“MIABOT gihapon ang bag-ong tuig bisan sa grabeng kagubot, panag-away, ug pagpamatay,” nag-ingon ang The Watch Tower, Enero 1, 1917. Ang Gubat sa Kalibotan I, nga nailhan kaniadto ingong Dakong Gubat nga mikalas ug daghang kinabuhi, nagpadayon gihapon sa Europe.

Bisag wala pa kaayo masabti sa mga Estudyante sa Bibliya kon unsay ipasabot sa pagkaneyutral ingong Kristohanon, daghan kanila ang naningkamot pag-ayo aron dili mahimong sad-an sa dugo. Pananglitan, sa England, ang 19 anyos nga si Stanley Willis determinado nga magpabiling neyutral. Sa  wala pa siya husaya, siya misulat: “Dako gayong pribilehiyo nga makahatag ug pamatuod. Giingnan ko sa Koronel ganinang buntag nga pasul-obon kuno kog uniporme sa sundalo, ug kon dili ko mosugot, ila kong paatubangon sa korte sa militar.”

Kay wala mosugot si Stanley, siya gipriso ug gipailalom sa pinugos nga trabaho. Pero positibo gihapon siya. Paglabayg duha ka bulan, siya misulat: “Pinaagi sa kusog nga gihatag sa Kamatuoran, ang usa makapailob ug makalahutay . . . sa mga butang nga lisod lahutayon sa uban.” Maalamon niyang gigamit ang iyang panahon sa prisohan ug miingon: “Dako kog panahon alang sa pag-ampo, pagpamalandong, ug pagtuon samtang naa sa prisohan. Panalangin kaayo ni.”

Wala madugay, ang United States apil na sa mga nasod nga naggubatay. Sa usa ka speech didto sa United States Congress niadtong Abril 2, 1917, ang presidente nga si Woodrow Wilson pormal nga mideklarar ug gubat batok sa Germany. Paglabayg upat ka adlaw, miapil na sila sa gubat. Ingong resulta, nasulayan ang neyutral nga baroganan sa mga Kristohanon sa United States.

Kay nagkinahanglan ug daghang sundalo, gipatuman sa United States ang Selective Service Act pagka-Mayo. Tungod niini, daghang lalaki ang gipatawag aron magsundalo. Usa ka bulan sa ulahi, gipatuman ang Espionage Act. Busa si bisan kinsa nga mobalibad sa pagsundalo kasohan ug krimen. Gigamit sa mga kaaway sa kamatuoran kini nga mga balaod aron ‘magmugnag kasamok’ sa mga alagad ni Jehova.—Sal. 94:20.

Gidahom na sa mga Estudyante sa Bibliya ang kagubot ug paggubatay sa mga nasod. Sulod sa daghang tuig, pirme nilang isangyaw ang mga tagna sa Bibliya nga naghisgot niana. Pero wala sila magdahom nga dunay mahitabong kagubot diha mismo sa mga alagad ni Jehova.

Nagsugod ang kasamok sa mga Kristohanon sa United States human mamatay si Charles Taze Russell. Wala sila magkasinabot kon unsaon pagdumala ang organisasyon. Giparehistro ni Brader Russell ingong korporasyon ang Zion’s Watch Tower Tract Society niadtong 1884, ug siya ang nagsilbing presidente niini hangtod sa iyang kamatayon niadtong Oktubre 1916. Dihang si Joseph F. Rutherford na ang nagdumala, ang pipila ka iladong brader sa organisasyon, lakip ang upat ka membro sa board of directors, nangambisyon ug dugang katungdanan.

Kining upat ka brader, ug ang uban pa, wala makaangay sa pamaagi ni Brader Rutherford. Usa sa mga hinungdan sa kasamok mao si Paul S. L. Johnson, nga nag-alagad niadtong panahona ingong pilgrim, o traveling overseer.

Sa wala pa mamatay si Brader Russell, iyang giasayn si Johnson sa England ingong traveling representative sa organisasyon. Apil sa iyang asaynment mao ang pagsangyaw, pagbisitag mga kongregasyon, ug paghimog report bahin sa pagsangyaw sa maong teritoryo. Pag-abot niya sa England niadtong Nobyembre 1916, giabiabi siyag maayo sa mga igsoon. Pero, midako ang iyang ulo tungod sa pagdayeg nga iyang nadawat, ug nagdahom siya nga siyay mopuli kang Brader Russell.

Nagbuotbuot siya sa pagpahawa sa pipila ka Bethelite sa England nga misupak niya. Gusto sab niyang kontrolahon ang bank account sa organisasyon sa London, maong gipabalik siya ni Brader Rutherford sa United States.

