Sa Australia, dihang kinder pa si Olivia, iyang giimbitar sa Memoryal ang iyang maestra. Sulod sa walo ka tuig, pirmeng imbitahon ni Olivia ang maestra kada Memoryal. Pagka-2016, ang maestra mitawag niya ug miingon nga gusto na siyang motambong. Nagpasalamat ug nalipay sab kaayo siya kay kada tuig siyang imbitahon ni Olivia. Busa mitambong  na gyod ang maestra sa Memoryal, kauban ang iyang bana. Nahinumdom ang iyang bana dihang gitukod ang maong Kingdom Hall, kay nagtrabaho man siya sa munisipyo. Iyang gisultihan ang mga igsoon nga nakadayeg gyod siya kay organisado kaayo ang pagtukod sa Kingdom Hall. Ang maestra ug ang iyang bana nalingaw kaayo nianang gabhiona, maong usa sila sa ulahing nanguli.

Si Jacintu ug ang iyang asawa nagpuyo sa Timor-Leste. Kay debotadong Katoliko, dili sila makadawat nga ang ilang pag-umangkong lalaki nahimong Saksi ni Jehova ug mibulag sa relihiyon sa ilang pamilya. Gusto nilang pamatud-an nga sayop ang desisyon sa ilang pag-umangkon, maong gibasa ni Jacintu ang librong Unsay Tinuod nga Gitudlo sa Bibliya? aron mangitag sayop nga mga pagtulon-an. Wala madugay, miingon siya sa iyang asawa: “Gibasa nako ang libro. Pero, wa man gyoy sayop.”

“Wa tingali nimo tarongag basa,” mitubag ang iyang asawa. “Basahag usab, pero hinayhinaya ug basa.”

Gibasag usab ni Jacintu ang libro, ug miingon na pod sa iyang asawa: “Wa man gyoy sayop. Gibase man gyod sa Bibliya ang ilang pagtulon-an. Bisan ang ilang giingon bahin sa pagsimbag patay gibase sa Bibliya.”

Ang asawa mitubag: “Basahag otro, ug linyahi ang matag parapo. Tun-ig maayo. Siyaro ug way sayop.”

Sa ikatulong higayon, gitun-an pag-ayo ni Jacintu ang libro, ug gimarkahan ang matag parapo. Pagkahuman, siya miingon: “Wa man gyoy sayop! Sakto gyod diay ang  atong pag-umangkon.” Karon, nagpa-Bible study na si Jacintu sa mga Saksi ni Jehova.

Usa ka payunir nga sister, nga nagpuyo sa Guam, ang mibisita sa usa ka babayeng nagasultig Pohnpeian. Iyang gipatan-aw ang video nga Nganong Tun-an ang Bibliya? Ang sister misaad nga mobalik sa sunod higayon. Halos kada balik niya, dili niya maabtan ang maong babaye. Dihang ang anak nga babaye niini ang iyang naabtan, gipatan-aw sa sister ang maong bata ug usa ka video sa Mahimong Higala ni Jehova. Giganahan kaayo ang bata. Dihang mibalik pag-usab ang sister, naabtan na niya ang inahan. Naminaw pag-ayo ang inahan sa mensahe sa Bibliya. Gisultihan diay siya sa iyang anak nga kinahanglan silang mosimba sa simbahan sa babayeng nagpatan-aw niyag video. Mao diayng nainteres ang inahan. Nasugdan ang  Bible study, ug dunay gihimong mga kahikayan aron mapadayon ang pagtuon.

Si Terence, nga usa ka tigdumala sa sirkito, mibiyahe kauban ang iyang asawa nga si Stella padulong sa Inakor. Kini nga teritoryo sa Papua New Guinea talagsa ra kaayong masangyawan. Si Terence miingon: “Sa sayong buntag sa among unang adlaw, nakamata mi kay dunay nanuktok sa pultahan. Daghang tawo ang naghulat sa gawas, maong gisangyawan namo sila sugod sa 6:00 sa buntag hangtod sa udto. Miundang mi aron maligo ug dayon among nakita nga daghan na sab ang mga tawong  naghulat sa gawas. Gisangyawan namo sila sugod sa 2:00 sa hapon hangtod sa tungang gabii.” Pagkaugma, sayong milakaw ang magtiayon aron mosangyaw sa laing lugar. Daghan gihapon ang miadto sa ilang balay, pero wala sila maabti sa mga tawo. Si Terence miingon, “Pagkahibalo nila kon asa mi miadto, ila ming giapas. Gisangyawan na sab namo sila hangtod sa udto. Pag-uli namo sa among gipuy-an, among naabtan ang laing grupo nga naghulat namo. Mao nay panghitabo kada adlaw. Ang mga tawo didto ‘samag mga karnero nga walay magbalantay.’”—Mat. 9:36.

Si Agnès, usa ka payunir nga nagpuyo sa New Caledonia, miadto sa usa ka physical therapist kay naghubag ang iyang bukton. Samtang giatiman siya, ang therapist miingon nga tingali way kaluoy ang Diyos, kay kadaghan na siyang nakakitag tawong nag-antos. Hilom nga nag-ampo si Agnès, nga nagpasalamat sa kahigayonan nga madepensahan niya si Jehova. Dayon, iyang gipakita sa therapist ang tract nga Matapos pa Kaha ang Pag-antos? ug gibasa ang Pinadayag 21:3, 4.

Ang therapist miingon: “Dili ko segurado kon kanang teksto nga imong gibasa naa sa akong Bibliya. Ebanghelyo ra man goy naa adto.” Dayon pagkahibalo niya nga Saksi ni Jehova si Agnès, siya miingon nga naa siyay nailaila nga mga Saksi didto sa iyang lugar, sa Chile.

Nahinumdoman ni Agnès ang report bahin sa Chile nga gipasalida sa JW Broadcasting. Busa dihang mibalik siya sa therapist, gidala niya ang iyang tablet ug gipakita niya sa therapist ang maong video report. Nainteres pag-ayo ang therapist dihang iyang nakita ang Bethel ug ang Assembly  Hall sa Chile. Dayon si Agnès miingon, “Naa koy laing regalo nimo, usa ka kompletong Bibliya, aron imo na gyong mabasa ang Pinadayag 21:3, 4, ang teksto nga akong gibasa niadtong miaging semana!” Tungod sa kalipay, mitindog ang therapist, migakos kang Agnès, ug miingon, “Salamat kaayo aning duha ka nindot nga regalo!”

Dihang mibalik na sab si Agnès, gihatagan niya ang therapist ug libro nga Unsay Tinuod nga Gitudlo sa Bibliya? ug gipatin-aw kon nganong nag-antos ang mga tawo. Ang therapist miingon nga mobakasyon siya sa Chile ug iyang dad-on ang libro aron makompleto niya nig basa.