Kapitulo 27

Ang Pagtawag Kang Mateo

WALA magdugay human nga giayo ang paralitiko, milakaw si Jesus sa Capernaum ngadto sa Dagat sa Galilea. Giadto na usab siya sa mga tawo, ug siya misugod sa pagpanudlo kanila. Samtang naglakaw siya, iyang nakita si Mateo, nga ginganlan usab ug Levi, nga naglingkod sa buhisanan. “Sumunod ka kanako,” midapit si Jesus.

Malagmit, si Mateo sinati na sa mga pagtulon-an ni Jesus, sama kang Pedro, Andres, Santiago, ug Juan sa dihang sila gitawag. Ug sama kanila, misanong dayon si Mateo sa pagdapit. Siya mitindog, gibiyaan ang iyang mga responsabilidad sa pagkamaniningil sa buhis, ug misunod kang Jesus.

Sa ulahi, tingali aron sa pagsaulog sa pagdawat sa iyang pagkatinawag, mihimog dakong salosalo si Mateo diha sa iyang balay. Gawas pa kang Jesus ug sa Iyang mga tinun-an, ang mga kauban kanhi ni Mateo mitambong. Kining mga tawhana tinamay sa kadaghanan sa ilang kaubang mga Hudiyo tungod kay maningil silag mga buhis alang sa gikaligotgotang Romanong mga awtoridad. Dugang pa, sila malimbongong maningil ug sobra gikan sa mga tawo kay sa regular nga balayranang buhis.

Nakakita kang Jesus diha sa salosalo uban niining mga tawhana, ang mga Pariseo nangutana sa iyang mga tinun-an: “Nganong ang inyong magtutudlo nakigsalo man uban sa mga maniningil sa buhis ug sa mga makasasala?” Nakadungog sa pangutana, gitubag ni Jesus ang mga Pariseo: “Ang mga tawong maayog lawas wala magkinahanglan ug mananambal, kondili ang mga nagmasakiton. Nan, lumakaw kamo, ug tun-i kon unsay kahulogan niini, ‘ang akong gikinahanglan mao ang kaluoy, ug dili ang halad.’ Kay ako mianhi dili sa pagtawag sa mga matarong, kondili sa mga makasasala.”

Dayag, gidapit ni Mateo kining mga maniningil sa buhis sa iyang balay aron nga sila makapaminaw kang Jesus ug makadawat ug espirituwal nga pagkaayo. Busa nakig-uban si Jesus kanila aron matabangan sila nga makabaton ug mahimsog nga relasyon sa Diyos. Si Jesus wala magtamay sa mga sama kanila, sama sa gihimo sa nagpakamatarong sa kaugalingon nga mga Pariseo. Hinunoa, nahangawa siya ug, sa ingon, nahimong usa ka espirituwal nga mananambal alang kanila.

Busa ang pagpakitag kaluoy ni Jesus sa mga makasasala wala magpasabot nga iyang gipalabay ang ilang mga kasal-anan kondili kini maoy usa ka pasundayag sa samang malumong pagbati nga iyang gipakita sa mga nagmasakiton sa lawas. Hinumdomi, pananglitan, sa mahangawaon iyang gihikap ang sanlahon, nga nag-ingon: “Buot ko. Magmahinlo ka.” Hinaot nga magpakita usab kita ug kaluoy pinaagi sa pagtabang sa mga tawong nagkinahanglan, ilabina sa pagtabang kanila sa espirituwal nga paagi. Mateo 8:3; 9:9-13; Marcos 2:13-17; Lucas 5:27-32.

▪ Diin si Mateo sa dihang nakita siya ni Jesus?

▪ Unsay trabaho ni Mateo, ug nganong gitamay kining mga tawhana sa ubang mga Hudiyo?

▪ Unsay reklamo ang gihimo batok kang Jesus, ug unsay iyang gitubag?

▪ Nganong nakig-uban si Jesus sa mga makasasala?