Midako ang teritoryo sa langyawng pinulongan sa Germany tungod sa daghang refugee ug mga tawo nga namalhin didto. Di pa dugay, sulod sa siyam ka bulan, 229 ka grupo ug pregroup nga langyawg pinulongan ang naporma. Mga 800 ka magmamantala ang mieskuyla sa gihimong mga 30 ka klase alang sa 13 ka pinulongan.

Gisangyawan sa atong mga igsoon kadtong nagpuyo sa mga refugee camp. Nagbutang silag mga cart sa kapig 200 ka lokasyon, ug mga 640,000 ka literatura ang ilang napanagtag.

 Giaprobahan sa Nagamandong Lawas ang usa ka espesyal nga kampanya sa pagsangyaw gikan sa Mayo hangtod sa Hulyo 2016. Mga 700 ka igsoon nga nagsultig Arabic gikan sa pito ka lainlaing nasod ang mibiyahe ngadto sa 10 ka lugar sa Austria ug Germany aron sangyawan ang daghang tawo didto nga nagsultig Arabic.

Dihang manangyaw, kasagarang magbaktas ra ang 50 ka magmamantala sa Faber’s Road Kriol Congregation sa Belize. Bisag kadaghanan sa mga igsoon naglisod sa pinansiyal, mahinatagon gihapon sila. Sa miaging pipila ka tuig, puniton sa mga igsoon ang mga sensilyo nga ilang makita sa dalan samtang nagsangyaw. Kada human sa tuig, ilang hugasan, ilainlain, ug kuwentahon ang mga sensilyo nga ilang natigom.

Bisag kasagaran sa mga sensilyo gamay rag kantidad (mga 25 sentabos), kada tuig makatigom silag mga sensilyo nga mokantidad ug mga 11,000 pesos. Gigamit sa mga igsoon ang katunga sa maong kuwarta alang sa mga bayronon sa ilang Kingdom Hall, ug ang katunga niana ilang gidonar alang sa tibuok kalibotang buluhaton.

Niadtong Marso 5, 2016, dunay dili malimtang panghitabo sa kasaysayan sa mga Saksi sa Burundi, dihang giduaw ni Brader Anthony Griffin, representante sa hedkuwarter, ang sangang buhatan. Ang mga kongregasyon sa tibuok nasod nakapahimulos sa espesyal nga programa nga gibrodkast pinaagi sa nasyonal nga estasyon sa radyo. Mga kuwatro milyones ang nakapaminaw!

Ang maong pagbrodkast nakahatag gyod ug maayong pamatuod, ug daghan ang nakadayeg niini. Usa sa mga  technical crew sa maong estasyon miingon, “Paghimo pa mog ingon ani nga mga programa!” Ug usa sa mga trabahante sa estasyon misulat: “Ipadayon ninyo ni [nga mga programa] kay makaluwas nig daghang tawo.” Gipatokar pod ni nga programa diha sa daghang bus ug taxi.

Sa adlaw sa Memoryal niadtong 2016, ang mga igsoon sa usa ka gamayng grupo sa Nepal nabalaka pag-ayo kay dunay himoong dakong concert sa eskuylahan nga tapad sa ilang giarkilahang pasilidad.

Kasagaran, banha kaayo ang maong mga concert. Sa buntag nianang adlawa sa Memoryal, gilimpiyohan sa mga igsoon ang pasilidad. Usa sa mga nag-organisar sa concert ang miduol nila ug miingon, “Among tugtog ra gyoy inyong madunggan.”

Gisugdan ang concert pagkaudto, ug puwerte gyong banhaa. Nag-arkila ang mga igsoon ug mas dagko nga speaker kay sa ilang giplanong gamiton. Pero dihang mitesting silag sulti sa mikropono, dili gihapon nila ni madunggan. Naguol ang mga igsoon, ug ilang giampo ang problema. Dayon mga 30 minutos sa wala pa magsugod ang Memoryal, dihang daghan nay nangabot nga mga igsoon, kalit nga napalong ang tugtog. Nagrayot ang mga tawo nga nag-inom didto sa concert, maong gipaundang sa polis ang concert. Tungod niana, malinawon ug wala nay kagubot sa palibot dihang nag-Memoryal ang mga igsoon.

Si Giuseppe usa ka regular payunir sa Italy. Nagtrabaho siya sa usa ka Internet consulting agency, pero naa ra siya sa iyang balay nag-opisina. Niadtong Mayo, mitambong  siya sa miting kauban ang mga 70 ka trabahante aron hisgotan ang bag-ong mga ideya nga puwedeng ipatuman sa ilang kompaniya. Ang ilang chief executive officer (CEO) miingon nga may mga website nga puwedeng himoong sampol sa kompaniya. Dayon duna siyay gipakitang sampol nga website sa screen. Nakurat si Giuseppe pagkakita niya sa home page sa jw.org. Ang CEO miingon, “Mao niy pinakamaayong website sa tibuok kalibotan!” Dayon iyang gihisgotan ang teknikal nga detalye sa jw.org. Nakadayeg siya kay dali rang matud-an ang mga link ug nindot ang mga graphics.

