GEORGIA
Ang Tinuod nga Kristohanong Gugma Dili Gyod Molubad
Igor: Sakop mi sa gipormang grupo sa mga Saksi didto sa Tkvarcheli, Abkhazia. Distansiyag mga 85 kilometros gikan sa siyudad sa Jvari ang kongregasyon diin nasakop ang among grupo, maong mobiyahe ko sa Jvari kada bulan aron mokuhag mga publikasyon. Pagka-1992, human mapildi ang Soviet Union, gusto sa Abkhazia nga mobulag sa Georgia ug maghimog kaugalingong gobyerno. Naggiyera ang mga sundalo sa Georgia ug ang mga rebelde, maong gubot kaayo niadtong panahona.
Gizo: Nabawtismohan ko sa edad nga 21, usa ka tuig sa wala pa magkagubot. Pagsugod sa giyera, ang mga igsoon nangalisang ug nahadlok nang mosangyaw. Pero gipalig-on mi ni Igor, nga maoy kanunay niyang ginahimo. Siya miingon: “Mas gikinahanglan sa mga tawo karon ang paghupay. Makapabilin
lang tang lig-on sa espirituwal kon dili ta moundang sa pagsangyaw.” Busa, adlaw-adlaw gihapon namong gisangyawan ang among mga silingan bahin sa makapahupayng mensahe sa Bibliya, pero nag-amping mi pag-ayo.Igor: Tungod sa giyera, dili na mi makaagi sa naandan namong ruta padulong ug pabalik sa Jvari aron makakuhag mga publikasyon. Kay didto ko nagdako, naa koy nahibaloan nga ruta agi sa mga kaumahan sa tsa ug kabukiran. Pero delikado gihapon kay posibleng makasugat mig armadong mga tawo o makatunob ug bomba. Dili nako gustong ipameligro ang kinabuhi sa mga igsoon, maong mag-inusara kong moadto didto kada bulan. Sa tabang ni Jehova, pirme kong makakuhag publikasyon nga nakatabang namo nga magpabiling lig-on sa espirituwal.
Bisag wala ray giyera sa Tkvarcheli, gibantayan pag-ayo ang mga tawo nga mosulod ug mogawas sa lungsod, apil ang mga produkto. Busa apektado gihapon mi sa kalisod. Hapit na ang tingtugnaw ug diyutay na lang ang among suplay sa pagkaon maong nabalaka mi. Pagkahibalo namo nga ang mga igsoon sa Jvari nag-andam ug mga hinabang, nalipay kaayo mi!
Gizo: Usa ka adlaw, gipangutana ni Igor ang akong pamilya kon puwede ba nga sa among balay ibutang ug ipang-apod-apod ang mga pagkaon. Miboluntaryo siya nga siyay mokuha sa mga pagkaon gikan sa Jvari. Nabalaka kaayo mi kay daghan siyag agiang mga checkpoint ug posibleng makasugat siyag armadong mga tawo ug tulisan.
Nahuwasan mi sa kabalaka dihang luwas nga nakabalik si Igor human sa pipila ka adlaw. Nagdrayb siyag sakyanan nga punog pagkaon nga igong makasustento namo panahon sa tingtugnaw! Niadtong lisod nga mga panahon, napamatud-an namo nga ang tinuod nga Kristohanong gugma dili gyod molubad.