SUKAD gisugdan kini niadtong 2014, ang Internet TV station nga gitawag ug JW Broadcasting nakadasig ug nakapalig-on pag-ayo sa espirituwalidad sa daghang tigtan-awan niini sa tibuok kalibotan. Kini nga estasyon gipasalida na sa kapig 90 ka pinulongan. Pananglitan, ang mga programa gihubad na sa pinulongang Ewe, Ga, ug Twi (nga makita sa hulagway), ug nalipay kaayo niini ang kapig 130,000 ka mga igsoon sa Benin, Côte d’Ivoire, Ghana, ug Togo. *

Si Agatha, asawa sa tigdumala sa sirkito sa Ghana, miingon, “Dihang maminaw ko sa mga membro sa Nagamandong Lawas ug sa ilang mga katabang, morag naa mismo si Jehova sa akong kuwarto ug nakig-estorya nako. Kon wala  pa ni nga programa, unsaon kaha nako pagkabaton niini nga pribilehiyo nga makapaminaw nila, nga mora ra man kog gamayng bata nga naa sa suok? Nakatabang gyod ni nga mas masuod ta sa atong mga igsoon sa tibuok kalibotan.”

Dunay report gikan sa Zambia nga nag-ingon: “Bisag naglisod sa pinansiyal, ang mga igsoon sa daghang kongregasyon naningkamot pag-ayo aron makabenepisyo sa JW Broadcasting. Pananglitan, ang Misako Congregation, nga mga 32 kilometros gikan sa kinaduolang lungsod, nahimutang sa kaumahan nga mabahaan kon ting-ulan.” Si Simon, usa ka ministeryal nga alagad nga nagboluntaryo sa maong kongregasyon, miingon: “Kada bulan, duna miy kakongregasyon nga magbaktas ug mga duha ka oras aron makaabot sa highway. Gikan didto, manakayan siya padulong sa lungsod aron maka-download sa mga programa. Usa ka 70 anyos nga lalaki ug ang iyang duha ka anak nga lalaki wala pa gyod makatambong ug tigom sa mga Saksi ni Jehova. Pero nainteres siya kay bisag bukid ang lugar, dunay ipasalidang mga video sa tigom. Ang maong tigulang miingon, ‘Mao niy paagi aron makakat-on bahin sa Diyos.’”

Usa ka sulat sa pagpasalamat gikan sa Russia nag-ingon: “Mga usa ka tuig na ming tigtan-awan sa JW Broadcasting ug nalipay kaayo mi ani nga pribilehiyo. Human sa pinakaunang programa, gibati dayon namo nga nahiusa mi sa mga igsoon sa tibuok kalibotan! Nindot kaayo! Usa gyod diay ta ka dakong pamilya! Nalipay kaayo ming makita ang mga membro sa Nagamandong Lawas. Naningkamot gyod sila sa paghatag ug pagkaon sa hustong panahon, ug kitang tanan nakapahimulos niini. Eksayted mi sa broadcasting kada bulan. Mas magarbohon na ming magpaila ingong mga Saksi ni Jehova. Salamat kaayo, minahal nga  mga igsoon! Mapasalamaton gyod mi kang Jehova ug kang Kristo sa tanan nilang maayong buhat. Napalig-on ug nadasig gyod mi!”

Si Horst ug Helga, infirm nga edarang magtiayon sa Germany, misulat: “Nindot kaayo ang JW Broadcasting. Napalig-on mi, ilabina sa eksperyensiya sa baldadong mga igsoon. Tungod nila, nadasig mi nga ihatag ang among kinamaayohan bisag luya na ang among lawas. Pagkakita namo sa paralisadong brader nga nag-alagad ingong ansiyano, among nakat-onan nga kitang tanan makahatag sa kinamaayohan ngadto kang Jehova. Dihang makita namo ang maong sulondang mga igsoon, magpasalamat mi kang Jehova ug mohangyo nga iya silang panalanginan.”

Si Kodi, nga nagpuyo sa England, miingon: “Salamat kaayo sa inyong panahon ug paningkamot sa paghimog mga video sa jw.org, JW Broadcasting, ug sa mga video ni Caleb ug Sophia. Salamat nga inyo ming gitabangan aron dali namong masabtan ang Bibliya. Nabawtismohan ko sa edad nga otso. Inigdako nako, gusto kong moboluntaryo sa pagtukod ug mga Kingdom Hall! Ug gusto sab kong mahimong Bethelite. Nuybe anyos na ko ron, ug gamayng panahon na lang ang akong paaboton.”

Si Arabella, otso anyos nga nagpuyo sa England, misulat: “Salamat sa mga video ug sa mga worksheet. Nakatabang ni nako nga mas mailhan si Jehova. Malingaw kaayo kong magtuon bahin kang Jehova gamit ang mga worksheet sa jw.org. Maayo kaayo mong mohimog kanta nga daling i-memorize. Natabangan sab ko sa mga video ni Caleb ug Sophia. Salamat kaayo sa inyong mga paghago.”