Kapitulo 88

Ang Tawong Dato ug si Lasaro

SI Jesus nakigsulti sa iyang mga disipulo bahin sa hustong paggamit sa materyal nga mga bahandi, nagpatin-aw nga kita dili mahimong mga ulipon niini ug sa samang higayon mga ulipon sa Diyos. Ang mga Pariseo namati usab, ug sila misugod sa pagyubit kang Jesus tungod kay sila mga mahigugmaon man sa salapi. Busa siya miingon kanila: “Kamo mao ang nagapakamatarong sa inyong kaugalingon sa atubangan sa mga tawo, apan ang Diyos nahibalo sa inyong mga kasingkasing; kay ang gipakahalangdon sa mga tawo kangil-aran man sa atubangan sa Diyos.”

Ang panahon miabot nga nabali ang hitabo diha sa mga tawong dato sa kalibotanong mga bahandi, sa politikanhong gahom, ug sa relihiyosong pagkontrolar ug impluwensiya. Sila ipaubos. Apan, ang mga tawo nga moila sa ilang espirituwal nga panginahanglan ipataas. Gipunting ni Jesus ang maong kausaban sa dihang mipadayon siya sa pag-ingon ngadto sa mga Pariseo:

“Ang Kasugoan ug ang mga Manalagna maoy hangtod kang Juan [Bautista]. Sukad niadto ang gingharian sa Diyos ginamantala ingon nga maayong balita, ug ang matag-usa ka tawo nagasulod niini sa linugsanay. Apan, mas masayon pang mahanaw ang langit ug ang yuta kay sa dili-matuman ang gamayng bahin sa Kasugoan.”

Ang mga eskriba ug mga Pariseo magarbohon sa ilang pangangkon nga nagsunod sa Kasugoan ni Moises. Hinumdomi nga sa dihang milagrosong gihatagan ni Jesus ug panan-aw ang usa ka tawong buta sa Jerusalem, sila nanghambog: “Kami mga tinun-an ni Moises. Kami nasayod nga ang Diyos nakigsulti kang Moises.” Apan karon ang Kasugoan ni Moises natuman sa gimbut-ang katuyoan niini sa pag-agak sa mga mapaubsanon ngadto sa gitudlo sa Diyos nga Hari, si Jesu-Kristo. Busa sa sinugdan sa ministeryo ni Juan, ang tanang matang sa mga tawo, ilabina ang mga mapaubsanon ug ang kabos, nanlimbasog nga mahimong mga ginsakopan sa Gingharian sa Diyos.

Sanglit natuman na karon ang Moisesnong Kasugoan, ang obligasyon sa pagsunod niana gikuha. Ang Kasugoan nagtugot sa pagdiborsiyo diha sa nagkalainlaing mga katarongan, apan karon si Jesus miingon: “Ang si bisan kinsa nga magabulag sa iyang asawa ug mangasawag lain nakapanapaw, ug ang mangasawa sa usa ka babayeng binulagan nakapanapaw.” Pagkadako tingali sa kalagot sa mga Pariseo sa maong mga pahayag, ilabina kay nagtugot sila ug panagbulag sa bisan unsang katarongan!

Mipadayon sa iyang pahayag diha sa mga Pariseo, miasoy si Jesus ug sambingay nga nagpasiugdag duha ka lalaki diin ang situwasyon, o kahimtang sa ulahi kalit nga nabag-o. Makatino ka ba kon kinsa ang gihawasan sa mga lalaki ug kon unsay kahulogan sa kausaban sa ilang kahimtang?

“Dihay usa ka tawong dato,” miasoy si Jesus, “ug nagsapot siya ug purpura ug lino nga manipis, maluho niyang ginatagamtam ang matag adlaw. Apan ginadala ang usa ka tawong kabos nga ginganlan si Lasaro sa gawas sa iyang ganghaan, nga nalukop sa kabahong ug nangandoy nga unta mabusog sa mga mumho nga mangatagak sa lamesa sa tawong dato. Oo, ang mga iro usab manuol ug motilap sa iyang mga kabahong.”

Gigamit ni Jesus dinhi ang tawong dato sa paghawas sa Hudiyonhong mga pangulo sa relihiyon, apil dili lamang ang mga Pariseo ug mga eskriba kondili ang mga Saduseo ug ang labawng mga saserdote. Sila dato sa espirituwal nga mga pribilehiyo ug mga kahigayonan, ug sila nanagpanggawi sama sa tawong dato. Ang ilang besti sa harianong purpura nagahawas sa ilang maayong posisyon, ug ang puting lino nagalarawan sa ilang pagpakamatarong sa kaugalingon.

