Diha man sa korte o sa lisod nga mga kahimtang, gipamatud-an sa atong mga igsoon ang ilang pagkamaunongon kang Jehova nga Diyos. Ang ilang panig-ingnan nagdasig natong tanan nga palig-onon ang atong pagtuo, ug mosalig nga trataron ni Jehova sa espesyal nga paagi ang maunongon kaniya.—Sal. 4:3.

Si Ruth nagdako sa pamilyang Saksi, pero nabugnaw sa pag-alagad sa bata pa. Wa madugay, naa siyay nakarelasyon, ug nanganak siyag babaye. Usa ka adlaw, sa siyudad sa La Plata, nakita ni Ruth ang mga Saksi nga nagsangyaw gamit ang table display ug nahinumdom siya sa kamatuoran nga iyang namat-an. Nakig-uban siyag balik sa mga igsoon, ug gitudloan ang iyang anak bahin sa Bibliya. Misupak niini ang amahan sa bata ug mipetisyon sa korte nga pugngan si Ruth sa pagtudlo sa ilang anak bahin sa Bibliya o pagkuyog niini sa mga tigom.

Ang abogado ni Ruth midepensa nga ang mga ginikanan parehong dunay katungod sa pagtudlo sa ilang anak bahin sa pagtulon-an sa relihiyon ug nga ang korte dili puwedeng mangilabot sa maong katungod gawas kon dunay ebidensiya nga ang maong pagtulon-an nakadaot sa bata. Mihukom ang korte nga angayng tahoron sa mga ginikanan ang katungod sa ilang anak bahin sa relihiyon, bisag kuwatro anyos pa lang siya niadto! Giklaro sa korte sa apelasyon nga ang ilang anak dili pa makadesisyon maylabot sa ginatudlo kaniya bahin sa Diyos, ug nga ang mga ginikanan dunay patas nga katungod sa pagtudlo sa ilang anak bahin sa Diyos.

Nagabasag Bibliya kada gabii ang anak ni Ruth ug tigtambongan na sa mga tigom. Nangandoy siyang maka-tour sa Bethel sa Buenos Aires.

Maylabot sa mga membro sa Kristohanong kongregasyon, namatikdan ni apostol Pablo nga “kon ang usa mag-antos, ang tanan mag-antos pod.” (1 Cor. 12:26, Biblia sa Kristohanong Katilingban) Mao sab niy gibati sa mga Saksi ni Jehova sa tibuok kalibotan dihang nag-antos si Sister Irina Zakharchenko ug Valida Jabrayilova didto sa Azerbaijan. Niadtong Pebrero 2015, giakusahan sila sa gobyerno nga naghimog ilegal nga relihiyosong buluhaton. Gipapriso sila sa huwes bisag wala pa husaya, ug kay pirmeng mapospon ang hearing, ang mga sister halos usa ka tuig nga nag-antos sa mga pagmaltratar didto sa prisohan.

Dihang gihusay na gyod ang ilang kaso niadtong Enero 2016, gihukmang sad-an sa huwes ang mga sister ug gipamulta. Pero iyang gikanselar ang multa kay ila man silang gipriso bisag wala pa husaya, ug gitugotan na silang makauli. Kay gihukman silang sad-an sa kasong kriminal, mipetisyon sila sa Baku Court of Appeal. Pero gidismis kini sa korte, maong miapelar sila sa Korte Suprema. Sa tabang sa UN Human Rights Committee, nagpasa silag reklamo batok sa mga pagmaltratar ug sa gihimong paglapas sa ilang katungod nga ipahayag ang pagtuo.

Arang-arang na ang kahimtang karon sa duha ka sister. Mapasalamaton kaayo sila sa tanang mga igsoon nga nag-ampo alang sa ilang kaayohan. Misulat si Sister Jabrayilova sa Nagamandong  Lawas: “Nakalahutay mi tungod sa inyong mga pag-ampo. Di gyod nako malimtan ang gugma ug pagpangga nga gipakita ninyo, ni Jehova, ug sa mga igsoon sa tibuok kalibotan.”

