Kapitulo 53

Ang Gihandom nga Labaw-Tawhanong Magmamando

DIHANG milagrosong gipakaon ni Jesus ang libolibo, nahibulong ang mga tawo. “Sa pagkatinuod kini siya mao gayod ang propeta nga moanhi sa kalibotan,” sila miingon. Sila mituo nga dili lang propeta si Jesus nga labaw pa kang Moises kondili siya ang labing maayong himoong magmamando. Busa nagplano sila sa pagdakop kaniya ug sa paghimo kaniyang hari.

Apan, si Jesus nahibalo sa plano sa mga tawo. Busa siya milihok dayon sa paglikay sa pinugos nga paghimo kaniya nga hari. Iyang gipalakaw ang mga tawo ug nagsugo sa iyang mga tinun-an sa pagsakay sa ilang sakayan ug sa pagbalik sa Capernaum. Ug dayon siya mipahilit sa bukid aron mag-ampo. Niadtong gabhiona nag-inusara didto si Jesus.

Sa hapit nang mibanagbanag ang adlaw mitan-aw si Jesus gikan sa iyang taas nga dapit ug nakakita sa mga balod nga gikusokuso tungod sa kusog nga hangin. Gumikan sa kahayag sa hapit nang pagtakdol sa bulan, sanglit taliabot man ang Paskuwa, nakita ni Jesus ang sakayan uban ang mga tinun-an nga naningkamot sa pagsongsong sa mga balod. Ang mga tawo namugsay taman sa ilang ginhawa.

Sa pagkakita niini, mikanaog si Jesus gikan sa bukid ug misugod sa paglakaw ibabaw sa tubig paingon sa sakayan nga gisongsong ang mga balod. Ang sakayan nakalawig na sa gilay-ong mga tulo o upat ka milya sa dihang nakaabot si Jesus. Apan, siya mipadayon sa paglakaw nga daw molabay lang. Dihang nakit-an siya sa mga tinun-an, sila misinggit: “Usa ka multo!”

Si Jesus mahupayong mitubag: “Ako kini; ayaw kamo kalisang.”

Apan si Pedro miingon: “Ginoo, kon ikaw man ugaling, paanhaa ako diha kanimo sa ibabaw sa tubig.”

“Umari ka!” mitubag si Jesus.

Dihadiha, si Pedro mikawas sa sakayan, milakaw ibabaw sa tubig paingon kang Jesus. Apan sa pagkakita niya sa hangin, nahadlok si Pedro, ug misugod siya sa pagkaunlod, siya misinggit: “Ginoo, luwasa ako!”

Dihadiha gituyhad ang iyang kamot, gikuptan siya ni Jesus, nga nag-ingon: “Tawong gamay ug pagtuo, nganong nagduhaduha ka man?”

Ug sa nakasakay na si Pedro ug Jesus sa sakayan, ang hangin milurang, ug nahibulong ang mga tinun-an. Apan angay bang mahibulong sila? Kon sila nakasabot sa “kahulogan sa mga tinapay” pinaagi sa pagpabili sa dakong milagro nga gihimo ni Jesus sa miaging pila ka oras sa nagpakaon sa libolibong mga tawo sa lima lamang ka tinapay ug duha ka gamayng isda, dili unta angay ikahibulong nga siya makalakaw sa ibabaw sa tubig ug makapalurang sa hangin. Apan, karon, misimba ang mga tinun-an kang Jesus ug miingon: “Ikaw mao gayod ang Anak sa Diyos.”

Sa ulahi, miabot sila sa Genesaret, usa ka matahom, mabungahong patag duol sa Capernaum. Didto ilang gigaod ang sakayan. Dihang mikawas sila, nakaila kang Jesus ang mga tawo ug nangadto sa kasikbit nga mga lungsod, nangita sa mga masakiton. Dihang ilang gidala sila diha sa ilang mga lantay ug nakahikap lang sa borlas sa sapot ni Jesus, sila bug-os nga nangaayo.

Kasamtangan, nahibaloan sa mga tawong nakasaksi sa milagrosong pagpakaon sa libolibo nga nakalakaw na si Jesus. Busa dihang midunggo ang gamayng mga sakayan gikan sa Tiberias, sila misakay niini ug milawig ngadto sa Capernaum sa pagpangita kang Jesus. Sa dihang ilang nakita siya, sila nangutana: “Rabbi, kanus-a ka miabot dinhi?” Gibadlong sila ni Jesus sumala sa atong makita unya. Juan 6:14-25; Mateo 14:22-36; Marcos 6:45-56.

▪ Human nga milagrosong gipakaon ni Jesus ang libolibo, unsay gustong buhaton sa mga tawo kaniya?

▪ Unsay nakita ni Jesus gikan sa bukid diin didto siya mipahilit, ug unya unsay iyang gihimo?

▪ Nganong dili angay mahibulong ang mga tinun-an niadtong mga butanga?

▪ Unsay nahitabo human nga miabot sila sa baybayon?