Kining mapahitas-ong tawong-dato nga matang naglantaw sa kabos, kasagarang mga tawo uban ang bug-os nga pagtamay, nagtawag kanilang ‘am ha·’aʹrets, o mga tawo sa yuta. Mao nga ang makalilimos nga Lasaro nagahawas niining mga tawhana diin sila wala hatagi sa relihiyosong mga pangulo ug hustong espirituwal nga pagkaon ug mga pribilehiyo. Busa, sama kang Lasaro nga naputos sa kabahong, ang komung mga tawo gitamay nga masakiton sa espirituwal ug angay lamang makig-uban sa mga iro. Apan, kadtong iya sa Lasaro nga matang gigutom ug giuhaw sa espirituwal nga pagkaon ug busa anaa sa ganghaan, nga nagapangita aron makadawat ug bisan unsang mga mumho sa espirituwal nga pagkaon nga mangahulog gikan sa lamesa sa tawong dato.

Karon si Jesus mipadayon sa pagbatbat sa kausaban sa kahimtang sa tawong dato ug Lasaro. Unsa kining mga kausabana, ug unsay ilang gihawasan?

Ang Tawong Dato ug si Lasaro Nakaagom ug Kausaban

Ang tawong dato nagahawas sa relihiyosong mga pangulo nga gipaboran sa espirituwal nga mga pribilehiyo ug mga kahigayonan, ug si Lasaro nagahulagway sa kasagarang katawhan nga gigutom sa espirituwal nga pagkaon. Gipadayon ni Jesus ang iyang estorya, nga nagbatbat sa kulbahinam nga kausaban sa mga kahimtang sa mga tawo.

“Karon sa lakat sa panahon,” si Jesus miingon, “ang makililimos namatay ug siya gidala sa mga manulonda ngadto sa sabakan ni Abraham. Usab, ang tawong dato namatay ug gilubong. Ug sa Hades iyang giyahat ang iyang mga mata, nga siya diha sa mga kasakitan, ug iyang nakita si Abraham sa halayo ug si Lasaro diha sa iyang sabakan.”

Sanglit ang tawong dato ug si Lasaro dili literal nga mga tawo kondili nagasimbolo sa mga matang sa katawhan, makataronganon nga ang ilang mga pagkamatay simboliko usab. Unsay gisimbolohan, o gihawasan sa ilang mga pagkamatay?

Si Jesus bag-o pang nagpunting sa kausaban sa mga kahimtang sa pag-ingon nga ‘ang Kasugoan ug ang mga Manalagna maoy hangtod kang Juan Bautista, apan sukad niadto ang gingharian sa Diyos ginamantala.’ Busa, maoy uban sa pagwali ni Juan ug ni Jesu-Kristo nga ang tawong dato ug si Lasaro namatay sa ilang kanhing mga kahimtang, o kondisyon.

Kadtong sakop sa mapainubsanon, mahinulsolon nga Lasaro nga matang namatay sa ilang nangaging kahimtang nga hinikawan sa espirituwal ug nahidangat sa pagkainuyonan sa Diyos. Samtang sa una sila nagsalig sa relihiyosong mga pangulo alang sa kon unsay diyutay nga nahulog gikan sa espirituwal nga lamesa, karon ang Kasulatanhong mga kamatuoran nga gipasa ni Jesus nagatagana sa ilang mga panginahanglan. Sa ingon sila nahidangat sa sabakan, o inuyonan nga posisyon, sa Labaw nga Abraham, si Jehova nga Diyos.

Sa laing bahin, kadtong naglangkob sa tawong dato nga matang wala na mauyoni sa Diyos tungod sa padayong dili pagdawat sa mensahe sa Gingharian nga gitudlo ni Jesus. Sa ingon niana sila namatay sa ilang kanhing posisyon sa daw pagkainuyonan. Ngani, gihisgotan nga sila diha sa masambingayong pagsakit. Pamati karon, samtang ang tawong tawo nagpahayag:

“Amahan nga Abraham, maluoy ka kanako ug sugoa si Lasaro nga ituslob ang iyang tudlo sa tubig ug pabugnawan ang akong dila, tungod kay ako ania sa kasakitan tungod niining nagdilaab nga kalayo.” Ang kalayonhong mga mensahe sa Diyos nga gimantala sa mga tinun-an ni Jesus mao ang nagasakit sa mga indibiduwal sa tawong dato nga matang. Gusto nila nga ihunong sa mga tinun-an ang pagmantala sa maong mga mensahe, sa ingon kahatagan silag diyutayng kahupayan gikan sa ilang mga kasakitan.

