Kapitulo 102

Ang Madaogong Pagsulod ni Kristo sa Jerusalem

SA PAGKABUNTAG, Dominggo, Nisan 9, si Jesus mibiya sa Bitaniya kauban sa iyang mga tinun-an ug milatas sa Bukid sa mga Olibo paingon sa Jerusalem. Sa wala madugay, sila nagsingabot na sa Betpage, nga nahimutang sa Bukid sa mga Olibo. Gisugo ni Jesus ang duha sa iyang mga tinun-an:

“Umadto kamo sa balangay nga inyong makita, ug didto inyong makita dayon ang usa ka asna nga gihigot, ug ang usa ka nati uban niini; hubara ninyo sila ug dad-a dinhi kanako. Ug kon adunay mangutana kaninyo, ingna lang siya, ‘Gikinahanglan sila sa Ginoo.’ Niana iyang ipadala sila dihadiha.”

Bisan tuod sa sinugdan wala makasabot ang mga tinun-an nga ang maong mga tugon maylabot sa pagkatuman sa tagna sa Bibliya, sa ulahi naamgohan nila kini. Ang propetang si Zacarias mitagna nga ang gisaad nga Hari sa Diyos mosulod sa Jerusalem nga magsakay sa usa ka asna, oo, “bisan sa bug-os nakatubong hayop nga anak sa usa ka asna.” Si Haring Solomon susamang nagsakay sa anak sa usa ka asna sa pagpadulong sa pagdihog kaniya.

Sa pagsulod sa mga tinun-an sa Betpage ug pagkuha sa nati ug sa inahan niini, ang pipila niadtong nagtindog sa haduol miingon: “Unsay inyong ginabuhat?” Apan sa gisultihan nga ang mga hayop maoy alang sa Ginoo, gitugot sa mga tawo nga dad-on sila sa mga tinun-an ngadto kang Jesus. Gibutang sa mga tinun-an ang ilang mga kupo sa inahang asna ug sa iyang nati, apan si Jesus misakay sa nati.

Samtang misulod si Jesus sa Jerusalem nga nagsakay, midaghan ang panon sa katawhan. Ang kadaghanan sa katawhan nagbuklad sa ilang mga kupo sa dalan, samtang ang uban nagputol sa mga sanga gikan sa mga kahoy ug nagkatag niana. “Bulahan ang Usa nga nagaanhi ingon nga Hari sa ngalan ni Jehova!” sila mipatugbaw. “Pakigdait sa langit, ug himaya sa kahitas-an!”

Ang pila ka Pariseo sa panon nayugot sa maong mga pahayag ug mireklamo kang Jesus: “Magtutudlo, badlonga ang imong mga tinun-an.” Apan mitubag si Jesus: “Magaingon ako kaninyo, Kon kini sila magpakahilom, ang mga bato ang mosinggit.”

Sa nagsingabot si Jesus sa Jerusalem, gitan-aw niya ang siyudad ug mihilak mahitungod niini, nga miingon: “Kon ikaw, bisan ikaw, nakaila niining adlawa sa mga butang maylabot sa pakigdait—apan karon sila gitago gikan sa imong mga mata.” Tungod sa iyang tinuyong pagkamasupilon, magbayad ang Jerusalem, sumala sa gitagna ni Jesus:

“Ang inyong mga kaaway [ang mga Romano ilalom kang General Tito] magatukod libot kaninyo sa usa ka kuta uban sa talinis nga mga kahoy ug magaliyok kaninyo ug magasakit kaninyo gikan sa tanang kiliran, ug magapulpog kaninyo ug sa inyong mga anak sa inyong taliwala sa yuta, ug sila dili mobiya sa usa ka bato nga nagapatong sa usa ka bato diha kaninyo.” Ang maong pagkalaglag sa Jerusalem nga gitagna ni Jesus nahitabo gayod 37 anyos sa ulahi, sa tuig 70 K.P.

Pila ra ka semana nga miagi, daghan diha sa panon nakakita nga gibanhaw ni Jesus si Lasaro. Karon sila nagpadayon sa pagsugilon sa uban sa maong milagro. Busa sa pagsulod ni Jesus sa Jerusalem, ang tibuok siyudad naukay. “Kinsa ba kini?” buot masayod ang mga tawo. Ug ang mga panon nagpadayon sa pagsulti: “Kini mao ang propetang si Jesus, nga taga Nazareth sa Galilea!” Sa pagkakita kon unsay nagkahitabo, ang mga Pariseo nagmulo nga sila bug-os walay mahimo, kay, sumala sa giingon nila: “Ang kalibotan nagasunod kaniya.”

Sumala sa iyang nabatasan sa mga pagduaw sa Jerusalem, si Jesus miadto sa templo aron sa pagtudlo. Didto ang mga buta ug mga bakol miduol kaniya, ug iya silang giayo! Sa dihang nakita sa pangulong mga saserdote ug sa mga eskriba ang kahibulongang mga butang gibuhat ni Jesus ug sa dihang ilang nadungog nga ang mga batang lalaki sa templo nagpatugbaw, “Pangluwas, nagapangamuyo kami, ang Anak ni David!” sila nasuko. “Nadungog ba nimo kon unsay ginasulti nila?” sila mitutol.

“Oo,” mitubag si Jesus. “Wala ba ninyo hibasahi kini, ‘Gikan sa baba sa mga bata ug sa mga masuso ikaw nagatagana sa pagdayeg’?”

Si Jesus mipadayon sa pagpanudlo, ug siya nanan-aw sa palibot sa tanang butang diha sa templo. Sa taudtaod hapon na. Busa siya mibiya, kauban sa 12, ug mipanaw balik sa 3 kilometros o kapin paingon sa Bitaniya. Didto gigugol niya ang Dominggo sa gabii, lagmit sa balay sa iyang higalang si Lasaro. Mateo 21:1-11, 14-17; Marcos 11:1-11; Lucas 19:29-44; Juan 12:12-19; Zacarias 9:9.

▪ Kanus-a ug sa unsang paagi si Jesus misulod sa Jerusalem ingong Hari?

▪ Unsa ka hinungdanon nga ang mga panon nagadayeg kang Jesus?

▪ Unsay gibati ni Jesus sa iyang pagtan-aw sa Jerusalem, ug unsang tagna ang iyang gipahayag?

▪ Unsay nahitabo sa miadto si Jesus sa templo?