NIADTONG Miyerkoles, Septiyembre 23, 2015, gipahibalo sa Nagamandong Lawas ang pamilyang Bethel sa tibuok kalibotan bahin sa pipila ka kausaban sa organisasyon aron magamit sa mas maalamong paagi ang donasyon sa mga igsoon. Dayon sa Sabado, Oktubre 3, 2015, gipatin-aw sa Nagamandong Lawas ang maong kausaban: “Ang Filipos 1:10 nagtambag nato nga ‘tinoon ang mas hinungdanong mga butang.’ Ingong pagsunod niini, gusto namo [ang Nagamandong Lawas] nga hatagag prayoridad ang mga buluhaton nga direktang makatabang sa espirituwal nga kaayohan sa katawhan sa Diyos ug sa pagpauswag sa buluhatong pagsangyaw sa tibuok kalibotan.”

 Si Brader Stephen Lett, nga membro sa Nagamandong Lawas, dugang nga nagpatin-aw niini sa JW Broadcasting: “Gusto gayong pauswagon sa Nagamandong Lawas ang buluhatong pagsangyaw. Busa among gipamalandong kon unsaon nga mamenosan ang gasto sa tanang sangang buhatan aron ang pondo mas magamit sa buluhatong pagsangyaw. Pananglitan, daghan sa naandang mga trabaho ug serbisyo sa Bethel ang gimenosan o gipahunong. Busa kinahanglang menosan sab ang membro sa pamilyang Bethel.”

Busa niadtong Septiyembre 2015, mga 5,500 ka membro sa pamilyang Bethel sa tibuok kalibotan ang gireasayn sa kanataran. Bisag dili sayon ang maong kausaban, dayag kaayo ang panalangin ni Jehova. Kini nga mga kausaban nakatabang nga mapauswag pa gyod ang buluhatong pagsangyaw ug pagpanudlo.

Dunay magtiayong Bethelite sa Sri Lanka nga gireasayn sa kanataran. Pero giisip nila kini ingong kahigayonan aron ipakita ang ilang pagtuo kang Jehova ug pagsalig sa iyang organisasyon. Sila misulat: “Wala mi masayod kon unsay among kinabuhi sa gawas. Pero segurado mi nga dili gyod mi pasagdan ni Jehova. Busa miampo mi, ‘Jehova, palihog, bisag unsa may among kahimtang, tabangi mi nga maka-adjust aron makaalagad ming duha ingong regular payunir.’ Sa among unang bulan sa gawas, wala kaayo miy kuwarta ug mga gamit. Pero gipangga ug giatiman gyod mi ni Jehova. Karon, naa na miy regular nga kitâ. Busy kaayo mi sa trabahoon sa balay, panginabuhi, ug sa pagpayunir. Pero nabalanse namo ang among panahon kay nabansay mi samtang naa sa Bethel. Wala nay kalipayng molabaw pa sa pagtabang sa mga tawo nga  makakat-on sa kamatuoran, ug nalipay kaayo mi kay amo ning mahimo ingong mga payunir.”

Pipila sa nareasayn nga mga Bethelite sa Colombia ang nagkat-on ug laing pinulongan ug mibalhin sa lagyong lugar aron sangyawan sa mensahe sa Gingharian ang komunidad didto. Panalangin sab kaayo ang maong mga igsoon sa ilang bag-ong kongregasyon. Usa ka tigdumala sa sirkito ang misulat bahin sa magtiayon nga naasayn sa iyang sirkito: “Gipabilhan gyod sa mga igsoon sa kongregasyon ang ilang tabang. Mas nadasig ang mga igsoon nga makigbahin sa pagsangyaw, ug ang mga brader sa kongregasyon gibansay sa pag-atiman sa lainlaing responsibilidad.” Daghan sa kanhing mga Bethelite ang miboluntaryo ug usa o pipila ka adlaw kada semana ingong part-time commuter.