“Apan si Abraham miingon, ‘Anak, hinumdomi nga ikaw nakadawat sa buhi ka pa sa bug-os sa imong maayong mga butang, apan si Lasaro sa makadaot nga mga butang. Karon, hinunoa, siya ginalipay na karon samtang ikaw anaa sa kasakitan. Ug gawas pa niining tanang butang, ang usa ka dakong bung-aw nahimutang taliwala kanamo ug kaninyo, mao nga kadtong buot molabang aron moanha kaninyo dili makalabang, ni ang mga tawo makalabang gikan dinha ngari kanamo.’”

Pagkamatarong ug pagkahaom nga nahitabo ang maong kulbahinam nga pagbali sa kahimtang taliwala sa matang Lasaro ug sa tawong-dato nga matang! Ang kausaban sa mga kahimtang natuman pila ka bulan sa ulahi sa Pentekostes sa 33 K.P., sa dihang ang daang pakigtugon sa Kasugoan gipulihan sa bag-ong pakigtugon. Unya natin-aw gayod nga ang mga tinun-an, dili ang mga Pariseo , ug ubang relihiyosong pangulo, ang giuyonan sa Diyos. Ang “dakong bung-aw” nga nagabulag sa simbolikong tawong dato gikan sa mga tinun-an ni Jesus sa ingon nagahawas sa dili-mausab, matarong nga paghukom sa Diyos.

Ang tawong dato sunod mihangyo sa “amahan nga Abraham”: “Paadtoa [si Lasaro] “sa balay sa akong amahan, tungod kay ako may lima ka igsoong lalaki.” Busa ang tawong dato misugid nga siya may mas suod nga relasyon sa laing amahan, kinsa sa aktuwal mao si Satanas nga Yawa. Ang tawong dato mihangyo nga pagaanon ni Lasaro ang mga mensahe sa paghukom sa Diyos aron dili mabutang ang iyang “lima ka igsoong lalaki,” ang iyang relihiyosong mga alyansa, sa “maong dapit sa kasakitan.”

“Apan si Abraham miingon, ‘Tua man kanila si Moises ug ang mga Manalagna; papatalinghoga sila kanila.’” Oo, aron ang “lima ka igsoong lalaki” mahigawas sa kasakitan, ang ila lang buhaton mao ang pagpatalinghog sa mga sinulat ni Moises ug sa mga Manalagna nga nagapaila kang Jesus ingong Mesiyas ug dayon mahimong iyang mga tinun-an. Apan mitutol ang tawong dato: “Dili, sa pagkamatuod, amahan nga Abraham, apan kon ang usa nga gikan sa mga nangamatay maoy moadto kanila sila maghinulsol.”

Apan siya miingon kaniya: “Kon sila wala magpatalinghog kang Moises ug sa mga Manalagna, ni sila malukmay bisan pag may mobangon gikan sa mga patay.” Dili itagana sa Diyos ang espesyal nga mga ilhanan o mga milagro aron motuo ang mga tawo. Sila kinahanglang mobasa ug mopadapat sa Kasulatan aron maangkon nila ang iyang pag-uyon. Lucas 16:14-31, Juan 9:28, 29; Mateo 19:3-9; Galacia 3:24; Colosas 2:14; Juan 8:44.

▪ Nganong simboliko man ang mga pagkamatay sa tawong dato ug ni Lasaro, ug unsay gihawasan sa ilang mga pagkamatay?

▪ Sa sinugdanan sa ministeryo ni Juan, unsang kausaban ang gipaila ni Jesus nga nahitabo?

▪ Unsay gikuha human nga namatay si Jesus, ug sa unsang paagi naapektohan niini ang bahin sa diborsiyo?

▪ Diha sa sambingay ni Jesus, kinsa ang gilarawanan sa tawong dato ug ni Lasaro?

▪ Unsa ang mga kasakit nga naagoman sa tawong dato, ug pinaagi sa unsa sila mihangyo aron sila mahupayan?

▪ Unsay gihulagwayan sa “dakong bung-aw”?

▪ Kinsa ang tinuod nga amahan sa tawong dato, ug kinsa ang iyang lima ka igsoong lalaki?