Kapitulo 36

Dakong Pagtuo sa Usa ka Opisyal sa Kasundalohan

SA GIPAHAYAG ni Jesus ang iyang Wali sa Bukid, siya nakaabot na sa katungang bahin sa iyang publikong ministeryo. Kini nagkahulogang siya may usa ka tuig ug siyam ka bulan na lamang o labaw pa nga nabilin sa pagtapos sa iyang buluhaton sa yuta.

Si Jesus karon misulod sa siyudad sa Capernaum, usa ka matang sa sukaranan sa iyang mga kalihokan. Dinhi ang mga tigulang sa mga Hudiyo miduol kaniya nga may hangyo. Sila gisugo sa usa ka opisyal sa Romanhong kasundalohan nga usa ka Hentil, usa ka tawo nga lahi ug rasa kay sa mga Hudiyo.

Ang minahal nga sulugoon sa opisyal sa kasundalohan himalatyon tungod sa usa ka grabeng sakit, ug buot niyang ang iyang sulugoon ayohon ni Jesus. Ang mga Hudiyo sinserong nangamuyo alang sa opisyal: “Takos siya sa imong paghatag niini kaniya,” matud nila, “kay iyang gihigugma ang atong nasod ug siya mismo ang mitukod sa sinagoga alang kanamo.”

Nga walay paglangan, si Jesus milakaw uban sa mga tawo. Apan, sa dihang sila nagkaduol na, nagpasugo ang opisyal sa kasundalohan sa mga higala sa pag-ingon: “Senyor, ayaw langana ang imong kaugalingon, kay ako dili takos aron ikaw mosulod sa akong balay. Tungod niana ako wala mag-isip nga ako mismo takos nga moduol kanimo.”

Mapaubsanon kaayong ekspresyon sa usa ka opisyal nga naanad sa pagsugo sa uban! Ug siya lagmit naghunahuna usab kang Jesus, kay nakaamgo nga ang batasan nagadili sa usa ka Hudiyo sa pagpakiglabot sa sosyal nga paagi sa mga dili-Hudiyo. Bisan si Pedro miingon: “Ikaw nahibalo nga dili sumala sa kasugoan nga ang usa ka Hudiyo moanib o moduol sa usa ka tawo sa laing rasa.”

Tingali tungod kay dili buot nga si Jesus makaagom sa mga sangpotanan sa paglapas sa maong batasan, gipahangyo siya sa opisyal sa iyang mga higala: “Isulti ang pulong, ug itugot nga mamaayo ang akong sulugoon. Kay ako usab usa ka tawong may pagbulot-an, nga may mga sundalo ilalom kanako, ug ako magaingon sa usa, ‘Umadto ka!’ ug siya moadto, ug sa lain, ‘Umari ka!’ ug siya moanhi, ug sa akong ulipon, ‘Buhata kini!’ ug iyang buhaton kini.”

Aw, sa nadungog kini ni Jesus, siya nahibulong. “Sultihan ko kamo sa tinuod,” matud niya, “wala ako makakaplag ug labihan ka dakong pagtuo sama niini sa Israel.” Human sa pag-ayo sa sulugoon sa opisyal, gigamit ni Jesus ang okasyon sa pag-asoy sa unsang paagi ang mga dili-Hudiyo nga may pagtuo pagahatagan sa mga panalangin nga gisalikway sa dili-matinuohong mga Hudiyo.

“Daghan,” matud ni Jesus, “gikan sa silangang mga bahin ug kasadpanhong mga bahin ang moabot ug mohirag sa lamesa kauban ni Abraham ug ni Isaac ug ni Jacob sa gingharian sa mga langit; samtang ang mga anak sa gingharian isalibay ngadto sa kangitngitan sa gawas. Didto unya sila magabakho ug magapangagot sa ilang mga ngipon.”

“Ang mga anak sa gingharian . . . nga isalibay ngadto sa kangitngitan sa gawas” maoy kinaiyanhong mga Hudiyo nga wala modawat sa higayon nga gitanyag una kanila sa pagkahimong mga magmamando uban kang Kristo. Si Abraham, Isaac, ug Jacob nagahawas sa kahikayan sa Gingharian sa Diyos. Sa ingon si Jesus miasoy sa unsang paagi ang mga Hentil pagadawaton sa paghirag sa langitnong lamesa, ingnon ta, “sa gingharian sa mga langit.” Lucas 7:1-10; Mateo 8:5-13; Buhat 10:28.

▪ Nganong ang mga Hudiyo nangamuyo alang sa usa ka Hentil nga opisyal sa kasundalohan?

▪ Nganong ang opisyal wala modapit kang Jesus sa pagsulod sa iyang balay?

▪ Unsay gipasabot ni Jesus sa panapos niyang mga pulong?