Kapitulo 98

Ang mga Tinun-an Naglantugi Samtang Nagsingabot ang Kamatayon ni Jesus

SI Jesus ug ang iyang mga tinun-an duol na sa Subang Jordan, nga ilang gitabok gikan sa distrito sa Perea sa pagpaingon sa Judea. Daghan pa ang kauban nila sa pagpanaw alang sa Paskuwa sa 33 K.P., nga usa na lang ka semana o kapin sa gilay-on.

Nag-una si Jesus sa paglakaw kay sa mga tinun-an, ug nahibulong sila sa iyang maisogong determinasyon. Hinumdomi nga sa pila ka semanang milabay sa dihang namatay si Lasaro ug si Jesus taliadto sa Judea gikan sa Perea, si Tomas midasig sa uban: “Mangadto usab kita, aron kita mamatay uban kaniya.” Hinumdomi usab nga tapos sa pagbanhaw ni Jesus kang Lasaro, ang Sanhedrin mihimog mga plano sa pagpatay kang Jesus. Dili katingad-ang giabot ug kahadlok ang mga tinun-an kay sila niadto talisulod na usab sa Judea.

Sa pagpaandam nila alang sa kon unsay naa sa unahan, gidala ni Jesus ang 12 nga silasila ra ug giingnan sila: “Ania kita, nga nagatungas paingon sa Jerusalem, ug ang Anak sa tawo igatugyan ngadto sa pangulong mga saserdote ug sa mga eskriba, ug pagahukman nila siya sa kamatayon ug igatugyan siya ngadto sa mga tawo sa mga nasod, ug pagabugalbugalan nila siya ug pagalud-an siya ug pagahampakon ug pagapatyon siya, apan sa tulo ka adlaw sa ulahi siya pagabanhawon.”

Kini ang ikatulong panahon sa dili pa dugayng mga bulan nga gisultihan ni Jesus ang iyang mga tinun-an bahin sa iyang kamatayon ug pagkabanhaw. Ug bisan pag sila namati kaniya, wala sila makasabot. Kini mahimong tungod kay sila nagtuo nga ipasig-uli dinhi sa yuta ang gingharian sa Israel, ug sila nagapanan-aw nga makapahimulos sa himaya ug kadungganan diha sa usa ka yutan-ong gingharian uban ni Kristo.

Apil sa mga magpapanaw paingon sa Paskuwa mao si Salome, ang inahan sa mga apostol nga si Santiago ug si Juan. Gitawag ni Jesus kining mga tawhana “Mga Anak sa Dalugdog,” pihong tungod sa ilang isog nga mga kinaiya. Sa dugaydugay nang panahon gihambin niining duha ang ambisyon nga mainila diha sa Gingharian ni Kristo, ug gipahibalo nila ang ilang mga tingusbawan ngadto sa ilang inahan. Karon giduol niya si Jesus alang kanila, nga miyukbo sa iyang atubangan, ug nangayog usa ka pabor.

“Unsa may imong gusto?” nangutana si Jesus.

Siya mitubag: “Ihatag ang pulong nga kining akong duha ka anak makalingkod unta, ang usa sa imong tuo nga kamot ug ang usa sa imong wala, diha sa imong gingharian.”

Sa pagkaamgo sa tinubdan sa hangyo, si Jesus miingon ngadto kang Santiago ug Juan: “Kamo wala mahibalo sa inyong gipangayo. Makainom ba kamo sa kopa nga hapit ko na nga pagaimnan?”

“Makainom kami,” sila mitubag. Bisan pag bag-o pa silang giingnan ni Jesus nga giatubang niya ang makalilisang nga paglutos ug sa kataposan ang kamatayon, lagmit sila wala makasabot nga kini mao ang iyang gipasabot sa “kopa” nga hapit na niyang pagaimnan.

Bisan pa niana, giingnan sila ni Jesus: “Kamo sa pagkamatuod magainom sa akong kopa, apan kining pagpalingkod sa akong tuo nga kamot ug sa akong wala dili ako ang pagtugot, kondili iya niadtong gikatagan-an niini sa akong Amahan.”

Sa wala madugay ang ubang napulo ka apostol nahibalo sa gipangayo ni Santiago ug ni Juan, ug sila nangasuko. Tingali si Santiago ug si Juan inila diha sa unaunang panaglalis taliwala sa mga apostol kon kinsa ang labing dako. Ang ilang hangyo karon nagapadayag nga sila wala magpadapat sa tambag nga gihatag ni Jesus bahin niana. Ikasubo, ang ilang ambisyong mainila kusog pa kaayo.

Busa aron husayon ang maong kinaulahiang panaglalis ug ang daotang buot nga namugna niana, gipatawag ni Jesus ang 12. Sa pagtambag kanila nga mahigugmaon, siya miingon: “Kamo nasayod nga ang mga punoan sa mga nasod nagaharihari kanila ug ang mga kadagkoan nagabuot kanila. Dili kini mahitabo kaninyo; apan si bisan kinsa nga buot mahimong dako sa inyong taliwala kinahanglang mahimong inyong alagad, ug si bisan kinsa nga mahimong una sa inyong taliwala kinahanglang mahimong inyong ulipon.”

Gihatag ni Jesus ang panig-ingnan nga angay nilang sundogon, sumala sa iyang gipatin-aw: “Maingon nga ang Anak sa tawo mianhi, dili aron pagaalagaron, kondili aron sa pag-alagad ug sa paghatag sa iyang kalag ingon nga lukat ilis sa daghan.” Si Jesus wala lamang mag-alagad alang sa uban kondili nagbuhat niana nga nagpakamatay pa alang sa katawhan! Gikinahanglan sa mga tinun-an ang mao mismong samag-Kristo nga kinaiya sa pagtinguha sa pag-alagad inay nga alagaron ug mahimong ubos inay nga mahimong inila. Mateo 20:17-28; Marcos 3:17; 9:33-37; 10:32-45; Lucas 18:31-34; Juan 11:16.

▪ Nganong ang mga tinun-an giabot ug kahadlok?

▪ Giunsa ni Jesus sa pag-andam ang iyang mga tinun-an alang sa kon unsay naa sa unahan?

▪ Unsa ang gipangayo kang Jesus, ug unsay gibati sa ubang mga apostol?

▪ Giunsa ni Jesus paghusay ang suliran taliwala sa iyang mga apostol?