Kapitulo 101

Diha sa Bitaniya, sa Balay ni Simon

SA DIHANG migikan si Jesus sa Jerico, siya mipaingon sa Bitaniya. Ang biyahe mokabat ug hapit usa ka adlaw, sanglit tungason kini diha sa malisod nga lugar nga mga 19 ka kilometros. Ang Jerico kapin kun kulang maoy 250 ka metros ubos sa lebel sa dagat, ug ang Bitaniya maoy mga 760 ka metros sa ibabaw sa lebel sa dagat. Ang Bitaniya, tingali imong mahinumdoman, mao ang lungsod ni Lasaro ug sa iyang mga igsoong babaye. Kining gamay nga balangay maoy 3 ka kilometros ang kalay-on gikan sa Jerusalem, nga nahimutang sa sidlakang bakilid sa Bukid sa mga Olibo.

Daghan na ang miabot sa Jerusalem alang sa pagsaulog sa Paskuwa. Sila sayo nga miabot aron sa paghinlo sa ilang kaugalingon sa seremonyal nga paagi. Tingali sila nakahikap ug patayng lawas o nakahimog butang nga nagpahugaw kanila. Busa ilang gisunod ang mga paagi sa paghinlo sa ilang kaugalingon aron madawat ang ilang pagsaulog sa Paskuwa. Samtang ang mga tawo nga sayong nangabot nagtigom sa templo, daghan ang naghunahuna kon moabot ba kaha si Jesus alang sa Paskuwa.

Ang Jerusalem maoy sentro nga lugar sa panaglantugi bahin kang Jesus. Nahibaloan sa tanan nga siya gustong dakpon sa relihiyosong mga pangulo aron siya ipapatay. Sa pagkamatuod, sila misugo nga kon dunay nahibalo kon hain siya, kinahanglan ilang ireport kini ngadto kanila. Tulo ka higayon sa mga bulan nga dili pa dugay—sa Piyesta sa mga Tabernakulo, sa Piyesta sa Dedikasyon, ug human nga iyang gibanhaw si Lasaro—kining maong mga pangulo misulay sa pagpatay kaniya. Busa, ang mga tawo nahibulong, iladlad ba ni Jesus ang iyang kaugalingon sa makausa pa? “Unsa may inyong hunahuna?” sila nangutana sa usag usa.

Kasamtangan, si Jesus miabot sa Bitaniya unom adlaw sa wala pa ang Paskuwa, nga nahulog sa adlaw sa Nisan 14 sumala sa kalendaryo sa mga Hudiyo. Miabot si Jesus sa Bitaniya sa Biyernes sa gabii, nga maoy sinugdanan sa Nisan 8. Piho nga wala siya mobiyahe paingon sa Bitaniya sa adlawng Sabado tungod kay ang pagbiyahe sa Igpapahulay—gikan sa pagsalop sa adlawng Biyernes ngadto sa pagsalop sa adlawng Sabado—gidili sa Hudiyonhong balaod. Tingali si Jesus mipauli sa balay ni Lasaro, sama sa iyang gihimo sa miagi, ug didto nagpalabay sa Biyernes sa gabii.

Apan, gidapit sa laing molupyo sa Bitaniya si Jesus ug ang iyang mga kauban alang sa usa ka panihapon sa Sabado sa gabii. Ang tawo mao si Simon, nga niadto sanlahon, kinsa sayosayo tingali giayo ni Jesus. Sanglit kay kugihan ug kinaiya, gisilbihan ni Marta ang mga bisita. Apan, sa nabatasan, si Maria matinagdanon kang Jesus, karon diha sa usa ka paagi nga nakapukaw ug panaglantugi.

Gibuksan ni Maria ang alabastro o gamayng botelya, nga nasudlan ug tunga sa kilo nga pahumot, “lunsayng nardo.” Mahal kaayo kini. Sa pagkamatuod, ang kantidad niini halos katumbas sa usa ka tuig nga suweldo! Sa dihang gibubo ni Maria ang pahumot diha sa ulo ni Jesus ug sa iyang tiil ug gipahiran ang iyang tiil sa iyang buhok, ang balay nalukop sa kaamyon sa pahumot.

Ang mga tinun-an nasuko ug nangutana: “Nganong giusikan kini?” Unya si Judas Iscariote miingon: “Nganong kining pahumot wala man hinoon ibaligyag tulo ka gatos ka denario ug ang halin ihatag ngadto sa mga kabos?” Apan si Judas sa pagkatinuod wala gayoy kahangawa sa kabos, kay siya nagapangawat man gikan sa kahon sa kuwarta nga gitipigan sa mga tinun-an.

Gidepensahan ni Jesus si Maria. “Pasagdi ninyo siya,” siya misugo. “Nganong samokon pa man ninyo siya? Usa ka maayong buhat kining iyang gihimo kanako. Kay ang kabos kanunayng anaa kaninyo, ug sa bisan unsang takna nga gusto ninyo, kamo kanunay makabuhat kanila ug maayo, apan ako dili kanunayng anaa kaninyo. Gihimo niya ang maarangan niya; iyang gihaplasan ug pahumot ang akong lawas aron sa pag-andam kanako alang sa adlaw sa paglubong. Sa pagkatinuod magaingon ako kaninyo, Nga bisan diin ang maayong balita igawali sa tibuok kalibotan, ang gibuhat niining babayehana pagahisgotan usab ingon nga handomanan alang kaniya.”

Si Jesus karon nakapalabay na ug kapin sa 24 oras sa Bitaniya, ug mikaylap ang balita nga siya atua didto. Busa, daghan ang miadto sa balay ni Simon sa pagtan-aw kang Jesus, ug sila miadto usab aron sa pagtan-aw kang Lasaro, nga atua usab didto. Busa ang pangulo sa mga saserdote nagsabot sa pagpatay dili lamang kang Jesus kondili kang Lasaro usab. Tungod kay daghan na ang mituo kang Jesus tungod sa pagkakita nga buhi ang tawo nga iyang gibanhaw gikan sa patay! Oo, pagkadaotan niining relihiyosong mga pangulo! Juan 11:55–12:11; Mateo 26:6-13; Marcos 14:3-9; Buhat 1:12.

▪ Unsa ang gilalisan diha sa templo sa Jerusalem, ug ngano?

▪ Nganong si Jesus miabot sa Bitaniya sa adlawng Biyernes inay sa Sabado?

▪ Sa dihang miabot si Jesus sa Bitaniya, diin kaha siya nagpalabay sa Igpapahulay?

▪ Unsay gihimo ni Maria nga nakapukaw ug panaglantugi, ug sa unsang paagi gidepensahan siya ni Jesus?

▪ Unsay nagpakita nga grabe kaayo ang pagkadaotan sa pangulo sa mga saserdote?