Kapitulo 39

Ang Mapahitas-on ug ang Mapaubsanon

TAPOS naghisgot sa maayong mga hiyas ni Juan Bautista, mibali si Jesus sa iyang pagtagad ngadto sa mapahitas-on, mabalhinong mga tawo sa iyang palibot. “Kining kaliwatana,” siya miingon, “sama sa mga bata nga managlingkod sa mga baligyaanan nga managsinggit sa ilang kauban sa dula, nga nag-ingon, ‘Gipatokahan bitaw namo kamog plawta, apan wala kamo mosayaw; nagminatay kami, apan wala ninyo hampasa ang inyong kaugalingon tungod sa kasubo.’”

Unsay gipasabot ni Jesus? Siya mibatbat: “Si Juan mianhi nga wala mokaon ni moinom, apan ang mga tawo nag-ingon, ‘Kana siya giyawaan’; ang Anak sa tawo mianhi nga nagakaon ug nagainom, apan ang mga tawo nag-ingon, ‘Tan-awa! Usa ka tawong ulitan ug tig-inom ug bino, ug higala sa mga maniningil sa buhis ug mga makasasala.’”

Imposible gayod nga mapahimut-an ang mga tawo. Walay butang nga makapahimuot kanila. Si Juan nagkinabuhing simple nga naghikaw sa kaugalingon ingong usa ka Nasareo, nga nagsunod sa gipahayag sa manulonda nga “siya kinahanglang dili moinom ug bino ug sa maisog nga ilimnon.” Bisan pa ang mga tawo miingon nga siya giyawaan. Sa laing bahin, nagkinabuhi si Jesus sama sa ubang mga tawo, wala niya hikawi ang iyang kaugalingon, bisan pa siya gisumbong nga mapatuyangon.

Pagkalisod nga pahimut-an ang mga tawo! Sila sama sa mga kauban sa dula, nga mibalibad sa pagsayaw samtang ang ubang mga bata nagpatokar sa plawta o wala masubo samtang nanagtuaw ang ilang mga kauban. Bisan pa, si Jesus miingon: “Ang kaalam ginamatarong pinaagi sa mga binuhatan niini.” Oo, ang ebidensiya—ang mga binuhatan—nagpatin-aw nga bakak ang mga sumbong batok kang Juan ug Jesus.

Mipadayon si Jesus sa pagsaway sa tulo ka siyudad sa Corazin, Betsaida, ug Capernaum, diin dinhi daghan siyag nahimong mga milagro. Kon nahimo pa niya kini sa Penisyanhong mga siyudad sa Tiro ug Sidon, si Jesus miingon, kining mga siyudara dayag nga maghinulsol nga managsul-ob ug sako ug managlubog sa mga abo. Gihukman ang Capernaum, nga dayag nga maoy iyang pinuy-anan sa panahon sa iyang ministeryo, si Jesus miingon: “Maarang-arang pa ang yuta sa Sodoma sa Adlaw sa Paghukom kay kanimo.”

Sunod gihimaya ni Kristo sa atubangan sa katilingban ang iyang langitnong Amahan. Napukaw siya sa pagbuhat niini tungod kay gitago sa Diyos ang hamiling espirituwal nga mga kamatuoran gikan sa mga maalamon ug sa mga makinaadmanon apan gipadayag kining katingalahang mga butang ngadto sa mga mapaubsanon, sa mga bata, pagaingon pa.

Sa kataposan, gihatag ni Jesus kining madanihong pagdapit: “Umari kamo kanako, kamong tanang nabudlayan ug nabug-atan, ug pagapahulayon ko kamo. Isangon ninyo ang akong yugo diha kaninyo ug pagtuon kamo gikan kanako, kay ako maaghop ug mapaubsanon, ug makakaplag kamog pahulay alang sa inyong mga kalag. Kay masayon ang akong yugo ug magaan ang akong luwan.”

Sa unsang paagi nakatanyag si Jesus ug pahulay? Iyang gihimo kini pinaagi sa pagtaganag kagawasan gikan sa nagapaulipon nga mga tradisyon nga gipapas-an sa relihiyosong mga pangulo diha sa mga tawo, lakip, pananglitan, sa mapig-oton nga mga sugo sa pagbantay sa Igpapahulay. Iyang gipakita usab ang dalan sa kahupayan alang sa mga tawo nga nabug-atan sa pagmando sa politikanhong mga awtoridad ug nabug-atan sa ilang mga kasal-anan tungod sa pagtulisok sa tanlag. Iyang gipadayag ngadto niining mga sinakit kon sa unsang paagi ang ilang mga sala mapasaylo ug kon unsaon nga matagamtam nila ang hamiling relasyon sa Diyos.

Ang masayon nga yugo nga gitanyag ni Jesus mao kanang bug-os nga pagpahinungod sa Diyos, aron makaalagad sa atong may kahangawa, maluluy-on langitnong Amahan. Ug ang magaan nga luwan nga gitanyag ni Jesus alang niadtong moduol kaniya mao kanang pagtuman sa mga kinahanglanon sa Diyos alang sa kinabuhi, nga mao ang Iyang mga sugo nga narekord sa Bibliya. Ug ang pagtuman niini dili gayod mabug-at. Mateo 11:16-30; Lucas 1:15; 7:31-35; 1 Juan 5:3.

▪ Sa unsang paagi ang mapahitas-on, mabalhinong mga tawo sa kaliwatan ni Jesus samag mga bata?

▪ Nganong napukaw si Jesus sa pagdayeg sa iyang langitnong amahan?

▪ Sa unsang paagi nabug-atan pag-ayo ang mga tawo, ug unsang kapahulayan ang gitanyag ni Jesus?