Usa ka brader nga nag-alagad sa Bethel sa Japan sulod sa 31 ka tuig ang giasayn ngadto sa kongregasyon nga duha ray ansiyano. Kay ang Kingdom Hall sa maong kongregasyon nakaeskedyul nga iremodel, nagplano siya nga dili motrabahog duha ka semana. Pero sa hapit na ang pagremodel, gitay-og sa 7.0 magnitude nga linog ang Kumamoto, ang lugar diin nahimutang ang iyang kongregasyon. Kay wala man siya mag-eskedyul ug trabaho, nakahimo siya sa pagpanguna sa paghatag ug hinabang ug sa pag-shepherding sa mga igsoon human sa linog. “Nasayod gyod si Jehova kon asa ang mas nanginahanglag tabang, ug didto ko niya giasayn,” siya miingon.

Si Phil ug Sugar, nga nag-alagad kaniadto sa sangang buhatan sa Australasia, miingon: “Dihang nareasayn mi, among gipaningkamotan nga magkinabuhing simple.  Mihangyo mi kang Jehova nga tabangan mi sa paghimog hustong desisyon ug nga iya kining panalanginan. Gusto namong moboluntaryo sa laing nasod. Gipanalanginan gyod ni Jehova ang among desisyon ug gitabangan mi aron bug-os makaalagad niya.” Naa sila karon sa Pilipinas ug nag-alagad sa English group sa Samal Island, Davao, diin dunay 34 ka magmamantala ug 9 ka regular payunir. Karon, duna silay mga 120 ka adres sa mga tawong interesado. “Dako pa gyod ang buluhaton. Malipayon mi kay misalig gyod mi kang Jehova. Mas milig-on ang among pagtuo ug gugma kaniya!”

Usa ka tagsaanong sister sa Russia ang gireasayn ingong espesyal payunir. Siya miingon: “Ang pagpayunir nakahatag nakog kahigayonan nga makigbahin pag-ayo sa pinakaimportante ug dili na mausab nga buluhatong pagsangyaw sa Gingharian sa Diyos. Nalipay kaayo ko nga gigamit ko ni Jehova alang sa iyang katuyoan.” Karon duna siyay unom ka Bible study, nga ang uban gikan sa Iraq, Nigeria, Sri Lanka, Syria, ug Zambia.

Daghang Bethelite sa Zambia ang nareasayn ingong regular payunir. Nalipay kaayo sila nga mas dako na silag panahon sa pagsangyaw. “Wa madugay sukad sa among paghawa sa Bethel, duna miy gitabangan nga duha ka tawong illiterate. Gitudloan namo sila sa pagbasa ug pagsulat,” miingon si Andrew, nga nagpayunir kauban ang iyang asawa. “Usa sa among Bible study maoy 10 anyos nga batang lalaki. Hapit na siyang mohatag sa iyang unang bahin sa midweek nga tigom. Duna pod miy nasangyawan nga magtiayon. Mitambong sila sa Memoryal ug sukad niadto presente na pirme sa mga tigom. Progresibo ang ilang pagtuon sa Bibliya. Di gyod namo ni mahimo  kon wala mi mosunod sa instruksiyon ni Jehova, nagpabili sa iyang tabang, ug misalig sa iyang paggiya.”

Si Edson ug Artness, nga nagpuyo sab sa Zambia, pipila pa lang ka bulan nga minyo dihang gireasayn sila sa kanataran. Si Artness miingon: “Ang pagbansay nga among nadawat sa Bethel nakatabang namo sa pagbadyet sa among kuwarta aron malipayon mi ug walay utang. Wala gyod mi magmahay nga nakaalagad mi sa Bethel. Nakakat-on mi sa pag-adjust sa among espirituwal nga mga tumong ug sa pagkab-ot niana sa tabang ni Jehova. Mas milig-on ang among pagsalig kang Jehova, ug determinado mi nga magpabiling maunongon kaniya.”