Minahal nga mga Igsoon:

Niadtong ikapitong siglo B.C.E., si propetang Ezequiel gihatagan ug makapahinganghang panan-awon. Iyang nakita sa langit ang dako kaayong karo nga gikontrol sa Soberano sa uniberso. Katingalahan kaayo ang paglihok sa maong karo. Paspas kaayo ning modagan, ug dali ra kaayong makaliko sa bisan unsang direksiyon nga dili na kinahanglang momenor o mobaking.—Ezeq. 1:4, 9, 12, 14, 16-27.

Ang maong panan-awon nagpahinumdom nato nga kanunayng naglihok ang langitnong bahin sa organisasyon ni Jehova. Komosta ang yutan-ong bahin? Klarong gipakita sa miaging tuig sa pag-alagad nga gipalihok sab ni Jehova ang iyang organisadong katawhan dinhi sa yuta sa makapahingangha nga gipaspason!

Dinhi sa United States, ang mga membro sa pamilyang Bethel nagsugod nag pamalhin gikan sa Brooklyn ngadto sa bag-ong tibuok kalibotang hedkuwarter sa Warwick, New York. Duna poy gibalhin sa laing mga pasilidad ug dunay giasayn sa kanataran. Daghang Bethelite sa ubang sangang buhatan ang aktibo kaayo sa pagpanukod, pagremodel, pag-usa sa mga sangang buhatan o departamento, o pagbalhin sa laing lugar. Komosta sa inyong bahin? Bisan tingalig wala mo mobalhin sa laing lugar, seguradong aktibo mo sa ubang buluhaton sa Gingharian.

 Natandog ug nadasig pag-ayo ang Nagamandong Lawas sa pagkasayod nga ang mga alagad sa Diyos sa tibuok kalibotan mas nagkugi sa mga buluhaton sa Gingharian, ug naningkamot nga makasunod pag-ayo sa organisasyon ni Jehova. Daghan ang mibalhin sa mga lugar nga dakog panginahanglan. Ang uban misulay ug laing mga pribilehiyo sa pag-alagad, sama sa pagboluntaryo sa langyawg pinulongan nga teritoryo. Daghan pod ang misulay ug laing paagi sa pagsangyaw nga tingali bag-o para nila. Daghan pa ang nagpauswag sa ilang pag-alagad sa uban pang paagi. Ug ang tanang matinumanong Kristohanon, lakip ang mga tigulang ug infirm, nagmalahutayon sa lumba sa kinabuhi. Padayon nilang gihimo ang ilang maarangan sa pag-alagad kang Jehova ug busa nakatabang sila nga mapamatud-ang bakakon si Satanas.—1 Cor. 9:24.

 Magmasaligon nga ang inyong kadasig gipabilhan gayod ni Jehova. (Heb. 6:10) Ang inyong pagkaandam nagpahinumdom namo kang Abraham ug Sara. Bisag kapig 70 anyos na si Abraham, mibiya siya sa Caldeanhong siyudad sa Ur ug gidala ang iyang pamilya ngadto sa layong lugar sa Canaan. Sukad niadto, mga usa ka gatos ka tuig siya nga nagpuyo sa mga tolda hangtod sa iyang kamatayon. Andam gayod mosakripisyo si Abraham ug ang iyang pinalanggang asawa!—Gen. 11:31; Buh. 7:2, 3.

Andam ba sab mong mosakripisyo? Nagmatinumanon mo niining malisod nga mga panahon ug inyong gituman ang sugo ni Jesus: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu.”—Mat. 28:19.

Matikdi nga gigamit ni Jesus ang pulong “panglakaw.” Kini nagpasabot nga duna gyod tay himoon, nga kinahanglan tang molihok. Makapalipay gayong makita nga sa miaging tuig, daghan kaayog nalampos ang madasigong mga sumusunod ni Kristo! Dayag gayod nga gipanalanginan ni Jehova ang pagsangyaw sa maayong balita sa Gingharian sa tibuok kanasoran.—Mar. 13:10.

Daghan ang midawat sa mensahe. Ang kinatas-ang ihap sa mga magmamantala sa miaging tuig maoy 8,340,847, ug kada bulan 10,115,264 ang aberids sa mga Bible study. Nagalihok gayod ang langitnong karo, ug mao man usab kamo. Ipadayon ang inyong kadasig kay mubo na lang ang panahong nabilin ayha sirhan ni Jehova ang pultahan sa kaluwasan.

Haom kaayo ang 2017 tinuig nga teksto: “Salig kang Jehova ug buhata ang maayo.” (Sal. 37:3) Kon inyong buhaton  ang maayo pinaagi sa paghimog sagradong pag-alagad kang Jehova, gipakita ninyo ang inyong pagsalig kaniya. Palihog hinumdomi kanunay nga wala gyod mo mag-inusara. Tinuod gayod ang giingon ni Jesus: “Ako magauban kaninyo sa tanang adlaw hangtod sa kataposan sa sistema sa mga butang.”—Mat. 28:20.

Magmasaligon nga padayong panalanginan ni Jehova ang inyong pagkamatinumanon. Gamay man o dako ang inyong nahimo, ang importante kang Jehova mao nga gihimo ninyo ang inyong kinamaayohan uban ang hustong motibo. Malipay gyod si Jehova sa inyong kinasingkasing nga pag-alagad. (2 Cor. 9:6, 7) Busa pabiling suod sa inyong mahigugmaong Amahan pinaagig regular nga pag-ampo, pagtuon sa Pulong sa Diyos, pagtambong sa mga tigom, ug sa pagpakigbahin sa ministeryo.

Kay mubo na lang kaayo ang iyang panahon, ang Yawa naningkamot pag-ayo sa paggamit sa bisan unsang paagi aron makabiya ta sa atong maunongong pag-alagad kang Jehova. (Pin. 12:12) Pero kon magpabilin tang suod kang Jehova, dili gyod molampos ang mga paningkamot sa Yawa. (Sal. 16:8) Gimahal mo namo pag-ayo ug among giapresyar ang inyong tabang sa pagtuman sa mga buluhaton sa Ginoo niining kataposang mga adlaw.

Inyong mga igsoon,

Nagamandong Lawas sa mga Saksi ni Jehova