“Ang Pulong sa Diyos Buhi”
Kapitulo 13
“Ang Pulong sa Diyos Buhi”
Sa nag-unang kapitulo, nakita nato nga ang tambag sa Bibliya makatabang kanato sa pagsulbad sa mga suliran ug sa paglikay sa mga sayop. Ang walay-panahon nga kaalam sa tambag sa Bibliya kusganon nga ebidensiya sa pagkadinasig. Ang Bibliya mismo nagkanayon: “Ang tanang Kasulatan gidasig sa Diyos ug mapuslanon alang sa pagpanudlo, alang sa pagpamadlong, alang sa pagtul-id sa mga butang, alang sa pagmatoto sa pagkamatarung.” (2 Timoteo 3:16) Apan ang Bibliya naghatag kanato kapin pa sa maalamong tambag. Ingon nga Pulong sa Diyos, kini aktuwal nga nag-usab sa katawhan.
1-3. (a) Sa unsang paagi ang Bibliya nagpasiugda sa panginahanglan sa kausaban sa personalidad? (b) Unsang kasinatian ang nagpakita sa gahum sa Bibliya sa pag-usab sa mga personalidad?
ANG Bibliya ba sa pagkamatuod makausab sa katawhan? Oo, kini ngani makausab sa ilang personalidad. Palandonga kining tambag nga girekord sa Bibliya: “Hukasa ninyo ang daang personalidad nga nahiuyon sa inyong karaang paggawi ug nga nadunot sumala sa iyang malimbongong pagpangibog; apan . . . magbag-o kamo sa puwersa nga nagpalihok sa inyong hunahuna, ug isul-ob ang bag-ong personalidad nga gilalang sumala sa kabubut-on sa Diyos sa matuod nga pagkamatarung ug pagkamaunongon.”—Efeso 4:22-24.
2 Posible ba sa pagkamatuod ang pagsul-ob sa bag-ong personalidad? Oo, posible! Sa pagkamatuod, ang pagkahimong Kristohanon usahay naglangkit sa dramatikong kausaban sa personalidad. (1 Corinto 6:9-11) Pananglitan, usa ka batang lalaki sa Habagatang Amerika nailo sa panuigon nga siyam. Nagtubo nga walay giya sa ginikanan, naugmad niya ang grabe nga suliran sa personalidad. Nagsugilon siya: “Sa panahon nga ako 18 na, ako bug-os nga nagiyan sa droga ug nakapuyo na sa prisohan alang sa pagpangawat sa pagsuportar sa bisyo.” Ang iyang iyaan, bisan pa, usa sa mga Saksi ni Jehova, ug sa kaulahian siya nakatabang kaniya.
3 Nagpatin-aw siya: “Ang iyaan nako nagsugod sa pagtuon sa Bibliya kanako, ug tapos sa pito ka bulan nakahimo ako sa pagbiya sa droga.” Gibiyaan usab niya ang iya kanhing kaubanan ug naghimog bag-ong mga higala taliwala sa mga Saksi ni Jehova. Nagpadayon siya: “Kining bag-ong kaubanan, uban sa akong regular nga pagtuon sa Bibliya, nagpahinabo kanako sa pag-uswag ug sa kaulahian sa pagpahinungod sa akong kinabuhi sa pag-alagad sa Diyos.” Oo, kining kanhi nagiyan sa droga ug kawatan nahimong aktibong Kristohanon, ug kining radikal nga kausaban nahimo pinaagi sa gahum sa Bibliya. Sa pagkamatuod, sama sa giingon ni apostol Pablo, “Ang Pulong sa Diyos buhi ug gamhanan.”—Hebreohanon 4:12.
Nausab Pinaagi sa Kahibalo
4, 5. Sumala sa Colosas 3:8-10, unsa ang kinahanglanon aron sa pag-ugmad sa bag-ong personalidad?
4 Sa unsang paagi ang Bibliya nag-usab sa katawhan? Ang tubag makita niining pasahe sa Bibliya: “Isalikway ninyo kining tanan, kasuko, kapungot, kadaotan, abusado nga pulong, ug hilas nga sinultihan gikan sa inyong baba. Ayaw magbinakakay sa usa ug usa. Hukasa ang daang personalidad uban sa mga batasan niini, ug isul-ob sa inyong kaugalingon ang bag-ong personalidad, nga pinaagi sa hustong kahibalo nahimong bag-o sumala sa dagway sa Usa kinsa naglalang niini.”—Colosas 3:8-10.