“Naapresyar sa akong mga katrabaho ang website pagkahibalo nila nga gihubad ni sa daghang pinulongan,” miingon si Giuseppe. “Pagkahuman sa presentasyon, ang akong superbisor miingon: ‘Saksi ni Jehova man ni si Giuseppe.’  Giingnan ko sa among CEO: ‘Maayo kaayo inyong organisasyon. Nakadisenyo mog website nga seguradong kaibgan sa mga kompaniya o organisasyon sa tibuok kalibotan. Di gyod lalim ang pag-update ani pirme, paghimo ani nga user-friendly, ug ang paghunahuna kon unsang mga impormasyon ang ibutang.’ Medyo naulaw ko kay naapil ko sa ilang pagdayeg, nga wala man unta koy apil sa naghimo sa atong website. Pero nalipay kaayo ko kay nakahatag nig pamatuod ngadto sa mga tawong walay ideya bahin sa mga Saksi ni Jehova. Karon, ang uban sa akong mga katrabaho regular na nakong maestorya bahin sa Bibliya, ug tulo kanila ang nagsugod nag Bible study.” Padayong giestudiyohan sa kompaniya ang jw.org nga website, ug padayong gisangyawan ni Giuseppe ang tulo niya ka kauban sa trabaho.

Si Jorge maoy usa ka batan-on nga nagpuyo sa Argentina. Sa iyang klasmet niya unang nadunggan ang maayong balita niadtong 2010. Dayon nagpa-Bible study siya gamit ang librong Unsay Tinuod nga Gitudlo sa Bibliya? Niining panahona sab, nagadula siyag soccer. Hawod kaayo siyag soccer maong nakasulod siya sa lower division sa usa ka iladong soccer club. Pagka-Abril 2014, gitanyagan siya nga moapil sa soccer team sa Germany. Eksayted kaayo siya nga mahimong propesyonal nga soccer player, maong gidawat niya ang tanyag. Pipila ka adlaw sa wala pa siya mobiyahe pa-Europe, giingnan siya sa iyang coach: “Di ba Saksi ni Jehova ka? Madaot ra imong kinabuhi kon moadto ka sa laing nasod. Saksi pod ko niadtong bata pa ko. Gitanyagan ko nga moapil sa team sa usa ka nasod sa Asia. Daghan silag gisaad nako, maong nadani kaayo ko. Mibiyahe ko kauban ang akong pamilya, pero nanguli mi nga punog  pagmahay.” Si Jorge miingon: “Namalandong ko sa iyang gisulti, ug nakadesisyon ko nga dili na modayon sa Europe. Pagka-2015, naaprobahan ko ingong magmamantala ug nabawtismohan.”

Niadtong Septiyembre 2015, gipahigayon ang “Sundoga si Jesus!” Rehiyonal nga Kombensiyon sa Kampala, Uganda. Nalipay kaayo ang mga nanambong dihang gi-release ni Brader Mark Sanderson, membro sa Nagamandong Lawas, ang New World Translation of the Holy Scriptures sa pinulongang Luganda.

Usa ka Bible study miingon: “Puwerte nakong lipaya pagkadawat nako sa nindot kaayong Bibliya! Niadtong panahona, nangandam ang mga tawo sa pagbisita sa papa. Aron dunay pondong magamit, namaligya silag mga ‘nabendisyonan’ nga mga rosaryo nga mokantidad ug mga 1,500 pesos. Gusto sa mga tawo nga makabatog bendisyon o grasya, pero wala silay kuwartang ikapalit. Pero nakadawat kog grasya o panalangin, libre pa gyod. Gihatag kini ni Jehova sa tanang nanambong sa kombensiyon, ug kami ray mag-igo kon pilay among kinasingkasing nga donasyon. Kada adlaw, dihang magbasa ko sa Bibliya diha sa akong kaugalingong pinulongan, mas nailhan nako si Jehova ug gibati kaayo nako nga iya kong gipanalanginan. Mapasalamaton gyod ko kang Jehova kay gihatagan ko niyag Bibliya.”

Sa Congo (Kinshasa), gusto sa mga lider sa ubang relihiyon nga daoton ang reputasyon sa www.pr418.com. Busa ilang gisultihan ang ilang mga membro nga ang publikasyon sa mga Saksi ni Jehova giimprenta sa mga dili ingon nato.  Aron pamatud-an ni, sila miingon nga ang mga letrang “www,” nagtumong sa numerong 666 diha sa basahong Pinadayag. (Pin. 13:18) Tungod ani, ang uban wala na magpa-Bible study.

Giampo sa usa ka magtiayong payunir ang maong problema. Dayon giimbitar nila sa balay ang ilang mga Bible study uban sa ilang mga asawa o bana. Tulo ka magtiayon ang miadto, ug human sa pagpangaon, gipakita sa magtiayong payunir ang video nga Mga Saksi ni Jehova—Organisado sa Pagsangyaw sa Maayong Balita. Tungod sa video, nawala ang tanan nilang sayop nga impresyon bahin sa gigikanan sa atong mga publikasyon. Pagkasunod semana, ang bana sa usa ka Bible study namugos gyod paghatag ug kuwarta nga mokantidad ug mga 4,900 pesos ingong donasyon para sa tibuok kalibotang buluhaton, bisag dili pa siya Bible study.

Bisag walay Internet ang mga igsoon sa lagyong lugar sa Papua New Guinea, gusto kaayo nilang makakat-on sa atong bag-ong mga kanta. Busa dunay brader sa Mundip Congregation nga moadto sa kinaduolang lungsod. Duha ka oras siyang magbaktas ug duha ka oras nga magsakayg bus. Pag-abot didto, dihang maka-access na siyag Internet, iyang kopyahon sa iyang notbok ang lyrics sa bag-ong kanta. Pagkahuman, mobiyahe na sab siya pauli ug iya ning isulat sa blackboard sa Kingdom Hall aron makita sa mga igsoon. Kopyahon sa mga igsoon ang bag-ong mga kanta aron duna silay magamit sa tigom. Kalipay kaayo nila ang pagkanta duyog sa mga igsoon sa tibuok kalibotan ingong bahin sa ilang pagsimba kang Jehova.