Si Jonathan, nga nagpuyo sa Pilipinas, naghulat sa iyang kasabot nga doktor. Kay desente siyag sininaan, usa ka babaye sa reception desk ang nangutana niya kon ahente ba siya sa insyurans. Miingon si Jonathan nga Saksi ni Jehova siya ug duna siyay giubanang Saksi nga pasyente. Nakadayeg ang receptionist nga si Laila. Iyang giingnan si Jonathan nga  ang iyang papa, nga bag-o lang namatay, tigbasahan ug Bantayanang Torre. Gihisgotan ni Jonathan ang teksto sa Juan 5:28, 29 ug gihatagan siyag kopya sa tract nga Unsay Paglaom Alang sa Namatay nga mga Minahal?

Kada adto ni Jonathan sa ospital, hatagan niyag mga publikasyon si Laila. Gi-refer sab niya si Laila ngadto sa usa ka sister, nga mao nay nag-Bible study niya. Wala madugay, ang bana ni Laila, igsoong babaye, ug inahan, nga tanan kauban niya sa balay, miapil sa Bible study.

 Si Rose, nga silingan ni Laila, miduol niya ug nangutana kon nganong daghan siyag bisita sa iyang apartment. Miingon si Laila nga nagpa-Bible study siya sa mga Saksi ni Jehova. Tungod adto, nagpa-Bible study sab si Rose, ug dihang gibisita niya ang iyang igsoong babaye didto sa probinsiya, iyang gisultihan ang iyang igsoon bahin sa iyang mga nakat-onan. Nainteres pod ang iyang igsoon nga si Abigail, maong nagpa-Bible study siya. Ang inahan ni Rose nagpa-Bible study sab.

Di pa dugay, nagpabawtismo si Laila panahon sa rehiyonal nga kombensiyon. Bawtismado na sab ang iyang mama. Ang iyang silingan nga si Rose, ug ang igsoon ni Rose nabawtismohan sab sa miaging tuig. Ang inahan ni Rose regular nga tigtambongan sa mga tigom. Ug ang ubang sakop sa pamilya ni Laila padayong nagtuon sa Bibliya. Nagsugod ning tanan sa usa lang ka interesado sa ospital!

Nagkadako ang sign-language nga teritoryo sa mga Saksi sa Sri Lanka. Niadtong 2015, wala ra makaabot ug 80 ang ilang rekord sa mga amang, ug gilista lang ni sa gagmayng papel. Dayon, naporma ang unang Sri Lankan Sign Language nga kongregasyon ug computer nay ilang gamit sa pagrekord sa mga 420 ka ngalan sa mga amang ug sa mga adres nga dunay GPS coordinate. Nakontak sa mga igsoon ang mga 80 porsiyento sa maong mga amang, personal man o pinaagig video call, chat, o text. Usa ka magtiayong misyonaryo miingon: “Karon, naa nay teritoryo ang amang nga mga igsoon. Sa una, kadto rang mga amang nga ilang nailhan ang ilang duawon.”

Ang mga igsoon sa Mongolia kugihan kaayong makigbahin sa special metropolitan public witnessing bisag tugnaw kaayo ang temperatura, nga moabot ug -30 degrees Celsius. Usa ka opisyales sa gobyerno ang mikuhag literatura sa cart. Nagpadala siyag mubong sulat ingong pasalamat, nga nag-ingon: “Budhista ko. Pero daghang relihiyon ang akong gisusi kay para nako, dili ta angayng magpokus sa usa ka tinuohan. Maayo pong mahibalo ta sa uban. Human nako mabasa ang uban ninyong mga publikasyon, nakahunahuna kong sulatan mo aron mahibalo mo sa akong gibati. Naggahin gyod mog dakong panahon ug kusog aron makahatag ug mga impormasyon nga makatabang sa mga tawo. Tungod sa inyong mga publikasyon, akong nakat-onan nga angay gyong basahon ang Bibliya. Kini maoy basahon sa kamatuoran. Makahatag nig tinuod nga giya sa atong kinabuhi. Gusto nakong pasalamatan ang tanan nga naghago pag-ayo aron mahubad ang literatura sa pinulongang Mongolian. Gusto sab nakong pasalamatan ang tanang nanghatag ug mga basahon bisag puwerteng inita o tugnawa.”

Sa Hong Kong, giduol sa payunir nga si Brett ang usa ka batan-on ug gitanyagan niyag tract nga Unsay Sekreto sa Malipayon nga Pamilya? Pagkakita sa tract, mihilak ang batan-on. Siya miingon nga nagdako siya sa pamilyang Saksi. Pero pag-edad niyag 16, milayas siya. Sa mga karsada na siya nagpuyo ug naadik sa droga sulod sa lima ka tuig. Dayon, nakit-an siya sa usa ka ahensiya ug gitabangan.

Miingon sab siya nga nianang buntaga ayha siya duola ni Brett, miampo siya, “Kon tinuod ang relihiyon nga akong gidak-an, palihog hatagi kog senyales karong adlawa.” Gibati  niya nga gidungog gyod ang iyang pag-ampo. Siya ug si Brett miadto sa duol nga kapehanan ug ilang gihisgotan ang brosyur nga Balik Kang Jehova. Pero niadtong gabhiona, mouli na sa France ang batan-on maong gipangayo ni Brett ang iyang kontak ug adres. Gihatag sab ni Brett ang iyang kontak ug adres ngadto sa batan-on. Wala madugay, ang batan-on nagpadalag sulat kang Brett: “Brad, gitubag gyod ni Jehova ang akong mga pag-ampo. Motambong ko sa pinakaduol nga Kingdom Hall karong Dominggo.” Gikontak niya ang mga Saksi sa France ug nagpa-Bible study. Tigtambongan na siya sa mga tigom.