Kapitulo 55

Daghang mga Disipulo Mihunong sa Pagsunod Kang Jesus

NANUDLO si Jesus diha sa sinagoga sa Capernaum mahitungod sa iyang bahin ingong tinuod nga tinapay gikan sa langit. Dayag nga ang iyang pakigpulong maoy sumpay sa paghisgot nga gisugdan uban sa tawo dihang ilang nakit-an siya sa ilang pagbalik gikan sa sidlakang bahin sa Dagat sa Galilea, diin didto nakakaon sila sa milagrosong pagkataganang mga tinapay ug mga isda.

Si Jesus mipadayon sa iyang pagpahayag, nga nagaingon: “Ang tinapay nga akong igahatag alang sa kinabuhi sa kalibotan mao ang akong unod.” Duha pa lang ka tuig nga milabay, sa tingpamulak sa 30 K.P., gisultihan ni Jesus si Nicodemo nga gihigugma gayod sa Diyos ang kalibotan nga tungod niana gihatag niya ang iyang Anak ingong Manluluwas. Busa, gipakita karon ni Jesus nga ang si bisan kinsa sa kalibotan sa katawhan nga magakaon sa iyang unod sa simbolikal nga paagi, pinaagi sa pagtuo sa kinabuhi diha sa halad nga iyang pagahimoon, mahimong makadawat ug kinabuhing dayon.

Apan, ang mga tawo, napandol sa mga pulong ni Jesus. “Unsaon man niining tawhana sa paghatag kanato sa iyang unod aron atong kan-on?” sila nangutana. Buot ni Jesus nga makasabot ang iyang mga mamiminaw nga ang pagkaon sa iyang unod himoon sa mahulagwayong paagi. Busa, sa pagpasiugda niini, mipahayag pa siyag usa ka butang nga mas kuwestiyonable kon sabton sa literal nga paagi.

“Gawas kon mokaon kamo sa unod sa Anak sa tawo ug moinom sa iyang dugo,” miingon si Jesus, “wala kamoy kinabuhi diha kaninyo. Siya nga mokaon sa akong unod ug moinom sa akong dugo may kinabuhi nga dayon, ug pagabanhawon ko siya sa kataposang adlaw; kay ang akong unod tinuod nga kalan-on, ug ang akong dugo tinuod nga ilimnon. Siya nga mokaon sa akong unod ug moinom sa akong dugo mahiusa uban kanako, ug ako mahiusa uban kaniya.”

Matuod, ang pagtulon-an ni Jesus makaluod paminawon kon nagsugyot pa siya ug kanibalismo. Apan, siyempre, wala magpasiugda si Jesus ug literal nga pagkaon sa unod ug sa pag-inom sa dugo. Gipasiugda lamang niya nga ang tanan nga makadawat sa kinabuhing dayon angay motuo sa halad nga iyang pagahimoon dihang iyang itanyag ang iyang hingpit tawhanong lawas ug ibubo ang iyang kinabuhi nga may dugo. Bisan pa, daghan sa iyang mga disipulo wala mosulay sa pagsabot sa iyang pagtulon-an ug busa mitutol: “Makalilisang kining sultiha; kinsa may makapatalinghog niini?”

Nahibalo nga nagbagolbul ang kadaghanan sa iyang mga disipulo, si Jesus miingon: “Napandol ba kamo niini? Nan, maunsa man kaha diay kon inyo nang nakita ang Anak sa tawo nga magasaka ngadto sa dapit diin didto siya kaniadto? . . . Ang mga pulong nga akong gisulti kaninyo kini espiritu ug kinabuhi. Apan aduna kaninyoy wala magapanuo.”

Si Jesus mipadayon: “Mao man gani nga giingnan ko kamo, Walay si bisan kinsa nga makaanhi kanako gawas kon itugot kini kaniya sa Amahan.” Tungod niana, daghan sa iyang mga disipulo mibulag ug wala na mosunod kaniya. Ug busa mibali si Jesus sa iyang 12 ka apostoles ug nangutana: “Buot ba usab kamong mobiya kanako?”

Si Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing dayon; ug kami nagatuo ug among nasinati nga ikaw mao ang Usa nga Balaan sa Diyos.” Pagkatahom nga pulong sa pagkamaunongon, bisan pa nga wala gayod bug-os hisabti ni Pedro ug sa ubang mga apostoles ang pagtulon-an ni Jesus mahitungod niining butanga!

Nalipay sa tubag ni Pedro, si Jesus miingon: “Dili ba gipili ko man kamo nga napulog-duha? Apan ang usa kaninyo mabutangbutangon.” Naghisgot siya bahin kang Judas Iscariote. Tingali ning yugtoa nakamatikod na ni Jesus nga si Judas “nagsugod,” o anaa sa unang tikang, sa daotang dalan.

Napabalo ni Jesus ang mga tawo sa pagdumili sa ilang mga pagsulay sa paghimo kaniyang hari, ug sila tingali nangatarongan, ‘Sa unsang paaging Mesiyas kini siya kon dili niya dawaton ang angay nga posisyon sa Mesiyas?’ Kini, usab, maoy bag-ong butang diha sa hunahuna sa mga tawo. Juan 6:51-71; 3:16.

▪ Alang kang kinsa ihatag ni Jesus ang iyang unod, ug sa unsang paagi ilang ‘pagakan-on ang iyang unod’?

▪ Unsang dugang mga pulong ni Jesus ang nakapalisang sa mga tawo, apan unsay iyang gipasiugda?

▪ Dihang daghan ang mihunong sa pagsunod kang Jesus, unsay tubag ni Pedro?