PANAHON sa tinuig nga miting sa Watch Tower Bible and Tract Society of Pennsylvania niadtong Oktubre 3, 2015, gipahibalo ni Brader Anthony Morris, membro sa Nagamandong Lawas, nga ang Teokratikanhong Tunghaan sa Ministeryo, Tigom sa Pag-alagad, ug ang Pagtuon sa Kongregasyon sa Bibliya pulihan nag bag-ong tigom nga Atong Kristohanong Kinabuhi ug Ministeryo. Gipahibalo sab ni Brader Morris nga ang Atong Ministeryo sa Gingharian pulihan nag colored, walo ka panid nga Atong Kristohanong Kinabuhi ug Ministeryo—Workbook sa Tigom. Kini maoy binulang publikasyon nga dunay eskedyul sa senemanang  tigom ug dunay mga hulagway nga gidisenyo aron mas makalingaw ang personal nga pagbasa sa Bibliya.

Ang bag-ong tigom gibahin sa tulo ka pangunang seksiyon:

1. Bahandi Gikan sa Pulong sa Diyos. Ang unang bahin niini nga seksiyon mao ang 10 minutos nga pakigpulong nga gibase sa senemanang pagbasa sa Bibliya ug sa hulagway sa workbook. Ang ikaduhang bahin mao ang “Pagpangitag Espirituwal nga Bahandi.” Kini maoy walo ka minutong pangutanag tubag nga panaghisgot base sa senemanang pagbasa sa Bibliya. Sundan kinig upat ka minutong pagbasa sa Bibliya.

2. Magmaepektibo sa Ministeryo. Niini nga seksiyon, kasagaran tulo ka estudyante ang mopasundayag kon unsaon paghimo ang unang pakig-estorya, pagbalikduaw, ug pagtuon sa Bibliya.

3. Kristohanong Pagkinabuhi. Kini magpasiugda kon unsaon pagpadapat ang mga prinsipyo sa Bibliya kada adlaw. Importanteng bahin sab niini nga seksiyon ang pangutanag tubag nga panaghisgot panahon sa Pagtuon sa Kongregasyon sa Bibliya.

Ang mga igsoon sa tibuok kalibotan nagpahayag sa ilang apresasyon sa pagbansay nga ilang nadawat pinaagi sa bag-ong tigom. Usa ka brader sa Australia misulat: “Nindot kaayo ang Tigom nga Kinabuhi ug Ministeryo. Mas praktikal ang materyal, ug simple ra ang sampol nga mga presentasyon. Di gyod mi laayon kay mugbo, direkta sa punto, ug makalingaw ang mga bahin, ilabina ang mga video ug ang mga bahin para sa mga bata.”

Ang mga ansiyano sa usa ka kongregasyon sa Italy misulat: “Tungod niining bag-o nga tigom, mas nadasig ming  tanan nga mangandam pag-ayo, ug busa miuswag ang kalidad sa among pagpanudlo. Nagkauswag gyod ang paagi ni Jehova sa pagtudlo sa iyang katawhan. Usa ka sister nga 15 anyos miingon: ‘Sa una, di ko ka-concentrate sa tigom. Pero natabangan ko sa bag-ong tigom nga makapangandam pag-ayo ug makapokus.’”

Usa ka pamilya sa Austria misulat: “Sa una, nalisdan mi sa among senemanang eskedyul sa pagbasag Bibliya kauban ang among 10 anyos nga batang babaye. Pero tungod sa seksiyon nga ‘Bahandi Gikan sa Pulong sa Diyos,’ mas nadasig mi nga mokomento. Ma-enjoy na ming tulo sa pagpangandam sa senemanang pagbasa sa Bibliya. Nalipay sab mi kay nakita namo ang espirituwal nga pag-uswag sa among anak.”

Si Ines, nga nagpuyo sa Germany, miingon: “Nadasig ko nga mangandam ug mamalandong pag-ayo sa materyal. Karon pa gyod ko nakasulay nga mag-research pag-ayo. Mas nasuod na ko kang Jehova ron. Makapaluya ang kalibotan ni Satanas. Pero tungod sa mga tigom, napalig-on ko ug nadasig nga molahutay.”

Nalipay kaayo ang mga kongregasyon sa Solomon Islands tungod sa bag-ong midweek nga tigom, ug naningkamot sila nga makabenepisyo pag-ayo niana. Daghang kongregasyon ang naa sa lagyong lugar nga walay koryente o Internet, ug simple ra kaayo ang kinabuhi sa mga igsoon didto. Asa man silag video player para sa binulang mga video sa tigom? Ang mga igsoon sa usa ka kongregasyon sa isla sa Malaita nagtinabangay sa pagbaligyag kopras. Ang halin ilang gidonar sa kongregasyon aron makapalit ug solar nga video player. Ug ang mga brader moadto sa lugar nga naay Internet aron mag-download sa binulang mga video. Ila dayon ning ipasa sa mga igsoon sa kongregasyon.

 “Dugay ko makasabot kon walay visual aid,” misulat ang usa ka brader nga nagpuyo sa United States. “Mao nay akong problema sulod sa kapig 40 ka tuig. Kinahanglan pa nakong balikbalikon ug basa ang usa ka punto aron ako ning masabtan ug mapatin-aw sa uban. Gusto nakong pasalamatan ang Nagamandong Lawas sa mga visual aid nga among nadawat. Nindot kaayo ang mga video bahin sa mga introduksiyon sa Bibliya, ug nakatabang kaayo nako ang mga hulagway sa workbook. Gipanalanginan gyod ni Jehova ang inyong mga paningkamot sa pagtabang sa iyang katawhan. Salamat kaayo.”