay.”

Usa niana nga mga babaye si Sister Valentina Miminoshvili. Nalipay kaayo si Antonina dihang nasayran niya nga duna diay mga tigom sa western Georgia. Siya mobiyahe kausa sa usa ka bulan aron motambong, bisag kapin sa 300 kilometros ang gilay-on niini gikan sa iyang balay.

Sa katuigang 1960, pipila sa mga Saksi nga gilutos sa mga awtoridad sa ubang bahin sa Soviet Union mibalhin sa mga lugar diin makapadayon sila sa buluhaton. Usa nila mao ang kugihan ug madasigong brader nga si Vladimir Gladyuk. Sa 1969, mibiya siya sa Ukraine ug mipuyo sa siyudad sa Zugdidi, sa western Georgia.

 Sa primero, kadtong namalhin sa Georgia naghimog mga tigom sa pinulongang Russian. Pero dihang nagkadaghan ang tigtambongan nga mga Georgian, naghimo na silag panagkatigom sa pinulongang Georgian. Maayo kaayog resulta ang pagsangyaw maong niadtong Agosto 1970, dunay 12 ka Georgian nga nabawtismohan.

Niadtong 1972, sa mga bulan sa Marso hangtod Mayo, si Vladimir ug ang iyang pamilya mibalhin sa Sokhumi. Usa kini ka siyudad sa kabaybayonan sa Black Sea, sa western Georgia. Si Vladimir miingon: “Natagan-an pag-ayo ang among espirituwal nga panginahanglan ug mapasalamaton mi kang Jehova tungod niini nga panalangin. Dali rang miuswag ang kongregasyon.” Nianang mga bulana, gipahigayon ang unang Memoryal sa Sokhumi, diin 45 ka tawo ang mitambong.

Si Babutsa Jejelava, nga karon mga 90 anyos na, maoy usa sa mga taga-Sokhumi nga unang midawat sa kamatuoran niadtong 1973. Siya miingon: “Usa ka adlaw, dunay upat ka babaye nga nag-estoryahanay. Duha nila maoy mga madre, ug ang duha maoy mga Saksi ni Jehova.” Kining duha ka Saksi mao si Lyuba, nga asawa ni Vladimir Gladyuk, ug si Itta Sudarenko, kugihang payunir nga taga-Ukraine.

Mahinumdoman pa gihapon ni Babutsa ang iyang gibati dihang nadunggan niya ang ilang panag-estoryahay. Siya miingon, “Naminaw ko nila pag-ayo.” Dihang nadunggan niya nga dunay personal nga ngalan ang Diyos, miapil dayon siya sa panag-estorya ug nangutana kon asa ni mabasa sa Bibliya. Daghan kaayo siyag pangutana maong miabot ug tulo ka oras ang ilang panaghisgot.

Nabalaka si Babutsa kay basig dili na sila magkita pag-usab sa mga Saksi, maong nangutana siya, “Balikan pa ba ko ninyo?”

“Oo, balikan ka namo karong Sabado,” mitubag ang mga sister.

Nalipay pag-ayo si Babutsa kay mibalik gyod ang mga sister pagka-Sabado. Gisugdan dayon nila ang pagtuon sa Bibliya. Sa hapit nang matapos ang pagtuon, naneguro na sab si Babutsa aron dili mawala ang iyang kontak sa mga Saksi ni Jehova. Siya nakahunahuna: ‘Karon nga nakit-an na nako ning mga tawhana, paneguroon gyod nako nga di ko mahilayo nila.’

Nakahunahunag paagi si Babutsa. Siya miingon: “Nasayod kong minyo na si Lyuba, maong akong gipangutana si Itta kon minyo na ba pod siya. Mitubag si Itta nga wala pa  siyay bana. ‘Aw, puyo dinhi sa akong balay!’ ako siyang giingnan. ‘Duha ang katre dinhi, ug naay lampshade sa tunga. Puwede tang magbasa ug mag-estorya bahin sa Bibliya bisag gabii na!’” Misugot si Itta ug mibalhin sa balay ni Babutsa.

Si Babutsa miingon: “Usahay dili ko matulog pagkagabii kay magsige kog pamalandong sa akong nakat-onan. Kon naa koy mahunahunaang pangutana, akong pukawon si Itta ug sultihan siya: ‘Itta, kuhaa imong Bibliya kay naa koy pangutana!’ Bisag katulgon pa si Itta, siya moingon, ‘Sige, kuhaon nako.’ Iya dayong basahon ang teksto nga maoy tubag sa akong pangutana.” Mga tulo pa lang ka adlaw sukad sa pagbalhin ni Itta, si Babutsa nagsangyaw na sa maayong balita!

Dunay suod nga amiga si Babutsa, si Natela Chargeishvili. Si Babutsa nahinumdom: “Abi nakog dili siya mainteres sa kamatuoran kay dato siya, pero nasayop ko. Sa una pa lang namo nga panag-estoryahay, mituhop dayon sa iyang kasingkasing ang kamatuoran.” Wala madugay, silang duha makugihon na kaayong nagasangyaw sa ilang mga higala, katrabaho, ug silingan.