Base sa Hulyo 2016 nga ihap, 55 na ka Saksi ni Jehova ang gipriso sa gobyerno sa Eritrea tungod sa ilang pagtuo. Tulo ka brader—si Paulos Eyassu, Isaac Mogos, ug Negede Teklemariam—ang gipriso sukad pa niadtong Septiyembre 1994, ug siyam pa ka brader ang naprisog labing menos 10 ka tuig.

Dunay maayong kausaban niadtong Enero 2016 dihang gihusay sa korte ang mga Saksi nga giaresto panahon sa Memoryal didto sa Asmara niadtong Abril 2014. Kini ang unang higayon nga ang gobyerno pormal nga mipasakag kasong “kriminal” batok sa mga Saksi ug nagtugot nila sa pagdepensa. Kadaghanan sa mga igsoon gihukmang sad-an sa paghimog “ilegal” nga tigom, gipamulta, ug gibuhian. Pero usa sa mga akusadong sister, si Saron Gebru, wala mosugot nga mohatag ug multa. Busa gisentensiyahan siyag unom ka bulan nga pagkapriso. Gitugotan si Sister Gebru nga duawog mga bisita kausa matag semana ug siya miingon nga gitratar siyag maayo didto. Siya ug ang 54 ka Saksi nga gipriso mapasalamaton kaayo sa tanan natong mga pag-ampo alang sa ilang kaayohan, kay atong ‘gihinumdoman silang mga binilanggo’ nga samag nabilanggo sab kita uban nila.—Heb. 13:3.

Niadtong Disyembre 21, 2015, ang estado sa Bremen, sa northwest Germany, mihatag na gyod ug mas taas nga legal status sa Religious Association of Jehovah’s Witnesses sa Germany. Upat ka tuig ni nga gipaningkamotan sa mga Saksi nga maaprobahan sa mga korte. Kadaghanan sa 16 ka estado sa Germany miuyon na sa desisyon sa Higher Administrative Court sa Berlin nga hatagan ang mga Saksi ni Jehova ug mas taas nga legal  status, nga gitawag ug public law status. Pero misupak niini ang estado sa Bremen tungod sa bakak nga mga akusasyon batok sa mga Saksi.

Niadtong 2015, ang Federal Constitutional Court sa Germany mihukom nga ang pagsupak sa Bremen maoy paglapas sa legal nga katungod sa mga Saksi. Giklaro sa maong desisyon nga base sa balaod, ang mga Saksi ni Jehova sa Bremen duna nay kagawasan sa ilang relihiyosong mga kalihokan. Ang mga kongregasyon gihatagan sab ug eksemsiyon sa buhis, lakip sa uban pang pribilehiyo nga nabatonan sa dagkong relihiyon sa Germany.

Niadtong Marso 2013, didto sa Osh, Kyrgyzstan, gihimohimoan ug ebidensiya si Oksana Koriakina ug ang iyang inahan nga si Nadezhda Sergienko aron mapasakaan silag kasong kriminal. Matod sa piskal, ang mga Saksi nanguwarta sa mga tawo samtang nagsangyaw bahin sa Bibliya. Gisentensiyahan sila sa huwes ug house arrest samtang wala pa husaya ang kaso. Pagka-Oktubre 2014, mihukom ang korte nga ang mga ebidensiya hinimohimo ra, dunay nalapas nga mga proseso, ug nga dili sad-an ang maong mga sister. Kini sab ang desisyon sa korte sa apelasyon niadtong Oktubre 2015.

Ang piskal sa siyudad sa Osh miapelar na sab, pero didto na sa Korte Suprema sa Kyrgyzstan. Gikanselar sa Korte ang desisyon nga dili sad-an ang mga sister ug midesisyon nga husayon ni pag-usab. Panahon sa hearing niadtong Abril 2016, ang mga abogado sa mga sister mihangyo nga idismis ang kaso kay ang paghikay niini milapas na sa gitakdang panahon sumala sa balaod. Kay wa nay mahimo ang huwes, iyang gidismis ang kaso ug wala na husaya pag-usab.

