Kapitulo 6

Ang Gisaad nga Bata

IMBES mopauli sa Nazaret, si Jose ug Maria nagpabilin sa Bethlehem. Ug sa walo pa ka adlaw ang edad ni Jesus, ilang gipatuli siya, sumala sa Kasugoan sa Diyos kang Moises. Batasan na usab nga hatagan ug ngalan ang bata sa ikawalong adlaw. Busa ilang ginganlang Jesus ang ilang anak, sumala sa gisulti sayosayo sa manulondang Gabriel.

Kapin sa bulan na ang milabay, ug si Jesus 40 na ka adlaw ang edad. Asa man siya dalha sa iyang mga ginikanan? Sa templo sa Jerusalem, nga pipila lamang ka milya ang kalay-on gikan sa ilang gipuy-an. Sumala sa Kasugoan sa Diyos kang Moises, human sa 40 ka adlaw gikan sa pagpanganak ug usa ka anak nga lalaki, gisugo ang usa ka inahan sa pagtanyag ug halad sa pagpaputli diha sa templo.

Mao kanay gihimo ni Maria. Ingong iyang halad, nagdala siyag duha ka gagmayng langgam. Gipadayag niini ang pagkabutang sa kinabuhi ni Jose ug Maria. Ang Kasugoan ni Moises nagsugo nga ang laki nga karnero, nga mas mahal kay sa duha ka langgam, ang ihalad. Apan kon dili makaabot niini ang inahan, igo na ang duha ka tukmo o salampati.

Diha sa templo gikugos si Jesus sa usa ka tawong tigulang. Ang iyang ngalan mao si Simeon. Gipadayag sa Diyos kaniya nga dili siya mamatay hangtod nga makita niya ang gisaad ni Jehova nga Kristo, o Mesiyas. Sa miadto si Simeon sa templo sa maong adlaw, gitultolan siya pinaagi sa balaang espiritu ngadto sa bata nga gikugos ni Jose ug Maria.

Sa gikugos ni Simeon si Jesus iyang gipasalamatan ang Diyos, nga nagaingon: “Karon, Soberanong Ginoo, itugot na nga ang imong ulipon magabiya nga malinawon sumala sa imong pulong; kay ang akong mga mata nakakita na man sa kasangkapan sa kaluwasan nga imong giandam diha sa atubangan sa tanang katawhan, usa ka kahayag sa pagkuha sa tabon gikan sa mga nasod ug himaya sa imong katawhan nga Israel.”

Nahibulong si Jose ug Maria sa pagkadungog niini. Dayon gipanalanginan sila ni Simeon ug miingon kang Maria nga ang iyang anak “gitudlo alang sa kalaglagan ug kaluwasan sa kapid-an sa Israel” ug nga ang kaguol, nga sama sa mahait nga espada, motusok sa iyang kalag.

Dinhi ning okasyona mao ang 84 anyos nga propetang babayeng ginganlag Ana. Sa pagkatinuod, presente gayod siya kanunay sa templo. Niadtong tungora miduol siya ug nagpasalamat sa Diyos ug misulti mahitungod kang Jesus sa tanan nga mamati.

Pagkadakong kalipay ang gibati ni Jose ug Maria sa maong mga hitabo sa templo! Siyempre, nagpamatuod lamang kining tanan kanila nga ang bata mao ang Gisaad nga Usa sa Diyos. Lucas 2:21-38; Levitico 12:1-8.

▪ Kanus-a sumala sa batasan hatagan ug iyang ngalan ang Israelinhon nga bata?

▪ Unsay gisugo alang sa usa ka Israelinhong inahan kon mag-edad nag 40 ka adlaw ang iyang anak, ug sa unsang paagi napadayag ang pagkabutang sa kinabuhi ni Maria sa pagsunod sa maong kinahanglanon?

▪ Kinsa ang nakaila sa pagkatawo ni Jesus ning okasyona, ug sa unsang paagi ilang gipakita kini?