5 Tagda ang hinungdanong papel nga gidula sa hustong kahibalo sa Bibliya. Ang Bibliya nagpatin-aw kon hain nga kinaiya ang kinahanglan natong tangtangon ug hain ang atong ugmaron. Ang maong kahibalo makahimog gamhanang epekto, sama sa nakaplagan sa batan-ong lalaki sa habagatang Europa. May matuod siya nga suliran: putong nga kinaiya. Samtang nagtubo, kanunay anaa siya sa mga away, ug ingon nga kahungawan sa iyang kaputong, nagtuon siya ug boksing; apan dili gihapon niya makontrol ang iyang putong nga kinaiya. Sa dihang nagsundalo siya, nalangkit siya sa kasamok tungod sa pagbukbok sa iyang kauban nga sundalo. Human makabiya sa pagkasundalo, naminyo siya apan bukbokon usab niya ang iyang asawa. Sa usa ka lalis sa pamilya, gibukbok niya ang iyang kaugalingon nga amahan, nga nadakdak sa yuta. Sa pagkamatuod usa ka masuk-anon, putong nga batan-on!
6, 7. Sa unsang paagi ang hustong kahibalo sa Bibliya nagtabang sa batan-ong lalaki sa habagatang Europa sa pag-usab sa iyang personalidad?
6 Sa kaulahian, bisan pa, siya nagtuon sa Bibliya uban sa mga Saksi ni Jehova ug nakadungog sa tambag: “Dili magbalus ug daotan alang sa daotan kang bisan kinsa. . . . Kon mahimo, sumala sa inyong maarangan, magmadaiton uban sa tanang mga tawo. Dili magpanimalos sa inyong kaugalingon, mga hinigugma, apan hatagi ug luna ang kapungot.” (Roma 12:17-19) Kini nakatabang kaniya sa pag-amgo kon unsa ka daotan ang iyang kahuyangan sa kaputong. Giundangan niya ang boksing, nga naamgohan niya wala mahiuyon sa madaiton Kristohanong personalidad. Apan sa gihapon kinahanglan makigbisog siya batok sa iyang putong nga kinaiya.
7 Natabangan siya, bisan pa, pinaagi sa iyang dugang kahibalo sa mga prinsipyo sa Bibliya. Kini naglunsay sa iyang tanlag, nga milihok sa pagpugong sa iyang kaputong. Makausa, sa dihang siya nakahimo na ug kauswagan sa iyang mga pagtuon sa Bibliya, ang usa ka estranghero nasuko ug nagbanghag kaniya ug mga insulto. Gibati sa batan-ong lalaki ang nagsurok nga kasuko. Unya, gibati niya ang laing puwersa: pagbati sa kaulaw; ug kini nagpugong kaniya sa pagpahungaw sa iyang kasuko. Inay kay sa “pagbalos ug daotan alang sa daotan,” gipugngan niya ang iyang espiritu. Karon, siya tawo nga nausab na, uban sa bag-ong personalidad, salamat sa hustong kahibalo sa Bibliya.
Pag-ila sa Diyos
8. (a) Sa kang kansang dagway gibuhat ang bag-ong personalidad? (b) Ang hustong kahibalo nga naghulma sa bag-ong personalidad kinahanglan maglakip sa kahibalo kang kinsa?
8 Matuod, daghang mga tawo ang nahibalo sa hustong butang buhaton, apan nungtan nila ang unodnong kahuyangan. Tataw nga, ang yanong pagbaton sa hustong kahibalo sa husto ug sayop dili ang tanan nga kinahanglanon. May laing butang pa ang nagtabang sa duha ka indibiduwal nga gihubit sa itaas sa pag-usab. Unsa kini? Ang pasahe nga gihisgotan sa unahan nagkanayon: “Isul-ob sa inyong kaugalingon ang bag-ong personalidad, nga pinaagi sa hustong kahibalo nahimong bag-o sumala sa dagway sa Usa kinsa naglalang niini.” (Colosas 3:10) Matikdi nga, maingon nga si Adan sa orihinal gibuhat sa dagway sa Diyos, mao man ang bag-ong personalidad gibuhat sa dagway sa Diyos. (Genesis 1:26) Busa, ang hustong kahibalo nga nakatabang niining duha ka batan-ong lalaki naglakip sa kahibalo sa Diyos. Kini nagpahinumdom kanato sa mga pulong ni Jesus: “Kini nagkahulogan sa walay kataposang kinabuhi, ang ilang pagbaton ug kahibalo mahitungod kanimo, ang bugtong matuod nga Diyos, ug sa usa kinsa imong gipadala, si Jesu-Kristo.”—Juan 17:3.