Mibalik si Johnson sa Brooklyn. Pero imbes nga magpaubos ug dawaton ang pagtul-id, pirme hinuon niyang kombinsihon si Brader Rutherford nga ibalik siya sa England aron ipadayon ang iyang asaynment. Kay wala mosugot si Brader Rutherford, iyang giimpluwensiyahan ang board of directors, ug upat kanila ang midapig niya.

 Kay gidahom na ni Brader Rutherford nga mohimo silag mga paagi aron makontrol ang pondo sa organisasyon sa United States, sama sa gihimo ni Johnson sa England, iya silang gitangtang ingong membro sa board of directors. Sumala sa balaod, ang matag membro sa board of directors kinahanglang ibotar kada tuig sa mga membro sa korporasyon. Pero sa tinuig nga miting sa korporasyon niadtong Enero 6, 1917, tulo lang ka membro sa board of directors ang gibotar—si Joseph F. Rutherford isip presidente, si Andrew N. Pierson isip bise presidente, ug si William E. Van Amburgh isip sekretaryo ug treasurer. Walay gihimong botasyon para sa upat pa ka posisyon sa board of directors. Ang mga brader sa maong mga posisyon, ang upat ka magsusupak, napili sukad pa kaniadto. Nagdahom ang uban nga magpabilin sila sa maong posisyon sa tibuok nilang kinabuhi. Pero kay wala man sila ibotar pag-usab panahon sa tinuig nga miting, dili na sila legal nga membro sa board of directors! Busa sa Hulyo 1917, gigamit ni Brader Rutherford ang iyang katungod sa pagpilig upat ka matinumanong brader alang niini nga posisyon.

Siyempre, puwerteng sukoa niadtong upat ka membro nga gitangtang ug mihimo silag mga pamaagi aron makabalik sa ilang posisyon. Pero wala sila molampos. Bisag ang uban midapig nila ug nagpormag kaugalingong organisasyon, kadaghanan sa mga Estudyante sa Bibliya nagmatinumanon. Ang upat ka magsusupak wala na gyod makabalik sa ilang posisyon.

Bisan sa mga kalisdanan, padayong gihimo ni Brader Rutherford ug sa ubang maunongong mga brader sa Bethel ang ilang maarangan aron mapauswag ang buluhaton sa Gingharian. Ang mga traveling overseer, nga nailhan kaniadto ingong mga pilgrim, midaghan gikan sa 69 ngadto sa 93. Midaghan sab ang mga colporteur, o regular payunir, gikan sa 372 ngadto sa 461. Ug sa unang higayon, duna silay gitudlo aron  mag-alagad ingong espesyal colporteur, nga gitawag karon ug oksilyare payunir. Ang ubang kongregasyon dunay 100 ka espesyal colporteur nga makugihong nagasangyaw.

Pagka-Hulyo 17, 1917, gi-release ang bag-ong libro nga The Finished Mystery. Nahurot ang suplay sa libro sa hinapos sa tuig, busa nagpaimprenta silag 850,000 ka dugang kopya niana. *

Niadtong 1916, gisugdan ni Brader Russell ang pagreorganisar sa mga buluhaton sa Bethel ug nahuman ni sa 1917. Pagka-Disyembre 1917, ang The Watch Tower miingon: “Ang mga nagtrabaho sa Opisina . . . nareorganisar na ug hapsay na ang dagan sa trabaho, nga maoy madahom sa usa ka maayong pagkadumala nga institusyon . . . Ilang giisip ang pagtrabaho sa Opisina ingong pribilehiyo, dili ingong katungod.”

Niadtong Septiyembre 1917, ang The Watch Tower miingon: “Sukad sa Enero 1, miuswag kada bulan ang gidaghanon [sa literatura nga napanagtag] kon ikompara sa tuig 1916 . . . Para namo, dako kaayo ning ebidensiya nga gipanalanginan sa Ginoo ang buluhaton dinhi sa Brooklyn.”

Gipahawa na sa organisasyon ang mga magsusupak. Ug ang gihimong surbi sa mga kongregasyon, nga giimprenta diha sa The Watch Tower, nagpakita nga kadaghanan sa mga igsoon misuportar kang Brader Rutherford ug sa matinumanong mga igsoon sa Bethel. Pero padayon gihapong gisulayan ang organisasyon. Bisag maayo ra ang kahimtang pagsugod sa 1918, kini ang kinalisorang panahon para sa modernong adlaw nga mga alagad ni Jehova.