Dili to lalim nga kasinatian sa mga sister, pero wala gyod sila maluya. Si Sister Sergienko miingon, “Kasagaran, maluya o magdumot ang mga tawo kon himoan silag daotan sa uban. Pero gibati nako ang gugma ug pagpangga ni Jehova pinaagi  sa mga igsoon—wala gyod mi pasagdi.” Napamatud-an mismo sa maong mga sister nga ginatuman gyod ni Jehova ang iyang saad diha sa Isaias 41:10: “Ayaw kahadlok, kay ako . . . magahawid kanimo sa akong tuong kamot sa pagkamatarong.”

Niadtong Agosto 9, 2015, napulo ka polis ang misulong sa kongregasyon nga nagtigom sa siyudad sa Osh, Kyrgyzstan. Mimando sila nga hunongon dayon ang “ilegal” nga tigom ug nanghulga nga pamusilon ang kapig 40 nga nanambong. Gidala sa mga polis ang napulo ka igsoon ngadto sa presinto, ug ilang gipangulata ang siyam kanila ug dayon gibuhian. Paglabayg duha ka adlaw, giaresto sa mga polis si Nurlan Usupbaev, usa sa mga brader nga gibun-og pag-ayo, ug gikasohan siya sa pagpanguna ug ilegal nga relihiyosong kalihokan.

Dihang nasang-at na sa Osh City Court ang kaso batok kang Brader Usupbaev, walay nakitang basehanan ang huwes maong iyang gidismis ang kaso. Miapelar ang piskal ngadto sa Osh Regional Court, pero gidismis gihapon ni. Ang korte mihukom nga dili sad-an sa ilegal nga relihiyosong kalihokan si Brader Usupbaev kay ang mga Saksi ni Jehova sa Kyrgyzstan legal nga narehistro.

Wala gihapon mosurender ang piskal. Miapelar siya sa Korte Suprema sa Kyrgyzstan. Nalipay kaayo si Brader Usupbaev kay gibasura sa Korte Suprema ang kaso niadtong Marso 2016. Giuyonan sa Korte Suprema ang desisyon sa ubos nga mga korte ug ilang giklaro nga ang mga Saksi ni Jehova dunay katungod nga maghimog relihiyosong mga tigom sa Kyrgyzstan. Kadtong mga igsoon nga gipangulata nagpayl ug kaso batok niadtong mga polis sa Osh, pero wala pay desisyon ang mga korte.

Bisag misupak pag-ayo ang mga ahensiya sa human rights sa Russia, gipadayon gihapon sa gobyerno sa Russia ang  ilang pagpangatake sa mga Saksi ni Jehova ug sa ilang relihiyosong mga kalihokan. Base sa kinabag-ohang report, gideklarar sa gobyerno nga “ekstremista” ang 88 sa atong mga publikasyon ug gidili ang opisyal nga website sa mga Saksi ni Jehova, ang jw.org. Niadtong 2015, gidili sa mga opisyal sa kustom ang pagpasulod sa New World Translation of the Holy Scriptures, ug gitimbangtimbang sa korte sa Vyborg kon ila bang ideklarar nga “ekstremista” kining modernong hubad sa Bibliya. Pagka-Marso 2016, gipangusgan pag-ayo sa Prosecutor General’s Office ang ilang pagsupak. Gusto nilang pasirad-an ang mga opisina sa mga Saksi ni Jehova sa  Solnechnoye, St. Petersburg tungod kuno sa “ekstremistang kalihokan.”

Bisag grabe ang gihimong pagsupak sa gobyerno batok sa mga Saksi ni Jehova, duna gihapoy maayong mga balita. Niadtong Oktubre 2015, usa ka piskal ang mipetisyon nga i-liquidate ang Local Religious Organization (LRO) sa Tyumen, mga 2,100 kilometros pasidlakan gikan sa Moscow. Bisag klaro na nga naghimohimo rag mga ebidensiya ang mga polis batok sa mga Saksi, gihukman gihapong sad-an sa Tyumen Regional Court ang LRO sa Tyumen. Pero niadtong Abril 15, 2016, gibaliktad sa Supreme Court of the Russian Federation ang desisyon sa ubos nga korte, ug mihukom nga “walay basehanan nga i-liquidate ang LRO sa mga Saksi ni Jehova sa Siyudad sa Tyumen.” Dihang gibasa sa huwes nga nagtsirman sa hearing ang desisyon, ang 60 ka igsoong naghuot sa korte nanindog ug namalakpak.

