Nakatabang pag-ayo ang mga tigom aron molig-on ang pagtuo sa mga bag-ohan. Ang bag-ong mga nabawtismohan ug ang dugay na sa kamatuoran andam magpagamit sa ilang balay alang sa mga tigom. Giabiabi pag-ayo kadtong tanang nanambong, ug nakapasamot ni sa ilang gugma sa usag usa.

Dihang daghan na ang kuwalipikadong bawtismohan, tinagotago silang naghimog espesyal nga mga tigom.  Niadtong Agosto 1973, nagtigom ang mga igsoon sa usa ka lugar nga gawas sa siyudad sa Sokhumi, duol sa baybayon sa Black Sea. Pero wala madayon ang pagbawtismo sa 35 ka kandidato. Sa wala pa mahuman ang tigom, nangabot ang mga polis ug gidakop ang pipila sa mga igsoon, apil si Vladimir Gladyuk.

Dihang gibuhian si Vladimir ug ang ubang mga igsoon, gikontak dayon nilag usab ang mga kandidato sa bawtismo. Duha ka adlaw human sa unang tigom didto sa baybayon, nabawtismohan ra gyod ang mga kandidato. Si Vladimir miingon: “Gitabangan gyod mi ni Jehova. Human sa bawtismo, nag-ampo ming tanan aron magpasalamat kang Jehova.”

Duha ka adlaw human sa bawtismo, gidakop na sab si Vladimir Gladyuk. Wala madugay, siya, si Itta Sudarenko, ug Natela Chargeishvili gisentensiyahag pagkapriso sulod sa daghang tuig. Bisag naguol ang mga igsoon sa maong pag-aresto, nagsangyaw gihapon sila, pero mas mabinantayon na.

Aron dili makamatikod ang gobyerno, ang mga igsoon nagsangyaw sa mga lungsod ug barangay nga layo sa ilang lugar. Ingong resulta, nakaabot sa mas daghang lugar ang maayong balita tungod sa pagsupak.

Panahon sa Komunista nga pagmando, ang mga igsoon nga nagpuyo sa dagkong siyudad nagasangyaw sa mingaw nga mga kalsada ug parke. Kasagaran nilang makaestorya ang mga tawo nga naggikan sa ubang mga lungsod ug barangay aron mobisita sa ilang mga paryente  o mamalit. Kon ang tawo interesado, pangayoon sa igsoon ang iyang adres aron maduaw ug maestorya siya pag-usab.

Usa si Babutsa Jejelava sa mga igsoon nga kanunayng mobiyahe sa tibuok western Georgia. Siya miingon: “Kay naa man koy mga paryente sa lainlaing lugar, walay nagduda sa akong sigeng pagbiyahe. Human sa mga duha ka tuig, kapin na sa 20 ka tawo sa Zugdidi ang akong giestadihan ug lima sa lungsod sa Chkhorotsku. Silang tanan nabawtismohan.”

Wala madugay, nakita sa mga igsoon nga gikinahanglan na gyod ang Georgian nga mga literatura. Dihang magbalikduaw o mag-Bible study, ilang naobserbahan nga mas maayong gamiton ang Bibliya ug mga literatura sa pinulongan nga mas masabtan sa mga estudyante. *

Para kang Babutsa, lisod kaayo ang pagdumalag pagtuon nga walay Georgian nga publikasyon. Siya miingon, “Russian ang akong Bibliya ug mga publikasyon, maong kinahanglan nakong hubaron ang mga tun-anang materyal aron masabtan sa akong mga estudyante.” Gamit lang ang diksiyonaryo, iyang gihubad ang mga artikulo sa atong mga magasin. Nahubad pa gani niya ang tibuok Ebanghelyo ni Mateo!

Giganahan kaayo ang mga interesado sa mga artikulo nga gihubad sa ilang pinulongan, ug gusto pa gani nila  kining kopyahon aron magamit sa ilang personal nga pagtuon. Kay limitado ra ang mga kopya sa Georgian nga Bibliya, gikopya sa ubang estudyante sa Bibliya ang Pulong sa Diyos.

Ang mga igsoon ug mga interesado nagpulihayg basa sa mga publikasyon nga gihubad sa Georgian. Gihatagan lang silag pipila ka adlaw o semana aron mabasa ang usa ka publikasyon. Busa dihang duna nay Gregong Kasulatan sa pinulongang Georgian, gikopya dayon ni sa usa ka pamilya.

