Kapitulo 69

Ang Isyu Bahin sa Pagkaamahan

SA PANAHON sa piyesta, ang panaghisgot ni Jesus uban sa Hudiyong mga pangulo dugang nga nagkainit. “Nasayod ako nga kamo kaliwat ni Abraham,” miingon si Jesus, ‘ngani naninguha kamo sa pagpatay kanako, tungod kay ang akong pulong wala man molambo diha kaninyo. Ako nagasulti sa nakita ko atubangan sa akong Amahan; ug kamo, nagabuhat sa nadungog ninyo sa inyong kaugalingong amahan.”

Bisag wala ipaila ang ilang amahan, gipatin-aw ni Jesus nga ang ilang amahan lahi sa iyang amahan. Wala mahibalo kon kinsang amahana ang anaa sa hunahuna ni Jesus, ang Hudiyong mga pangulo mitubag: “Si Abraham mao ang among amahan.” Sila nagtuo nga sila adunay samang pagtuo kang Abraham, kinsa higala sa Diyos.

Apan, nakuratan sila sa tubag ni Jesus: “Kon mga anak pa kamo ni Abraham, magabuhat unta kamo sa gibuhat ni Abraham.” Sa pagkatinuod, sundon sa tinuod nga anak ang iyang amahan. “Apan karon naninguha kamo sa pagpatay kanako,” miingon si Jesus, “ang tawo nga nagsugilon kaninyo sa kamatuoran nga akong nadungog gikan sa Diyos. Wala magbuhat niini si Abraham.” Busa si Jesus miingon na usab: “Kamo nagabuhat sa gibuhat sa inyong kaugalingong amahan.”

Wala gihapon sila makasabot kon kinsa ang gitumong ni Jesus. Sila miingon nga sila maoy tinuod nga mga anak ni Abraham, nga nagaingon: “Dili kami mga pinaangkan.” Busa, nangangkon nga tinuod nga mga magsisimba sama kang Abraham, sila mipahayag: “Kami usa rag Amahan, ang Diyos.”

Apan ang Diyos ba gayod ang ilang tinuod nga Amahan? “Kon ang Diyos mao pa ang inyong Amahan,” mitubag si Jesus, “higugmaon unta ninyo ako, kay migula ug mianhi man ako gikan sa Diyos. Ako wala moanhi sa akong kaugalingong pagbulot-an, kondili sa pagbulot-an sa Usa nga nagpadala kanako. Nganong dili man kamo makasabot sa akong gisulti?”

Misulay si Jesus sa pagpakita niining mga pangulo sa relihiyon sa mga sangpotanan sa ilang pagsalikway kaniya. Apan karon prangka siyang miingon: “Kamo gikan sa inyong amahan nga mao ang Yawa, ug ang inyong tinguha mao ang pagtagbaw sa mga pangibog sa inyong amahan.” Unsang matanga sa amahan ang Yawa? Si Jesus nagpaila kaniya nga usa ka mamumuno ug miingon usab: “Siya bakakon ug amahan sa bakak.” Busa si Jesus mitapos: “Siya nga gikan sa Diyos mamati sa mga pulong sa Diyos. Maoy hinungdan nga kamo dili mamati, tungod kay kamo dili man gikan sa Diyos.”

Nasuko tungod sa paghukom ni Jesus, ang mga Hudiyo mitubag: “Dili ba husto kami sa among pag-ingon, Ikaw Samarianhon ug giyawaan?” Ang terminong “Samarianhon” gigamit ingong ekspresyon sa kasilag ug pagtamay, kay gikaligotgotan man sa mga Hudiyo ang mga Samarianhon.

Wala magtagad sa pasipala bahin sa pagkahimong Samarianhon, si Jesus mitubag: “Ako wala hingyawai, kondili ako nagpasidungog sa akong Amahan, ug kamo nagapakaulaw kanako.” Mipadayon, mihatag si Jesus ug makapukaw nga saad: “Kon adunay magatuman sa akong pulong, siya dili gayod makasinatig kamatayon.” Siyempre, si Jesus wala magpasabot nga ang tanan nga mosunod kaniya sa literal dili na gayod makasinatig kamatayon. Hinunoa, ang iyang gipasabot nga sila dili makasinatig walay kataposang kalaglagan, o “ikaduhang kamatayon,” nga diin wala na gayoy pagkabanhaw.

Apan, literal nga gisabot sa mga Hudiyo si Jesus. Busa, sila miingon: “Karon napiho na gayod namo nga ikaw giyawaan. Si Abraham namatay, maingon man ang mga propeta; ug unya moingon ikaw, ‘Kon adunay magatuman sa akong pulong, siya dili gayod makatilaw ug kamatayon.’ Labaw ka pa ba sa atong amahan nga si Abraham, nga namatay? Ug ang mga propeta nangamatay. Nagpakakinsa ka man?”

Niining tibuok nga diskusyon, dayag nga gipasiugda ni Jesus niining mga tawhana ang kamatuoran nga siya mao ang gisaad nga Mesiyas. Apan inay direktang gitubag ang ilang pangutana bahin sa kon kinsa siya, si Jesus miingon: “Kon pasidunggan ko ang akong kaugalingon, ang akong kadungganan walay hinungdan. Ang nagapasidungog kanako mao ang akong Amahan, ang inyong giingon nga mao ang inyong Diyos; apan wala man lagi kamo makaila kaniya. Apan ako nakaila kaniya. Ug kon nag-ingon pa ako nga ako wala makaila kaniya nan bakakon unta ako sama kaninyo.”

Mipadayon, si Jesus naghisgot na usab sa matinumanong Abraham, nga nagaingon: “Ang inyong amahan nga si Abraham nalipay nga siya makakita sa akong adlaw, ug siya nakakita niini ug nagsadya.” Oo, pinaagi sa mata sa pagtuo, nagpaabot si Abraham sa pag-abot sa gisaad nga Mesiyas. Wala makatuo, ang mga Hudiyo mitubag: “Wala pa makalim-an ka tuig ang imong kagulangon, ug nakakita ka na kang Abraham?”

“Sa pagkatinuod magaingon ako kaninyo,” mitubag si Jesus, “sa wala pa mitungha si Abraham, mao na ako.” Siyempre, si Jesus nagpasabot sa iyang una-tawhanong paglungtad ingong gamhanang espiritu nga persona sa langit.

Nangasuko sa pangangkon ni Jesus nga naglungtad na siya una pa kang Abraham, ang mga Hudiyo namunit ug mga bato ug gibato siya. Apan siya mitago ug migawas sa templo nga wala masamdi. Juan 8:37-59; Pinadayag 3:14; 21:8.

▪ Sa unsang paagi gipakita ni Jesus nga siya ug ang iyang mga kaaway lahi ug mga amahan?

▪ Unsay kahulogan sa pagtawag sa mga Hudiyo kang Jesus nga usa ka Samarianhon?

▪ Sa unsa nga diwa nga nagpasabot si Jesus nga ang iyang mga sumusunod dili gayod makasinatig kamatayon?