Ang mga alagad ni Jehova didto sa Russia padayong nag-alagad kaniya bisag unsa pay “hinagiban nga buhaton batok [kanila].”—Isa. 54:17.

Sa miaging mga tuig didto sa Rwanda, ang mga estudyanteng Saksi gipahawa sa mga eskuylahan kay wala sila moapil sa relihiyoso o nasyonalistikong mga kalihokan. Aron masulbad ang maong problema, niadtong Disyembre 14, 2015, ang gobyerno nag-isyu ug memorandum nga kinahanglang wad-on ang diskriminasyon sa relihiyon diha sa mga eskuylahan. Kini nagbaod sa mga eskuylahan nga tahoron ang kagawasan sa pagsimba sa mga estudyante.

Niadtong Hunyo 9, 2016, ang seksiyong Balita diha sa jw.org nagpagawas ug artikulo nga nag-ulohang “Gobyerno sa Rwanda Mimando nga Wad-on ang Relihiyosong Diskriminasyon Diha sa mga Eskuylahan.” Usa ka iladong online newspaper sa Rwanda ang nagpagawas sab sa mao mismong artikulo diha sa ilang website. Kapin sa 3,000 ang nakabasa niini sa maong website ug daghan kanila ang mikomento nga uyon sila sa gihimo sa gobyerno. Lipay kaayo ang mga Saksi sa Rwanda kay tungod sa maong memorandum, ang ilang mga anak makaeskuyla na nga walay diskriminasyon sa relihiyon.

Sa kapig 60 na ka tuig, ang isyu bahin sa pagsundalo mao ang kanunayng giatubang sa mga brader sa South Korea nga nag-edad ug 19 hangtod 35. Wala giila sa gobyerno sa South Korea ang katungod sa pagdumili nga magsundalo tungod sa baroganan ug wala silay gihatag nga opsiyon nga ikapuli sa pagsundalo. May mga kahimtang diin sunodsunod nga henerasyon sa mga Saksi—lolo, amahan, ug anak—ang gipriso kay wala mosugot nga magsundalo.

Ang Constitutional Court kaduha na mihukom nga subay sa konstitusyon ang Military Service Law, pero ang ubos nga mga korte ug ang mga nasilotan sa maong balaod mipetisyon na pod diha sa Constitutional Court. Busa niadtong Hulyo 9, 2015,  gi-hearing sa Korte ang mga brader nga midumili sa pagsundalo tungod sa ilang baroganan. Si Brader Min-hwan Kim, nga gipriso sulod sa 18 ka bulan kay dili itugot sa iyang konsensiya ang pagsundalo, miingon: “Nakagawas na ko sa prisohan. Pero maayo untag dili na pangprisohon kadtong modumili sa pagsundalo. Kon hatagan silag laing buluhaton puli sa pagsundalo, makatabang gyod sila sa komunidad.” Hapit nang ihatag sa Constitutional Court ang ilang desisyon.

Si Brader Hemdemov, 53 anyos, minyo, ug dunay upat ka anak nga lalaki. Ansiyano siya kaniadto ug tinahod sa ilang komunidad. Pero niadtong Mayo 2015, gisentensiyahan siya sa korte ug upat ka tuig nga pagkapriso kay naghimo kuno siyag “ilegal” nga relihiyosong tigom sa iyang balay. Gipriso siya kauban sa bagis nga mga kriminal didto sa prisohan sa lungsod sa Seydi, ug balikbalik nga gisukitsukit ug gikulata sa mga polis. Pero siya ug ang iyang pamilya nagmaunongon gihapon kang Jehova. Ginabisita ug ginadasig siya sa iyang asawa nga si Gulzira.

Kay nahibalo ta nga ang mga alagad ni Jehova naningkamot nga magmaunongon bisag ginasulayan, iampo nato ang ilang kaayohan. Ang ilang panig-ingnan magdasig nato nga magmaunongon sa Diyos ug mosalig sa saad diha sa Salmo 37:28: “Dili niya pagabiyaan ang mga maunongon kaniya.”