Trese anyos lang si Raul Karchava dihang gisugo siya sa iyang papa nga kopyahon ang Gregong Kasulatan. Siya miingon: “Mipalit si Papa ug usa ka karton nga notbok  ug klaseklaseng bolpen ug lapis aron ganahan kuno kong magkopya. Gitapol ko, pero misugot gihapon ko. Tibuok adlaw kong nagkopya, nga mopahulay lang kadiyot kon hawoy na akong kamot.”

Nalipay kaayo ang mga paryente ni Raul pagkahibalo nila nga ang mga igsoon nagkauyon nga dili sa kuhaon ang libro sulod sa pipila ka semana aron mahuman nig kopya ni Raul. Sulod lang sa duha ka bulan, iyang nakopya ang tanang 27 ka basahon sa Kristohanon Gregong Kasulatan!

Bisan pa sa ilang mga paningkamot, ang mga publikasyon nga ilang gikopya dili gihapon igo aron matagan-an ang espirituwal nga panginahanglan sa nagkadaghang interesado. Busa bisag delikado, ang mga igsoon  nag-imprentag mga publikasyon diha sa ilang balay ug nag-apod-apod niini.

Padayong nag-uswag ang pagsangyaw sa western Georgia. Pero komosta kaha sa eastern Georgia? Duna bay igsoon sa Tbilisi, ang kaulohang siyudad, nga makatabang sa mga interesado sama kang Vaso Kveniashvili, nga gihisgotan ganina?

Sa katuigan sa 1970, gipapahawa sa Soviet ang mga Saksi gikan sa ilang mga balay aron moundang sila sa pagsangyaw. Mao nay nahitabo kang Oleksii ug Lydia Kurdas, magtiayong taga-Ukraine nga mibalhin sa Tbilisi. Tungod sa ilang baroganan, gipriso sila sulod sa daghang tuig didto sa mga kampo sa Soviet.

Gisangyawan ni Oleksii ug Lydia ang relihiyoso kaayong magtiayon nga si Zaur ug Eteri Kessaev. Kini nga magtiayon dunay anak, si Larisa, nga 15 anyos pa niadtong panahona. Si Larisa nahinumdom: “Naningkamot gyod ming pamatud-an nga ang Orthodox Church lang ang tinuod nga relihiyon. Wa madugay, nahutdan na mig ikapangatarongan, pero daghan pa silag mga tekstong ikapamatuod.”

Si Larisa mipadayon: “Kada simba namo, pirme nakong basahon diha sa bungbong ang Napulo ka Sugo nga gipatung-an sa duha ka imahen. Pero nianang gabhiona, dihang gibasahan mi ni Oleksii sa Exodo 20:4, 5, nakuratan ko. Wa ko katulog kay nagsige ra kog hunahuna, ‘Nagasimba baya mig mga imahen. Sa ato pa, wala diay mi magsunod sa sugo sa Diyos?’”

Aron mahimutang, miadto dayon si Larisa sa simbahan pagkabuntag ug gibasag usab ang sugo nga “Dili ka  magbuhat alang kanimo ug usa ka linilok nga larawan . . . Dili ka magyukbo kanila.” Karon pa gyod niya nasabtan ang kahulogan niini nga sugo. Wala madugay, si Larisa ug ang iyang ginikanan nabawtismohan ug nahimong usa sa unang mga Saksi sa Tbilisi.

Mga 20 ka tuig human siya unang masangyawi, may nailaila si Vaso Kveniashvili nga tigtambongan sa mga tigom sa mga Saksi ni Jehova sa Tbilisi. Nalipay si Vaso nga makauban na pod niya ang mga Saksi. Dugay na niya ning gipangandoy.

Pero sa primero, nahadlok ang mga Saksi nga apilon si Vaso sa espirituwal nga mga kalihokan kay nailhan siyang kriminal. Nagduda pa gani ang uban nga basig espiya siya sa Soviet. Busa wala siya tugoti nga motambong sa mga tigom sulod sa upat ka tuig.

 Dihang nakita nila nga sinsero ang motibo ni Vaso, siya gibawtismohan ug nahimong membro sa kongregasyon. Nasuod ra gyod si Vaso sa Diyos sa hustisya, nga iyang gipangita sukad sa batan-on pa siya! (Isa. 30:18) Matinumanon siyang nag-alagad kang Jehova hangtod sa iyang kamatayon niadtong 2014.

Pagka-1990, organisado na ang pagsangyaw sa western ug eastern Georgia. Mga 900 na ang magmamantala nga nagdumalag 942 ka Bible study. Sinugdanan pa lang ni sa dakong pag-uswag nga mahitabo.