9. Sa unsang paagi ang kahibalo sa Diyos nagtabang kanato sa pag-usab sa atong personalidad?
9 Sa unsang paagi ang kahibalo sa Diyos nagtabang kanato sa pag-usab sa atong personalidad? Kini naghatag kanato ug motibo sa pagbuhat niana. Sa dihang makaila kita sa Diyos pinaagi sa atong pagtuon sa Bibliya, nakakat-on kita sa iyang langitnong mga hiyas ug nakakita sa gugma nga iyang gipakita kanato. Kini nagtultol kanato sa paghigugma kaniya balik. (1 Juan 4:19) Unya, kita makasugot sa kon unsa ang giingon ni Jesus ang nahauna ug labing dakong sugo: “Kinahanglan higugmaon mo si Jehova nga imong Diyos uban sa bug-os mong kasingkasing ug uban sa bug-os mong kalag ug uban sa bug-os mong hunahuna.” (Mateo 22:37) Ang gugma sa Diyos magpahinabo kanato nga buot mosul-ob sa bag-ong personalidad nga nagpahimuot kaniya. Kini magpahinabo kanato nga buot mahimong sama kaniya, bisan kon unsa man kalisod ang atong pagpanlimbasog niini.
Lalom Nakagamut nga Kahuyangan
10, 11. Sa unsang paagi ang hustong kahibalo nagtabang sa batan-ong babaye sa Amihanang Amerika sa pag-usab sa iyang personalidad?
10 Sa pipila ka kaso, kini sa pagkamatuod usa ka panlimbasog. Ang usa ka batan-ong babaye sa Amihanang Amerika nanginahanglan sa pagpakigbugno sa tumang kalisod aron sa pag-usab. Usa ka biktima sa abuso sa sekso sa bata pa, nagtubo siya sa usa ka pintas nga pamilya ug sa kaulahian midangop sa mga droga. Bisan pa, gastoso ang mga droga, busa gibaligya niya ang iyang kaugalingon ingon nga puta aron kabayran ang bisyo. Gihasol ug gitulis niya ang mga turista ug naggugol ug mas daghang panahon sa prisohan ug bilyaran kay sa balay.
11 Sa dihang nahinagbo siya sa mga Saksi ni Jehova, siya—tapos sa daghang mga aborsiyon—nahimong inahan sa ilehitimong bata. Bisan pa, nakaangay siya sa nadunggan niya gikan sa Bibliya ug misugod sa pagtuon niini. Wala madugay siya nakaugmad ug relasyon sa Diyos ug naghimog kausaban sa iyang kinabuhi.
12, 13. Hubita kon sa unsang paagi ang hustong kahibalo, makausa nga kini matanom, molihok nga puwersa sa kausaban.
12 Ang malisod nga pagpakigbugno anaa sa unahan, bisan pa, sanglit ang daang personalidad lalom nga nakagamut. Sa usa ka okasyon, nahiubos siya sa pipila ka maayog-tuyo nga tambag, nag-undang sa pagtuon sa Bibliya, ug nagbalik sa iyang hugaw nga mga paagi. Apan dili siya makalimot sa kamatuoran sa Bibliya nga natanom kaniya, ug nag-admiter siya: “Matag karon ug unya bation nako nga sad-an, ug ang mga pulong sa 2 Pedro 2:22 naglatas sa akong hunahuna: ‘Ang iro nagbalik sa iyang kaugalingong suka ug ang nadigo nga anay sa yanang.’”
