Kapitulo 12

Ang Pagbawtismo Kang Jesus

MGA unom ka bulan human gisugdan ni Juan ang pagwali, si Jesus, nga karong panahona maoy 30 anyos na, miduol kaniya sa Jordan. Alang sa unsang katuyoan? Aron lang ba moduaw? Si Jesus ba interesado lamang kon unsa nay lakat sa buluhaton ni Juan? Dili, si Jesus mihangyo kang Juan nga siya bawtismohan.

Dihadiha mibalibad si Juan: “Ako mao ang may kinahanglan nga imong bawtismohan, ug ikaw na hinoon ang mianhi kanako?” Si Juan nahibalo nga ang iyang ig-agaw nga si Jesus mao ang linain nga Anak sa Diyos. Gani, miulpot si Juan sa kalipay diha sa tagoangkan siya iyang inahan sa dihang si Maria, nga nagsabak kang Jesus, miduaw kanila! Sa walay duhaduha, ang inahan ni Juan nga si Elizabeth nagsugid kaniya mahitungod niini. Ug dayag nga iyang gisuginlan siya sa gisulti sa manulonda mahitungod sa pagkatawo ni Jesus ug mahitungod sa pagpakita sa mga manulonda ngadto sa mga magbalantay sa hayop sa gabii nga natawo si Jesus.

Busa si Jesus dili dumuloong kang Juan. Ug si Juan nahibalo nga ang iyang bawtismo dili alang kang Jesus. Kini maoy alang sa mga tawo nga naghinulsol sa ilang mga sala, apan si Jesus walay sala. Ugaling, bisan sa pagdumili ni Juan, si Jesus miinsister: “Itugot lang kini karon, kay angay kanato ang pagbuhat niini aron sa pagtuman sa tibuok pagkamatarong.”

Nganong angay nga bawtismohan si Jesus? Tungod kay ang bawtismo ni Jesus maoy usa ka simbolo, dili sa paghinulsol alang sa mga sala, kondili sa iyang pagtanyag sa iyang kaugalingon sa pagtuman sa kabubut-on sa iyang Amahan. Si Jesus maoy usa ka panday, apan karon mao na ang panahon nga iyang sugdan ang ministeryo nga sa maong katuyoan si Jehova nga Diyos nagpadala kaniya sa yuta. Naghunahuna ka ba nga nagpaabot si Juan nga adunay talagsaong butang mahitabo kon iyang bawtismohan si Jesus?

Buweno, si Juan sa ulahi mitaho: “Ang Usa nga nagsugo kanako sa pagpangbawtismo sa tubig miingon kanako, ‘Siya nga imong makita nga pagakunsaran ug pagapuy-an sa espiritu, mao kana siya ang magapangbawtismo pinaagi sa balaang espiritu.’” Busa nagpaabot si Juan nga mokunsad ang espiritu sa Diyos diha sa usa ka tawo nga iyang pagabawtismohan. Busa, tingali wala siya mahibulong sa dinha, sa mikawas si Jesus gikan sa tubig, si Juan nakakita sa “espiritu sa Diyos nga mikunsad ingon ug salampati diha kaniya.”

Apan labaw pa niana ang nahitabo dihang gibawtismohan si Jesus. ‘Ang langit nabukas’ kaniya. Unsay kahulogan niini? Dayag nga nagkahulogan kini nga samtang siya gibawtismohan, ang panumdoman sa iyang una-tawhanong paglungad sa langit mibalik kaniya. Sa ingon, si Jesus karon bug-os nang makahinumdom sa iyang kinabuhi ingong usa ka espiritu nga anak ni Jehova nga Diyos, apil sa tanang mga butang nga gipamulong sa Diyos kaniya sa langit sa panahon sa iyang una-tawhanong paglungtad.

Dugang pa, sa panahon sa iyang bawtismo, usa ka tingog nga gikan sa langit miingon: “Kini mao ang akong Anak nga pinalangga, nga akong giuyonan.” Kang kinsang tingog kadto? Kaugalingon bang tingog ni Jesus? Siyempre dili gayod! Kadto mao ang tingog sa Diyos. Sa matin-aw, si Jesus mao ang Anak sa Diyos, dili ang Diyos mismo, sama sa gipangangkon sa uban.

Apan, si Jesus maoy usa ka tawhanong anak sa Diyos, sama sa unang tawo, si Adan. Ang tinun-ang si Lucas, human nagbatbat sa bawtismo ni Jesus, misulat: “Sa pagsugod ni Jesus sa iyang buluhaton, mga katloan ka tuig na ang iyang panuigon, siya sumala sa gituohan mao ang anak ni Jose, nga anak ni Heli, . . . nga anak ni David, . . . nga anak ni Abraham, . . . nga anak ni Noe, . . . nga anak ni Adan, nga anak sa Diyos.”

Maingon nga si Adan maoy tawhanong “anak sa Diyos,” mao man si Jesus. Si Jesus mao ang labing bantogang tawo nga nabuhi sukad, nga matin-aw kon atong susihon ang kinabuhi ni Jesus. Hinunoa, sa panahon sa iyang bawtismo, si Jesus misulod ngadto sa usa ka bag-ong relasyon uban sa Diyos, nahimo usab nga espirituwal nga anak sa Diyos. Gitawag sa Diyos siya karon ug balik sa langit, pagaingon pa, pinaagi sa pagpasugod kaniya diha sa usa ka dalan nga motultol sa iyang paghalad sa iyang tawhanong kinabuhi sa walay kataposan ingong halad alang sa hinukmang katawhan. Mateo 3:13-17; Lucas 3:21-38; 1:34-36, 44; 2:10-14; Juan 1:32-34; Hebreohanon 10:5-9.

▪ Nganong si Jesus dili dumuloong alang kang Juan?

▪ Sanglit siya walay sala, nganong gibawtismohan si Jesus?

▪ Tungod sa nahibaloan ni Juan mahitungod kang Jesus, nganong wala siya mahibulong sa dihang ang espiritu sa Diyos mikunsad diha kang Jesus?