NIADTONG Mayo 7 ug 8, 2016, napunog mga bisita ang lobby sa tibuok kalibotang hedkuwarter didto sa 25 Columbia Heights, Brooklyn, New York. Sagad, sirado ang lobby ug walay mga tour display sa adlawng Sabado ug Dominggo. Pero niadtong adlawa dunay open house sa Bethel, ug ang mga tawo nga nagpuyo duol sa Bethel giimbitar aron ilang makita ang atong Bible display.

Ang maong pagpangimbitar nakahatag ug maayong pamatuod sa komunidad ug nakadasig pag-ayo sa mga igsoon. Makapalipay kaayong madungog ang positibong mga komento sa dugay na natong mga silingan.

“Sukad sa dekada 60, lainlaing lugar na [sa palibot sa Bethel] ang akong napuy-an,” miingon ang usa ka lalaki,  “ug kamo ang kinamaayohang silingan. Mingawon gyod mi ninyo. Ayaw na lang mog pamalhin.”

“Dili maingon ani ka nindot ning lugara kon dili pa tungod ninyo,” miingon ang usa ka babaye. “Nalipay gyod mi nga nagkasilingan ta sa taastaas nga panahon.”

Daghang payunir ang nakadayeg kay matinahoron ug madinawaton ang mga tawo nga nagpuyo duol sa Bethel. Usa ka lalaki, nga membro sa usa ka asosasyon, ang miingon nga naapresyar kaayo niya ang atong organisasyon ug naguol siya kay duna siyay biyahe atol sa open house.

Nindot kaayo ang resulta sa gihimong pagpangimbitar. Panahon sa duha ka adlaw nga open house, 48 ka dili Saksi ang mibisita aron makita ang Bible display. Daghang Bethelite ang miabiabi nila sa lobby.

Si Sally, dalaga nga kapig 25 anyos, halos tunga sa oras nga nag-tour sa eksibit. Nakita niya sa lobby ang mga payunir nga naghatag niyag imbitasyon. Si Sally miingon nga wala siya magdahom nga naa diay Bible display. Giingnan siya sa mga payunir nga nalipay silang makailaila ug propesyonal nga sama niya nga dunay apresasyon sa Bibliya. Si Sally mitubag: “Siyempre, importante gyod na. Sa Bibliya lang nato mahibaloan ang mensahe sa Diyos. Mao niy giya sa atong kinabuhi.”

Si Sally miingon nga nagtuon siyag Latin ug Greek tungod sa iyang apresasyon sa Bibliya. Nainteres sab siya sa mga hubad niini. Para niya, importante gyod nga husto ang pagkahubad aron ang mensahe dili maimpluwensiyahan sa gituohan sa mga tawo. Dihang giingnan sa mga payunir si Sally nga ang atong website nga jw.org dunay binase sa Bibliya nga mga artikulo nga gihubad sa kapig 800  ka pinulongan, dili makatuo si Sally. Gipatin-aw sab sa mga sister kon unsay gihimo sa mga maghuhubad sa Bibliya bahin sa ngalang Jehova, ug nakurat siya ug nangutana, “Nganong gitangtang man ang ngalan ni Jehova sa Bibliya?” Ayha siya mibiya, si Sally miingon, “Dugay na ko dinhing lugara. Makaingon gyod kong maayo kaayo mo nga silingan.”

Pagka-Lunes, human sa open house, usa ka ministro sa relihiyon ang miduol kang John, Bethelite nga nag-cart witnessing duol sa Bethel. Iyang giingnan si John nga nalingaw kaayo siya sa open house ug nakadayeg kaayo siya kay gisunod gyod nato ang Bibliya. Pero pagkataudtaod, kalit siyang miingon, “Naglagot ko sa mga Saksi!” Naglibog si John ug nangutana kon ngano. “Kay manghawa man god mo! AYAW MOG BALHIN! Pamalit mog dagkong bilding, pagtukod mog bisan unsa, basta dinhi lang mo. Dako mog natabang sa atong lugar. Naglagot ko nga mamalhin mo!”

Ang gihimong pagpangimbitar ug ang open house para sa Bible display nakahatag gyod ug maayong pamatuod sa komunidad, ug tungod niini mas nailhan na sa atong mga silingan ang ngalan sa Diyos.