13 Sa kaulahian, kining kahibalo nagtukmod kaniya sa paghimog lain determinadong paningkamot. Nagkanayon siya: “Gisugdan nako pag-abli ang ganghaan kang Jehova ug sagad mag-ampo alang sa panabang.” Niining panahon, ang bag-ong personalidad mas lig-on nga natanom, bisan pa nga siya sa gihapon kinahanglan manlimbasog ug maayo. Makausa, sa usa ka gutlo sa kahuyangan, nahagsa siya pag-usab sa pagpahubog ug imoralidad. Niining panahon, bisan pa, ang reaksiyon niya nagpakita nga siya sa pagkamatuod nag-usab. Giluod sa iyang kaugalingon siya nagkanayon: “Dugang ako nga nag-ampo ug nagtuon.” Sa kaulahian, ang Pulong sa Diyos gamhanan nga naglihok sa iyang kinabuhi ngadto sa gilapdon nga siya nahimong aktibong Kristohanon, nagkinabuhi sa hinlo, dungganon nga kinabuhi. Sulod sa daghan nang mga tuig karon, siya sa bug-os lahi nga persona gikan sa abusado, nagiyan sa droga, luog-kinabuhi nga indibiduwal nga mao siya kanhi.
Katawhan nga Nausab Pinaagi sa Pulong sa Diyos
14, 15. (a) Unsang puwersa gikan sa Diyos ang nagpalakaw pinaagi sa Bibliya? (b) Unsa ang pipila ka kinaiya sa matuod nga mga Kristohanon karon?
14 Ang gahum nga gipalihok sa Bibliya sa mga kinabuhi sa mapinaubsanong mga indibiduwal nagpakita nga kini kapin pa kay sa yano tawhanong binuhat. Ingon nga dinasig nga Pulong sa Diyos, kini usa ka kanal alang sa pagpalakaw sa espiritu sa Diyos. Ang samang espiritu nga naghimong posible sa mga milagro nga gibuhat ni Jesus nagtabang kanato karon sa pagbuntog sa daotang mga hiyas ug mag-ugmad sa Kristohanong personalidad. Sa pagkamatuod, ang pasukaranang mga hiyas nga kinahanglan sa mga Kristohanon ugmaron—gugma, kasadya, pakigdait, taas-pailob, kalolot, kaayo, pagtuo, kaaghup, ug pagpugong sa kaugalingon—gitawag sa Bibliya nga “bunga sa espiritu.”—Galacia 5:22, 23.
15 Karon, kining espiritu nagpalakaw dili lamang sa pipila ka indibiduwal apan sa minilyon kinsa “gitudloan ni Jehova” ug nagpahimulos sa ‘dagayang kalinaw’ gikan Kaniya. (Isaias 54:13) Kinsa kini sila? Si Jesus naghatag sa paagi sa pag-ila kanila, nga nag-ingon: “Pinaagi niini ang tanan makaila nga kamo akong mga disipolo, kon kamo may gugma sa inyong taliwala.” (Juan 13:35) Ang Kristohanong gugma bunga sa espiritu ug yawing bahin sa Kristohanon bag-ong personalidad. Duna ba ing bisan unsang grupo sa katawhan nga nagpakitag gugma sa paagi nga gipamolong ni Jesus?
16, 17. Magkutlo ug pipila ka komento sa pamantalaan nga nagtabang sa pag-ila kinsa kadtong “gitudloan ni Jehova” ug kinsa nagpahimulos sa ‘dagayang kalinaw.’
16 Buweno, pamatii kining tipik sa sulat sa New Haven Register, pamantalaan sa Amihanang Amerika: “Bisan kon napikal ka o nanuyo [nasuko], sama nako, sa ilang pagpangabig, makadayeg ka sa ilang pagkamahinalaron, sa ilang pagkamaayo, sa ilang talagsaong panig-ingnan sa tawhanong paggawi ug malinis nga kinabuhi.” Ang pamantalaan nga Münchner Merkur sa Alemanya naghisgot sa samang grupo sa pag-ingon niini: “Sila ang labing matinud-anon ug labing untup nga mga magbabayad ug buhis sa Pederal nga Republika [sa Alemanya]. Ang ilang pagkamasinugtanon sa mga balaod makita sa ilang paagi sa pagmaniho maingon man sa mga estadistika sa krimen.”
17 Mahitungod kang kinsa kining duha ka pamantalaan nagsulti? Sa samang grupo nga gihisgotan sa Herald sa Buenos Aires, Argentina. Kining pamantalaan nagkanayon: “Ang mga Saksi ni Jehova napamatud-an latas sa katuigan nga kugihan, ugdang, madaginoton ug mahadlokon sa Diyos nga mga lungsoranon nga dayag matang nga kinahanglanon sa nasod.” Ang usa ka sosyolohikal nga pagtuon sa Zambia nga gipatik sa American Ethnologist nagpunting sa samang grupo. Kini nag-ingon: “Ang mga Saksi ni Jehova nasinati sa mas dakong kalamposan kay sa mga membro sa ubang denominasyon sa paghupot nga lig-on sa bugkos sa kaminyoon.”
