Kapitulo 14

Ang Unang mga Tinun-an ni Jesus

HUMAN nakagugol ug 40 ka adlaw didto sa kamingawan, gibalikan ni Jesus si Juan, nga maoy nagbawtismo kaniya. Samtang siya miduol, dayag nga gitudlo siya ni Juan ug miingon sa mga tawo nga presente didto: “Tan-awa, ang Kordero sa Diyos nga magakuha sa sala sa kalibotan! Mao kana siya ang gihisgotan ko sa akong pag-ingon, Sunod kanako adunay usa ka tawo nga nag-una na kanako, tungod kay siya naglungtad na una pa kanako.” Bisag magulang si Juan kay sa iyang ig-agaw nga si Jesus, si Juan nahibalo nga si Jesus naglungtad na una pa kaniya ingong espiritu nga persona sa langit.

Bisan pa, sa pipila ka semana nga sayosayo, sa dihang miduol si Jesus aron magpabawtismo, si Juan tataw nga wala gayod mahibalo nga si Jesus mao ang Mesiyas. “Bisan ako wala masayod kaniya,” midawat si Juan, “mao lamang nga mianhi ako nga nagpangbawtismo sa tubig aron ikapadayag siya ngadto sa Israel.”

Si Juan mipadayon sa pagsaysay ngadto sa iyang mga mamiminaw sa nahitabo sa dihang iyang gibawtismohan si Jesus: “Nakita ko ang espiritu nga mikunsad ingon ug salampati gikan sa langit, ug kini nagpabilin diha kaniya. Bisan ako wala masayod kaniya, apan ang Usa nga nagsugo kanako sa pagpangbawtismo sa tubig miingon kanako, ‘Siya nga imong makita nga pagakunsaran ug pagapuy-an sa espiritu, mao kana siya ang magapangbawtismo pinaagi sa balaang espiritu.’ Ug ako nakakita ug gipanghimatuod ko nga kini siya mao ang Anak sa Diyos.”

Sa pagkasunod adlaw si Juan nagtindog uban sa iyang duha ka tinun-an. Sa gihapon, sa dihang miduol si Jesus, siya miingon: “Tan-awa, ang Kordero sa Diyos!” Niini, kining duha ka tinun-an ni Juan Bautista misunod kang Jesus. Ang usa kanila mao si Andres, ug ang usa dayag mao ang tawo nga nagtala niining mga butanga, nga ginganlan usab ug Juan. Kini nga Juan, sumala sa mga gipaila, maoy ig-agaw usab ni Jesus, dayag anak sa igsoong babaye ni Maria, si Salome.

Milingi ug nakakita kang Andres ug Juan nga nagsunod kaniya, si Jesus nangutana: “Unsay inyong gipangita?”

“Rabbi,” sila nangutana, “diin ka nagpuyo?”

“Ngari, ug tan-awa ninyo,” si Jesus mitubag.

Mga alas kuwatro na kadto sa hapon, ug si Andres ug Juan mipabilin uban kang Jesus nianang adlawa. Human niadto si Andres nalipay kaayo nga siya midalidali sa pagpangita sa iyang igsoon, nga ginganlag Pedro. “Among nakaplagan ang Mesiyas,” iyang gisultihan siya. Ug iyang gidala si Pedro ngadto kang Jesus. Tingali si Juan sa maong higayon nakakita sa iyang igsoong si Santiago ug gidala siya ngadto kang Jesus; apan, sa kinaiyanhon, wala hisgoti ni Juan kining personal nga impormasyon diha sa iyang Ebanghelyo.

Sa pagkasunod adlaw, nakit-an ni Jesus si Filipe, nga gikan sa Betsaida, ang mao gihapong siyudad nga maoy gigikanan ni Andres ug Pedro. Iyang gidapit siya: “Sumunod ka kanako.”

Unya nakit-an ni Filipe si Natanael, nga ginganlag usab ug Bartolome, ug miingon: “Gikahibalag namo ang gihisgotan ni Moises diha sa Kasugoan, ug gisulat usab sa mga Propeta, si Jesus nga Nazaretnon, nga anak ni Jose.” Nagduhaduha si Natanael. “Duna ba goy maayo gikan sa Nazaret?” siya nangutana.

“Ngari ug tan-awa,” mitubag si Filipe. Sa dihang nagkaduol na sila kang Jesus, si Jesus miingon mahitungod kang Natanael: “Tan-awa, aniay usa ka tinuod gayod nga Israelinhon, kang kinsa wala ang pagkalimbongan.”

“Naunsa ba nga nakaila ka man diay kanako?” nangutana si Natanael.

“Sa wala ka pa tawga ni Filipe, samtang nagpasilong ikaw diha sa kahoyng igira, nakita ko ikaw,” si Jesus mitubag.

Si Natanael nahibulong. “Rabbi [nga sa ato pa, Magtutudlo], ikaw mao ang Anak sa Diyos, ikaw mao ang Hari sa Israel,” siya miingon.

“Mituo ba ikaw tungod lang sa akong pag-ingon kanimo nga nakita ko ikaw nga nagpasilong diha sa kahoyng igira?” si Jesus nangutana. “Makakita ka ug labi pa ka dagkong mga butang kay niini.” Unya siya misaad: “Sa pagkatinuod magaingon ako kaninyo, Makita ra ninyo ang langit nga maabli ug ang mga manulonda sa Diyos nga magakayab ug magakunsad sa ibabaw sa Anak sa tawo.”

Wala magdugay tapos niini, si Jesus, uban sa iyang bag-ong nabatonang mga tinun-an, mibiya sa Walog sa Jordan ug mipanaw ngadto sa Galilea. Juan 1:29-51.

▪ Kinsa ang unang mga tinun-an ni Jesus?

▪ Sa unsang paagi si Pedro, ug tingali si Santiago, gipailaila ngadto kang Jesus?

▪ Unsay nakapatuo kang Natanael nga si Jesus mao ang Anak sa Diyos?