18, 19. Sa unsang paagi ang mga Saksi ni Jehova sa Italya ug sa Habagatang Aprika gihubit?
18 Ang pamantalaan nga La Stampa sa Italya naghisgot usab sa mga Saksi ni Jehova sa dihang kini nag-ingon: “Sila mao ang labing maunongong mga lungsoranon nga mahimong pangandoyon sa usa: wala sila maglikay sa mga buhis o maningkamot sa paglihay sa dili kombenyente nga mga balaod alang sa ilang kaugalingong ganansiya. Ang moral nga mga mithi sa gugma alang sa silingan, pagdumili sa gahum, dili-madagmalon ug personal nga pagkamatinud-anon (nga alang sa kadaghanan sa mga Kristohanon ‘Domingo nga mga lagda’ lamang nga maayo iwali sa pulpito) lakip sa ilang ‘matag adlaw’ nga paagi sa pagkinabuhi.”
19 Ang usa ka propesor sa unibersidad sa Habagatang Aprika kinsa nasinati sa pagpihig ubos sa rasanhong balaod nianang nasora nagtawag sa mga Saksi ni Jehova nga “katawhan nga edukado sa hataas nga mga sukdanan sa Bibliya aron sa pagkamatuod mahimong ‘buta-sa-kolor.’” Nagpatin-aw niini, midugang siya: “Nia ang katawhan kinsa makakita kon unsa ang uban sa sulod, dili lamang sa kolor sa ilang panit. Ang mga Saksi ni Jehova karon naglangkob sa bugtong matuod nga pagkamanagsoon sa katawhan.”
20. Ngano ang mga Saksi ni Jehova nagbuntaog nga lahi?
20 Kining mga komento nagpakita nga dunay kahugpongan sa katawhan kinsa nagbukas sa ilang mga kasingkasing sa Bibliya ug diha kang kinsa ang espiritu sa Diyos nahimong aktibo. Takos sa pagtagad nga mao kini ang samang katawhan kinsa among gipaila sa unahan nga nagtuman sa sugo ni Jesus sa pagwali sa maayong balita sa Gingharian libot sa kalibotan. (Mateo 24:14) Ngano ang mga Saksi ni Jehova nagbuntaog niining mga paagi? Sa daghang bahin sila dili lahi sa ubang katawhan. Duna sila sa samang unodnong kahuyangan, sa samang ekonomikanhong suliran, ug sa samang pasukaranang kinahanglanon. Apan ingon nga usa ka grupo, sila nahigugma sa Diyos, seryoso sa Bibliya, ug nagtugot niini sa paggahum sa ilang kinabuhi.
21. Unsa ang gipamatud-an sa kamatuoran nga ang katawhan sama sa mga Saksi ni Jehova mahimong maglungtad karon sa punog-dumot nga kalibotan?
21 Minilyon sa mga Saksi ni Jehova makaplagan sa kapin sa 200 ka kayutaan. Sila naglakip sa katawhan sa tanang rasa, pinulongan, ug sosyal nga kahimtang nga mahunahunaan. Apan ang ilang pagkamanagsoon nahiusa, malinawon, internasyonal. Maayo sila nga mga lungsoranon sa bisan unsang nasod sila nakaplagan nga nagpuyo, apan una ug labaw sa tanan, sila mga sakop sa Gingharian sa Diyos, ug silang tanan aktibo kaayo sa pagsugilon sa uban sa maayong balita nianang Gingharian. Sa pagkamatuod kahibudnganan nga niining nabahin, punog-dumot nga kalibotan, ang usa ka grupo sama sa mga Saksi ni Jehova mahimong maglungtad. Ang kamatuoran nga naglungtad sila gamhanan nga ebidensiya nga ang espiritu sa Diyos sa gihapon aktibo taliwala sa katawhan. Ug kini pruweba nga ang Bibliya sa pagkamatuod “buhi ug gamhanan.”
[Mga Pangutana sa Pagtuon]
[Blurb sa panid 177]
Ang Bibliya aktuwal nga nag-usab sa katawhan
[Blurb sa panid 181]
Ang kahibalo sa Diyos nagpahinabo sa tawo nga buot mahimong sama kaniya
